Baboleli ba ’Muso Baa Tlaleha

Bopaki bo sa Reroang bo Beha Litholoana

JESU o ile a qalisa puisano e ileng ea lebisa bopaking bo sa reroang empa e le bo atlehang haholo ha a ne a re ho mosali oa Mosamaria selibeng: “Mphe, ke noe.” (Johanne 4:7) Ka ho tšoanang le rōna kajeno re ka ba ba atlehang haholo haeba re falimehetse menyetla eohle ea bopaki bo sa reroang. Moena e mong Australia o ile a qholotsa puisano e sa reroang ka ho bala temana ea letsatsi ha a lutse bencheng ea sebaka se seng sa boikhathollo. Monna e mong ea nang le thahasello o ile a hlokomela buka eo ’me a re le eena o ne a thahasella Mangolo. E ne e le Mok’hatholike ea seng a sa ee kerekeng ka mehla ea neng a rutiloe thuto ea hore lintho li ikentse sekolong se seng sa K’hatholike ’me joale a se a sa tsebe seo a ka se lumelang. Moena eo o ile a lokisetsa ho mo fumanela buka Life—How Did It Get Here? By Evolution or by Creation?a Matsatsi a mabeli hamorao o ile a isa buka eo mosebetsing oa monna eo, a mpa a fumana feela hore o ne a le sieo. Mongoli oa hae o ile a batla a phamola buka eo, a re: “Esale re emetse buka ena.”

Lihora tse peli hamorao moena o ile a fumana molaetsa oa fono-fono o tsoang ho monna eo a kōpa likopi tse ling tse peli tsa buka ea Creation ’me a kōpa hore Paki e mo etele ofising ea hae. Eitse ha moena a ea ofising eo, a fumana monna eo a le teng le ba bang hape ba babeli. Ho ile ha qalisoa thuto ea Bibele le bona, ho akarelletsa le mongoli eo, ’me ho ile ha etsoa litokisetso tsa hore moena a etele moo habeli ka beke. Libeke tse seng kae tse latelang, kharebe ea monna eo, eo e leng ‘Mokreste ea tsoetsoeng la bobeli,’ e ile ea ’na ea romella melaetsa e botsa lipotso tsa Bibele. Qetellong, e ile ea kopanela thutong eo, joalokaha ’mate oa monna eo oa khoebo le motsoalle oa hae, ea neng a lumela hore lintho li ikentse, ba ile ba etsa.

Ba ile ba ntšetsa lithuto tsa bona tsa Bibele pele ka mehla ka likhoeli tse hlano, bekeng e ’ngoe le e ’ngoe thuto ea bobeli e ne e tsamaisetsoa sebakeng se seng sa boikhathollo. Eaba mohlankana oa mongoli eo o kopanela thutong eo ea sehlopha. Kapele ka mor’a moo, ’mate oa monna eo oa pele le motsoalle oa hae ba ile ba fallela Idaho United States, moo ba ileng ba tsoela pele ho ithuta. Libeke tse seng kae hamorao, monna eo oa pele o ile a atameloa ke monna e mong eo a neng a sa mo tsebe ka ho felletseng, ea ileng a botsa hore na ho ne ho etsahale eng ka lipuisano tsa Bibele tse neng li le sebakeng se seng sa boikhathollo. Kamoo ho bonahalang ka teng, o ne a ntse a mametse lithuto tsa bona. Ho ile ha etsoa litokisetso tsa hore le eena a ithute.

See sohle se ile sa ba le phello efe? Likhoeli tse leshome le metso e robeli ho tloha kopanong eo ea pele sebakeng sa boikhathollo, monna eane oa pele le kharebe ea hae, eo pele e neng e le ‘Mokreste ea tsoetsoeng la bobeli,’ ba ne ba se ba nyalane ’me ba ile ba kolobetsoa. Mongoli le mohlankana oa hae le bona ba ile ba nyalana ’me ba kolobetsoa. ’Mate oa khoebo le motsoalle oa hae ba ileng ba ea United States ba ile ba kolobetsoa, ’me e mong oa bona o sebeletsa e le pula-maliboho ea thusang khafetsa. Eo ea neng a mametse lipuisano tsa Bibele sebakeng se seng sa boikhathollo o ile a ntšetsa lithuto tsa hae pele. Eaba o fallela Ireland, ’me o ne a lebelletse hore a kolobetsoe!

Sena sohle se etsahetse ka baka la hore moena o ile a sebelisa nako ea hae ea khefu ea lijo tsa motšehare hore a etse bopaki bo sa reroang, ’me Jehova o ile a hlohonolofatsa boiteko ba hae. E se eka le rōna ka ho tšoanang re ka sebelisa monyetla o mong le o mong ho phatlalatsa litaba tse molemo ho ba lapetseng molaetsa oa ’Muso oa Jehova!

[Mongolo o botlaaseng ba leqephe]