Mosebetsi oa Phetolelo—Tsela eo o Etsoang ka Eona

PELE ho etsoa mosebetsi oa phetolelo, lingoliloeng tsa Lipaki Tsa Jehova lia hlophisoa le ho hlahlobisisoa hantle ebe lia ngoloa. Lefapha le Ngolang le ntlo-khōlo ea Lipaki Tsa Jehova New York, le etsa bonnete ba hore lintlha tse ngotsoeng lingoliloeng tsena li nepahetse le hore ho sebelisitsoe puo ka tsela e nepahetseng.a

Lefapha le Ngolang le romela lingoliloeng tsena ho lithimi tsa phetolelo tse ka bang lekholo ’me boholo ba bafetoleli ba lula moo puo eo ba fetolellang ho eona e buuoang teng. Boholo ba bona ba fetolela ka lipuo tsa habo bona. Bafetoleli ba lokela ho utloisisa lingoliloeng tse ngotsoeng ka Senyesemane hantle ’me ba tsebe puo ea habo bona hantle.

Bafetoleli ba etsa mosebetsi oa bona joang?

Geraint, e leng mofetoleli ea lulang Brithani o re: “Ke sebetsa le bafetoleli ba bang. Kahoo, ho hlokahala hore re sebelisane hantle. Re sebetsa hammoho ho rarolla mathata ao re kopanang le ’ona ha re ntse re fetolela. Ha re shebe mantsoe feela empa re sheba lipolelo. Re nahanisisa ka molaetsa o fetisoang sehloohong ka seng ’me re leka ho fetolela ka tsela eo babali ba tla e utloisisa.”

Ke eng seo le batlang ho se finyella ha le fetolela?

“Re batla hore ha motho a bala sengoliloeng a se ke a utloa hore se fetoletsoe empa a utloe eka ho tloha qalong se ngotsoe ka puo ea habo. Kahoo, re leka ho fetolela ka tsela eo batho ba buang ka eona. Ha re etsa sena, batho ba tla thabela ho bala lingoliloeng tsa rōna ’me ba tsoele pele ho li bala.”

Ho lula moo puo e buuoang teng ho le thusa joang?

“Ho bua le batho ba lulang mona ho re thusa ho fetolela ka tsela eo ba tla e utloisisa. Re lula Wales moo batho ba bangata ba buang Sewelsh ’me re kopana le batho ba buang puo ena letsatsi le leng le le leng. Hape, re botsa batho ka mantsoe ao re a sebelisang ho utloa hore na ke tsela eo ho buuoang ka eona, hore na baa a utloisisa le hore na a natefisa puo. Sena se re thusa hore re fetolele ka tsela e nepahetseng.”

Le etsa mosebetsi oa lōna joang?

“Thimi ka ’ngoe e na le mosebetsi oa eona. Pele re fetolela, e mong le e mong oa e bala ho utloa hore na e bua ka eng le hore na e ngolletsoe bo-mang. Re ipotsa lipotso tse kang: ‘Re ithuta’ng sehloohong see? Se bua ka eng hona se ngoletsoe’ng?’ Lipotso tsena li re thusa ho fetolela habonolo.

“Ka mor’a moo, re buisana ka lintho tseo re li hlokometseng sehloohong seo. Re etsa bonnete ba hore rea se utloisisa le hore re fetisa molaetsa ka tsela eo Senyesemane se o fetisitseng ka eona. Re batla hore ha motho a bala sengoliloeng se fetoletsoeng a ikutloe ka tsela eo motho ea balang sengoliloeng sa Senyesemane a ikutloang ka eona.”

Thimi e sebetsa joang?

“Re batla hore ha motho a bala sengoliloeng sa rōna ka lekhetlo la pele feela, a se utloisise. Re bala serapa se seng le se seng hammoho ka makhetlo a ’maloa e le hore re utloe hore na re fetoletse ka tsela e nepahetseng.

“Nakong ea phetolelo, lik’homphieutha tsa rōna li hlahisa ntho e tšoanang kahoo re bona seo motho ea fetolelang a ntseng a se thaepa. Ka mor’a moo rea sheba hore na lintlha tsohle li fetoletsoe ka nepo. Re boetse rea mamela hore na ho fetoletsoe ka tsela eo batho ba buang ka eona, mantsoe a ngotsoe ka nepo le hore na puo e sebelisitsoe hantle. Ka mor’a moo, e mong o re balla serapa seo. Haeba a khitlela ha a ntse a bala, rea hlokomela hore ho na le bothata. Ha re se re qetile ho fetolela sehlooho, motho a le mong o re balla sona ebe rea tšoaea hore na ke hokae moo re lokelang ho lokisa.”

Ke mosebetsi o boima hakaakang!

“E, o boima! Re chaisa re khathetse haholo. Re boela re qalella ka mosebetsi hape hoseng ha letsatsi le hlahlamang re khatholohile. Lefapha le Ngolang le re romella liphetoho tseo re lokelang ho li kenya sengoliloeng libeke tse ’maloa ka mor’a hore re qete ho fetolela. Ka mor’a ho kenya liphetoho tseo, re boetse re e bala hape le ho etsa bonnete ba hore ea utloahala le hore e baleha hamonate.”

Lik’homphieutha li le thusa joang?

“Le hoja k’homphieutha e sa khone ho fetolela ka tsela eo batho ba fetolelang ka eona, Lipaki Tsa Jehova li sebelisa mananeo a eona ho inolofalletsa mosebetsi oa phetolelo. Lenaneo le leng ke dikishinari eo ho eona re bokeletseng mantsoe le lipolelo tseo re li sebelisang hangata. Ho boetse ho na le lenaneo la ho etsa lipatlisiso le re bontšang lintho tseo thimi ea rōna e kileng ea li fetolela ’me sena se re thusa ho bona hore na lintho tse ling li ile tsa fetoleloa joang.”

U ikutloa joang ka mosebetsi oa hao?

“Mosebetsi oo re o etsang o thusa batho ba bang. Kahoo, re batla ho etsa mosebetsi o tsoileng matsoho e le hore batho ba thabele ho bala lingoliloeng tseo re li fetoletseng ’me li ba thuse. Re thaba haholo ha re tseba hore limakasine kapa lintho tse hlahang websaeteng ea rōna li ka thusa motho ea li balang hore a phele ka tsela e khahlisang Molimo.”

Mosebetsi oa Phetolelo o Thusa Batho ho Tseba Jehova

Lingoliloeng tsa rōna li tsoela batho ba limilione molemo kaha li ngotsoe ka puo ea habo bona. Lingoliloeng, livideo hammoho le lintho tse hlahang websaeteng ea rōna ea jw.org, li thehiloe Bibeleng. Re etsa boiteko ba ho fetolela lingoliloeng ka lipuo tse ngata hobane Molimo, eo lebitso la hae e leng Jehova o batla hore batho ba “sechaba se seng le se seng le moloko o mong le o mong le leleme le leng le le leng” ba rutoe molaetsa oa Bibele.—Tšenolo 14:6.b