1986—Selemo sa “ho Sireletsa Khotso”?
MACHABA A KOPANENG a phatlalalitse 1986 e le Selemo sa Machaba sa Khotso. Ke khatelo-pele efe e lebisang khotsong ea lefatše e entsoeng? Litlhaloso tse latelang li tsoa likarolong tsohle tsa lefatše.
Ho tloha ka ’Mesa 7 ho ea ho 12, 1986, bo-ramolao ba tsoang linaheng tse 103 ba bile le seabo sebokeng sa bo75 sa IPU (Mokhatlo oa Bo-Ramolao) mane Motseng oa Mexico.
Mongoli-Kakaretso oa Machaba a Kopaneng Javier Pèrez de Cuèllar o ile a fetisetsa molaetsa ona ho Mokhatlo: “Ha Selemo sena sa Machaba sa Khotso se qala, bohle a ba ke ba hopole hore sehlooho sa sona—‘Ho Sireletsa Khotso le Bokamoso ba Batho’—se lebisa tlhokomelo e khethehileng eseng feela ho 1986 empa le lilemong tse ka pele. A re sebeliseng menyetla ea 1986 ka tieo eohle.”
Moeta-pele oa Mokhatlo oa Bo-Ramolao a bolela hore o etetse linaha tse ’maloa “ho ea kōpa bo-ramolao ba tsona hore na ba ne ba ke ke ba sebeletsa e le bo-ramolao ba khotso.” A liella litema: “Ke fumane kamoo hona ho leng thata kateng, ’me mabakeng a mang ho bileng ho se nang tšepo ho hang.”
Sehlopha sa Mexico sona sa bolela kamoo se “soabileng haholo kateng hore ho sa tsotellehe ho ameha ho ntseng ho eketseha hoa batho ka likotsi tsa tlholisano ea libetsa le boiteko bo etsoang ke Machaba a Kopaneng, ha ho khatelo-pele ea sebele e entsoeng lilemong tsa morao tjena lehlakoreng la phokotso ea libetsa.”
Sehlopha sa Argentina sa hlokomela “hore leha e le limillione tse mashome a tšeletseng tse shoeleng ntoeng ea bobeli ea lefatše, leha e le sephetho sa eona sa nuclear Hiroshima, leha e le lintoa tsa libetsa tse lekholo le mashome a mararo tse loanneng ha e sa le ho tloha ka nako eo ha lia lekana ho ruta motho hore o lintšing tsa ho itimetsa.” Ho ne ho ngongorehuoe ka ho teba hore “Mebuso e mehlano e nang le libetsa tsa nuclear e se e bokelletse lihlomo tsa nuclear tse fetang 50 000, bongata bo lekanang le litone tse tharo tsa liqhomane tse tloaelehileng bakeng sa moahi ka mong oa naletsana ea rōna.”
Litho tsa kamehla tsa Lekhotla la Tšireletso la Machaba a Kopaneng li ne Ii emetsoe, ’me tse ling tsa litlhaloso tsa tsona ke tse latelang:
Sehlopha sa Brithani se itse: “Sepheo sa leano la mantlha e tlameha ho ba ho thibela tlholisano ea lihlomo sepaka-pakeng. Leha ho le joalo, re lokela ho toba linnete . . . Sepaka-paka se se se ntse se hlomelletsoe ntoa.” Sehlopha sa France sa hatisa “hore ho hlōleha hoa Machaba a Kopaneng ho boloka khotso le tšireletseho ea lichaba tse ikentseng khokanyan’a-phiri ho tsoaloa ka ho khetheha ke Linaha tse ling tse tlōlang melao-metheo ea bohlokoa ea molao oa machaba le oa boitsoaro.” Sehlopha sa U.S.S.R. sa bolela kamoo “se amehileng haholo ka kotsi ea koluoa ea nuclear e sokelang moloko oa batho, e ka lebisang timetsong ea tsoelopele lefatšeng.” Sehlopha se emetseng U.S. se tlalehoa se itse se ne se tla “leka ho buisana ka hore tšebelisano-’moho ea machaba e-ea hlokahala bakeng sa ho loantša bokhukhuni.”
Ka lehlakoreng le leng la lefatše, Selemo sa Machaba sa Khotso se ile sa tšoauoa ka la 21 Tlhakubele ke seboka sa khorola-koqo Holong e Khōlō ea Sechaba Beijing. Tona-kholo ea China Zhao Ziyang o ne a kholisehile haholo ho feta ba bang ka ho re: “Ha feela batho ba lefatše ba ntse ba tsoela pele boikitlaetsong ba bona bo sa thekeseleng, ruri ba tla fumana khotso.”
Mabapi le Selemo sa Khotso sa Machaba sa Machaba a Kopaneng, Mopapa John Paul II o boletse hore Matla a Bopapa a batla ho susumetsa “letoto la litšebeletso tsa lefatšeng ka bophara tsa ho rapella khotso e amang lichaba tsohle le malumeli ’ohle.”
Khotso e sita lefatše lena. E be ke hobane’ng? Khotso ea sebele e tlameha ho theoa leratong; lefatše le arohantsoe ke boikhohomoso ba bochaba le lehloeo. Khotso ea sebele e hloka puso e bohlale le e lokileng; babusi ba batho ba sa phethahalang ba ke ke ba finyella tekanyetso ena. Khotso ea sebele e tlameha ho likoloha borapeling bo kopaneng ba Molimo o le mong oa ‘nete; malumeli a lefatše a arohile litsekana tsa mekha ea bokhelohi e likete ka mokhoa o nyahamisang, ’me ha ho le o mong o tlotlisang Jehova e le Morena ea Phahameng. Khotso ea sebele e batla ho tlosoa hoa “molimo oa lefatše lena,” Satane Diabolose le tsamaiso ea hae ea puso; ke ’Muso oa Jehova feela matsohong a Kreste oa Hae o ka thumakanyang Satane le mesebetsi ea hae.—2 Ba-Korinthe 4:4.
[Setšoantšo se leqepheng la 15]
Dolara ea gauda ea “khotso” ea Australia
Setempe sa lisheleng tse 10 sa “khotso” sa Kenya