Ba Ile ba Pholoha Litlhaselong tsa Bokhukhuni Mumbai
KA MONGOLI OA TSOHA! INDIA
MOTSE o moholo oa Mumbai, oo pele o neng o bitsoa Bombay, o na le baahi ba fetang limilione tse 18 ba ntseng ba eketseha ka sekhahla. Letsatsi le leng le le leng baahi ba mona ba pakeng tsa limilione tse tšeletseng le tse supileng ba tsamaea ka literene tsa moo tse lebelo tse bileng li tsamaeang khafetsa lipakeng tsa toropo le metse e haufi ha ba ea mesebetsing, likolong, lik’holejeng, mabenkeleng le libakeng tse ratoang ke bahahlauli. Nakong eo sephethephethe se leng boima, terene ka ’ngoe e hulang makareche a robong eo ka tloaelo e nkang batho ba 1 710, e laela bapalami ba ka bang 5 000. Ka la 11 July, 2006 ka eona nako eo sephethephethe se leng sengata, likhukhuni li ile tsa hlasela literene tsa Mumbai. Pele metsotso e 15 e feta, libomo tse supileng li ile tsa phatloha litereneng tse fapakaneng Seporong se karolong e ka Bophirimela, tsa bolaea batho ba 200 ’me ba 800 ba tsoa likotsi.
Batho ba bangata bao e leng litho tsa liphutheho tse 22 tsa Lipaki Tsa Jehova tsa Mumbai le metseng ea litoropo e haufi ba atisa ho tsamaea ka literene ’me ba ne ba le teng litereneng tse ileng tsa hlaseloa. Ka lehlohonolo, ha ho na ba ileng ba shoa empa ba ’maloa ba ile ba tsoa likotsi. Anita o ne a e-ea hae a tsoa mosebetsing. Terene e ne e tletse, ka lebaka leo o ne a eme haufi le monyako oa lekareche la boemo ba pele e le hore a tle a theohe habonolo ha terene e ema. Ha terene e ntse e tsamaea, hang-hang ho ile ha utloahala molumo o moholo oa ho phatloha, ’me lekareche leo a neng a le ka ho lona le ile la tlala mosi o motšo. Ha a hlahela ka ntle le monyako a sheba ka ho le letona o ile a hlokomela hore lehlakore la tšepe la lekareche le haufi le ne le khephohile le leketlile lephakong la terene. O ile a tšoha ha a bona batho le litho tsa batho li tsoa le moo lekareche le neng le khephohile teng li ntse li oela seporong. Ka mor’a nako e neng e bonahala e le telele haholo—le hoja e ne e le metsotsoana e seng mekae feela—terene e ile ea ema. Eena hammoho le bapalami ba bang ba ile ba itahlela fatše holim’a seporo ’me ba qela ho leoto ba balehela hōle le terene eo. Anita o ile a letsetsa monna oa hae John a ka cell phone ea hae ’me ka lehlohonolo o ile a mo fumana; ka mor’a metsotso e seng mekae tsamaiso ea mehala ea sebakeng seo kaofela e ile ea imeloa ka lebaka la batho ba bangata ba tšohileng ba neng ba letsa ka nako e le ’ngoe. O ne a ntse a theotse moea ho fihlela a buisana le monna oa hae. Joale o ile a sitoa ho ithiba, eaba o qala ho lla. O ile a mo bolella se etsahetseng a ba a mo kōpa hore a mpe a tl’o mo lata. Ha a ntse a mo emetse pula e ile ea qala ho na ’me ea hlakola boholo ba bopaki bo neng bo tla thusa ba etsang lipatlisiso.
Claudius, eo le eena e leng e mong oa Lipaki Tsa Jehova, o ile a tloha ofising ea hae pele ho nako eo a tloaetseng ho tloha ka eona. O ile a palama terene e tlohang Seteisheneng sa Churchgate ka 5:18 mantsiboea, e leng moo literene tsa Western Railway li palameloang teng eaba o kena lekarecheng la boemo ba pele. Ha a ntse a batla setulo kahobane leeto la hae la ho ea seteisheneng sa Bhayandar le ne le tla nka hora, o ile a bona Joseph oa phuthehong ea Lipaki Tsa Jehova e haufi le ea habo. Nako e ile ea feta kapele ha ba ntse ba qoqa. Kaha a ne a khathetse ke mosebetsi oa letsatsi leo, Joseph o ile a ea le sephume sa boroko. Kahobane terene e ne e tletse haholo, Claudius o ile a ema ka maoto ha terene e fihla seteisheneng se ka pele ho seo a neng a tla theoha ho sona e le hore a atamele monyako. Ha Claudius a ntse a eme moo, Joseph o ile a tsoha a itšetleha ka setulo sa hae a re a tsamaee hantle. Claudius o ile a itšoareletsa ka tšepe ea setulo a inamela ho eena hore a buisane le eena. E ka ’na eaba sena ke sona se pholositseng Claudius. Hang-hang ho ile ha utloahala lerata le leholo. Lekareche le ile la tsukutleha habohloko, la tlala mosi ’me ha re fi! Claudius o ile a tabana fatše lipakeng tsa litulo, e ne eka ha a sa tla utloa, kaha o ne a se a utloa ho lla manyenenyene feela ka litsebeng. Moo a neng a eme teng, e ne e se e le mohohlo feela. Ba bang ba bapalami ba neng ba eme haufi le eena terene e ne e ba hlatselitse seporong ha ba bang ba ne ba rapaletse fatše ba shoele. O ne a pholohile ho phatloheng ha seqhomane sa bohlano liqhomaneng tse supileng tse ileng tsa phatlola literene letsatsing leo la Labobeli le mahlonoko.
Claudius o ile a phallisetsoa sepetlele, liaparo tsa hae li ne li khenathetse mali hohle. Leha ho le joalo, boholo ba mali ana e ne e le a tsoang ho bapalami ba ileng ba e-ba malimabe. O ne a tsoile likotsi tse seng kae feela—a tabohile moropa oa tsebe, a chele letsohong le leng a bile a tlabohile moriri. Ha a le sepetlele o ile a kopana le Joseph le mosali oa hae Angela, ea neng a le ka lekarecheng le hlahlamang la bona leo ho lona ho kenang basali feela ’me o ne a sa tsoa likotsi. Joseph o ne a utloile bohloko leihlong le letona a bile a se a sa utloe litsebeng. Lipaki tsena tse tharo li ile tsa leboha Jehova ka hore ebe li ne li ntse li phela. Claudius o boletse hore hang ha kelello ea hae e khutla o ile a re, ‘Ke ntho e se nang thuso hakaakang hore motho a lelekise chelete le lintho tse bonahalang tsamaisong ee ea lintho ha e le moo a ka lahleheloa ke bophelo ka ho panya ha leihlo!’ O ile a thaba haholo hore ebe o ne a entse hore kamano ea hae le Molimo oa hae, Jehova, e be eona ntho e ka sehloohong bophelong ba hae!
Ka nako e khutšoanyane feela, motse o moholo oa Mumbai o ne o hlasetsoe ke likhohola tse khōlō, ho qhomme merusu ea boipelaetso joale ho se ho bile ho phatlohile libomo. Leha ho le joalo, Lipaki tsa moo tse fetang 1 700 li bonahatsa moea o motle, lia cheseha. Kamehla li bolella baahisani ba tsona ka tšepo e babatsehang ea lefatše le lecha moo ho ke keng ha hlola ho e-ba le mabifi.—Tšenolo 21:1-4.
[Ntlha e Qolotsoeng e leqepheng la 23]
Moo a neng a eme teng, e ne e se e le mohohlo feela
[Setšoantšo se leqepheng la 23]
Anita
[Setšoantšo se leqepheng la 23]
Claudius
[Setšoantšo se leqepheng la 23]
Joseph le Angela
[Tlhaloso ea Moo Setšoantšo se Nkiloeng Teng e leqepheng la 22]
Sebastian D’Souza/AFP/Getty Images