Lepheo la Lefehlo

Na le Entsoe?

● Mafehlo a mang a khona ho qeta metsotsoana e 30 a sa uputse mapheo empa a sa theohe hakaalo bophahamong boo a leng ho bona. A khona ho etsa see joang? A na le mapheo ao moea o kubang ka holimo feela, a fapaneng le a sefofane leha e le sefe se kileng sa etsoa!

Ak’u nahane: Lepheo le lesesaane la lefehlo le na le lipoliti tse le thibelang ho kobeha. Bo-rasaense ba fumane hore lipoliti tseo li boetse li thusa lefehlo ho phahama ha le fofa. Makasine ea New Scientist e re: “Sena se etsoa ke hore moea o potoloha pakeng tsa lipoliti tseo ’me o thibela lepheo ho ea tlaase, e leng se thusang ho fehla moea o phaphamatsang lepheo.”

Ka mor’a hore Abel Vargas eo e leng moenjiniere oa lifofane le bo-mphato ba hae ba ithute ka lepheo la lefehlo, ba ile ba etsa qeto ea hore “ke habohlokoa ho etsisa mapheo a lintho tse phelang, ha ho etsoa lifofa-sebakeng tse nyenyane.” Kaha liroboto tse lekanang le letsoho ka boholo li na le k’hamera kapa thepa e ’ngoe, li thusa ka litsela tse ngata, tse kang ho fumana boitsebiso libakeng tsa likoluoa le ho hlahloba hore na sebaka se silafetse hakae.

U nahana’ng ka see? Na lepheo le lesesaane le nang le lipoliti la lefehlo le bile teng ka tšohanyetso? Kapa na le entsoe?

[Setšoantšo se leqepheng la 25]

Lefehlo le lenyenyane la maiketsetso (sefofa-sebakeng) le boima ba limiligrama tse 120 le bophara ba lisenthimithara tse tšeletseng ’me le na le mapheo a “silicon” a masesaane a sephara a uputsang ha a tsamaisoa ka motlakase

[Tlhaloso ea Moo Setšoantšo se Nkiloeng Teng]

© Philippe Psaila/Photo Researchers, Inc.