Baromuoa ba Gileade—Ba Inehetse Morerong o le Mong
“ENA ke beke ea ho qetela le le liithuti, bekeng e latelang le tla ba baromuoa!” Mantsoe ao a hlalosa hantle boikutlo ba liithuti tse 23 tsa sehlopha sa bo81 sa Sekolo sa Bibele sa Gileade sa Watchtower tse neng li tla amohela mangolo a tsona. Ho tsona, le ba bang ba 4 262 ba neng ba tlile, lenaneo la ho amohela mangolo a thupelo le neng le tšoaretsoe Holong ea Lipaki tsa Jehova ea Jersey City, mohla la 7 Loetse, 1986, e tla ba letsatsi le ke keng la lebaloa.
Martin Poetzinger a bula lenaneo ka thapelo ’me Carey Barber, molula-setulo a kenyelletsa lenaneo ka ho bolela hore ka lilemo baevangeli ba likete-kete ba ile ba fumantšoa thupelo ea Gileade ’me ba inehetse morerong o le mong: ho romeloa likhutlong tsa lefatše e le baromuoa ba ’nete ba bolelang ka tšepo ea ’Muso. Re thaba haholo hakaakang hore e be baromuoa bana ba bacha, moeeng oa lebitso “Gileade,” ba tla fetoha ‘qhubu ea bopaki’!
Ho qalisa lenaneo, Milton Henschel a hlalosa hore liithuti tsena, joaloka baapostola mehleng ea Jesu, li itokiselitse mosebetsi o moholo. Moromuoa oa mosebetsi Pauluse o hlalositse hantle boikutlo ba hae ka mosebetsi ona ha a re: “Ke motho ea lokolohileng, ea leng taolong ea mang kapa mang; empa ke ikentse lekhoba la bohle, hore ke tle ke hape ba bangata.”—1 Ba-Korinthe 9:19, TLP.
Mantsoe ana a Pauluse a bontša eng? Hore baromuoa bana ba bacha ba lokela ho khahlehela batho. E lokela ho ba takatso ea bona ho thusa batho ba mefuta eohle ka molaetsa oa ’nete o pholosang bophelo—esita le bao ho ka etsahalang hore ba kopanela le mokhatlo o mong o hlophisitsoeng oa bolumeli.
Sebui se latelang, Theodore Jaracz, sa hopotsa baromuoa ba bacha hore, ho fapana le baeti ba eang libakeng tse ling ka morero oa ho boha naha, bona ba romiloe ka sepheo sa ho ea metseng e sa tšoaneng ea lefatše ho ea ruta litaba tse molemo. A ba khothalletsa ho hopola mohlala oa Jesu le oa barutuoa ba pele le oa baromuoa ba mehleng ena, bao ba bangata ba bona ba ntseng ba sebeletsa ka botšepehi likabelong tsa bona. “E bang le mohopolo o le mong,” o hlalositse. “Le se lumelle ho phehella lintho tse bonahalang ho le faposa. Haeba le boloka leihlo la lōna ‘le lokile,’ ka hona le tla ba le mohopolo o le mong.” (Luka 11:34) A eketsa: “Joaloka baromuoa ba Gileade, le inehetse morerong o le mong—ho batla batho ba tšoanelehang le ho bolela litaba tse molemo.”
Keletso e nakong ea fanoa ke Max Larson oa Komiti oa Feketheri mabapi le mehato eo ba ka e nkang ha ho hlaha mathata kabelong ea bona ea boromuoa. “U se tele,” o hlalositse. “Sebeletsa ho lokisa mathata a hao.” Joang? “Ka ho fumana mohopolo oa Molimo litabeng.” (1 Ba-Korinthe 2:11-16) Larson o hatelletse bohlokoa ba ho rapella thuso ea Jehova le ho hatella hore baromuoa ba hlokomele kamano ea bona le Molimo kamehla.
Lon Schilling oa Komiti oa Mapolasi a Watchtower a hatella bohlokoa ba ho hōlisa le ho boloka boikutlo bo nepahetseng ba kelello. “Likelello tsa lōna li tla sebetsa joang ha le talimane le phephetso kapa boemo bo hlokahalang hore le etse tokiso mohopolong?” a botsa. “Kaha re libopuoa tse neuoeng boikhethelo, re ikarabella ka liphello.” A bontša hore Molimo “ha o re tsamaise ka mochine o itseng o laolang lintho tse hōle.” Ka baka leo, baromuoa ha ba lokela ho lebella ho hongata ho Molimo ho feta ho utloahalang. Ba ithaopelang ho tataisoa ke Jehova Molimo ka Lentsoe la hae, moea oa hae, le mokhatlo oa hae o hlophisitsoeng ba tla boloka boikutlo bo botle ba kelello.
“Boikutlo ba lōna ka lintho tsa bohlokoa bo botle hakae?” Potso ena e botsitsoe ke Ulysses Glass, e mong oa barupeli Sekolong sa Gileade. Ka lipontšo tse ngata, morupeli enoa oa nako e telele o bontšitse hore “boikutlo bo leka-lekaneng, bo lemohang, le bo tsitsitseng ka lintho tsa bohlokoa bo tla nolofaletsa [baromuoa] ho boloka lithahasello tsa ’Muso li hlakile.” A phahamisitse setempe sa poso, a bolela hore, le hoja bohlokoa ba setempe bo le bonyenyane, mosebetsi oa sona o moholo ke matla a sona a ho khomarela nthong e le ’ngoe ho fihlela e fihla moo e eang teng.” A re: “Tšoanang le setempe seo, ’me le khomarele nthong e le ’ngoe—thomong ea lōna ea ho bolela—ho fihlela le fihla moo le eang teng, mose oane ho mahlomola a maholo.”
Jack Redford, morupeli oa Sekolo sa Gileade eo pele e neng e le moromuoa, puong ea hae e phethang o buile ka liphephetso tse ling tseo baromuoa ba bacha ba lokelang ho talimana le tsona. O hatisitse hore haeba ba tšepa Jehova ka ho feletseng ba ka hlōla tšitiso leha e le efe, ebang ke ho ithuta puo e ncha, ho hlolohela hae, ho phela le batho ba bang, ho amohela litloaelo tse fapaneng, kapa ho hlōla mathata a botho bo sa tšoaneng. Taba ea bohlokoa ke ena: “U se leke ho etsa lintho ka matla a hao. 1 Ba-Korinthe 3:9 e re, ‘Re ba sebetsang le Molimo.’” A ba tiisetsa: “Etsang karolo ea lōna ’me le kholisehe hore Jehova o tla etsa karolo ea hae.”
“Sekolo sa Gileade sa Bibele sa Watchtower ke mpho ea Molimo!” Ka mantsoe ao Frederick W. Franz, moprisedente oa Mokhatlo, a kenyelletsa puo ea ho qetella hoseng hoo. O boletse hore Sekolo sa Gileade “se lokiselitsoe batho ba tla sebeletsa e le lipaki, ba tla fana ka bopaki ba hore ’Muso oa Molimo ka Jesu Kreste oa busa.” A hopotsa sehlopha sena sa bo81 hore ho inehela ha sona morerong o le mong ho beha boikarabelo bo boholo ho sona “hobane se ea tšimong ea bopaki ka nako ea bohlokoa haholo historing ea motho. Jehova o behile holim’a rōna boikarabelo ba ho phatlalatsa litaba tse molemo tsa ’Muso le ho bontša batho bohle ba lefatše likhutlong tse hōle tsa lona tsela ea Molimo ea ho pholoha.”
Thabo le teboho ea monyetla oa ho ba Sekolong sa Gileade li ile tsa bonahala ha liithuti li amohela mangolo a tsona a thupelo. Kaha morero oa baromuoa o ne o hlakile, sehlopha sena sa bo81 sa Gileade, lengolong la sona ho Sehlopha se Busang le lelapa la Bethele, sa bontša hore se ikemiselitse ho sebeletsa lithahasello tsa Jehova Molimo ka botšepehi le ‘ho rorisa lebitso la hae’ lichabeng. (2 Samuele 22:50) Motšehare oa mantsiboea, kamor’a lipontšo tsa ho fana ka bopaki likabelong tsa nako e fetileng, New York le tšimong ea boromuoa, le tšoantšiso ea mehleng ena e susumetsang maikutlo, lenaneo la Gileade la phethoa ka thapelo ke Lyman Swingle.
Liithuti tse amohetseng mangolo tse 23 li ne li shebile pele ka tjantjello tšebeletsong ea boromuoa. Hobane’ng? E mong o hlalositse:
Na u ka eketsa tšebeletso ea hao ho Molimo le ho etsa hore e be e beang haholo? Haeba ho joalo, itšebelise joalokaha ho entse liithuti tsena e le hore u ka tšoaneleha tšimo ea boromuoa. Thabo e khōlō ea bona, le ea hao, ke hore ho fumanoe bophelo ba bona bo tletse ka tšebeletso e inehetseng ho Jehova.—Malakia 3:10.
[Lebokose le leqepheng la 22]
“Puo ea Moena Larson e hatisitse kelellong ea ka taba ea hore ho hlokahala re etse litokiso mehopolong. Hore ke phethahatse karolo ea ka ke le moromuoa, ke lokela ho qoba ‘mohopolo oa nama’ ’me ke batle mohopolo oa Jehova le oa Mora oa hae, Jesu Kreste.”—Alain Saint-Jean, ea abetsoeng New Caledonia.
[Lebokose le leqepheng la 23]
“Puo ea Moena Glass e nthusitse ho bona lintho tsa bohlokoa. Ha rea lokela ho khelosoa tseleng ke lintho tsa lefeela. Re lokela ho leka-lekana.”—Humphrey Hermanus, ea abetsoeng Suriname.
[Lebokose le leqepheng la 24]
“Ha ke mametse puo ea Moena Redford, ke ile ka ikutloa ke sireletsehiie ho tseba hore mathata ao re tla tobana le ’ona ha se a macha. Ba bang ba atlehile ho ahlola, ’me le rōna re ka a hlōla ka ho itšetleha ka matla a Jehova e seng a rōna.—Veronica Lipham, ea abetsoang Papua New Guinea.
[Lebokose le leqepheng la 24]
“Jesu o itse, ‘Rekisa maruo a hao, ’me u ntatele, . . . u bolele hohle ’muso oa Molimo.’ [Mattheu 19:21; Luka 9:60, NW] Sepheo sa tšebeletso ea boromuoa se ile sa hatisoa ke takatso ea ho batla ho thusa ba bangata ka tsela ea moea, sebakeng leha e le sefe seo ho hlokahalang thuso e joalo ho sona le moo e ka sebelisoang hamolemo ho sona.—Fredrick Steiner, ea abetsoang Guatemala.
[Lebokose le leqepheng la 24]
LIPALO-PALO TSA SEHLOPHA SENA:
Lenane la linaha tseo ba tsoang ho tsona: 7
Lenane la linaha tseo ba abetsoeng ho tsona: 12
Karolelano ea lilemo: 30,3
Karolelano ea lilemo ’neteng: 13,4
Karolelano ea lilemo tšebeletsong ea nako e tletseng: 9,3
[Litšoantšo tse leqepheng la 23]
COSTA, Alan le Betty United States
GANSLMEIER, Anton le Rita Jeremane
GONZALES, John le Cynthia United States
GRAULICH, Uwe le Katherine Jeremane
HERMANUS, Humphrey le Ludmila Netherlands Antilles
JOHANSEN, Bård le Ester Norway
KLOOSTERMAN, Otto le Yvonne Netherlands
LARSON, Gary le Annette Canada
LIPHAM, Mark le G. Veronica United States
SAINT-JEAN, Alain France
STEINER, Fredrick le Helen United States
SZYMANSKI, Cynthia United States
WILKE, David United States