Hantle-ntle ke Mang ea Hlohlelletsang Boloi?

HA E bua ka ’Mōpi oa rōna, Bibele e re: “Molimo ke leseli ’me ha ho na lefifi ho hang bonngoeng le eena.” (1 Johanne 1:5) Seo ke ’nete ka ho khetheha ha re bua ka kutloisiso ea moea. Kahoo, na ke Molimo oa ’nete ea hlohlelletsang boloi? Kapa na bo hlohlelletsoa ke matla a itseng a khopo?

Mekhoa e hlaheletseng ea boloi ke bonohe le tšebelisano le meea, e akarelletsang bonohe ba linaleli, ho hlalosa se boleloang ke linomoro tse itseng, ho bala mela ea seatla, boselamose haesita le ho bua le “bafu” le ho betsa ba bang ka mantsoe a boloi. Ke khale mekhoa ena e le teng, boholo ba eona e ne e sebelisoa Babylona ea boholo-holo, eo lithako tsa eona li leng Iraq. (Esaia 47:1, 12, 13) Mekhoa ena ea boloi e ile ea tloha Babylona, ea namela libakeng tse ling tsa boholo-holo ’me ea mela ka metso meetlong e mengata le lichabeng tse ngata.

Nahana ka se ileng sa etsahala motseng oa Filipi o Macedonia ea boholo-holo. Ha sehlopha se senyenyane sa basebeletsi ba Bakreste, ba neng ba akarelletsa moapostola Pauluse le ngaka Luka, se le motseng oo, se ile sa kopana le ngoanana e mong ea neng a e-na le matla a boloi. Hlokomela kamoo mongoli oa Bibele Luka a ileng a senola mohloli o sa bonahaleng oa matla a hae. O ile a ngola a re: “Lekhabunyane le itseng le nang le moea, modemona oa bonohe, la re khahlanyetsa. Le ne le ruisa beng ba lona haholo ka ho sebelisa tsebo ea ho bolela liketsahalo esale pele.”—Liketso 16:16-18.

Ha e le hantle, matla a ngoanana eo a ne a sa tsoe ho Jehova, Molimo oa ’nete, empa a ne a tsoa ho modemona, e leng moea o mobe. Kahoo, Pauluse le metsoalle ea hae ba ile ba hana ho mo mamela. Mohlomong joale ua ipotsa: ‘Bademona ke bo-mang? Hona ba tsoa hokae?’ Hlokomela kamoo Bibele e arabang lipotso tsena kateng.

Bademona ke Bo-mang?

Nako e telele pele Jehova a bōpa batho, o ile a bōpa libōpuoa tse ngata tsa moea tse bohlale e le ‘bara ba Molimo’ ba leholimong. (Jobo 38:4, 7) Joaloka batho, li na le bolokolohi ba ho ikhethela ’me ka nako e telele li ile tsa lula li tšepahala ho Molimo kaofela ha tsona. Empa boemo boo bo thabisang bo ile ba fela ka tšohanyetso. Joang?

Ka mor’a hore Molimo a bōpe batho, sebōpuoa se seng sa moea se ile sa qala ho labalabela ntho e neng e sa se lokela—e leng ho rapeloa. Lengeloi lena le khopo le ile la sebelisa noha feela joalokaha sebapali se etsa eka popi ea bua, ho khelosa mosali oa pele, e leng Eva, hore a se ke a mamela ’Mōpi oa hae. (Genese 3:1-6) Bibele e re lengeloi leo la lerabele ke “noha ea pele, e bitsoang Diabolose le Satane.” (Tšenolo 12:9) Jesu o ile a mo hlalosa e le “’molai” ea ‘sa kang a ema a tiile ’neteng,’ ’me a phaella ka ho re: “Ha a bua leshano, o bua ho ea ka tšekamelo ea hae, hobane o leshano ’me ke ntate oa leshano.”—Johanne 8:44.

Ha nako e ntse e ea, ‘bara ba bang ba moea ba Molimo oa ’nete’ ba ile ba ikopanya le Satane borabeleng ba hae. (Genese 6:1, 2) Hamorao ho ile ha buuoa ka bona e le “mangeloi a ileng a etsa sebe” le “mangeloi a sa kang a boloka sebaka sa ’ona sa pele empa a furalla sebaka sa ’ona sa bolulo se loketseng,” kapa sebaka seo a neng a se abetsoe leholimong. (2 Petrose 2:4; Juda 6) A ile a bitsoa bademona. (Jakobo 2:19) Ho feta moo, a ikemiselitse ho khelosa batho ba bangata kahohle kamoo a ka khonang borapeling ba ’nete, joalokaha a ile a khelosa Baiseraele ba bangata mehleng ea Bibele. (Deuteronoma 32:16, 17) Kajeno joaloka nakong e fetileng, ka masene Satane le bademona ba sebelisa mashano a bolumeli.—2 Bakorinthe 11:14, 15.

Itšireletse!

Le hoja meea e khopo e na le matla a phahametseng a batho, ka thuso ea Molimo re ka ‘ema khahlanong le eona’ ’me ra e hlōla. (1 Petrose 5:9) Empa e le hore re fumane thuso eo, ho hlokahala hore re ithute seo Molimo a se lebeletseng ho rōna ’me re se phethe. Ha a bua ka Bakreste ba mehleng ea hae, moapostola Pauluse o ile a ngola, a re: “[Ha rea khaotsa] ho le rapella le ho kōpa hore le ka tlala tsebo e nepahetseng ea thato ea hae ka bohlale bohle le kutloisiso ea moea, e le hore le tsamaee ka mokhoa o tšoanelang Jehova e le hore le mo khahlise ka botlalo.”—Bakolose 1:9, 10.

Ba ileng ba fumana “tsebo e nepahetseng” ba ne ba akarelletsa batho ba bangata ba motse oa Efese ba neng ba sebelisa tsebo ea boloi. Hlokomela kamoo ho tseba ’nete ho ileng ha ba ama kateng. Bibele e re: “Ba bangata ba neng ba sebelisa tsebo ea boselamose ba bokella libuka tsa bona ’me ba li chesa ka pel’a bohle.” Theko ea libuka tseo e ne e le “likotoana tsa silevera tse likete tse mashome a mahlano,” ’me eo e ne e le chelete e ngata! (Liketso 19:17-19) Mohlala ona o bontšang sebete o ile oa tlalehoa molemong oa rōna.—2 Timothea 3:16.

Melao-motheo e re Sireletsang

Ho na le lintho tse ling tseo re ka li etsang ho itšireletsa ho bademona. Nahana ka melao-motheo e latelang ea Bibele.

“Le se ke la lumela polelo e ’ngoe le e ’ngoe e bululetsoeng, empa lekang lipolelo tse bululetsoeng ho bona hore na li simoloha ho Molimo.” (1 Johanne 4:1) Lintho tse ling tse buuoang ke linohe tsa linaleli, bo-kea-tseba, ba buisanang le meea ea bafu le bo-ngakana-ntšonyana e ka ’na eaba ke ’nete. Ka mohlala, ngoanana eo oa Filipi ea neng a kenoe ke modemona o ne a bua ’nete ha a ne a re ka Pauluse le metsoalle ea hae: “Banna bana ke makhoba a Molimo ea Phahameng ka ho Fetisisa, a phatlalatsang tsela ea poloko ho lōna.” (Liketso 16:17) Leha ho le joalo, Pauluse le metsoalle ea hae ha baa ka ba lumela ho ikopanya le eena. Ho e-na le hoo, Pauluse o ile a laela moea oo o mobe hore o tsoe ho eena. Kahoo, hlahloba lithuto tsa bolumeli ka hore u li bapise le seo Bibele e se bolelang.—Liketso 17:11.

“Ka hona, ipeheng tlas’a Molimo; empa le hanyetse Diabolose, ’me o tla le balehela.” (Jakobo 4:7) Bademona ke lira tsa Molimo ebile ke lira tsa hao. U se ke ua labalabela le hanyenyane feela ho tseba ka litsela tsa bona tse lefifi. Ho e-na le hoo, u ipehe tlas’a Molimo ka hore u mamele litaelo tsa hae tse lerato, tse seng boima. (1 Johanne 5:3) Ka mohlala, Molimo o ile a re ho sechaba sa boholo-holo sa Iseraele: “Ho lōna ha hoa lokela hore ho fumanoe leha e le mang ea . . . sebelisang bonohe, ea sebelisang boselamose kapa leha e le mang ea batlang lipontšo tsa se tlang kapa moloi, kapa ea betsang ba bang ka mantsoe a boloi kapa leha e le mang ea batlang keletso ho ea buisanang le meea kapa setsebi se bolelang liketsahalo esale pele kapa leha e le mang ea botsang bafu. Etsoe e mong le e mong ea etsang lintho tsena ke ntho e manyala ho Jehova.” (Deuteronoma 18:10-12) Tsela eo Molimo a talimang lintho ka eona ha ea fetoha.—Bagalata 5:9, 20.

“Ha ho mantsoe a boloi a bakelang [bahlanka ba Jehova] bomalimabe.” (Numere 23:23) Bohle ba batlang ho khahlisa Molimo ha baa lokela ho tšaba bademona. Ha e le hantle, meea eo e khopo ea “thothomela” ka pel’a Molimo, kaha ea tseba hore o na le matla a maholohali, ao qetellong a tlang ho a sebelisa ho e timetsa. (Jakobo 2:19) Molimo o tla ‘bontša matla a hae molemong oa bao lipelo tsa bona li feletseng ho eena,’ ’me “a ke ke a lumella ea lokileng hore a therekele.”—2 Likronike 16:9; Pesaleme ea 55:22.

“Ba phelang baa tseba hore ba tla shoa; empa ha e le ba shoeleng, ho hang ha ba tsebe letho.” (Moeklesia 9:5) Lentsoe la Molimo le ruta hore ha e le hantle bafu ba shoele! Ha rea lokela ho ba tšaba, kaha ba ke ke ba hlola ba ntša motho leha e le ofe kotsi. (Esaia 26:14) E le hore ba thetse batho, ka linako tse ling bademona ba ikhakanya joalokaha eka ke meea ea bafu, e leng se ka ’nang sa hlakisa hore na ke hobane’ng ha batho ba elelloa hore “moea” oa motho ea neng a le mosa o batla o sa tšoane le motho eo ba neng ba mo tseba.

“Le ke ke la ja ‘tafoleng ea Jehova’ le tafoleng ea bademona.” (1 Bakorinthe 10:21, 22) Bohle ba ratang Jehova e le kannete ba tla qoba libuka, lifilimi le lipapali tsa k’homphieutha tse thehiloeng boloing kapa tse khothalletsang mekhoa le litumelo tsa boloi.a Pesaleme ea 101:3 e re: “Nke ke ka beha letho le se nang molemo ka pel’a mahlo a ka.” Ho feta moo, boithabiso bo nang le boloi bo tlotlisa pefo le boitšoaro bo bobe, e leng lintho tseo “ba ratang Jehova” ba li nyonyang.—Pesaleme ea 97:10.

Kamehla bademona ba ’nile ba leka ho patela batho seo ba hlileng ba leng sona. Empa ha baa atleha ka ho feletseng. A sebelisa Bibele, Jehova o pepesitse seo ba hlileng ba leng sona, hore ke lira tsa moloko oa batho tse leshano, tse sehlōhō le tse khopo. Ba fapane hakaakang le ’Mōpi oa rōna, Jehova Molimo! Joalokaha sehlooho se latelang se bontša, oa re rata, kamehla o re bolella ’nete ’me o batla hore re phele re thabile ka ho sa feleng.—Johanne 3:16; 17:17.

[Mongolo o botlaaseng ba leqephe]