2. Na Ke Molato Oa Rona Ha Re Hlaheloa Ke Mathata?

Re Lokela ho Tseba Karabo

Haeba re le molato, re ka khona ho etsa ho hong ho iphokoletsa mathata.

Nahana ka Taba Ena

Batho ba kentse letsoho hakae linthong tsee tse re bakelang mathata?

• 

  Tlhekefetso.

  World Health Organization (WHO) e hakanya hore motho a le mong ho ba bane o kile a hlekefetsoa ’meleng ha e sa le ngoana le hore mosali a le mong ho ba bararo o kile a hlekefetsoa ’meleng kapa ka motabo (kapa ka bobeli).

• 

  Ho Hlokahalloa.

  World Health Statistics 2018, e hatisitsoeng ke WHO e re: “Ho hakanngoa hore lefatšeng lohle, batho ba 477 000 ba ile ba bolaoa ke ba bang ka selemo sa 2016.” Palo eo e phaellana holim’a ea ba 180 000 bao ho hakanngoang hore ba ile ba bolaoa lintoeng le liqhoebeshanong ka sona selemo seo.

• 

  Bokuli.

  Mongoli oa makasine ea National Geographic e leng ’mè Fran Smith o re: “Ho na le batho ba fetang bilione ba tsubang, ’me koae e baka mafu a mahlano a bolaeang batho ka ho fetisisa e leng: lefu la pelo, setorouku, kokoana-hloko e etsang hore motho a heme ka thata, lefu la matšoafo le sa phekoleheng (COPD) le kankere ea matšoafo.”

• 

  Ho se Lekane Maemong a Bophelo.

  ’Mè Jay Watts eo e leng setsebi sa kelello o re: “Bofutsana, ho khelloa fatše hobane u le motho oa boemo bo itseng, ho khetholloa ka morabe, ho khetholloa ho ea ka hore na u oa bong bofe, ho ba le mathata a bolulo le ho phela har’a batho ba ratang ho hlolisana ho ka etsa hore motho a be le khatello ea maikutlo.”

  ITHUTE HAHOLOANYANE

  Shebella video e reng Ke Hobane’ng ha Molimo a Ile a Bopa Lefatše? e fumanehang ho jw.org/st.

Bibele e Re’ng?

Boholo ba mathata a re hlahelang a bakoa ke batho.

Mathata a mangata a bakoa ke mebuso e hatellang, e thatafalletsang batho bophelo ha ka nako e tšoanang e ipolela hore e sebeletsa batho.

“Motho o busitse motho ho mo ntša kotsi.”​—MOEKLESIA 8:9.

Mathata a ka fokotseha.

Likeletso tsa Bibele li ka re thusa hore re phele hantle ’meleng re be re be le khotso le batho ba bang.

“Pelo e nang le khutso ke bophelo ba sebopuoa sa nama, empa poulelo ke ho bola masapong.”​—LIPROVERBIA 14:30.

“Lehloeo le nang le lonya le bohale le khalefo le ho tleroha le puo e nyefolang li ke li tlosoe tsohle ho lona hammoho le bobe bohle.”​—BAEFESE 4:31.