Ho Tsoalloa Lefatšeng le Batang!

LESEA le tsoalloa lefatšeng le se nang kutloelo-bohloko, le batang le le sithabetsang maikutlo. Le hoja lesea le ke ke la bolela hore na le hlile le ikutloa joang, litsebi tse ling tsa saense li lumela hore le pele le hlaha lesea le se le ntse le hlokomela se etsahalang.

Buka ea The Secret Life of the Unborn Child, e re: “Rea tseba hore ngoana ea e-song ho hlahe ke motho ea hlokomelang lintho, ea arabelang eo ho tloha ha a le likhoeli li tšeletseng ho ea pele (’me mohlomong le pele ho moo) a phelang bophelo bo bontšang hore o na le maikutlo.” Le hoja lesea le ke ke la hopola, litsebi tse ling tsa saense lia ipotsa hore na ebe se etsahalang ha le hlaha ha se ame bophelo ba lona hamorao.

Ho imeloa kelellong ho tsoela pele ka mor’a tsoalo. Ha lesea le se le se ka pōpelong, ha le sa feptjoa ka mohlolo. Lethopo le neng le le fepela oksijene le limatlafatsi ha le sa le eo. Hore le tle le phele, le tlameha ho qala ho hema le ho ja limatlafatsi. Le hloka motho ea ka le fepang le ho le hlokomela ka lintho tse ling tseo le li hlokang nameng.

Lesea le sa tsoa hlaha hape le lokela ho hōla kelellong, maikutlong le moeeng. Kahoo motho e mong o tlameha ho hlokomela lesea. Ke mang ea boemong bo botle haholo ba ho etsa joalo? Lesea le hloka eng ho batsoali ba lona? Litlhoko tsee li ka khotsofatsoa joang? Lihlooho tse latelang li tla thusa ho araba lipotso tsena.