Pono ea Bibele

Lithapelo Tse Utluoang ke Molimo

“Le ’ne le kōpe, ’me le tla fuoa; le ’ne le batle, ’me le tla fumana; le ’ne le kokote, ’me le tla buleloa. Etsoe e mong le e mong ea kōpang oa amohela, ’me e mong le e mong ea batlang oa fumana, ’me e mong le e mong ea kokotang o tla buleloa.”—LUKA 11:9, 10.

KA HO bontša tšepo e feletseng mantsoeng ana a Jesu Kreste a qotsitsoeng ka holimo, Bakreste ba bangata ba retelehela ho Molimo ka thapelo ka mathata le matšoenyeho a bona, ba kholisehile hore oa ba rata le hore oa ba tsotella. Leha ho le joalo, ba bang, ba lula ba tsielehile ha ba ntse ba emetse hore lithapelo tsa bona li arabeloe. Na u nahana hore lithapelo tsa hao ha li na thuso? Na Molimo oa mamela ha u rapela?

Leha ho ka bonahala eka lithapelo tsa rōna ha li arabeloe, hona ha ho bolele hore Molimo ha a li utloe. Bibele ea re tiisetsa: “Mahlo a Jehova a talimile ba lokileng, ’me o sekehela thapeli ea bona tsebe.” (1 Petrose 3:12) Kahoo, Jehova Molimo o utloa lithapelo tsa ba lokileng, ebang li etsoa ka lentsoe le utloahalang kapa li etsetsoa ka pelong. (Jeremia 17:10) Jehova o boetse o hlahloba menahano le maikutlo a susumetsang thapelo e ’ngoe le e ’ngoe, haesita le ao motho ea rapelang a sa a utloisiseng ka botlalo kapa a sa a hlokomeleng.—Baroma 8:26, 27.

Leha ho le joalo, lithapelo li lokela ho finyella litekanyetso tse itseng haeba li tla amoheleha ho Molimo. Ntho ea pele, li lokela ho lebisoa ho Molimo ka ho khethehileng—eseng ho Jesu, ho “mohalaleli,” kapa ho molimo oa setšoantšo. (Exoda 20:4, 5) Lithapelo li boetse li lokela ho etsoa ka lebitso la Mora oa Molimo, Jesu Kreste. (Johanne 14:6) Na see se bolela hore lithapelo tsa rōna li utluoa ke Jesu pele ’me eena a li fetisetse ho Molimo? Che. Ho e-na le hoo, ha re rapela Jehova ka lebitso la Jesu, re itsebahatsa re le barutuoa ba Kreste ebile re lumela hore ke ka sehlabelo sa hae feela re khonang ho atamela ho Molimo.—Baheberu 4:14-16.

Motho ea rapelang o lokela ho bontša tumelo. Moapostola Pauluse o ile a bolela a re: “Kantle ho tumelo ho ke ke ha khoneha ho khahlisa [Molimo], kaha ea atamelang Molimo o lokela ho lumela hore o teng le hore e ba moputsi oa ba mo batlang ka tieo.” (Baheberu 11:6) Motho o tseba joang haeba a e-na le mofuta oo oa tumelo? Mongoli oa Bibele Jakobo oa araba: “Ke tla u bontša tumelo ea ka ka mesebetsi ea ka.” (Jakobo 2:18) E, tumelo e beha litholoana, ’me le tsona ka lehlakoreng le leng, li bontša hore re rata Molimo le hore re leka ho mo khahlisa.

Barapeli ba Molimo ba boetse ba lokela ho ba ba phehellang ha ba rapela. Jesu o ile a hlakisa sena ho Luka 11:9, 10, e qotsitsoeng qalong. Ho feta moo, haeba motho a rapela hanngoe feela ka taba e itseng, na see hase bontše hore o fela a sa tiea ka seo a se batlang?

Seo Molimo a se Tšepisitseng

Ho sa tsotellehe hore na re rapela hangata hakae, re sa ntse re phela har’a “linako tse mahlonoko tseo ho leng thata ho sebetsana le tsona.” (2 Timothea 3:1) Le hoja e le ’nete hore Jesu o itse balateli ba hae ba ne ba tla thaba, o ne a sa bolele hore ba ne ba tla phela ba se na mathata. (Matheu 5:3-11) Leha ho le joalo, o itse, barutuoa ba ne ba ka thaba ho sa tsotellehe ho siama, tlala, lenyora kapa mahloriso.

Thabo eo Jesu a ileng a bua ka eona ha ea itšetleha ka ho phela ka tlas’a maemo a molemo. Ho e-na le moo, ke khotsofalo ea ka hare eo re nang le eona hobane re sebeletsa Molimo. Ka lebaka leo, re ka thaba le haeba re phela ka har’a meferefere.—2 Bakorinthe 12:7-10.

Ho Sebetsana le Mathata a Botho

Joale, na ke ho itšetleha ka seolo se se nang bohloa ho rapela Molimo ka mathata a botho a kang ho fumana molekane oa lenyalo ea tšoanelehang kapa ho sebelisana le lelapa, bophelo bo botle ba ’mele, kapa mathata a mosebetsi? Che, hobane le hoja Molimo a sa tšepise ho fetola maemo a bophelo ba rōna ka mohlolo, o tla re fa bohlale ba ho sebetsana le ’ona ka katleho. Ha a ngola mabapi le liteko, Jakobo o ile a re: “Haeba mang kapa mang oa lōna a haelloa ke bohlale, a ’ne a kōpe Molimo, hobane o fana ka seatla se bulehileng ho bohle a bile a sa nyelise; ’me o tla bo fuoa.” (Jakobo 1:5) Kahoo, Jehova o tla re tataisa a sebelisa moea oa hae o halalelang. Sena se tla re thusa ho utloisisa le ho sebelisa melao-motheo ea Bibele ha re etsa liqeto.

Ke ’nete hore moea oa Molimo ha o re etsetse liqeto. Ho fapana le hoo, ho hlokahala hore motho e mong le e mong a etse boiteko. Ka mohlala, ha re e-na le bothata bo itseng, na re etsa lipatlisiso ka bona le ho fuputsa litšobotsi tse sa tšoaneng tsa boemo boo? Ho etsa joalo ke ho bontša Molimo hore re na le tumelo. (Jakobo 2:18) Na re lekile ka makhetlo-khetlo ho rarolla bothata ba rōna, re sa khaotse ho kōpa tataiso ea Molimo? (Matheu 7:7, 8) Na re hlahlobile ka hloko melao-motheo ea Bibele e sebetsanang le boemo boo? Lentsoe la Molimo le ka re ‘hlomella ka ho feletseng bakeng sa mosebetsi o mong le o mong o molemo.’—2 Timothea 3:16, 17.

Le hoja e le ’nete hore Molimo a ka kenella litabeng tsa rōna le ho tlosa mathata ’ohle a rōna, o re file bolokolohi ba ho ikhethela. Ka masoabi, batho ba bangata ba sebelisa bolokolohi ba bona ba ho ikhethela ho ntša ba bang kotsi. Ka lebaka leo, a mang a mathata ao re nang le ’ona a tla ’ne a tsoele pele ho fihlela lefatše la Molimo le lecha le fihla. (Liketso 17:30, 31) E ka ’na ea e-ba bothata bo atileng sebakeng seo re lulang ho sona, bothata bo kang tlōlo ea molao kapa ntoa; kapa bo ka akarelletsa ho mamella mathata a tlisoang ke bahanyetsi. (1 Petrose 4:4) Re lokela ho lumela hore lefatšeng lena le sa tšabeng Molimo, ha ho mohla maemo a mang a tla ntlafala.

Ho sa tsotellehe seo, Molimo o rata barapeli ba hae ebile o batla ho ba thusa. Mohla ’Muso oa hae o busang lefatše lohle kantle ho tšitiso ea letho o tla felisa ka ho feletseng mathata a tšabehang a aparetseng lefatše lena. (Tšenolo 21:3, 4) Ho fihlela ka nako eo, re lokela ho phehella ho kōpa tataiso ea hae ha re sebetsana le mathata a bophelo. Haeba re etsa joalo, re ka kholiseha hore Jehova o tla phethahatsa tšepiso e tlalehiloeng Bibeleng ho Esaia 41:10 e reng: “U se ke ua tšoha, kaha ke na le uena. U se ke ua talima koana le koana, etsoe ke ’na Molimo oa hao. Ke tla u matlafatsa. Ka sebele ke tla u thusa. Ke tla u tšoara ka tieo ka letsoho la ka le letona la ho loka.”