Tsela eo Nonyana ea Wandering Albatross e Fofang ka Eona

LINONYANA tse fofelang holimo haholo li khona ho qeta nako li le moeeng li sa etse boiteko bo bokaalo. Nonyana ea wandering albatross ke mohlala o ikhethang oa seo. Nonyana ena eo mapheo a eona a leng bolelele ba limithara tse 3,4 ha a phukaletse ’me e le boima ba lik’hilograma tse 8,5 e khona ho fofa lik’hilomithara tse likete e sebelisa matla a seng makae feela! Lebaka la sena ke tsela eo e ahehileng ka eona le eo e fofang ka eona.

Ak’u nahane: Ha albatross e fofa e sebelisa mesifa e khethehileng e etsang hore mapheo a lule a phukaletse, ’me mesifa e se ke ea khathala. Ntho e ’ngoe e thusang nonyana ena hore e qete nako e ngata e fofa, ke tsela eo e fofang ka eona ha e le ka holim’a leoatle.

Ha li-albatross li fofa ka holim’a leoatle li lula li nyoloha, li thinya li bile li theoha​—e leng se li thusang hore li se ke tsa felloa ke matla ha li le moeeng. Bo-rasaense ba sa tsoa fumana hore na linonyana tsena li khona ho etsa seo joang. Ba ile ba sebelisa mechine e li lekolang le mananeo a khethehileng a k’homphieutha, ’me ba hlokomela hore li-albatross li nka matla ka hore li tsamaee li furalla moea o li hulelang morao. Bo-rasaense ba re: “Li lula li nka matla ka tsela e hlophisehileng.” Phello e ba efe? Nonyana ena e khona ho qeta lihora tse ngata e fofa empa e sa uputse mapheo!

Leseli lena le ka ’na la thusa baenjiniere ho etsa lifofane tse baballang mafura, mohlomong tse bileng li sa sebeliseng enjene.

U nahana’ng ka see? Na tsela eo nonyana ea albatross e fofang ka eona le tsela e ikhethang eo e ahehileng ka eona e bile teng ka ho iphetola ha lintho? Kapa na e entsoe?