Bibele—Na e Hlile ea Halalela?
KE BATHO ba bakae kajeno ba talimang Bibele e halalela, e le Lentsoe la Molimo? Mehleng ena eo ho eona batho ba tletseng lipelaelo ka bolumeli, ba bangata ba nahana hore e siiloe ke nako le hore hase ea bohlokoa, ba belaella hore na kannete ea halalela. Esita le baeta-pele ba bang ba bolumeli ba Bokreste-’mōtoana ba ruta hore Bibele e tletse lipale le litšōmo. Ba na le pelaelo mabapi le ‘hore na ebe tlhaloso ea Bibele litabeng tsa histori ke eo motho ea hlalefileng a ka e amohelang.’—The Interpreter’s Dictionary of the Bible, Moqolo 2, leqephe 611.
Liithuti tse hlahelletseng li jala lipelaelo mabapi le hore na ho nepahetse hore ho thoe Bibele ke Lentsoe la Molimo. Se seng se itse “haeba motho a batla ho sebelisa puo e kang e reng Bibele ke Lentsoe la Molimo, lebitso le loketseng bakeng sa eona e ne e tla ba hore ke Lentsoe la Iseraele, Lentsoe la Bakreste ba bang ba pele ba neng ba le ka sehloohong.” (The Bible in the Modern World, ea James Barr) Ke eng seo u se nahanang? Na Bibele ke Lentsoe la Molimo? Na e hlile ea halalela?
Ke Mang ea Ngotseng Bibele?
Ka tloaelo ho thoe buka ea pele ea Bibele, e leng Genese, e ile ea ngoloa ke Moshe, Moheberu ea ileng a phela lilemo tse 3 500 tse fetileng. Ho latela Bibele ka boeona, banna ba ka bang 40 ba tsoang mefuteng e sa tšoaneng ea bophelo ba ile ba kopanela ho ngoleng Mangolo a mang, phello ea e-ba hore ho be le pokello ea libuka tse 66, kapa likaroloana, tsa Bibele. Leha ho le joalo, banna bana ha baa ka ba inka joaloka baqapi ba sebele ba Bibele. Sengoli se seng se itse: “Lengolo lohle le bululetsoe ke Molimo.” (2 Timothea 3:16, NW) Se seng se ile sa ngola tjena ka lingoli tsa Bibele: “E bile ka ho susumetsoa ke Moea o Halalelang batho ba ileng ba bolela tse tsoang ho Molimo.”—2 Petrose 1:21, BPN.
Sena se beha lingoli sehlopheng sa bakopitsi, kapa bangoli, ba laoloang ke Molimo, kapa ba tataisoang ke oona. Ho latela Bibele, hangata sengoli se ne se lumelloa ho khetha mantsoe a sona ha se ngola boitsebiso boo se bo fuoeng ke Molimo. (Habakuke 2:2) Ke ka baka leo ho nang le mekhoa e mengata ea ho ngola e sebelisitsoeng ka hare ho Bibele eohle. Empa ka mehla ho ngoloa ha eona ho ’nile ha ba tlas’a tataiso ea Molimo.
Ke ’nete, hase hore ha lingoli tsena li bolela hore li bululetsoe ke Molimo e se e le bona feela bopaki ba hore Bibele ke molaetsa o tsoang ho Molimo oo ’Mōpi a o fetiselitseng ho batho. Leha ho le joalo, hore na Ea Holimo ka ho Fetisisa ke Moqapi oa Bibele kapa che ho ka bonoa ka ho hlakileng ha ho etsoa tlhahlobisiso e se nang leeme ea buka ena ka boeona. Na Bibele e fana ka bopaki ba hore e qapiloe ke Molimo? Ha e le hantle na re ka bua ka kholiseho hore Bibele ea halalela?