Khaolo ea 131

Ho Iponahatsa ka Makhetlo a ho Qetela, le Pentekonta ea 33 C.E.

KA NAKO e ’ngoe Jesu o etsa litokisetso bakeng sa hore baapostola ba hae kaofela ba 11 ba e’o kopana le eena thabeng ea Galilea. Ho bonahala eka barutuoa ba bang ba bolelletsoe ka seboka seo, ’me batho ba fetang 500 ka kakaretso ba bokana hammoho. Ena e ipaka ho ba kopano e thabisang hakaakang ha Jesu a iponahatsa ’me a qala ho ba ruta!

Har’a lintho tse ling, Jesu o hlalosetsa letšoele le leholo hore Molimo o mo neile bolaoli bohle leholimong le lefatšeng. Oa khothatsa: “E-eang ke hona, le rute lichaba tsohle; le ba kolobetse ka lebitso la Ntate, le la Mora, le la Moea o Halalelang; ’me le ba rute ho boloka tsohle tseo ke le laetseng tsona.”

Nahana ka hona! Banna, basali, le bana kaofela ba fumana thōmo ena e tšoanang ea ho kopanela mosebetsing oa ho etsa barutuoa. Bahanyetsi ba tla leka ho emisa ho bolela le ho ruta ha bona, empa Jesu oa ba khothatsa: “Bonang, ’na, ke na le lōna ka mehla eohle, ho isa bofelong ba lefatše.” Jesu o ntse a e-⁠na le balateli ba hae ka moea o halalelang, ho ba thusa ho phetha tšebeletso ea bona.

Ka kakaretso, Jesu o iponahatsa a phela ho barutuoa ba hae ka nako ea matsatsi a 40 ka mor’a tsoho ea hae. Liketsahalong tsena tseo a iponahatsang ho tsona o ba ruta ka ’Muso oa Molimo, ’me o hatella hore na boikarabelo ba bona ke bofe joaloka barutuoa ba hae. Ketsahalong e ’ngoe o bile o iponahatsa ho Jakobo, ngoan’abo ka ’m’a bona, ’me o kholisa enoa eo pele e neng e se molumeli hore ka sebele ke Eena Kreste.

Ha baapostola ba sa ntsane ba le Galilea, ka ho hlakileng Jesu o ba laela hore ba khutlele Jerusalema. Ha a kopana le bona moo, o re ho bona: ‘Le se ke la tloha Jerusalema, le mpe le lebelle pallo ea Ntate, eo le e utloileng ho ’na, hobane Johanne o fela a kile a kolobetsa ka metsi; empa lōna le tla kolobetsoa ka moea o halalelang, ha ho fetile matsatsi a se makae.’

Hamorao Jesu o boetse o kopana le baapostola ’me o ba etella pele ho tsoa motseng ho ea fihla Bethania, e letsoapong le ka bochabela la Thaba ea Mehloare. Ka ho makatsang, ho sa tsotellehe tsohle tseo a li boletseng ka hore o se a le haufi le ho nyolohela leholimong, ba sa ntsane ba lumela hore ’Muso oa hae o tla hlongoa lefatšeng. Kahoo baa botsa: “Morena, na u re, e se e le joale u tla tsosa ’muso oa Iseraele na?”

Ho e-⁠na le hore a leke ho lokisa likhopolo tsa bona tse fosahetseng hape, Jesu o arabela feela ka ho re: “Ha hoa le lokela ho tseba mehla, leha e le linako tseo Ntate a itaoletseng tsona a ’notši.” Joale o boetse o hatisa mosebetsi oo ba tšoanetseng ho o etsa, o re: “Le tla fuoa matla mohla Moea o Halalelang o tlang ho lōna, ’me le tla ba lipaki tsa ka Jerusalema, le naheng eohle ea Judea, le ea Samaria, le ho isa pheletsong ea lefatše.”

Ha ba sa ntsane ba mo talimile, Jesu o qala ho nyolohela leholimong, ’me joale leru lea mo koahela ’me ha ba sa ’mona. Ka mor’a ho hlobola ’mele oa hae oa nama, o nyolohela leholimong e le motho oa moea. Ha ba 11 ba ntse ba shebile sebakeng, banna ba babeli ba apereng liaparo tse tšoeu ba itlhahisa ho bona. Mangeloi ana a nkileng ’mele ea nama aa botsa: “Banna ba Galilea, le ntse le emetse’ng, le lelaletse leholimong? Jesu eo ea nketsoeng leholimong a le har’a lōna, o tla be a tle ka mokhoa oo le ’moneng a e-⁠ea leholimong ka oona.”

Mokhoa oo Jesu a sa tsoa tloha lefatšeng ka oona hase o hapang tlhokomelo ea batho ’me ke balateli ba hae ba tšepahalang feela ba ’monang. Kahoo o tla khutla ka mokhoa o tšoanang​—⁠o ke keng oa hapa tlhokomelo ea batho ’me ke balateli ba hae ba tšepahalang feela ba lemohang hore o khutlile le hore o se a le teng matleng a ’Muso.

Joale baapostola ba theoha Thabeng ea Mehloare, ba tšela Khohlo ea Kedrone, ’me ba kena Jerusalema hape. Ba lula moo ka ho utloa taelo ea Jesu. Matsatsi a leshome hamorao, Moketeng oa Bajode oa Pentekonta ea 33 C.E., ha barutuoa ba ka bang 120 ba phuthehetse kamoreng e ka holimo Jerusalema, hang-hang ntlo e tlala lerata le tšoanang le la moea o matla o fokang. Maleme a kang mollo aa bonahala, ’me leleme le leng le le leng le lula holim’a e mong le e mong oa ba leng teng, ’me barutuoa kaofela ba qala ho bua lipuo tse fapaneng. Hona ke ho tšolloa ha moea o halalelang oo Jesu a neng a o tšepisitse! Mattheu 28:16-20; Luka 24:49-52; 1 Ba-Korinthe 15:5-7; Liketso 1:3-15; 2:1-4.

▪ Ke bo-mang bao Jesu a ba fang litaelo tse mabapi le ho arohana ha hae le bona thabeng ea Galilea, ’me litaelo tsee ke life?

▪ Jesu o fana ka matšeliso afe ho barutuoa ba hae, ’me o tla ba le bona joang?

▪ Jesu o iponahatsa halelele hakae ho barutuoa ba hae ka mor’a tsoho ea hae, ’me o ba ruta eng?

▪ Ke mang eo Jesu a iponahatsang ho eena eo ho bonahalang eka pele ho lefu la Jesu e ne e e-⁠s’o be morutuoa?

▪ Jesu o tšoara liboka life tse peli tsa ho qetela le baapostola ba hae, ’me ho etsahala’ng liketsahalong tsee?

▪ Jesu o tla khutla ka mokhoa oo a tsamaileng ka oona joang?

▪ Ho etsahala’ng ka Pentekonta ea 33 C.E.?