Melemo ea ho Balla Bana
KA MONGOLI OA TSOHA! POLAND
Bahlophisi ba letšolo la selemo le selemo la “Poland Eohle e Balla Bana,” ba re: “Ho bala ke senotlolo sa tsebo le bohlale ba kelello. . . . Ho bula menyetla ea ho kena letlotlong la monahano le tsebo ea motho.” Haeba sena ke ’nete, ke hobane’ng ha batho ba bangata ba baholo le bana ba nka ho bala e le ntho feela tjee e hlokahalang?
Baqapi ba phutuho ena ba re: “Tloaelo ea ho bala le ho rata libuka e lokela ho hlaoleloa bongoaneng.” Ba bolella batsoali: “Haeba u batla hore bana ba hao ba be bohlale ba be ba atlehe sekolong le bophelong, ba balle ka lentsoe le phahameng letsatsi le leng le le leng metsotso e 20.”
Hape batsoali ba khothalletsoa hore ba se ke ba liehisa ho balla bana ba bona empa “ba hle ba qalelle kapele-pele kamoo ho ka khonehang.” Neng? Batsoali baa khothalletsoa: “A re balleng lesea, re le sekile ka matsohong, re le talimile ka lerato, ’me re tsosa thahasello ea lona ka lentsoe la rōna. Ka tsela ena ho thehoa katamelano e tla lula e le teng ea ho rata ho bala ka boikutlo ba ho sireletseha le ho thaba. Ho phaella moo, ho susumetsa khōlo ea lona ea kelello.”
Bahlophisi ba phutuho eo ba hatisa hore “ho balla bana hona joale ho bohlokoa ho feta pele,” ’me ba supa le melemo e meng. Ho balla holimo ho ruta bana ho nahana, “ho ba thusa ho utloisisa batho ba bang, lefatše le hore ba ikutloisise, . . . ho tsosa thahasello, ho hōlisa monahano, ho susumetsa khōlo ea maikutlo, ho etsa hore a nahanele le ho ba le kutloelo-bohloko, ho ruta melao ea boitšoaro, . . . ho etsa hore motho a itšepe.” Kantle ho pelaelo, ke “pheko ea litšusumetso tse ngata tse sa batleheng . . . tse sokelang likelello le lipelo tsa bana,” kamoo baeta-pele ba letšolo lena ba phethelang kateng.
Hore ho bala ho tle ho atlehe ka ho khethehileng, ho lokela ho sebelisoe lingoliloeng tse khothalletsang bacha hore ba atamele haufi le ’Mōpi oa bona oa leholimo. Bibele ke buka e molemohali bakeng sa ho re thusa ho atamela haufi le Molimo. Bibele e re, Timothea e monyenyane o ile a rutoa “lingoliloeng tse halalelang” “ho tloha boseeng.” (2 Timothea 3:15) Lenaneong la ho balla bana ka lentsoe le phahameng, batsoali ba ka akarelletsa libuka tse thehiloeng Bibeleng tse kang Buka ea ka ea Lipale tsa Bibele le Ithute ho Mosuoe e Moholo, tseo ka ho khetheha li ngoletsoeng bana ’me li hatisitsoe ke Lipaki Tsa Jehova.