Ea Pele Lilemong Tse Lekholo Tse Fetileng

Tumello ea molao ea Watch Tower Bible and Tract Society e ile ea ngoloa fatše ka molao Pennsylvania, U.S.A. ka la 15 December, 1884.a Ke moo ntlo-khōlō ea mokhatlo ona e thehiloeng teng. Hamorao ka la 23 April, 1900, ho ile ha fumanoa setša bakeng sa ofisi ea pele ea lekala London, Engelane. Se ne se le 131 Gipsy Lane, Forest Gate, London Bochabela, joalokaha ho bontšitsoe mona.

HA LEKALA leo la pele le ne le thehoa lilemong tse lekholo tse fetileng, Engelane e ne e e-na le kakaretso ea Liithuti tsa Bibele tse 138, kamoo Lipaki tsa Jehova li neng li bitsoa kateng mehleng eo. Lilemo tse peli hamorao, ka 1902, lekala la bobeli le ile la buloa Jeremane; ’me ka 1904, ho ne ho thehiloe makala a eketsehileng Australia le Switzerland.

Ka 1918, selemo seo Ntoa ea I ea Lefatše e letseng ka sona, ho ne ho e-na le Liithuti tsa Bibele tse 3 868 tse tlalehang mosebetsi oa boboleli lefatšeng ka bophara. Selemo se latelang, ho ile ha thehoa lekala la bohlano la Mokhatlo oa Watch Tower—lekhetlong lena, Canada. Joale ha molaetsa oa ho bolela ka Bibele o ntse o tiea, ho ile ha buloa makala a macha linaheng tse ngata tse fapaneng, ha buloa a tšeletseng ka 1921 feela.

Ka 1931, ha Liithuti tsa Bibele li ne li amohela lebitso le thehiloeng Bibeleng la Lipaki tsa Jehova, ho ne ho e-na le liofisi tsa makala tse 40 lefatšeng ka bophara. (Esaia 43:10-12) Lilemong tse tharo tse latelang, palo eo e ile ea nyolohela ho tse 49! Ka 1938 ho ne ho e-na le tlhōrō ea Lipaki tse 59 047 tse bolelang linaheng tse 52, empa ka nako eo khanyetso e matla e ne e qalile ho sokela mosebetsi oa tsona oa Bokreste libakeng tse ngata.

Ha puso ea lipolotiki ea bompoli le ea khatello e namela linaheng tse ngata ’me Ntoa ea II ea Lefatše e qhoma ka September 1939, liofisi tsa makala tsa Lipaki tsa Jehova li ile tsa koaloa linaheng tse ngata. Ka 1942, e ne e le tse 25 feela tse neng li ntse li sebetsa. Leha ho le joalo, ho makatsang ke hore nakong eona eo ea ntoa e senyang ka ho fetisisa historing ea motho, Lipaki tsa Jehova li ile tsa lula li le mafolofolo lefatšeng ka bophara ’me tsa e-ba le keketseho e khōlōhali historing ea kajeno.

Ha Ntoa ea II ea Lefatše e lala ka 1945—’me linaha tse ngata li sala e le masupi—liofisi tsa makala tsa Lipaki li ile tsa boela tsa buloa ’me ha thehoa tse ncha. Ka 1946, ho ne ho e-na le tse 57 lefatšeng ka bophara. Joale ho ne ho e-na le Lipaki tse kae tse mafolofolo nakong eo? E ne e le tlhōrō ea tse 176 456! Eo ke palo e batlang e imenne hararo ho tse neng li le teng ka 1938!

Kamoo Makala a Pele a Ileng a Atoloha Kateng

Ka 1911, lekala la pele la Mokhatlo oa Watch Tower le London, Engelane, le ile la fallela 34 Craven Terrace, moo ho neng ho e-na le liofisi tse eketsehileng le sebaka sa bolulo. Joale, ka la 26 April, 1959, ho ile ha neheloa mehaho e mecha ea lekala Mill Hill, London. Hamorao ho ile ha atolosoa libaka tsa bolulo, ’me qetellong (ka 1993), ho ile ha neheloa setsi sa khatiso se boholo ba lisekoere-mithara tse 18 500 le liofisi tsa tsamaiso haufi le moo. Mona ho hatisoa Molula-Qhooa le Tsoha! tse fetang limilione tse 90 ka lipuo tse 23 selemo le selemo.

Katoloso ea lekala la bobeli la Mokhatlo e ile ea e-ba e tsotehang le ho feta. Ka 1923, lekala la Jeremane le ile la fallisetsoa Magdeburg. Molula-Qhooa oa July 15, 1923, ke oa pele o ileng oa hatisoa moo ka mochine oa khatiso oa Mokhatlo. Lilemo tse ’maloa tse latelang, ho ile ha rekoa sebaka se haufi le moo, ha eketsoa mehaho ’me ha batloa thepa ea ho kopanya libuka le mechine e eketsehileng ea khatiso. Ka 1933, Manazi a ile a nka lekala leo ka mahahapa, Lipaki tsa thibeloa ’me hamorao tse likete tse peli tsa tsona tsa isoa likampong tsa mahloriso.

Ha Ntoa ea II ea Lefatše e lala ka 1945, mehaho e Magdeburg, eo ka nako eo e neng e le karolo ea Jeremane Bochabela, e ile ea khutlisoa ’me lekala la thehoa hape. Empa ka la 30 August, 1950, mapolesa a Bokomonisi a ile a hlasela mehaho eo ’me a tšoara basebetsi, ’me ho ile ha thibeloa Lipaki Jeremane Bochabela. Ho sa le joalo, ho ne ho ile ha rekoa setša se seng Wiesbaden, Jeremane Bophirimela ka 1947. Ka lilemo tse latelang tse mashome, mehaho ea lekala e ile ea atolosoa ka makhetlo e le ho tsamaisana le tlhoko ea lingoliloeng.

Kaha sebaka seo ho ka atolosetsoang ho sona Wiesbaden se ne se se se felile, ho ile ha rekoa sebaka sa lihekthere tse 30 haufi le Selters ka 1979. Ka mor’a lilemo tse ka bang hlano tsa kaho, ho ile ha neheloa lekala le leholo ka la 21 April, 1984. Ho tloha nakong eo, le ’nile la atolosoa e le hore le lekane basebetsi ba lona ba fetang sekete. Khoeli ka ’ngoe, mechine ea khatiso ea offset e Selters e hatisa limakasine tse fetang limilione tse 16 ka lipuo tse fetang 30; ’me selemong se tsoa feta, sebaka seo ho kopanngoang libuka ho sona se hlahisitse libuka tse fetang limilione tse 18, ho kopanyelletsa le Libibele.

Makala a Mang a Maholo a Khatiso

Qalong ho ile ha thehoa lekala Kobe, Japane, ka 1927, empa mahloriso a matla ho Lipaki nakong ea Ntoa ea II ea Lefatše a ile a fokotsa mosebetsi oa tsona. Leha ho le joalo, nakoana ka mor’a ntoa, ho ile ha boela ha thehoa lekala Tokyo. Ha ho se ho se sebaka seo ho ka atolosetsoang ho sona moo, ho ile ha hahuoa lekala le lecha Numazu. Le ile la neheloa ka 1973. Ha ka potlako mehaho ena e e-ba menyenyane, ho ile ha hahoa e meholo e mecha Ebina, ’me eona e ile ea neheloa ka 1982. Haufinyane tjena ho sa tsoa qetoa mehaho e atolositsoeng setšeng sena, moo ho ka lulang basebetsi ba 900. Ka puo ea Sejapane feela, ho ile ha hatisoa Molula-Qhooa le Tsoha! tse fetang limilione tse 94 ka 1999, hammoho le libuka tse limilione.

Ho ’nile ha atolosoa mehaho ea makala ka ho tšoanang linaheng tse ngata. Ho ile ha thehoa lekala Mexico City, Mexico, ka 1929. Joale ha Lipaki li se li le 60 000, ho ile ha hahoa mehaho e mecha ka ntle ho motse oo. E ile ea neheloa ka 1974, ’me katoloso ea eona ea qetoa ka 1985 le ka 1989. Hona joale mehaho e mecha e meholo ea khatiso le libaka tsa bolulo tse eketsehileng li se li le haufi le ho fela. Ka hona, haufinyane lekala la Mexico le tla be le khona ho fana ka bolulo bakeng sa basebetsi ba 1 200. Lekala lena le se ntse le fana ka limakasine le libuka bakeng sa Lipaki tse fetang 500 000 le batho ba bang ba limilione ba Mexico hammoho le batho ba lulang linaheng tse haufi.

Ka 1923, ofisi ea lekala e ile ea thehoa Rio de Janeiro, Brazil, ’me hamorao ha hahoa libaka tse ntle tsa bolulo. Empa kaha São Paulo ke setsi sa khoebo le sa lipalangoang moo Brazil, ka 1968 ho ile ha hahoa lekala le lecha motseng oo. Mahareng a lilemo tsa bo-1970, ho ne ho e-na le Lipaki tse ka bang 100 000 Brazil. Leha ho le joalo, ho ne ho se ho sa khonehe ho atolosa mehaho São Paulo, ka hona, ho ile ha rekoa setša sa lihekthere tse 115 Cesário Lange, lik’hilomithara tse ka bang 150 ho tloha São Paulo. Ka la 21 March, 1981, mehaho ea lekala e ile ea neheloa sebakeng seo se secha. Ka lebaka la katoloso e entsoeng setšeng sena, lekala lena le ka fana ka bolulo ho batho ba ka bang 1 200. Ho hatisoa limakasine le libuka Brazil bakeng sa karolo e khōlō ea Amerika Boroa hammoho le likarolo tse ling tsa lefatše.

Lekala le leng le leholo la khatiso le ile la qetoa mathoasong a bo-1990 haufi le Bogotá, Colombia. Teng ho hatisoa Molula-Qhooa le Tsoha! hore li abuoe Amerika Boroa e ka leboea-bophirimela.

Makala a mang a hatisang limakasine tse limilione selemo le selemo a Afrika Boroa, Argentina, Australia, Canada, Finland, Italy, Korea, Nigeria, Philippines le Spain. Lekala la Italy le boetse le hatisa libuka tse limilione ka lipuo tse ngata, ho kopanyelletsa le Libibele, selemo se seng le se seng. Ntle ho pelaelo, boholo ba likhatiso tsa selemo le selemo, e leng libuka tse fetang limilione tse 40 le limakasine tse fetang limilione tse sekete, li ntse li hatisoa ntlo-khōlō ea Watch Tower Bible and Tract Society e Brooklyn, New York, hammoho le setsing sa eona sa khatiso se ka leboea ho New York.

Ka sebele, hoa babatseha hore ebe liofisi tsa lekala li eketsehile ho tloha ho e le ’ngoe lilemong tse lekholo tse fetileng ho fihlela ho tse 109 kajeno, tse hlokomelang Lipaki tsa Jehova linaheng tse 234. ’Me ke ho tsotehang hakaakang ha ho hopoloa hore li sebetsa ka Bakreste ba baithaopi ba 13 000 ba inehetseng! Ka sebele, mosebetsi oa bona hammoho le oa baithaopi ba 5 500 ba sebetsang ntlo-khōlō ea Mokhatlo e bile oa bohlokoa phethahatsong ea boprofeta ba Jesu Kreste ba hore ‘litaba tsena tse molemo tsa ’Muso oa Molimo li tla boleloa lefatšeng lohle leo ho ahiloeng ho lona pele bofelo bo e-tla.’—Matheu 24:14.

[Mongolo o botlaaseng ba leqephe]

[Setšoantšo se leqepheng la 15]

Tom Hart, eo ho lumeloang hore e bile Seithuti sa Bibele sa pele Engelane

[Litšoantšo tse leqepheng la 16]

Lekala la London 34 Craven Terrace (fotong e ho le letona)

Mehaho e sebelisoang hona joale London