Na U Ananela Lintho tse Halalelang?
“Phehellang [ho ba le] khotso le batho bohle, le khalalelo eo ntle le eona ho seng motho ea tla bona Morena, le talimile ka hloko . . . hore ho se be sehlola leha e le motho ofe kapa ofe ea sa ananeleng lintho tse halalelang, joaloka Esau, eo bakeng sa sejo se le seng a ileng a fana ka litokelo tsa hae joaloka letsibolo.”—BAHEBERU 12:14-16, NW.
1. Batho ba bangata ba bontša ho hloka kananelo joang, empa Bakreste ba fapane joang?
JEHOVA MOLIMO oa rōna ke Mofani ea seatla se bulehileng haholo. Ka bolokolohi o fana ka lintho tse hlokoang ke pōpo ea hae kaofela. Leha ho le joalo, boholo ba batho ha ba nahane ka ho teba ka sena. Ha ba lebohe Jehova kapa hona ho lumela hare ba mo kolota ho hoholo. Ka lehlakoreng le leng, Bakreste ha ba nke molemo oa Jehova e le lefeela. Ba mo hlompha bakeng sa seo a ba etsetsang sona. Ka baka la boinehelo ba bona ho eena, Jehova o beile lintho tse ’maloa tse halalelang letsohong la batho ba hae e leng hoo batho ka kakaretso ba sa ho thabeleng. Tsena ke lintho tsa bohlokoahali, tse behelletsoeng kathōko e le tse halalelang le tse amanang le borapeli ba Jehova. Na ua tseba hore na lintho tsee tse halalelang ke eng? Hona na u li ananela ka ho teba, ka pelo eohle?—Pesaleme ea 104:10-28; Mattheu 5:45; Tšenolo 4:11.
2. Ke mang ea bontšitseng ho hloka kananelo ho hoholo?
2 Hase bohle har’a batho ba Molimo ba ileng ba ananela lintho tse halalelang ka ho loketseng. Ka mohlala, Esau mor’a Isaaka o ile a hlōleha ntlheng ena. Pauluse o ile a bua ka eena ha a ne a ngolla Bakreste ba Baheberu ba tlotsitsoeng. Kamor’a ho qophella bana hore ba ‘phehelle ho ba le khotso le batho bohle,’ a ba lemosa hore ba kholisehe hore har’a bona ho se be “sehlola leha e le motho ofe kapa ofe ea sa ananeleng lintho tse halalelang, joaloka Esau, eo bakeng sa sejo se le seng a ileng a fana ka litokelo tsa hae joaloka letsibolo.”—Ba-Heberu 12:14-16, NW.
3, 4. Litokelo tse halalelang tsa letsibolo tseo Esau a ileng a li rekisetsa Jakobo bakeng sa sekotlolo sa sopho e ne e le eng?
3 Litokelo tsee tsa letsibolo e ne e le eng? Jehova o ne a tšepisitse ntate-moholo oa Esau, Abrahama, hore ka eena le litloholo tsa hae ho ne ho tla qetella ho hlahile eo e neng e tla ba Peō ea tšepiso, Messia, kapa Kreste. Ka Peō ena lichaba tsohle li ne li tla khona ho itlhohonolofatsa, e leng ho neng ho tla isa ho lopolloeng ha tsona sebeng le lefung.—Genese 22:15-18; Ba-Galata 3:16; NW.
4 Esau, letsibolo la Isaaka, o ne a ena le monyetla oa ho ba karolo,ea leloko le neng le tla hlahisa Peō eo. Ena e ne e le karolo ea tokelo ea hae ea tsoalo. Empa o ile a itlotlolla kaha tlaleho ea Bibele e bolela hore: “Esau o na a nyelise boholoane ba hae ka mokhoa o joalo.” Ka lehala o ile a bo rekisa bakeng sa sejo se le seng sa sopho ea lensisi le bohobe. Ka sebele, ha re batle ho etsisa ho hloka kananelo ha hae. Ho e-na le hoo, re lokela ho hlaolela boikutlo ba Jakobo, moen’a Esau. E ne e le eena ea latelang bakeng sa ho fumana tokelo ea tsoalo, eo a ileng a e reka ka ho bona ho hloka kananelo ho totobetseng ha moholoane oa hae. Kahona Jakobo o ile a netefatsa hore tokelo ea ho ba ntate-moholo oa Peō e tšepisitsoeng e fetisoa ka motho ea neng a nka ntho ena e halalelang e le ea bohlokoa ka ho loketseng.—Genese 25:27-34.
5. Ke lintho life tse halalelang tseo re tla nahana ka tsona, ’me re ka qoba ho li nka e le lefeela joang?
5 Kahare ho phutheho ea Bokreste, Jehova o fane ka lintho tse ngata tse halalelang ho re boloka re le matla moeeeng ’me re hlomeletsoe ka ho loketseng bakeng sa tšebeletso ea hae. Are ke re buisaneng ka tse ’maloa tsa tsona. Joale, re le batho ka bomong, re ka nahanisisa ka tsona ’me ra matlafatsa kananelo ea rōna bakeng sa tsona e le hore le ka mohla re se ke ra li nka e le lefeela.
Lebitso la Jehova le Topollo—Li Halalela Ka Ho Fetisisa
6. Ke ka litsela life re ka bontšang hore ha re nke khalalelo ea lebitso la Jehova e le lefeela?
6 Ho tlang pele lethathamong la rōna la lintho tse halalelang ke lebitso la Jehova. Lebitso lee le phahame hakae kelellong ea hao le pelong ea hao? Ha a fana ka thapelo ea mohlala, Jesu a qala ka ho re: “Lebitso la hao le halaletsoe.” (Mattheu 6:9, TLP) Ha re kolobetsoa, re fetoha ba bang ba Lipaki tsa Jehova. (Esaia 43:10, 11) Ke tlotla e kaakang! Hape ha re bua ka molemo oa Jehova le merero ea hae e hlollang, ba bang ba mo tseba ka lebitso la hae la botho, ’me le bona ba batla ho mo sebeletsa. Empa haeba motho a khaotsa ho bua ka eena, kapa ho hobe le ho feta, a kenella ho etseng ho fosahetseng, hona ho tlisa thohako lebitsong le letle la Jehova le botumong ba hae. Kamehla Lipaki tsa Jehova tse tšepahalang tsa Bakreste li loanela ho halaletsa lebitso la hae le halalelang pel’a ba bang ka seo li se buang le seo li se etsang.—Levitike 22:31, 32; Deuteronoma 5:11.
7. Ke hobane’ng ha re lokela ho bontša kananelo e feletseng bakeng sa sehlabelo sa topollo sa Kreste?
7 Ho hong ho kaholimo lethathamong la lintho tse halalelang ke sehlabelo sa topollo. Sehlabelo sa Kreste ke sa bohlokoa hakae ho uena? Ke feela motheong oa tumelo e feletseng sehlabelong sena se phethahetseng sa botho re ka tšoareloang libe. (1 Johanne 2:1, 2) Pauluse o bua ka phutheho e tlotsitsoeng e le ea “Molimo, eo a iphumanetseng eona ka mali a Mora oa hae.” (Liketso 20:28, TLP; bapisa 1 Petrose 1:17-19.) Jesu, Mora oa Molimo ea tsoetsoeng a ‘notši, o ile a tela setulo sa hae leholimong, a phela lefatšeng har’a banna le basali ba baetsa-libe, ’me a fana ka bophelo ba hae bo phethahetseng ba botho lefung la mahlomola thupeng ea tlhokofatso e le hore re ka fumana bophelo bo sa feleng. (Mattheu 20:28) E ne e tla ba ho hloka teboho ho phahameng ka ho fetisisa haeba letsatsi le leng le le leng motho a sa bontše kananelo e tebileng bakeng sa mpho ena ea bohlokoahali ea Molimo.—Ba-Heberu 10:28, 29; Juda 4, 5.
Kamano ea Rōna Le Jehova le Mokhatlo oa Hae o Hlophisitsoeng
8. Kamano ea rōna le Jehova ke ea bohlokoa hakae?
8 Sena se re tlisa nthong e ’ngoe e halalelang haholo, kamano ea rōna le Jehova. Re lokela ho tšoara kamano ena e haufi-ufi le Ntate oa rōna oa leholimo e le ea bohlokoa hakaakang! Haeba re ‘atamela Molimo, o tla re atamela.’ (Jakobo 4:8) O re rata haholo ’me hape o batla hore re mo rate ka lipelo tsohle tsa rōna. (Mattheu 22:37, 38; Johanne 3:16) Davida o ile a nea mora oa hae Salomone keletso e utloahalang mabapi le kamano ea hae le Jehova. Sena se ne se akarelletsa temoso ena: “Ha e le uena, mor’a ka Salomone, hlokomela Molimo oa ntat’ao, ’me u o sebeletse ka pelo eohle ea hao le ka moea o o ratang; hobane Jehova o botsisisa lipelo tsohle, ’me o lekola merero eohle le mehopolo eohle. Ekare ha u mo batla, o tla fumanoa ke uena; ha u mpa u mo furalla, o tla u lahla ka ho sa feleng.” (1 Likronike 28:9) Kahoo “le ipoloke leratong la Molimo, le ntse le lebeletse mohau oa Morena oa rōna Jesu Kreste, hore le fuoe bophelo bo sa feleng.”—Juda 21.
9. Ke ka litsela life re bontšang hore ha re nke tokelo ea ho ba karolo ea mokhatlo o hlophisitsoeng oa Jehova e le lefeela?
9 Na hape u ananela hore na ke tokelo e halalelang hakaakang ho ba karolo ea mokhatlo o hlophisitsoeng oa Jehova? Kaofela ha rōna re tlameha ho hopola hore re kahare ho oona feela ka baka la mosa o sa tšoanelang oa Jehova. Haeba motho a ipaka e le ea se nang kananelo ’me a fetoha mofosi ea sa bakeng, o tla lahleheloa ke tokelo ena. Pauluse o lemositse: “Ka baka leo, ea lekanyang hore o sa eme, a ke a iponele hore a se ke a oa.” (1 Ba-Korinthe 10:6-12) Pauluse o fane ka temoso ena kamor’a ho bolela ka Baiseraele ba 23 000 ba ileng ba shoa ka baka la borapeli ba litšoantšo le boitšoaro bo babe. Re ka bontša kananelo ea rōna bakeng sa khalalelo ea mokhatlo o hlophisitsoeng oa Jehova ka hore motho ka mong oa rōna a etse karolo ea hae ho o boloka o se na litšila, boitšoaro bo bobe, likomang, khoebo, le maikutlo a ho phahamela ba bang le leeme. (2 Ba-Korinthe 7:1; 1 Petrose 1:14-16) Re ka sebeletsa ho matlafatsa tlamahano ena ea lerato la boena, ha ka hloko re ntse re bolokile taolo ea puso ea Molimo ’me re sebelisana le ba etelletseng pele.—1 Ba-Thessalonika 4:3-8; 5:12, 13.
Lentsoe la Molimo, Melao ea Oona, le Tšepo ea ’Muso
10. Re bontša joang hore re ananela Mangolo a Halalelang ka botlalo?
10 Lentsoe la Molimo le bululetsoeng, Bibele e Halalelang, le lona le halalela haholo. Le tšoere likahlōlo tsa bomolimo, litaelo, taeo, litšepiso, litšenolo, e, sohle seo re se hlokang ‘ho re koetlisetsa mesebetsi eohle e lokileng.’ (2 Timothea 3:16, 17, TLP) Re ka bontša ho ananela see joang? Pele, ka ho ithuta lona le ho sebelisa seo re ithutang sona bophelong ba rōna. Joale, ka hore ka ho loketseng re ele hloko ‘lijo tse theiloeng Bibeleng tse tlang nakong ea teng’ tseo Jehova a fanang ka tsona ka “mohlanka ea khabane, ea bohlale.” (Mattheu 24:45) Hape ha re sheba litaba ho tsoa phihlelong, ho hlokahala hore re boloke likopi tsa rōna tsa botho tsa Bibele, le likhatiso tsa rōna tsa Bokreste tseo re li sebelisang mosebetsing oa rōna oa boboleli li le makhethe li bile li hloekile. Ho ka ’na ha tlisetsa Jehova thohako haeba re etsoa ho ea paka ’me re sebelisa Bibele e sa shebahaleng hantle kapa e litšila.
11. Ke hobane’ng ha re sa lokela ho nka melao e halalelang ea Jehova e le lefeela?
11 Kahare ho Lentsoe la Molimo ho na le melao e halalelang ea Jehova. Na kamehla u e talima e halalela, kapa ka linako tse ling u sekamela ho e nka habobebe? Melao ea Jehova e tšoana le matšoao, litšupiso, le mela e sehiloeng ka har’a tsela bakeng sa tšireletseho tseleng e eang bophelong. Haeba re e utloa re tla tsamaea re sireletsehile ’me qetellong re fihle moo re eang teng e leng lefatšeng le lecha la Jehova; empa haeba re nka litaelo tsa Jehova le likhopotso tsa hae habobebe, re se re ntse re lebile koluoeng.—Pesaleme ea 119:10, 11, 35, 101, 102; Liproverbia 3:1-4.
12. Tšepo ea rōna ea ’Muso ke ntho e halalelang joang?
12 Ka ho sebelisa Bibele, re boetse re ithuta ka ntho e halalelang eo e lokelang ho ba ea bohlokoahali lipelong tsa rōna: tšepo ea rōna ea ’Muso. Ha a bua ka Abrahama ea tšepahalang, Pauluse o bolela tjena ho Ba-Heberu 11:10: “Hobane o na a lebeletse motse [’Muso oa Molimo] o nang le motheo, oo Molimo e leng mohahi le mothei oa oona.” Na u na le tšepo e matla le e tšoarellang ka ho tšoanang ’Musong oa Molimo? Na tumelo ea hao e matla hoo pelo ea hao e se nang lipelaelo, le cheseho ea hao e lulang e sa fokotsehe ha u ntse u lebeletse merero ea Molimo hore e phethahale ka nako ea oona e loketseng?—Mattheu 24:20-22, 33, 34, 42.
Lipokano tse Halalelang le Litokelo tse Halalelang
13. Ke hobane’ng ha re sa lokela ho nka melemo ea liboka tsa Bokreste e le lefeela?
13 Pauluse o elelitse, “re isane ka cheseho leratong le mesebetsing e metle. Re se ke ra ngala liphutheho tsa rōna, kamoo e leng mokhoa oa ba bang.” Sena se bontša hore liboka tsa rōna tsa Bokreste ke tokisetso e ’ngoe e halalelang e sa lokelang ho nkoa habobebe. Ha re le libokeng, re fumana taeo ea bohlokoahali le botsoalle bo mofuthu tseo re li hlokang ka ho potlakileng. Hape mona re ka etsa “polelo ea phatlalatsa ea tšepo ea rōna” ka ho bua re le sethalleng ha re e-na le monyetla le ka ho fana ka litlhaloso kamehla. (Ba-Heberu 10:23-25, NW) Hape kaha Holo ea ’Muso ke hona moo boholo ba liboka tsa rōna li tšoareloang teng, na kamehla u etsa menehelo le ho sebetsa ka thata ho e boloka e hlokometsoe hantle?—Exoda 35:21.
14. Ke eng e tla re thusa ho ananela hore tšebeletso ea rōna ea Bokreste ke letlotlo le halalelang?
14 Pauluse o tšoantša tokelo ea ho bolela litaba tse molemo eo Bakreste ba nang le eona le “letlotlo le lipitseng tsa letsopa.” (2 Ba-Korinthe 4:1, 7, NW) E, tšebeletso ea Bokreste le eona ke ntho e halalelang eo re lokelang ho e ananela ka ho teba. Le hoja ba bangata bao re ba bolellang ba iphapantse, re lokela ho lula re ikhopotsa tokelo e phahameng eo re nang le eona ea ho bolella ba bang ka Jehova le merero ea hae. Ka ho etsa joalo re tla be re phetha thōmo ea rōna ea ho bolela litaba tse molemo tsa ’Muso oa Molimo le ho etsa barutuoa. (Mattheu 24:14; 28:19, 20) Ho shebella barutuoa ba bacha ha ba tsoela pele ke ntho e ’ngoe e thabisang. (1 Ba-Thessalonika 2:19, 20) Haeba re tšoara tšebeletso ea rōna e le letlotlo joalo, ha re na ho ba ba sa tsoeng kamehla kapa ba monyebe ntlheng ea ho phatlalatsa litaba tse molemo.
15. Ke hobane’ng ha ho hlokomela litokelo kahare ho mokhatlo o hlophisitsoeng oa Jehova ho sa lokela ho nkoa habobebe?
15 Litokelo tse kahare ho mokhatlo o hlophisitsoeng oa Jehova le tsona lia halalela. Ha e le hantle, litokelo tse joalo ke letlotlo le halalelang. (Bapisa Liketso 20:28) E-bang boikarabelo bo akareletsa bolebeli, bolisa, ho ruta, kapa tšebeletso e ’ngoe eitseng e etsetsoang Bakreste-’moho le rōna, e hlokomele ka hloko e fetisisang. Esita le haeba mosebetsi oo o bonahala o fokola, u se ke ua o nka habobebe, empa u o etse hantle, ka potlako, joalokaha u etsetsa Jehova. Hopola, “ea leng khabane ho tse nyenyane, le ho tse kholo o tla ba khabane.”—Luka 16:10.
Lenyalo le Lelapa
16. Ke ka litsela life re ka bontšang hore re talima lenyalo le lelapa e le lintho tse halalelang?
16 Lethathamong la lintho tse halalelang, u se ke ua lebala ho akarelletsa lenyalo le lelapa. Ke ’nete hore bao e seng Bakreste le bona ba ntse ba kena lenyalong, empa Bakreste ba talima lenyalo le halalela, le ameha borapeling ba bona ho Jehova. (Bapisa 1 Petrose 3:1-7.) Ba bontša hlompho joang bakeng sa ntho ee e halalelang? Ho Ba-Heberu 13:4 Bibele e re: “Lenyalo a le ke le hlomphehe har’a batho bohle, le liphate li hloke litšila; hobane Molimo o tla ahlola babōki le bafebi.” Jesu o lemositse hore ho lula u talimile mosali ka ho mo lakatsa ho ne ho tla lekana le ho feba ka pelong. (Mattheu 5:27, 28) Haeba u khetha ho kena lenyalong, u ho etse ka mokhoa o hlomphehang. Joale, le ka mohla u se nke lenyalo la hao e le lefeela. Hlaolela lerato la ’nete le hlompho e tebileng letsatsi le leng le le leng. Haeba u ena le bana, ‘ba hōlise ka ho ba laea le ka ho ba rutela Moreneng.’ Ka tsela ena lelapa la hao le tla “halalela.”—Ba-Efese 6:4; bapisa 1 Ba-Korinthe 7:14.
Moea o Halalelang oa Jehova le Thapelo
17. Ke hobane’ng ha re ke ke ra nka moea o halalelang oa Molimo e le lefeela?
17 Re hloka litokisetso tsa Jehova kaofela, ’me thuso e ’ngoe ea bohlokoa e tsoang ho Jehova ke moea oa hae o halalelang. (Johanne 14:26) Ka linako tse ling ha re tsebe litsela tseo ka tsona Jehova a sebelisang moea oa hae o halalelang molemong oa rōna, empa ntho e ’ngoe: Re ke ke ra tsoela pele kantle ho oona. Re lokela ho rapella moea o halalelang hore o re thuse ho utloisisa lithuto tsa ’nete le ho mamella liteko. Re o hloka hore o re thuse ho hlaolela litholoana tsa moea. (Ba-Galata 5:22, 23) Hape ho Ba-Efese 4:30 re lemosoa hore ‘re se ke ra soabisa’ moea o halalelang ’me ka ho kenella linthong tse o thibelang hore o tle ho rōna. E se eka kamehla re ka ananela moea o halalelang oa Jehova.
18. Ke hobane’ng ha thapelo e le tokelo e halalelang?
18 Ntho ea ho qetela e halalelang eo re tla buisana ka eona, thapelo, ka sebele ke ea bohlokoa haholo. Re na le tokelo e kaakang ea ho buisana le ’Musi oa bokahohleng, Jehova! Ka ho hlakileng, re lokela ho mo atamela ka hlompho, ka tšabo, le ka mohla re se mo atamele ka ho se tsotelle. Re ka kholiseha hore o tla utloa a be a arabele lithapelo tse etsoang tumellanong le thato ea hae. “Le se ke la belaella letho; empa nthong tsohle seo le se batlang, le ke le se tsebise Molimo ka thapelo le ka kōpo e nang le teboho.” (Ba-Filippi 4:6) Thapelo e tla re boloka re ntse re ananela lintho tse halalelang.
19. Ke mahlohonolo afe a tlelang ba ananelang ka ho loketseng lintho tse halalelang?
19 Re buisane feela ka lintho tse halalelang tse 13 tseo le ka mohla re sa lokelang ho li nka e le lefeela. Ho na le tse ling tse ngata tse ka boleloang. Haeba re ananela lintho tse joalo, re tla boloka kamano e ntle le Molimo oa rōna, Jehova, ’me re fumane tlhohonolofatso ea hae ea letsatsi le letsatsi. Hoo ho tlisa khotso e kaakang ea kelello, ’moho le letsoalo le letle! Le ka mohla u se nke kamano eo ea bohlokoahali e le lefeela! Rata Jehova ka pelo ea hao eohle, ka kelello ea hao eohle, ka moea oa hao oohle, le ka matla a hao ’ohle, ’me o tla u rata kamehla. (1 Johanne 4:16) Ha ho letho le ka senyang tlamahano eo ea lerato ha e se ho se tšepahale ha hao.—Ba-Roma 8:38, 39.
20. Re ka kholiseha joang hore re tla tsamaea ka katleho tseleng e eang bophelong lefatšeng le lecha la Jehova?
20 Hape a re ipolokeng re tšoarehile tšebeletsong ea ’Muso, re hlokomela litokelo tsohle tsa rōna hantle ’me re ananela litokisetso tsohle tsa moea. Ka lipelo tse tletseng teboho kamehla, e se eka re ka ba seli ho utloa melao eohle e halalelang ea Jehova le likhopotso tsa hae, re ananela hore li fanoe ho re tataisa re sireletsehile tseleng e eang bophelong. Hape, ha re tsoela pele ho tsamaea tseleng eo e tšesaane e eang bophelong, re na le monyetla oa hore Jehova ha a na ho re boloka re ntse re phela feela ho feta mahlomoleng a maholo empa hape o tla re fa bophelo bo sa feleng ka mahlohonolo a sa khaotseng lefatšeng la hae le lecha, leo joale le seng le le haufi haholo. O tla etsa sena sohle, hobane re ananetse lintho tse halalelang.
U ne u tla Fana ka Karabelo Efe?
◻ Re ka qoba ho nka lebitso la Jehova le sehlabelo sa topollo e le lefeela joang?
◻ Ke eng e ka ’nang ea bontša hore ha re ananele kamano ea rōna le Jehova le mokhatlo oa hae o hlophisitsoeng?
◻ Tse ling tsa lintho tse bontšang kananelo ea rōna bakeng sa Lentsoe la Molimo le melao ea oona, le tšepo ea ’Muso ke life?
◻ Re ka bontša joang hore ha re nke liboka tsa Bokreste le litokelo tsa puso ea Molimo e le lefeela?
◻ Lintho tse halalelang tse eketsehileng tseo re lokelang ho hlaolela kananelo e tebileng bakeng sa tsona ke life?