Lipotso Tse Tsoang ho Babali
■ Moea o halalelang o sebelisana joang le Sehlopha se Busang sa mehleng ena ha ho tluoa likhethong tsa baholo?
Moapostola Pauluse a bolella baholo ba Bakreste ba Efese: “Joale, lōna, hlong le itise, le lise le mohlape kaofela, oo Moea o Halalelang o le beileng balebeli ba oona, ho alosa kereke ea Molimo eo o ithuetseng eona ka mali ao e leng a oona ka sebele.”—Liketso 20:28.
Pauluse ha a ka a fana ka lintlha tse qaqileng kamoo moea oa Molimo o ileng oa sebetsa likhethong tseo. Leha ho le joalo, re ka tseba se etsahetseng ha sehlopha se busang sa lekholong la pele la lilemo se ne se nahanela potso e amang lebollo. Ha sehlopha se akarelletsa qeto ea sona, sa ngola: “Ho hopotsoe ke Moea o Halalelang le ke rōna, hore re se ke ra le jarisa boima bo fetisang.” (Liketso 15:28) Ke joang moea oa Molimo o halalelang, matla a oona a seng sebōpehong sa motho, o tlatselitseng qetong e tlamang e finyelletsoeng nakong eo?
Lengolo la Liketso khaolo 15 le bontša hore pele Pauluse le Barnabase ba ile ba ala taba. Ha latela puisano. Moapostola Petrose a pheta lintho tse qetelletseng ka ho kolobetsoa ha Molichaba ea sa bolotsoang, Kornele, le ba ntlo ea hae. Petrose a hlalosa hore ‘Molimo o ba pakile ka ho ba nea moea o halalelang, joaloka rōna.’ (Liketso 15:7, 8; 10:9-48) Ha latela Pauluse le Barnabase “ba bolela kamoo Molimo o entseng mehlolo ka bona le meeka e mengata har’a lichaba.” (Liketso 15:12) Ka hore moea o halalelang o sebetse ho Petrose, Kornele, Pauluse le Barnabase, ha bontša hore ho ne ho sa hlokahale hore Balichaba ba bolotsoe.
Ho bile le tšebetso e eketsehileng ea moea qetong e finyelletsoeng ke sehlopha se busang. Re ka lumela hore ba ile ba kōpa thuso ea moea lipuisanong tsa bona. Thuso e joalo ho ka etsahala hore e ile ea susumelletsa morutuoa Jakobo ho hopola boprofeta ba Amose 9:11, 12, le ho bona kamoo bo sebetsang kateng. Boprofeta boo bo ne bo ngotsoe ka ho bululeloa ke moea o halalelang. (Liketso 15:13-20) Ho feta moo, ‘baapostola le baholo ba Jerusalema’ ba neng ba bōpa sehlopha se busang e ne e le Bakreste ba neng ba tlotsitsoe ka moea o halalelang le ba neng ba bontša tšebetso ea oona bophelong ba bona, joaloka ho bea litholoana tsa oona.—Liketso 15:2; Ba-Roma 8:14-17; 1 Ba-Korinthe 7:40; Ba-Galata 5:22, 23.
Ka hona, ntle ho hore ho be le mantsoe a utloahalang a hlahang leholimong potsong e amang lebollo, ba neng ba etsa sehlopha se busang ba ne ba ka bua ka nepo ba re “moea o halalelang” o tataisitse qeto ea bona.
Ke tšebetso e tšoanang ha ho khethoa banna ba Bakreste ho ba baholo, kapa balebeli liphuthehong kajeno. Nako le nako sehlopha sa baholo (ho akarelletsa molebeli ea tsamaeang oa Mokhatlo) se lula fatše le ho buella baena bakeng sa ho khethoa e le balebeli. Ba leng sehlopheng e se e le baholo ba khethiloeng ’me bophelong ba bona ba bonahatsa hore ba na le moea. Puisano ea bona e buloa ka thapelo bakeng sa tataiso ea moea. ’Me nakong ea seboka ba hlahloba ho bona haeba moena e mong le e mong ea nahaneloang a finyella litlhokahalo tse behetsoeng baholo ka Bibeleng, tse tlalehiloeng ka tataiso ea moea o halalelang. (1 Timothea 3:2-7; Tite 1:5-9) Hape ba nahanela haeba moena a bontša ka mokhoa oa hae oa bophelo hore ‘o tletse moea o halalelang le hlalefo.’ (Liketso 6:3) Haeba ba lumela hore o joalo ’me a finyella litlhokahalo ka tekanyo e utloahalang, ba romela lipuello tsa bona ho Sehlopha se Busang se khethuoeng ke moea kapa bao se ba khethileng e le baemeli. Hamorao phutheho e ka tsebisoa hore moena o khethiloe.
Hoa utloahala hore moholo ea khethuoeng o sa ntse a sa phethahala ’me o na le likhaello. Empa baapostola ba ne ba sa phethahala, pele Jesu a ba khetha le kamor’a hore ba sebeletse e le sehlopha se busang. (Luka 9:46, 54; 22:54-62; Ba-Galata 2:11-14) Empa bonneteng ba ne ba e-na le moea oa Molimo ’me ba khethuoe ka tataiso ea oona. Ka mokhoa o tšoanang, baena le bo-khaitseli ba ka kholiseha hore ‘moea o halalelang o beile balebeli, ho lisa phutheho.’ (Liketso 20:28) Ke bakeng sa banna bana ho fanoeng ka keletso ena: “Hopolang balisa ba lōna ba le boleletseng lentsoe la Molimo, ’me le etsise tumelo ea bona.”—Ba-Heberu 13:7.