Khaolo ea 19
Ha Tsebo ea Molimo e Tlala Lefatše
1, 2. Pōpo ea Jehova e ile ea senngoa joang?
HA RE re moetsi ea tummeng oa litšoantšo tse ferefuoang o sa tsoa qeta setšoantšo se setle haholo. Ka nepo o se nka se le setle haholo—mosebetsi o tsoileng matsoho! Empa ka tšohanyetso sera se mōna sea se senya. Ka ho utloahalang, sena se utloisa moetsi oa litšoantšo bohloko bo boholo. O tla laba-labela hakaakang ho bona sesenyi seo se koalloa! ’Me u ka inahanela kamoo moetsi oa litšoantšo a laba-labelang hore a be le setšoantšo sa hae se tsosoloselitsoeng botleng ba sona ba pele.
2 Joaloka moetsi eo oa litšoantšo, Jehova o ile a bōpa mosebetsi o tsoileng matsoho ka ho lokisa lefatše le ho beha moloko oa batho holim’a lona. Ka mor’a ho bōpa monna le mosali, o ile a re mosebetsi oohle oa hae oa lefatšeng o “molemo haholo.” (Genese 1:31) Adama le Eva e ne e le bana ba Molimo, ’me o ne a ba rata. O ile a ba nahanela bokamoso bo thabileng, bo khanyang. Ke ’nete, Satane o ile a ba etella pele borabeleng, empa pōpo ea Molimo e babatsehang ha e-ea ka ea senngoa hoo e ke keng ea lokisoa.—Genese 3:23, 24; 6:11, 12.
3. “Bophelo ba sebele” ke eng?
3 Molimo o ikemiselitse ho lokisa lintho. O rata haholo ho bona re phela ka tsela eo a neng a e rerile pele. Boteng ba rōna bo bokhutšoanyane le bo likhathatso hase “bophelo ba sebele,” hobane ke ba boleng bo tlaase haholo ho seo Jehova a se hopotseng. “Bophelo ba sebele” boo Molimo a re batlelang bona ke “bophelo bo sa feleng” tlas’a maemo a phethahetseng.—1 Timothea 6:12, 19.
4, 5. (a) Tšepo ea Paradeise e tla phethahala joang? (b) Ke hobane’ng ha re lokela ho nahana ka tšepo ea rōna ka bokamoso?
4 Tsebo ea Molimo e tlisa boikarabelo ka pel’a Jehova. (Jakobo 4:17) Empa nahana ka mahlohonolo ao u tlang ho a thabela haeba u sebelisa tsebo eo ’me u hahamalla bophelo bo sa feleng. Ka Lentsoeng la hae, Bibele, Jehova Molimo o entse setšoantšo se setle sa seo bophelo bo tlang ho ba sona lefatšeng la Paradeise le haufi haholo. Leha ho le joalo, joaloka batho ba Jehova ha re sebeletse Molimo feela hobane re lakatsa moputso. Re sebeletsa Molimo hobane re mo rata. (Mareka 12:29, 30) Ho feta moo, ha re lefshoe ka bophelo ka ho sebeletsa Jehova. Bophelo bo sa feleng ke mpho ea Molimo. (Baroma 6:23) Ho tla re tsoela molemo ho thuisa ka bophelo bo joalo hobane tšepo ea Paradeise e re hopotsa hore na Jehova ke Molimo oa mofuta ofe—“moputsi oa ba mo batlang ka tieo” ea lerato. (Baheberu 11:6) Tšepo e khanyang ka ho hlaka likelellong tsa rōna le lipelong e tla re nolofalletsa ho mamella mathata lefatšeng la Satane.—Jeremia 23:20.
5 Joale a re tsepamiseng mohopolo oa rōna tšepong e thehiloeng Bibeleng ea bophelo bo sa feleng nakong e tlang Paradeiseng ea lefatšeng. Bophelo bo tla ba joang ha tsebo ea Molimo e tlala lefatše?
KA MOR’A ARMAGEDDONE —LEFATŠE LA PARADEISE
6. Armageddone ke eng, hona e tla bolela eng ho moloko oa batho?
6 Joalokaha ho bontšitsoe pejana, haufinyane Jehova Molimo o tla felisa tsamaiso ea hona joale e khopo ea lintho. Lefatše le atamela ka potlako ho seo Bibele e se bitsang Har–Magedone, kapa Armageddone. Lentsoe leo le ka ’na la etsa hore batho ba nahane ka koluoa ea nyutlelie e tlisoang ke lichaba tse loanang, empa Armageddone hase ea mofuta oo. Joalokaha Tšenolo 16:14-16 e bontša, Armageddone ke ‘ntoa ea letsatsi le leholo la Molimo ea Matla ’Ohle.’ Ke ntoa e akarelletsang “marena a lefatše lohle leo ho ahiloeng ho lona,” kapa lichaba. Mora oa Jehova Molimo, Morena ea khethiloeng, haufinyane o tla palama ho kena ntoeng. Phello e tiile ka ho feletseng. Bohle ba hanyetsang ’Muso oa Molimo ’me e le karolo ea tsamaiso ea Satane e khopo ba tla felisoa. Ho tla pholoha feela ba tšepahalang ho Jehova.—Tšenolo 7:9, 14; 19:11-21.
7. Satane le bademona ba hae ba tla be ba le hokae nakong ea Puso ea Lilemo tse Sekete ea Kreste, ’me see se tla tsoela moloko oa batho molemo joang?
7 Nka hore u pholohile koluoa eo. Bophelo bo ne bo tla ba joang moo lefatšeng, lefatšeng le lecha le tšepisitsoeng ke Molimo? (2 Petrose 3:13) Ha ho hlokahale hore re nahanele, hobane Bibele e-ea re bolella, ’me seo e se buang sea hlolla. Rea tseba hore Satane le bademona ba hae ba tla felloa ke mosebetsi, ba koalloe sekoting sa ho se sebetse nakong ea Puso ea Lilemo tse Sekete ea Jesu Kreste. Libōpuoa tseo tse khopo, tse lonya ha li sa tla hlola li lalla, li fehla khathatso le ho leka ho re susumelletsa hore re etse liketso tsa ho se tšepahale tse khahlanong le Molimo. Ho khatholla hakaakang!—Tšenolo 20:1-3.
8, 9. Lefatšeng le lecha, ho tla etsahala eng ka mahlomola, ho kula, le ho tsofala?
8 Ka nako e loketseng, mefuta eohle ea ho kula e tla fela. (Esaia 33:24) Joale ba hlotsang le ba holofetseng ba tla ema, ba tsamaee, ba mathe, le ho tjeka ka maoto a phetseng hantle, a matla. Ka mor’a lilemo li phela li sa utloe letho litsebeng, lithōlō li tla utloa mehoo ea thabo ho li potoloha. Lifofu li tla makala ha li bona lefatše le tletseng mebala-bala le libōpeho ka pel’a mahlo a tsona. (Esaia 35:5, 6) Qetellong, li tla bona lifahleho tsa baratuoa ba tsona! Mohlomong ka nako eo pono ea tsona e tla fifala ka nakoana ke meokho ea thabo.
9 Nahana feela! Ho se ho se likhalase tsa mahlo, ho se ho se melamu ea ho tsamaea kapa mare, ho se ho se meriana, ho se ho se litleleniki tsa meno kapa lipetlele! Ho kula maikutlong le ho tepella maikutlo li ke ke tsa hlola li amoha batho thabo hape. Ha ho ngoana ea tla fokolisoa ke boloetse. Tšenyo ea botsofali e tla etsolloa. (Jobo 33:25) Re tla phela hantle haholo ’meleng, re be matla haholoanyane. Hoseng ho hong le ho hong re tla tsoha borokong ba bosiu re khatholohile ka matla a nchafetseng, re tletse matla le mafolo-folo bakeng sa letsatsi le lecha la bophelo bo sehlahlo le mosebetsi o khotsofatsang.
10. Baphonyohi ba Armageddone ba tla qala mosebetsi ofe?
10 Ho tla ba le mosebetsi o thabisang o mongata o tla etsoa ke baphonyohi ba Armageddone. Ba tla fetola lefatše paradeise. Moneketsela leha e le ofe oa tsamaiso ea khale e silafetseng o tla hlekoa. Lirapa tsa lifate le lipalesa le tsa litholoana le meroho li tla nkela mek’huk’hu le libaka tse senyehileng sebaka. Bohle ba tla thabela matlo a khotsofatsang le a thabisang. (Esaia 65:21) Ha nako e ntse e feta, likarolo tseo tsa paradeise tsa lefatše li tla atoloha ’me li kopane ho fihlela lefatše lohle le finyella tekanyo ea botle e ileng ea behoa ke ’Mōpi morao koo tšimong ea Edene. E tla ba ho khathollang hakaakang ho kopanela mosebetsing oo oa ho tsosolosa!
11. Kamano ea nako e tlang le moloko oa batho le tikoloho ea lefatše le bophelo ba liphoofolo e tla ba efe?
11 Tsena tsohle li tla etsoa tlas’a tataiso ea bomolimo e le hore tikoloho e se ke ea senngoa. Batho ba tla ba khotsong le liphoofolo. Ho e-na le hore li bolaoe ka sehlōhō, motho o tla boela a qala boikarabelo ba ho lebela lefatše, a li hlokomela hantle. Bona ka mahlo a kelello liphiri le likonyana, litau le manamane, li fula hammoho—’me liphoofolo tse ruiloeng li sireletsehile ka ho feletseng. Esita le ngoana e monyenyane a ke ke a tšaba letho ho sebata, leha e le hore khutso ea lefatše le lecha e tla senngoa ke batho ba sehlōhō, ba mabifi. (Esaia 11:6-8) Leo e tla ba lefatše le lecha la khotso e kaakang!
MOLOKO OA BATHO O FETOTSOE
12. Esaia 11:9 e phethahala joang kajeno, ’me e tla phethahatsoa joang Paradeiseng?
12 Esaia 11:9 e re bolella hore na ke hobane’ng ha ho ke ke ha e-ba le kotsi e etsoang lefatšeng lohle. E re: “Hobane lefatše le tla tlala tsebo ea Jehova, joalo ka ha metsi a aparetse leoatle.” Sena se amana le batho hobane liphoofolo li ke ke tsa fumana “tsebo ea Jehova” ’me tsa etsa liphetoho, kaha li laoloa ke tšekamelo ea tlhaho. Empa tsebo ea ’Mōpi oa rōna e hlile e fetola batho. Ha ho pelaelo hore uena u se u entse liphetoho ka lebaka la ho sebelisa tsebo ea Molimo bophelong ba hao. Ba limilione ba entse sena. Ka hona, boprofeta bona bo se bo qalile ho phethahala ho ba sebeletsang Jehova. Empa, bo boetse bo supa nakong eo batho lefatšeng lohle ba tlang ho lahla litšobotsi leha e le life tsa bophoofolo kapa tse mabifi ’me ba e-ba le khotso ka ho sa feleng.
13. Ke lenaneo lefe la thuto le tlang ho ntšetsoa pele lefatšeng?
13 E tla ba ntho e ntle hakaakang ha tsebo ea Molimo e tlala lefatše! Ho tla ba le lenaneo le batsi la thuto tlas’a tataiso ea Morena Jesu Kreste le babusi hammoho le eena ba 144-000. Joale “meqolo” e mecha e tla sebelisoa. Ka ho totobetseng ena ke litaeo tse ngotsoeng tsa Molimo tse tla sebeletsa e le motheo oa ho ruta baahi ba lefatše. (Tšenolo 20:12) Moloko oa batho o tla ithuta khotso, eseng ntoa. Lihlomo tsohle tse senyang li tla fela ka ho sa feleng. (Pesaleme ea 46:9) Baahi ba lefatše le lecha ba tla rutoa ho tšoara batho ba habo bona ka lerato, tlhompho, le seriti.
14. Lefatše le tla fapana joang ha moloko oa batho e tla be e le lelapa le le leng le kopaneng?
14 Moloko oa batho e tla ba lelapa le kopaneng. Ho ke ke ha e-ba le mekoallo bakeng sa bonngoe le boena. (Pesaleme ea 133:1-3) Ha ho ntlo ea motho e tlang ho notleloa ho thibela masholu. Khotso e tla rena pelong e ’ngoe le e ’ngoe, ntlong e ’ngoe le e ’ngoe, karolong e ’ngoe le e ’ngoe ea lefatše.—Mikea 4:4.
TSOHO E THABISANG
15. Ke lihlopha life tse peli tse tla tsosetsoa lefatšeng?
15 Nakong ea Lilemo tse Sekete, tsoho e tla ba teng. Bao ka boomo ba ileng ba siteloa moea o halalelang oa Molimo, kapa matla a sebetsang a hae, ka hore ba nke bohato khahlanong le pontšo ea oona kapa litataiso ba sa bake, ba ke ke ba tsosoa. (Matheu 23:15, 33; Baheberu 6:4-6) Ha e le hantle, ke Molimo ea tlang ho etsa qeto hore na ke mang ea entseng sebe ka tsela eo. Empa ho tla tsosoa lihlopha tse peli tse ikhethang—“ea ba lokileng hammoho le ba sa lokang.” (Liketso 24:15) Kaha ho tla be ho e-na le taolo e loketseng, ke ho utloahalang ho fihlela qeto ea hore ba pele ba tla amohelloa bophelong lefatšeng e tla ba ba lokileng, ba ileng ba sebeletsa Jehova ka botšepehi.—Baheberu 11:35-39.
16. (a) Ke bo-mang ba tla ba har’a “ba lokileng” ba tla tsosetsoa lefatšeng? (b) Ke bafe ba tšepahalang ba boholo-holo bao u ratang ho kopana le bona ka ho khetheha, hona hobane’ng?
16 Ho e-na le ho utloa litaba ka lintoa, likoluoa, le lefu, bahlanka ba Jehova ba tla fumana litlaleho tse babatsehang tsa tsoho. E tla ba ho thabisang ho tseba ka ho khutla ha banna le basali ba tšepahalang ba kang Abele, Henoke, Noe, Abrahama, Sara, Jobo, Moshe, Rahaba, Ruthe, Davida, Elia, Esthere. Ba tla fana ka linnete tse susumetsang hakaakang tsa histori ha ba fana ka makolopetso a tšehetsang litlaleho tse ngata tsa Bibele! Ha ho pelaelo hore bona le ba lokileng ba shoeleng linakong tsa morao tjena ba tla laba-labela ho ithuta ka bofelo ba tsamaiso ea Satane le kamoo Jehova a ileng a halaletsa lebitso la hae le halalelang le ho tlosa thohako boreneng ba hae.
17. Ba tšepahalang ba tla thusa ba bang ba tsositsoeng ka eng?
17 Baa ba tšepahalang e tla ba thuso e kaakang nakong ea karolo e latelang ea tsoho, ha ba limilione tse likete ba “ba sa lokang” ba lokolloa litlamong tsa lefu! Boholo ba moloko oa batho ha boa ba le monyetla oa ho tseba Jehova le ka mohla. Satane o ne a ‘foufatsa likelello tsa bona.’ (2 Bakorinthe 4:4) Empa mosebetsi oa Diabolose o tla be o etsollotsoe. Ba sa lokang ba tla khutlela lefatšeng le letle le la khotso. Ba tla amoheloa ke batho ba hlophisehileng hantle hore ba ba rute ka Jehova le ka Mora oa hae ea busang, Jesu Kreste. Ha ba limilione tse likete ba tsositsoeng ba tseba ka ’Mōpi oa bona le ho mo rata, tsebo ea Jehova e tla tlala lefatšeng ka tsela e ke keng ea lekanngoa.
18. U nahana hore u tla ikutloa joang ha u amohela baratuoa ba tsositsoeng?
18 Tsoho e tla tlisa thabo e kaakang lipelong tsa rōna! Ke mang ea e-song ho ka a utloa bohloko ka lebaka la sera sa rōna lefu? Ka sebele, ke mang ea e-song ho ikutloe a ferekane ka ho feletseng ha tlamo ea lerato kapa botsoalle e tsekoloha ha ho kula, botsofali, kotsi, kapa pefo e baka lefu la moratuoa? Joale, nahana ka thabo ea ho kopana hape Paradeiseng. Bo-’mè le bo-ntate, bara le barali, metsoalle le seng, ba tla kopana ka ho tšeha le ho lla ke thabo.
PHETHEHO QETELLONG!
19. Ke mohlolo ofe o tla etsahala nakong ea Lilemo tse Sekete?
19 Ho pholletsa le Lilemo tse Sekete, ho tla etsahala mohlolo o babatsehang. Bakeng sa moloko oa batho, mohlomong e tla ba tšobotsi e hlollang haholo ea Puso ea Lilemo tse Sekete ea Kreste. Jehova o tla tataisa Mora oa hae hore a sebelise melemo ea sehlabelo sa thekollo ho monna le mosali e mong le e mong ea tšepahalang le ea mamelang. Ka tsela eo, sebe sohle se tla tlosoa ’me moloko oa batho o tla phahamisetsoa phethehong.—1 Johanne 2:2; Tšenolo 21:1-4.
20. (a) Ho phethahala ho tla bolela eng? (b) Baphonyohi ba Armageddone le ba tsositsoeng ba tla qala ho phela ka kutloisiso e feletseng neng?
20 Phetheho! E tla bolela eng? E tla bolela ho khutlela bophelong ka tsela eo Adama le Eva ba neng ba bo thabela pele ba siteloa Jehova Molimo. ’Meleng, kelellong, maikutlong, boitšoarong, moeeng—ka litsela tsohle tse ka nahanoang—batho ba phethahetseng ba tla finyella litekanyetso tsa Molimo ka botlalo. Empa na joale batho bohle ba tla tšoana hantle-ntle? Le hanyenyane! Pōpo ea Jehova—lifate, lipalesa le liphoofolo—kaofela li re ruta hore o rata ho se tšoane. Batho ba phethahetseng ba tla ba le botho bo sa tšoaneng le litalenta. E mong le e mong o tla thabela bophelo joalokaha Molimo a ile a bo rerela joalo. Tšenolo 20:5 e re: “Bafu ba bang kaofela ha baa ka ba phela ho fihlela lilemo tseo tse sekete li felile.” Joaloka bongata bo boholo ba baphonyohi ba Armageddone, ba tsositsoeng ba tla phela ka ho feletseng ha ba fihla phethehong e se nang sebe.
21. (a) Ho tla etsahala eng qetellong ea Puso ea Lilemo tse Sekete ea Kreste? (b) Qetellong ho tla etsahala eng ka Satane le bohle ba ka lehlakoreng la hae?
21 Batho ba phethahetseng ba tla tobana le teko e le ’ngoe ea ho qetela. Qetellong ea Lilemo tse Sekete, Satane le bademona ba hae ba tla lokolloa sekoting ka nako e khutšoanyane ’me ba tla lumelloa ho etsa boiteko ba ho qetela ho etsa hore batho ba furalle Jehova. Ba bang ba tla etelletsa litakatso tse fosahetseng ka pele ho lerato la Molimo, empa bofetoheli bona bo tla khutsufatsoa. Jehova o tla bolaea bana ba nang le boithati hammoho le Satane le bademona ba hae kaofela. Joale bafosi bohle ba tla be ba felile.—Tšenolo 20:7-10.
U TLA ETSA ENG?
22. U lebelletse ho ea etsa eng Paradeiseng?
22 Kahoo bosafeleng bo tla nama ka pel’a ba ratang Jehova Molimo ebe ba lula lefatšeng la Paradeise. Re sitoa ho lekanyetsa thabo ea bona, ’me le uena u ka ba le karolo ho sena. ’Mino, botsebi, mesebetsi ea matsoho—lintho tse phethahetseng tse finyelletsoeng ke moloko oa batho li tla feta hōle mesebetsi e molemohali ea litsebi tse hloahloa lefatšeng la khale! Ka holim’a tsohle, batho ba tla be ba phethahetse ’me ba tla be ba e-na le nako e sa feleng ka pel’a bona. Nahana hore na u tla khona ho etsa eng u le motho ea phethahetseng. Hape, nahana seo uena le batho ba bang le tlang ho ithuta sona ka pōpo ea Jehova—ho qala ka limilione tse likete tsa lihlopha tsa linaleli ho pholletsa le bokahohle ho fihlela karoloaneng e nyenyane ka ho fetisisa ea athomo. Tsohle tseo motho a li finyellang li tla tsoela pele li thabisa pelo ea Ntate oa rōna oa leholimo ea lerato, Jehova.—Pesaleme ea 150:1-6.
23. Ke hobane’ng ha bophelo Paradeiseng bo ke ke ba tena le ka mohla?
23 Ka nako eo bophelo bo ke ke ba tena. E tla ba bo thahasellisang haholoanyane ha nako e ntse e feta. U-ua hlokomela hore ha ho na qetello tsebong ea Molimo. (Baroma 11:33) Ho pholletsa le bosafeleng, kamehla ho tla ba le lintho tse ncha tse ka ithutoang tse eketsehileng le tse ka hlahlobjoang. (Moeklesia 3:11) ’Me ha u ntse u tsoela pele ho ithuta ka Jehova Molimo, u tla tsoela pele u phela—eseng feela lilemo tse seng kae empa ka ho sa feleng!—Pesaleme ea 22:26.
24, 25. Ke hobane’ng ha u lokela ho phela tumellanong le tsebo ea Molimo hona joale?
24 Na bokamoso bo thabisang lefatšeng la paradeise hase ba bohlokoa ho feta boiteko leha e le bofe kapa boitelo boo u ka bo etsang? Hantle haholo! Jehova o u nanabellelitse senotlolo sa bokamoso boo bo babatsehang. Senotlolo seo ke tsebo ea Molimo. Na u tla se sebelisa?
25 Haeba u rata Jehova, u tla thabela ho etsa thato ea hae. (1 Johanne 5:3) Ha u ntse u phehella tsela eo, u tla ba le mahlohonolo a makaakang! Haeba u sebelisa tsebo ea Molimo, e ka u tlisetsa bophelo bo thabileng haholoanyane le lefatšeng lena le likhathatso. ’Me meputso ea kamoso e meholo, hobane tsebo ena ke e isang bophelong bo sa feleng! Hona joale ke nako e ntle ea hore u nke bohato. Ikemisetse ho phela tumellanong le tsebo ea Molimo. Bontša lerato la hao ho Jehova. Hlompha lebitso la hae le halalelang ’me u pake Satane a le leshano. Ka lehlakoreng le leng, Jehova Molimo, Mohloli oa bohlale le tsebo tsa ’nete, o tla u thabela ka pelo ea hae e bulehileng le e lerato. (Jeremia 31:3; Sofonia 3:17) ’Me o tla u rata ka ho sa feleng!
LEKA TSEBO EA HAO
“Bophelo ba sebele” ke eng?
Ka mor’a Armageddone, ho tla etsahala eng lefatšeng?
Ke bo-mang ba tla tsosoa holim’a lefatše?
Moloko oa batho o tla phethahala joang ’me qetellong o lekoe?
Tšepo ea hao ke efe ka Paradeise?
[Setšoantšo se leqepheng la 188, 189]
Na u tšepile ho phela Paradeiseng, ha tsebo ea Molimo e tlala lefatše?