Jesu Bophelo le Tšebeletso tsa Hae

Ha Mora ea Lahlehileng a Fumanoa

HA MORA ea lahlehileng, kapa ea lehlasoa, papisong ea Jesu a khutlela ntlong ea ntat’ae, ke kamohelo ea mofuta ofe eo a e fumanang? Mamela ha Jesu a pheta:

“Eare ha a sa le hole, ntat’ae a ’mona, a mo utloela bohloko, a titima, a itihela molaleng oa hae, a mo aka.” Ke ntate ea mohau, le ea nang le kutloelo-bohloko hakaakang, ea emelang hamolemo Ntate oa rōna oa leholimo, Jehova!

Mohlomong ntat’ae o ne a ile a utloa ka bophelo ba bootsoa bo phetsoeng ke mora oa hae. Empa o mo amohela hae ntle le ho emela tlhaloso e felletseng. Jesu le eena o na le moea o joalo oa ho amohela, o nka bohato ba ho atamela baetsalibe le balekhetho, ba emeloang ke mora ea lehlasoa papisong ena.

Kannete, ntate ea nahanelang papisong ea Jesu ha ho pelaelo hore o na le mohopolo o itseng ka ho baka ha mora oa hae ka ho hlokomela ho soaba le moea o robehileng tse bonahalang ho mora oa hae ha a khutla. Empa bohato bo lerato bo nkoang ke ntate bo etsa hore mora a nolofalloe ho ipolela libe tsa hae, joalokaha Jesu a pheta: “Empa mora a re ho eena: Ntate, ke sitetsoe leholimo le uena, ’me ha ke sa tšoanela ho bitsoa mora oa hao. [“Nketse a mong oa bahlanka ba hao,” NW].”

Empa, le pele a qeta ho bua ntat’ae o nka khato, o laela bahlanka ba hae: “Phakisang, le tlise seaparo se selelele sa bohlokoa, le mo apese sona; le mo kenye lesale monoaneng, le be le mo roese lieta maotong; ’me le tlise namane e nontšitsoeng, le e hlabe, re tle re je, re nyakalle. Hobane mora enoa oa ka o na a shoele, ’me joale o boetse o pholohile; o na a lahlehile, ’me joale o boetse o fumanoe. ’Me ba qala ho nyakalla.”

Khabareng, ‘mora oa ntat’ae e moholo o na a le naheng.’ Bona haeba u ka khetholla hore na o emela mang ka hore u mamele karolo e setseng ea pale. Jesu o re ka mora e moholo: “Eitse ha a fihla a atamela ntlo, a utloa lipina le mehobelo. A bitsa e mong oa bahlanka, a ’motsa, a re: Taba tseo ke’ng? Eo a re ho eena: Moen’ao o fihlile, ’me ntat’ao o hlabile namane e nontšitsoeng, hobane o bile a ’mona a sa phela. Eaba oa halefa, a hana ho kena.

“Ntat’ae a mpa a tsoa, a mo rapela, a re, a kene. Eena a araba, a re ho ntat’ae: Bona! Ke u sebelelitse lilemo tse kalo, ke sa tlōle litaelo tsa hao, ’me ha u e-so ho ’nee le potsanyane hore ke thabe le metsoalle ea ka. Empa enoa mora oa hao, ea jeleng letlotlo la hao kaofela le linyatsi, ere a sa fihla, u mo hlabetse namane e nontšitsoeng.”

Ke bo-mang, bao joaloka mora e moholo, ba ileng ba nyatsa mohau le tlhokomelo tse bontšitsoeng baetsalibe? Na hase Bafarisi le bangoli? Kaha Jesu o ile a susumetsoa ho etsa papiso ena ke ha ba mo nyatsa ha a amohela baetsalibe, ka ho hlakileng e tlameha e be ke bona ba emeloang ke mora a moholo.

Jesu o phetha pale ea hae ka boipiletso ba ntate ho mora oa hae e moholo: “Ngoan’a ka, u ho ’na ka mehla, ’me tsohle tsa ka ke tsa hao. Empa re ne re tšoanetse ho nyakalla le ho thaba, hobane enoa, ngoan’eno, o na be a shoele, ’me o bile o pholohile; o na be a lahlehile, ’me o bile o fumanoe.”

Jesu o siea a sa hlakisa joalo seo mora e moholo a se etsang qetellong. Ka sebele, hamorao, ka mor’a lefu la Jesu le tsoho ea hae, ho ile “ha ba ha lumela le baprista ba bangata,” mohlomong ho akarelletsa le ba bang ba sehlopha sena sa “mora e moholo” bao Jesu a buang le bona mona.

Empa mehleng ee bara baa ba babeli ba emela bo-mang? E tlameha e be ke ba seng ba e-na le tsebo e lekaneng ka merero ea Jehova hoo ba nang le motheo oa ho ba le kamano le eena. Mora e moholo o emela litho tse ling tsa “mohlatsoana,” kapa ‘phutheho ea matsibolo ao mabitso a ’ona a ngotsoeng bukeng ea leholimo.’ Bana ba ile ba e-ba le boikutlo bo tšoanang le ba mora eane e moholo. Ba ne ba se na takatso ea ho amohela sehlopha sa lefatšeng, “linku tse ling,” tseo ba neng ba ikutloa hore li ba nkela boemo bo hlahelletseng ka pel’a batho.

Ka lehlakoreng le leng, mora ea lehlasoa, o emela batho ba bang ba Molimo ba tlohang ho ea thabela menate eo lefatše le fanang ka eona. Leha ho le joalo, ka nako ea teng, bana ba bakileng baa khutla ’me ba fetoha bahlanka ba mafolofolo ba Molimo hape. Ka sebele, ke Ntate ea lerato le ea mohau hakaakang ho bao ba hlokomelang hore ba hloka tšoarelo ’me ba khutlela ho eena! Luka 15:20-32; Liketso 6:7; Luka 12:32; Ba-Heberu 12:23, TLP; Johanne 10:16.

◆ Jesu o latela mohlala oa ntate ea nang le kutloelo-bohloko papisong ea hae joang?

◆ Pono ea mora e moholo ke efe ka ho amoheloa ha ngoan’abo, ’me Bafarisi ba ile ba itšoara joaloka mora e moholo joang?

◆ Papiso ea Jesu e sebetsa joang mehleng ea rōna?