Pono ea Bibele

Na Ruri Jesu e ne e le Mora oa Molimo?

A KHOLISEHILE ka ho feletseng, moapostola Petrose o ile a re ho Jesu: “U Kreste, Mora oa Molimo ea phelang.” (Matheu 16:16) Ona ke mohlala o le mong ho e mengata ka Bibeleng e bontšang hore Jesu ke Mora oa Molimo, e leng tlhaloso e ’nileng ea hlahisa maikutlo a mangata bathong ba ratang bolumeli.

Ba bangata ba lumelang hore Jesu Kreste ke Molimo ba na le bothata ba ho hlalosa hore na ke hobane’ng ha a bitsoa Mora oa Molimo. Ho hlakile hore e ke ke ea e-ba Molimo ea ba ea e-ba Mora oa Molimo. Ba bang ba nka Jesu e le feela motho oa bohlokoa historing, monna ea bohlale, kapa eo mohlomong e neng e le moprofeta oa ’nete oa Molimo, ebe ke phetho. Empa hantle-ntle Bibele eona e ruta eng? Na ho na le taba hore na u lumela eng?

Letsibolo la Molimo

Bibele e ruta hore ho na le nako eo Molimo a neng a le mong. Ka lebaka la lerato la hae, o ile a etsa qeto ea hore e be ntate a tsebe ho thabela bophelo le motho e mong—empa eseng ka tsela eo batho e bang bo-ntate ka eona. Ho e-na le hoo, Jehova o ile a sebelisa matla a hae a ho bōpa a ke keng a lekanngoa, ho etsa motho ea bohlale oa moea eo hona joale re mo tsebang e le Jesu Kreste—“tšimoloho ea pōpo ea Molimo.” (Tšenolo 3:14; Liproverbia 8:22) Kaha Jesu o bōpiloe ke Molimo ka ho toba nakong eo Molimo a ntseng a le mong, ke ka nepo Jesu a bitsoang “mora ea tsoetsoeng a ’notši” le “letsibolo la pōpo eohle.”—Johanne 1:14; Bakolose 1:15.

Ka ho hlakileng, kaha ke letsibolo la pōpo ea Molimo, Jesu e ke ke ea e-ba ’Mōpi, “eo e leng eena feela Molimo.” (1 Timothea 1:17) Ka lehlakoreng le leng, Molimo o file Mora oa hae litokelo tse ngata. Ka mohlala, Molimo o ile a sebelisa Jesu hore a bōpe “lintho tse ling tsohle,” ho kopanyelletsa le ’ona mangeloi. Mangeloi ana a bitsoa “bara ba Molimo”—hape Jehova ke Monehi-Bophelo oa ’ona.—Bakolose 1:16; Jobo 1:6; 38:7.

Ka mor’a hore a lokise lefatše hore le hahoe ke batho, ho bonahala Molimo a ile a bua le Mora oa hae oa letsibolo, a re: “A re etse motho ka setšoantšo sa rōna.” (Genese 1:26; Liproverbia 8:22-31) Ka hona, Jehova o ile a boela a sebelisa motho eo oa moea eo qetellong e neng e tla ba Jesu hore a bōpe mora oa Molimo oa pele oa motho, Adama.—Luka 3:38.

Jesu e ba Mora oa Molimo oa Motho

Moapostola Johanne o senola hore ka nako e behiloeng, Mor’a Molimo oa moea “o ile a fetoha nama ’me a lula har’a rōna.” (Johanne 1:14) E le hore a fetole Jesu bothong ba moea ho mo isa ho ba nama, Molimo o ile a fetisetsa ka mohlolo bophelo ba Jesu ho tsoa leholimong ho bo kenya ka pōpelong ea moroetsana oa Mojuda, Maria. Ka tsela eo, Jesu e ile ea ’na ea e-ba Mor’a Molimo, le hoja e ne e se e le motho. Ho feta moo, kaha Molimo, eseng motho leha e le ofe, ke eena ea fileng Jesu bophelo, Jesu o ile a tsoaloa a phethahetse, a se na sebe. Lengeloi Gabriele le ile la bolella Maria: “Se tsoetsoeng se tla bitsoa se halalelang, Mor’a Molimo.”—Luka 1:35; Baheberu 7:26.

Ntate ka boeena o ile a tiisa hore Jesu ke mora oa hae ha e ntse e le motho oa nama. Ha Jesu a ne a kolobetsoa, Johanne Mokolobetsi o ile a bona maholimo a buleha ’me a utloa lentsoe le tsoang leholimong le re: “Enoa ke Mora oa ka, ea ratoang, eo ke mo amohetseng.” (Matheu 3:16, 17) Hase feela Johanne a ileng a bolella barutuoa ba hae: “Ke ho bone, ’me ke pakile hore enoa ke Mora oa Molimo.”—Johanne 1:34.

Nakong ea tšebeletso ea hae ea lefatšeng, Jesu ha aa ka a letsa terompeta hore ke eena Mesia, Mora oa Molimo. (Mareka 8:29, 30) Hangata o ne a tlohella batho hore ba iketsetse qeto ka bobona ha ba mametse lithuto tsa hae, ba shebile tsela eo a phelang ka eona le ha ba bona mehlolo e mengata eo a neng a e etsa, eo boholo ba eona a neng a e etsa phatlalatsa. Ka mohlala, o ile a phekola “bohle ba eang hampe, ba leng mahlomoleng ke mafu a sa tšoaneng le litlhokofatso.” (Matheu 4:24, 25; 7:28, 29; 12:15) Lifofu, bo-tsebe-tutu, ba holofetseng le ba kulang kaofela ba ile ba tla ho Jesu ’me o ile a ba phekola. O ile a ba a tsosa le bafu! (Matheu 11:4-6) A shebiloe ke barutuoa ba hae, Jesu o ile a tsamaea ka mohlolo holim’a metsi ’me a khutsisa moea le maqhubu nakong eo ho neng ho e-na le sefefo se matla. Pontšo ena ea matla e ile ea susumelletsa barutuoa ba hae hore ba re: “Ka sebele u Mor’a Molimo.”—Matheu 14:24-33.

Kamoo U ka Ruang Molemo ho Mora oa Molimo

Ke hobane’ng ha Molimo a ile a tlosa Mora oa hae ea tsoetsoeng a ’notši leholimong ho mo tlisa lefatšeng, hore feela qetellong a tl’o shoa lefu le sehlōhō? “E le hore e mong le e mong ea bontšang tumelo ho eena a se ke a timetsoa empa a be le bophelo bo sa feleng.” (Johanne 3:16) E ne e le feela ka hore a shoe Jesu a neng a ka “fana ka moea oa hae hore e be thekollo e le phapanyetsano bakeng sa ba bangata.” (Matheu 20:28) Ka sebele, historing eohle ha ho motho ea bontšitseng batho lerato joaloka Jehova le Mora oa hae oa letsibolo.—Baroma 8:32.

Ka mor’a lefu la hae Jesu o ile a “boleloa hore ke Mor’a Molimo” ka tsela e ikhethang haholo le e matla, “ka ho tsoha bafung” ho khutlisetsoa bophelong ba ho ba Mora oa Molimo oa moea. (Baroma 1:4; 1 Petrose 3:18) Joale ka mor’a ho leta ka mamello a le lehlakoreng la Ntate oa hae ka lilemo tse ka bang 1900, Jesu o ile a behoa setulong sa borena e le Morena oa ’Muso oa Molimo—’muso oa leholimo oo haufinyane o tla busa holim’a lefatše lohle.—Pesaleme ea 2:7, 8; Daniele 7:13, 14.

Na u batla ho amoheloa ke Mora eo oa Molimo ea matla? Haeba ho joalo, joale re u khothalletsa hore u hlahlobe lithuto tsa hae ’me u li sebelise bophelong ba hao. Jesu ka boeena o ile a re: “Sena se bolela bophelo bo sa feleng, ho tsoela pele ba rua tsebo ka uena, Molimo a le mong feela oa ’nete, le ka eo u mo romileng, Jesu Kreste.” (Johanne 17:3) Ruri seo motho a se lumelang ka Mora oa Molimo ke sa bohlokoa!—Johanne 3:18; 14:6; 1 Timothea 6:19.

NA U KILE UA IPOTSA?

◼ Ke joang Jesu e leng Mora ea tsoetsoeng a ’notši oa Molimo?—Johanne 1:3, 14; Tšenolo 3:14.

◼ Ke hobane’ng ha u ka lumela hore Jesu ke Mora oa Molimo?—Matheu 3:16, 17.

◼ U ka rua molemo joang ka ho lumela hore Jesu ke Mora oa Molimo?—Johanne 3:16; Johanne 14:6; 17:3.

[Litšoantšo tse leqepheng la 12, 13]

Lithuto tse bohlale tsa Jesu le mehlolo ea hae e matla li ile tsa paka hore e ne e se motho feela ea tšoanang le ba bang