Khaolong ea 21

Nka Sebelisa Nako ea ka Hantle Joang?

U ka rata ho ekeletsoa lihora tse kae ka letsatsi? ․․․․․

U ka etsa’ng ka nako eo e eketsehileng?

□ Nka e qeta ke e-na le metsoalle

□ Ke robetse

□ Ke ithuta

□ Ke etsa lintho tse ling ․․․․․

NAKO e tšoana le pere e lebelo—e le hore e u tsoele molemo u lokela ho ithuta ho e laola. Ha u laola nako, u ka ’na ua iphokoletsa ho imeloa kelellong, ua fumana limaraka tse holimo le ho etsa hore batsoali ba hao ba u tšepe haholoanyane. Mohlomong u re: “Eo ke taba e utloahalang, empa ha ho bonolo ho e etsa!” Ke ’nete hore u tla tobana le mathata. Empa u ka a hlōla. A re ke re hlahlobe mehlala e seng mekae.

Bothata ba Pele: Ho Etsa Kemiso

Se ka ’nang sa u sitisa. Ha u nahana ho etsa lintho ka kemiso, seo se etsa hore u ikutloe eka u qabeletsoe! U rata ho etsa lintho ka nako leha e le efe, eseng hore u laoloe ke kemiso.

Lebaka leo u lokelang ho ba le eona. Morena Solomone o ile a ngola, a re: “Ka sebele merero ea ea khothetseng e tlisa molemo.” (Liproverbia 21:5) Solomone e ne e le motho ea phathahaneng. O ne a nyetse, a e-na le bana ebile e le morena. Ho ka etsahala hore ebe o ile a phathahana le ho feta ha a ntse a hōla. Ka ho tšoanang, le uena u phathahane hona joale. Empa mohlomong u tla phathahana le ho feta ha u ntse u hōla. Ho molemo hore u qalelle hona joale ho ba ea hlophisehileng!

Seo bacha ba bang ba se buang. “Hoo e ka bang likhoeling tse tšeletseng tse fetileng, ke ile ka qala ho itloaetsa ho etsa lintho ka kemiso. Ke ne ke leka ho inolofalletsa lintho, ’me ho ba le kemiso ho ile ha nthusa!”—Joey.

“Ho ngola lintho fatše ho nthusa hore ke latele kemiso. Ha ho e-na le lintho tse ngata tseo ke lokelang ho li etsa, ’na le ’Mè re li ngola fatše, e le ho bona hore na re ka thusana joang ho finyella lipakane tsa rōna.”—Mallory.

Se tla u thusa. Nahana ka sena: A re re le nka leeto ka koloi. Setho ka seng sa lelapa se akhela mekotla ka buting. Empa ha ho bonahale eka mekotla eo e tla fella. U ka etsa’ng? U ka ’na ua e ntša kaofela ka buting ebe u qala ho e paka bocha, u kenye e meholo pele, u ntan’o kenya e menyenyane.

U ka sebelisa leano le tšoanang bophelong. Haeba u qala ka lintho tse sa reng letho, u tla hloka nako ea ho etsa lintho tsa bohlokoa. Ha u qala ka lintho tsa bohlokoa u tla makatsoa ke kamoo u salloang ke nako e ngata kateng bakeng sa ho etsa lintho tse ling!—Bafilipi 1:10.

Ke lintho life tsa bohlokoa haholo tseo u lokelang ho li etsa?

․․․․․

Joale khutlela lethathamong leo u le entseng ’me u ngole lintho tseo ka tatellano ho latela hore na ke tsa bohlokoa hakae. Haeba u qala ka ho etsa lintho tsa bohlokoa, u ka ’na ua makatsoa ke kamoo u salloang ke nako e ngata kateng bakeng sa ho etsa lintho tseo e seng tsa bohlokoa hakaalo.

Seo u ka se etsang. Batla bukana eo u tla ngolla ho eona lintho tseo u lokelang ho li etsa, ’me u li thathamise ho latela bohlokoa ba tsona. Ka lehlakoreng le leng, mohlomong e ’ngoe ea lintho tse latelang e ka u thusa.

□ K’halendara ea selefouno

□ Bukana ea ho ngolla lintlha

□ K’halendara ea k’homphieutha

□ K’halendara ea deskeng

Bothata ba Bobeli: Ho Khomarela Kemiso

Se ka ’nang sa u sitisa. Ha u tsoa sekolong, seo u batlang ho se etsa feela ke ho phomola le ho shebella TV ka metsotso e seng mekae. Kapa u batla ho itokisetsa tlhahlobo, empa u fumana molaetsa ka fono o u memelang ho ea shebella filimi e itseng. Nako eo filimi e qalang ka eona e ke ke ea fetoloa, empa uena u ka khona ho bala bosiu. U ipolella hore, ‘Ebile ke sebetsa hantle le ho feta ha ke le tlas’a khatello.’

Lebaka leo ka lona u lokelang ho e khomarela. U ka ’na ua fumana limaraka tse holimo ha u ithuta nakong eo kelello ea hao e hlaphohetsoeng haholoanyane. Ho phaella moo, na u se u ntse u se na mathata a mangata ao u lokelang ho sebetsana le ’ona? Ke hobane’ng ha u ikekeletsa ’ona ka ho balla tlhahlobo ka lepotlapotla e se le bosiu haholo? Ho ka ’na ha etsahala’ng hoseng ka le hlahlamang? U ka ’na ua seloa, ua ikutloa u imetsoe le ho feta kelellong, ua tlameha ho tsoa ka tlung u se u matha, ’me mohlomong u be u fihle sekolo se se se kene.—Liproverbia 6:10, 11.

Seo bacha ba bang ba se buang. “Ke rata ho shebella TV, ho letsa katara le ho qeta nako ke e-na le metsoalle. Hase hore lintho tsena li fosahetse; empa ka nako e ’ngoe li nka sebaka sa lintho tsa bohlokoa ebe ke qetella ke etsa lintho ka lepotlapotla.”—Julian.

Se tla u thusa. U se ke ua etsa kemiso ea lintho tseo u lokelang ho li etsa feela—empa u etse le ea lintho tseo u thabelang ho li etsa. Julian o re: “Ho bonolo ho etsa lintho tseo ke lokelang ho li etsa ha ke tseba hore ka mor’a moo ke il’o etsa lintho tseo ke li thabelang.” Tlhahiso e ’ngoe ke ena: Ipehele pakane e khōlō, ebe u ipehela tse ling tse nyenyane tse tla u thusa hore u e finyelle.

Seo u ka se etsang. Ke lipakane life tse seng kae tse utloahalang tseo u ka li finyellang likhoeling tse tšeletseng tse tlang?

․․․․․

Ke pakane efe e utloahalang eo u ka e finyellang lilemong tse peli tse tlang, hona u lokela ho qalella ho etsa’ng hona joale e le hore u e finyelle?a

․․․․․

Bothata ba Boraro: Ho ba Makhethe le ho Hlophiseha

Se ka ’nang sa u sitisa. Ha u tsebe hantle hore na ho ba makhethe le ho hlophiseha ho amana joang le ho sebelisa nako ea hao hantle. Ntle ho moo, ho bonahala ho le bonolo haholo ho ba bohlasoa. U ka ’na ua hloekisa kamore ea hao hosasane—kapa ua hla ua e tlohela! Kaha ha u tsotelle leha ho le bohlasoa, eo hase taba e u tšoenyang. Na ehlile ho joalo?

Lebaka leo ka lona u lokelang ho ba makhethe le ho hlophiseha. Ha lintho tsohle li le makhethe li bile li hlophisehile, seo se tla u bolokela nako ha u li batla. Hape sena se tla etsa hore u imolohe kelellong, e leng ntho eo u hlileng u e hlokang.—1 Bakorinthe 14:40.

Seo bacha ba bang ba se buang. “Ka linako tse ling, ha ke se na nako ea ho beha liaparo tsa ka moo li lokelang ho lula teng, ke qetella ke sa fumane lintho tseo ke li hlokang hobane li patehile ka har’a bohlasoa!”—Mandy.

“Ke ile ka qeta beke ke ntse ke batla sepache sa ka. Seo se ile sa ntšulafalletsa bophelo haholo. Qetellong ke ile ka se fumana ha ke hloekisa kamore ea ka.”—Frank.

Se tla u thusa. Leka ho khutlisetsa lintho moo li lulang teng kapele kamoo u ka khonang. Hleka lintho ka linako tsohle ho e-na le ho emela hore ho be bohlasoa.

Seo u ka se etsang. Leka ho itloaetsa hore u be makhethe. Beha lintho ka makhethe ’me u bone hore na seo se ke ke sa u nolofalletsa bophelo.

Nako ke ntho ea bohlokoa eo uena, bacha ba bang le batsoali ba hao le nang le eona ka ho lekana letsatsi le letsatsi. Haeba u e senya, lintho li tla u tsamaela hampe. Ha u e sebelisa hantle, u tla rua molemo. Ke uena ea tla ikhethela.

[Mongolo o botlaaseng ba leqephe]

LENGOLO LA SEHLOOHO

“Nepisisa lintho tsa bohlokoa haholo.”—Bafilipi 1:10.

KELETSO

U se ke ua leka ho sebelisa litlhahiso tsohle tse fanoeng khaolong ena ka nako e le ’ngoe. Ho e-na le hoo, leka ho sebelisa e ’ngoe ea tsona khoeling e latelang. Ha u se u ipabola ntlheng eo, khetha e ’ngoe eo u ka e ntlafatsang.

NA U NE U TSEBA . . . ?

Ho rera ho etsa lintho tse ngata haholo ka letsatsi ho tla u imetsa kelellong. Haeba u beha lintho ka mahlopho, u tla tseba hore na ke lintho life tseo u lokelang ho li etsa le tseo u lokelang ho li tlohela.

SEO KE RERANG HO SE ETSA!

Ntho eo nka fokotsang nako eo ke e qetang ke e etsa ke ․․․․․

Ke tla sebelisa nako eo ke etsa se latelang ․․․․․

Lintlha tseo ke tla rata ho li botsa motsoali kapa batsoali ba ka tabeng ena ke ․․․․․

U NAHANA’NG KA SEE?

● Ha u ithuta ho hlophisa nako ea hao hona joale, seo se tla u thusa joang hore u phethe boikarabelo ba hao nakong e tlang?

● U ka ithuta eng ho batsoali ba hao tabeng ea ho sebelisa nako hantle?

● Haeba u se u ntse u e-na le kemiso, u ka ’na ua lokela ho etsa liphetoho life hore e u tsoele molemo haholo?

[Ntlha e Qolotsoeng e leqepheng la 154]

“Ke utloile motho e mong a soasoa le e mong a re ka ’na, haeba u batla hore a fihle sebakeng se itseng ka hora ea bone, u lokela ho mo bolella hore a fihle moo ka hora ea boraro. Ke ha ke tla elelloa hore ke lokela ho hlophisa nako ea ka hantle!”—Ricky

[Lebokose le leqepheng la 155]

Nako ea ka e Fella Hokae?

Ka beke, bacha ba pakeng tsa lilemo tse 8 le 18 ba qeta lihora tse kana ba etsa lintho tse latelang:

17

ba e-na le batsoali ba bona

30

ba le sekolong

44

ba shebeletse TV, ba bapala lipapali tsa video, ba romellana melaetsa ba bile ba mamela ’mino

Kopanya lihora tseo u li qetang beke ka ’ngoe

u shebeletse TV ․․․․․

u bapala lipapali tsa video ․․․․․

u le Inthaneteng ․․․․․

u mametse ’mino ․․․․․

Kakaretso ․․․․․

Lihora tseo nka li qetang ke etsa lintho tsa bohlokoa ․․․․․

[Setšoantšo se leqepheng la 153]

Nako e tšoana le pere e lebelo—u lokela ho ithuta ho e laola