Boiteko ba ho Ntša Vatican Machabeng a Kopaneng
MOKHATLO oa litaba oo ntlo-khōlō ea oona e leng Roma o bitsoang Inter Press Service (IPS) o ile oa tlaleha hore “selekane sa machaba sa mekhatlo eo e seng ea ’muso (non-governmental organizations [li-NGO]) e fetang 70 se qalile letšolo la lefatše lohle la ho ntša Vatican Machabeng a Kopaneng.” Hona joale, Vatican ke moemeli ea sa nkeng karolo kapa setho se sa emeleng naha mokhatlong oa Machaba a Kopaneng. Esale Vatican e fumana boemo boo ho tloha ka 1964.
Ke hobane’ng ha sehlopha see sa li-NGO, seo ho elella mafelong a April selemong se fetileng se neng se eketsehile hore e be mekhatlo e 100 lefatšeng lohle, se hana boemo ba Vatican Machabeng a Kopaneng? Hobane li-NGO li tseka hore Vatican hase naha ea bopolotiki empa ke matla a bolumeli. Frances Kissling, mopresidente oa Mak’hatholike a Ikhethelang ka Bolokolohi, o ile a bolella IPS hore selekane sena ha se khahlanong le tokelo ea Vatican ea ho ntša maikutlo a eona, empa “se belaella tokelo ea hore naha ena eo e seng ’muso e be boemong bo tšoanang le ba mebuso.”
Anika Rahman, mookameli oa International Programmes at the Centre for Reproductive Law and Policy, oa lumela. IPS e ile ea mo qotsa a bolela hore “haeba Machaba a Kopaneng a nka Motse oa Mopapa e le naha e nang le litokelo tsa ho ba moemeli ea sa nkeng karolo, ka lebaka la matla a oona a bolumeli, mokhatlo ona oa lefatše o fa malumeli a mang matla a hore le ’ona a batle seo.” O ile a phaella: “Ho tiisa hore Machaba a Kopaneng ha a buelle bolumeli bo itseng, mekhatlo ea bolumeli e kang Kereke ea Roma e K’hatholike ha ea lokela ho lumelloa hore e kopanele sebokeng sena e le setho se sa emeleng naha.”
Ho thoe’ng ka tseko ea hore Vatican ke naha kahoo e lokeloa ke boemo boo e leng ho bona hona joale? Ms. Kissling ha ho ne ho buisanoa le eena o ile a re: “Ho bolela hore [Motse oa Mopapa] ke ’muso ha ho utloahale ebile ke leshano. Ha re re [Vatican] ke naha re sebelisa tlhaloso ea lekholong la bo15 la lilemo ea hore na naha ke eng le hore Motse oa Mopapa ha e le hantle ke tsamaiso ea puso ea bolumeli.” O ile a phaella ka ho bolela hore “Vatican” le “Motse oa Mopapa” ka bobeli ke “mantsoe a bolelang ntho e le ’ngoe bakeng sa Kereke ea Roma e K’hatholike.”
Boholo ba lehloeo la li-NGO ka boemo boo Vatican e nang le bona hona joale Machabeng a Kopaneng bo bakoa ke maikutlo a Vatican litabeng tse amanang le palo ea baahi. Ka mohlala, Vatican e sebelisitse liboka tsa Machaba a Kopaneng tse kang Seboka sa Machaba sa Palo ea Baahi le Tsoelo-pele ea Bona sa 1994 se neng se tšoaretsoe Cairo, le Seboka sa Basali sa 1995, se neng se tšoaretsoe Beijing, ho ntša maikutlo a eona a matla khahlanong le thero ea malapa. IPS e re: “Kaha Machaba a Kopaneng a etsa boholo ba liqeto tsa ’ona motheong oa hore litho lia lumellana, maikutlo a hanyetsang joaloka a Vatican a sentse litherisano litabeng tse amang palo ea baahi, lithibela-kemolo, litokelo tsa basali le tlhokomelo ea bophelo bo botle mabapi le ho hlahisa bana.”
Ho latela Ms. Kissling, “karolo e loketseng Vatican ke ho ba NGO—joaloka li-NGO tse ling tse emelang Mamosleme, Mahindu, Mabuddha, Mabahai le mekhatlo e meng ea bolumeli.” Selekane sena se batla hore Mongoli-Kakaretso oa Machaba a Kopaneng, Kofi Annan hammoho le Seboka se Akaretsang sa Machaba a Kopaneng, ba hlahlobe ka molao boemo ba Vatican mokhatlong ona o moholo ka ho fetisisa lefatšeng oa lipolotiki.
[Litšoantšo tse leqepheng la 31]
Moemeli oa Vatican o bua Machabeng a Kopaneng
[Litlhaloso Tsa Moo Litšoantšo li Nkiloeng Teng]
UN/DPI Photo by Sophie Paris
UN photo 143-936/J. Isaac