Ho Hlomelloa Bakeng sa Tšebeletso ea Boromuoa Lilemong tsa bo-1990
HO SIMOLOHA mehla e khethehileng bakeng sa tšebeletso ea boromuoa. Joalokaha ho buleha menyetla masimong a mangata a macha, Lipaki tsohle tse tšepahalang tsa Jehova li chesehela ho hatela pele mosebetsing o moholoanyane.
Kahoo ebile ka tjantjello e khōlō ha liithuti tse 24 tsa sehlopha sa bo89 sa Sekolo sa Watchtower sa Bibele sa Gileade se ne se e-ba teng lenaneong la sona la ho abeloa mangolo ka September 9, 1990. Baeti ba menngoeng le litho tsa lelapa la Bethele ba fetang 5 000 ba ile ba bōkana hammoho ho tla mamela lenaneo la ho abjoa ha mangolo a baromuoa bana ba bacha ba neng ba se ba amohetse likabelo tsa ho ea linaheng tse leshome. Ho tloha Holong ea Kopano ea Lipaki tsa Jehova e Jersey City, New Jersey, lenaneo lohle le ile la boela la utluoa ke ba neng ba bōkane Bethele ea Brooklyn, Mapolasing a Watchtower, le Setsing sa Thupelo sa Watchtower se Patterson, New York.
Hantle ka 10:00 hoseng, Theodore Jaracz, setho sa Sehlopha se Busang sa Lipaki tsa Jehova eo e neng e le molula-setulo letsatsing leo, o ile a mema bamameli hore ba kopanele pineng e bulang. Ka mor’a moo, Arthur Worsley oa lelapa la Bethele ea Brooklyn o ile a etsa thapelo. Joale molula-setulo o ile a bua ka Liketso 10:33, moo Kornele, molaoli oa lekholo oa Moroma a ileng a re ho Petrose: “Joale, re lutse mona kaofela pel’a Molimo, ho utloa tsohle tseo Molimo o u laetseng tsona.” Ho ile ha hlokomeloa hore liketsahalo tsa histori tse etsahetseng mehleng ea Petrose li ne li tla bula tsela ea hore litaba tse molemo li bolelloe batho ba lichaba tsohle.
Philip D. Wilcox, ea tsoang Mapolasing a Watchtower, o ile a fana ka puo ea pele letotong la lipuo tse supileng tse susumetsang. Ka Ba-Filippi 4:7 o ile a iketsetsa sehlooho se reng, “Lumella Khotso ea Molimo Hore e u Thuse Kabelong ea Hao.” O ile a re: “Jehova Molimo ke eena Mohloli oa khotso eohle ea ’nete. O thabela khotso ka kutloisiso e felletseng kapa e phethahetseng, ’me ha a utloe ho khathatseha ho tepelletsang maikutlong, tšabo, kapa ho se tsitse kelellong. Ka lebaka leo, ho na le khutso le khotso tse pota-potileng boteng bo khanyang ba Jehova a le teroneng ea hae joalokaha bo bontšitsoe ka mookoli o botala ba emerauda o bonoeng ke Johanne ponong. (Tšenolo 4:2, 3) Khotso ea hae ha e felle ho eena empa e fetela ho bohle ba tla e lumella hore e ba thuse. Na le tla e lumella hore e le thuse?” Moena Wilcox o ile a totobatsa lithuso tse peli tsa bohlokoa e leng thapelo le ho ikemisetsa ho letela Jehova. (Mikea 7:7; Ba-Filippi 4:6) O boletse hore ha ho letho leo Molimo o le lumellang le ka re bakelang kotsi ea ka ho sa feleng.
Lloyd Barry, setho sa Sehlopha se Busang, o ile a latela ka sehlooho se reng, “Tsoelang Pele le Bososela.” O ile a qala ka hore, “Litšeho ke moriana o molemo.” O ile a hopola mantsoe ao hobane morao koana ka 1955 e ne e le sehlooho sa leqephe le ka ntle la tokollo ea pele ea makasine oa Tsoha! e ileng ea hlaha ka Sejapane. Empa ke litšeho tsa mofuta ofe? Hase ‘litšeho tse lerata, tse hlokang kelello tsa maoatla.’ (Moeklesia 7:6) Ho e-na le hoo, ke litšeho tsa thabo, tsa khatholoho tsa baromuoa le ba bang ba ileng ba arabela memong ea Davida ea hore ka mehla ba ‘ithabele ho Jehova.’ (Pesaleme ea 32:11) Moena Barry o ile a hlokomela hore ho sa tsotellehe liteko tse sehlōhō, Jobo o ne a ka tsoela pele a bososela hobane a ne a tseba hore o bolokile botšepehi ho Molimo. Joaloka Jobo, baromuoa ba bolokang botšepehi ho sa tsotellehe liteko ba tla fumana tlhohonolofatso e enneng qetellong. (Jobo 29:24; 42:12) Sebui se ile sa phetha ka hore: “Ipolokeng le tšoarehile, tsoelang pele le bososela, ’me le lōna le tla kotula pososelo e sa feleng ea ho amoheloa ke Jehova.”
Sebui se latelang e bile Richard E. Abrahamson, ea ileng a khetha sehlooho se reng, “Kahlolo ea Lōna e Molemo e Tsejoe ke Batho Bohle,” se theiloeng ho Ba-Filippi 4:5. (NW) Ho latela Segerike sa pele, polelo ‘kahlolo e molemo’ e ka fana ka maikutlo a ho “tenyetseha.” Baromuoa ba bang ba bile le mathata feela ka baka la likhetho tsa botho. E mong o ile a makatsoa haholo ke kamoo moromuoa-’moho le eena a ileng a seha sekotoana sa chisi hampe ka teng tafoleng. Ka mor’a lilemo tse 22 tsa tšebeletso ea boromuoa, moromuoa ea ileng a makala o ile a hlokomela hore likhathatso tse ngata li bakoa ke lintho tse sa reng letho tse kang tsela eo e mong a sehang chisi ka teng. Sebui se ile sa eletsa: “Ithuteng ho tenyetseha joaloka sefate har’a moea oa sefefo. Ho na le melemo e mengata ea ho tenyetseha, joaloka ho tseba ho mamella liteko hamolemonyana le ho khomarela kabelo eo u e filoeng ka khotso ea kelello.”
Milton G. Henschel, oa Sehlopha se Busang o ile a bua ka sehlooho se reng, “Monyako o Moholo oa Tšebeletso o Bulehile.” Moena Henschel o ile a bolela hore Jesu o ne a rata batho, a ba utloela bohloko, ’me o ile a ba ruta lintho tse ngata. Ha moapostola Pauluse a le Efese, o ile a ngolla Bakorinthe: “Ke buletsoe monyako o moholo oa tšebeletso, empa ho le bahanyetsi ba bangata.” (1 Ba-Korinthe 16:8, 9, NW) Ho sa tsotellehe khanyetso ena, Pauluse o ile a ruta holong ea sekolo ea Tyranno ka lilemo tse peli hoo molaetsa oa ’Muso o ileng oa tsejoa seterekeng sohle sa Asia. (Liketso 19:9, 10) Monyako o bulehileng o ile oa etsa hore a atlehe boboleling ba hae. Phutheho ea Efese e ne e sa ntsane e sebetsa qetellong ea lekholo la pele la lilemo.—Tšenolo 2:1-7.
Jack D. Redford, morupeli oa Gileade o ile a bua ka sehlooho se reng, “Le ’Ne le Itekole Seo le Leng Sona.” (2 Ba-Korinthe 13:5) Baromuoa ba Gileade ba butse masimo a macha le ho matlafatsa liphutheho tse seng li theiloe, ba mamella lintho tse ngata le mahloriso ao Diabolose a ba tliselitseng ’ona hore a ba khelose. Ba bangata ba ntse ba kenela tšebeletso ea boromuoa. Ka liphihlelo tse peli o ile a etsa lipapiso ho bontša bohlokoa ba ho itekola ho bona haeba motho a sa le tumelong. Moromuoa e mong o ile a lahleheloa ke litokelo tsa hae ka mor’a hore ka boikhohomoso a hane keletso e mo lemosang ka tsela e fosahetseng eo a neng a e nkile. Ho fapana le hoo, moromuoa e mong o ile a lula kabelong ea hae ka thabo le hoja likhoeling tsa pele tse tharo a le moo a ile a kula haholo ka baka la boloetse bo felletseng ka hore a hlothehe moriri le ho lahleheloa ke kutlo. O sa ntse a le moo ka mor’a lilemo tse 42 ’me ka lithuto tsa Bibele, o thusitse batho ba 156 hore ba kolobetsoe. Moena Redford o ile a phetha ka hore: “Le hanele Diabolose, ’me le eena o tla le balehela. Le ka mohla le se amohele seo a le nehang sona hore a le khelose. Le ’ne le ipake seo le leng sona. Jehova o tla le hlokomela.”
Morupeli e mong, Ulysses V. Glass o ile a latela ’me a bua ka sehlooho se reng, “Bohlale bo ho ba Ikokobetsang.” (Liproverbia 11:2) O ile a sebelisa oache ea letsoho e nang le beteri e sebetsang ka matla a letsatsi ho bapisa kamoo khanya ea Lentsoe la Molimo e ka re bolokang re “chachiloe.” O bontšitse hore, “Empa tsebo feela ha e fane ka bohlale. Molimo o boetse o batla boikokobetso.” (Mikea 6:8) Boikokobetso bo tla etsa hore re tšabe Molimo, ’me “qalo ea bohlale ke ho tšaba Jehova.” (Liproverbia 9:10) Ke ’nete, re tlameha ho nahana ho itseng ka rōna; ho inyatsa haholo ho ka ba kotsi. Jehova o file ba bang matla a khethehileng a ho etsa lintho joalokaha a entse ha ho hahoa tabernakele, empa boikokobetso ba botšepehi bo tlameha ho sebeletsoa. Moena Glass o ile a bolella sehlopha: “Nakong ea thupelo le fane ka bopaki ba botšepehi le tlhompho. Bontšang botšepehi bo tšoanang kabelong ea lōna, ’me Molimo o tla le hlohonolofatsa.”
Albert D. Schroeder oa Sehlopha se Busang o ile a fana ka puo e khethehileng e nang le sehlooho se reng, “Ho Hlomelloa Hamolemo Bakeng sa Tšebeletso ea Boromuoa Lilemong tsa bo-1990.” O ile a simolla ka hore: “Lilemo tsa bo-1990 li bile le tšimoloho e atlehileng. Lichaba tse ngata tsa Europe Bochabela li se li sisintsoe. Likhoeling tse ’maloa tse fetileng Lerako la Berlin le ile la buloa. The New York Times e ne e na le sehlooho se reng: ‘August 1990, Khoeli e Ileng ea Sisinya Lefatše.’ Kahoo, lōna ba amohelang mangolo le phela nakong ea tšisinyeho. Na thupelo ea lōna ea likhoeli tse hlano e le hlomelletse hamolemo bakeng sa tšisinyeho eo? E, ho joalo!” Joale o ile a bolela tse ling tsa litšobotsi tse thusang tsa New World Translation of the Holy Scriptures—With References le kamoo ho ithuta Lentsoe la Molimo ho leng matla ka teng. Kofuto e ’ngoe e hlomelletseng liithuti hamolemo ke buka “Lengolo Lohle le Bululetsoe ke Molimo ’me le Molemo.” Buka e ncha Moloko oa Batho o Batla Molimo e lokela hoba thuso e ’ngoe e matla haholo ho baromuoa. Moena Schroeder o ile a phetha ka hore: “Ka baka leo, baena, lebohang Jehova ka thuto e hlollang, ea bohlokoahali eo le e fumaneng—e tiileng le e ke keng ea sisinngoa. Tsamaeang le tlhohonolofatso ea Jehova ’me le be le tšepo e felletseng ho eena le ho Moeta-pele oa rōna ea hlollang, Jesu Kreste. Ka sebele, mantsoe ao re nang le ’ona ka Mangolong a bululetsoe ’me a tla le thusa le ho le tataisa mosebetsing oa boromuoa.”
Ho ile ha baloa litumeliso tse tsoang linaheng tse 11. Liithuti li ile tsa amohela mangolo a tsona a diploma, ’me se seng sa tsona se ile sa bala lengolo le amang pelo le lebisitsoeng ho Sehlopha se Busang le lelapa la Bethele.
Lenaneo la motšehare oa mantsiboea le ne le kopanyelletsa kakaretso ea thuto ea Molula-Qhooa, e neng e tšoeroe ke David L. Walker, setho sa Komiti ea Mapolasi a Watchtower. Joale liithuti li ile tsa sebelisa sehlooho se susumetsang se reng, “Matla a Thapelo Mosebetsing oa Boboleli,” ho etsa lipontšo tsa liphihlelo tsa tšebeletso ea tšimo. Phutheho ea sebaka seo e ile ea etsa tšoantšiso e susumetsang e reng, Ho Lokolloa Bakeng sa ho Ntšetsa Borapeli ba ’Nete Pele, e theiloeng tabeng ea ha Esdrase a khutlela Jerusalema ho ntšetsa borapeli ba ’nete pele. Mopresidente oa Sekolo sa Gileade, Moena Frederick W. Franz, o ile a phetha ka thapelo e susumetsang.
[Setšoantšo se leqepheng la 24]
Sehlopha se Amohelang Mangolo sa bo89 sa Sekolo sa Bibele sa Gileade sa Watchtower
Lethathamong le ka tlaase mona, mela e baloa ho tloha ka pele ho ea ka morao, ’me mabitso a thathamisitsoe ho tloha ka letsohong le letšehali ho ea ka ho le letona moleng o mong le o mong. (1) Ahr, K.; Johnston, L.; Ng Ying Kin, V.; Sukkau, A.; Rodriguez, A.; Myklebust, N. (2) Ahr, H.; Verbeek, P.; Verbeek, K.; DeBolt, S.; DeBolt, S. (3) Sukkau, W.; Ayala, L.; Ayala, S.; Jenson, R.; Ng Ying Kin, J.; Myklebust, T. (4) Rodriguez, C.; Ferlisi, G.; Ferlisi, L.; Tank, J.; Jenson, K.; Tank, J.; Johnston, P.