Lihlekehleke Tsa Faeroe—Li Hokahane ka Tsela e Ikhethang
LIHLEKEHLEKE Tsa Faeroe ke sehlopha sa lihlekehleke tse 18 tse nyenyane tse khobokaneng karolong e ntseng e loebehlana ea leoatle, Atlantic Leboea ’me baahi ba tsona ba bua Sefaeroe. Lihlekehlekeng tsena tse ntle, lithaba tse telele tse matsutla-tsutla li theohela leoatleng ka tsela e hlollang. Metse e pel’a leoatle e na le matlo a pentiloeng ka mebala e mengata. Hlabula maralla a apareloa ke mohloa o botala bo khahlang.
Le hoja baahi ba 48 000 ba lihlekehlekeng tsena ba sebelisana, qalong ho ne ho se bonolo. Ho ne ho sebelisoa liketsoana tsa masokoana ho tsamaisa batho le thepa ho tloha sehlekehlekeng se seng ho ea ho se seng. Batho ba ne ba tsamaea ka maoto ha ba ea motseng o mong, ba hloa lithaba tse telele le ho theoha likhohlo tse tebileng. Ho haha ntlo e ne e le mosebetsi o boima haholo kaha thepa eohle e ne e tlameha ho tla ka seketsoana sa masokoana. Pele mosebetsi oa kaho o qala, thepa e ne e lokela ho isoa setšeng sa kaho ho tloha koung e nyenyane.
Baahi ba Pele
Litlaleho tsa khale ka ho fetisisa tse fumanehang tsa Lihlekehleke Tsa Faeroe, ke tse ngotsoeng ke monna e mong oa moitlami oa Leaerishe hoo e ka bang ka 825 C.E. O tlaleha hore lilemo tse ka holimo ho lekholo pele ho eena, ho ne ho e-na le baitlami ba Maaerishe ba neng ba lula lihlekehlekeng tseo ba le bang. Leha ho le joalo, ho tlalehoa hore batho ba qalile ho lula lihlekehlekeng tseo mathoasong a lekholo la borobong la lilemo, ha Grímur Kamban a fihla a tsoa Norway.
Le hoja baahi ba pele ba ne ba phela ka ho tšoasa litlhapi, ba ne ba boetse ba ruile linku. Ka Sefaeroe, lebitso Føroyar (Lihlekehleke Tsa Faeroe) le bolela “Lihlekehleke Tsa Linku,” ’me ho rua linku e ntse e le habohlokoa. Boea ba linku bo ’nile ba ba sireletsa lifefong, puleng le serameng. Ha e le hantle, ho ’nile ha thoe ‘boea ke ba bohlokoa ho Mafaeroe joalokaha eka ke khauta.’
Esita le kajeno, ho na le linku tse ngata lihlekehlekeng tseo ho feta batho. Linku li hlajoa ka tsela ea moetlo, ebe nama ea tsona e fanyehoa libakeng tseo moea o ka kenang habonolo ho tsona hore e ome. Sena se etsa hore nama e be monate o tsoang ka litsebe, e be sejo se ikhethang.
Joalokaha ho ka lebelloa hore batho ba seng bakae ba phelang sebakeng se ka thōko ba be le maqhama a matla hobane ba thusana, ho joalo le ka Mafaeroe. Le kajeno a ntse a bolokile maqhama a matla le hoja mekhoa ea sejoale-joale ea ho tsamaea le ho buisana e a nolofalelitse lintho.
Li Hokahantsoe ka Litonnoro
Tonnoro ea pele Lihlekehlekeng Tsa Faeroe e ile ea buloa ka 1963. E ile ea phunngoa thabeng e Sehlekehlekeng sa Suðuroy se ntlheng e ka boroa, moo e neng e hokahanya metse e ’meli. Tonnoro eo e ile ea phunngoa ka ho epa, ho bora le ho qhomisa lidaenamaete ka mahlakoreng a mabeli a thaba eo ka nako e le ’ngoe.
Tonnoro e ’ngoe e sa tsoa phunngoa e etsa hore batho ba tsamaee limithara tse ka bang 150 ka tlas’a leoatle ’me e hokahanya lihlekehleke tse peli tse khōlō. Ha ba qala ho e phunya, ba ile ba sebelisa boro e bolelele ba limithara tse hlano ho bora lejoeng. Ka mor’a moo, ba kenya daenamaete ka mokoting oo eaba ba e qhomisa. Ba ntan’o tlosa mafika le majoe, kahoo ha hlahella tonnoro ea limithara tse hlano. Ba ile ba etsa sena ka makhetlo ho fihlela e ka ba bolelele ba lik’hilomithara tse tšeletseng. Tonnoro eo e ile ea buloa ka la 29 April, 2006.
Hona joale ho na le litonnoro tse 18 Lihlekehlekeng Tsa Faeroe, tse peli tsa tsona li ka tlas’a leoatle ’me li hokahanya lihlekehleke. Ha ho na naha e ’ngoe lefatšeng e nang le litonnoro tse bolelele ba lik’hilomithara tse ngata hakaalo ha li bapisoa le palo ea baahi ba eona. Leha ho le joalo, ho ntse ho raloa litonnoro tse ncha. Paramente e entse qeto ea ho haha tse ling tse peli lipakeng tsa lihlekehleke tse khōlō. E ’ngoe ea tsona, eo ho lebeletsoeng hore e qetoe ka 2012, e tla ba bolelele ba lik’hilomithara 11, 9 ’me e tla ba e ’ngoe ea litonnoro tse telele ka ho fetisisa lefatšeng tse tsamaeang ka tlas’a metsi.
Maqhama a Ikhethang
Lihlekehlekeng Tsa Faeroe ho na le sehlopha se seng sa batho ba nang le maqhama a ikhethang—maqhama a matla a moea a momahanyang Lipaki Tsa Jehova. Lipaki tsa pele tse ileng tsa etela lihlekehlekeng tsena—ke basali ba babeli ba inehetseng ba neng ba tsoa Denmark ka 1935—ba ileng ba qeta lehlabula ba ea ka ntlo le ntlo ba bolella batho molaetsa oa Bibele o buang ka ’Muso oa Molimo. Ha nako e ntse e ea, baahi ba bang ba lihlekehlekeng tseo ba ile ba amohela molaetsa oo o khothatsang eaba le bona baa o phatlalatsa.—Matheu 24:14.
Kajeno, ho na le Lipaki tse ka bang lekholo tse kopanelang Liholong Tsa ’Muso tse ’nè tse lihlekehlekeng tsena. Li etsa tšebeletso ea tsona ka cheseho, li thusoa ke litsela tse ntle le litonnoro tse hokahanyang lihlekehleke tsena tse hlollang tse karolong e ntseng e loebehlana ea leoatle, Atlantic Leboea.
[Setšoantšo se leqepheng la 17]
Tonnoro ena e etsa hore batho ba tsamaee limithara tse ka bang 150 ka tlas’a leoatle ’me e hokahanya lihlekehleke tse peli tse khōlō