Beke e Ileng ea Fetola Lefatše

“Ho bokoe ea tlang ka lebitso la Morena!”—MATTHEU 21:9.

1. Ke lihlopha life tse fapaneng tse ileng tsa angoa ke liketsahalo tse etsahetseng ka August selemong se fetileng?

“MATSATSI A MARARO A MAHLONOKO A ILENG A TSUKUTLA LEFATŠE.” Ka August 1991, lihlooho tsa mecha ea phatlalatso tse kang sena li ile tsa hatisa hore lefatše le ka hlanama ka mor’a matsatsi a seng makae feela. Ka sebele, matsatsi a ho qetela a August ha ea ka ea e-ba a bohlokoa ho lefatše feela empa e bile a bohlokoa le ho sehlopha seo Jesu a itseng ka sona: “Hase karolo ea lefatše.” Kajeno sehlopha sena se tsejoa e le Lipaki tsa Jehova.—Johanne 17:14, NW.

2, 3. (a) Tokoloho e ile ea totobatsoa joang Zagreb ho sa tsotellehe tšokelo ea ntoa? (b) Tumelo e matla e ile ea putsoa joang Odessa?

² Kopano ea pele ea machaba ea Lipaki tsa Jehova e kileng ea lokisetsoa bakeng sa Yugoslavia e ne e lokiselitsoe hore e tšoaroe ka August 16 ho ea ho 18. Joalokaha ho ile ha fela ha e-ba joalo, e ne e tla boela e be kopano ea pele e khōlō ea batho ba Jehova sechabeng seo se lintšing tsa ho ba le ntoa ea lehae. Lipaki tsa sebaka seo, hammoho le baithaopi ba tsoang linaheng tsa boahisani, li ne li sebelitse ka likhoeli tse peli bakeng sa ho nchafatsa ka ho felletseng lebala la bolo la HAŠK Građanski le leng Zagreb. Le ne le hloekile ka ho fetisisa, e le sebaka se loketseng bakeng sa Kopano ea “Barati ba Tokoloho ea Bomolimo.” Baeti ba likete-kete ba tsoang linaheng tse ling ba ne ba rerile ho ba teng, ho akarelletsa le ba 600 ba tsoang United States. Ha tšokelo ea ntoa ea lehae e ntse e tōta, ho ne ho ntse ho thoe: “Maamerika a ke ke a tla ho hang.” Empa a ile a fela a tla, hammoho le baeti ba tsoang linaheng tse ling tse ngata. Ho ne ho lebelletsoe hore ho tla ba teng ba 10 000, empa letsatsing la ho qetela ho bile teng ba 14 684 lebaleng leo la lipapali! Bohle ba ile ba hlohonolofatsoa ka ho enneng hobane ha baa ka ba ‘furalla ho bokana ha bona hammoho.’—Ba-Heberu 10:25, NW.

³ Matsatsi a mararo ka mor’a kopano e neng e tšoaretsoe Zagreb, ho ile ha etsoa boiteko bo ileng ba nyopa ba ho ketola ’muso Soviet Union. Nakong eo, barati ba tokoloho ea bomolimo ba ne ba ntse ba etsa litokisetso tsa ho qetela tsa kopano ea bona e neng e tla tšoareloa Odessa Ukraine. Na kopano e ne e tla tšoaroa? Ka tumelo e matla baena ba ile ba etsa mosebetsi oa ho qetela oa ho nchafatsa lebala la lipapali ka ho felletseng, ’me baeti ba ile ba fihla ba sa khaotse. Joalokaha eka ke mohlolo, boiteko ba ho ketola ’muso bo ile ba fela. Ho ile ha tšoaroa kopano e thabisang ka August 24, 25, ’me ha ba teng ba 12 115 eaba ho kolobetsoa ba 1 943—e leng karolo ea 16 lekholong ea tlhōrō ea ba bileng teng! Lipaki tsena tse ncha, hammoho le ba ’nileng ba boloka botšepehi ka nako e telele, li ile tsa thaba hore li khone ho tla kopanong eo li e-na le tšepo e felletseng ho Jehova.—Liproverbia 3:5, 6.

4. Lipaki tse Europe Bochabela li ’nile tsa latela mohlala ofe o behiloeng ke Jesu?

⁴ Lipaki tsena tse tšepahalang li ne li latela mohlala o behiloeng ke Ea re Behetseng Mohlala, Jesu Kreste. Le ka mohla ha aa ka a hlokomoloha ho ba teng meketeng e laetsoeng ke Jehova, esita leha Bajode ba ne ba batla ho ’molaea. Ha a nyolohela Jerusalema bakeng sa ho keteka Paseka ea ho qetela, ba ne ba pealletse ka tempeleng, ba ntse ba botsa: “Lōna, ha le lekanya, le re’ng? Na a ke ke a tla moketeng?” (Johanne 11:56) Empa o ile a fela a tla! Sena se ile sa betla tsela bakeng sa beke e ileng ea fihla tlhōrōng ka ho hlanama ha histori ea batho. Na joale re ka hlahloba lintlha tse ling tse khōlō tse etsahetseng bekeng eo—Nisane 8 ho ea ho 14 ho latela almanaka ea Sejode?

Nisane 8

5. Jesu o ne a hlokometse eng ha a ntse a le tseleng e eang Bethania ka Nisane 8, 33 C.E.?

⁵ Letsatsing lena Jesu le barutuoa ba hae ba fihla Bethania. Mona, Jesu o ne a tla qeta masiu a tšeletseng a le lapeng la motsoalle oa hae ea ratoang Lazaro, eo a neng a sa tsoa mo tsosa bafung. Bethania e haufi le Jerusalema. Jesu o se a tsebisitse barutuoa ba hae ka lenyele: “Bonang, re nyolohela Jerusalema, ’me Mor’a motho o tla neeloa baprista ba baholo le bangoli; ba tla mo ahlolela lefu. Ba tla mo neela ba-lichaba, hore ba mo some, le ho mo shapa, le ho mo thakhisa sefapanong [“thupeng ea tlhokofatso,” NW]; ’me o tla tsoha ka tsatsi la boraro.” (Mattheu 20:18, 19) Jesu o hlokomela ka botlalo hore joale o tlameha ho tobana le liteko tse sisimosang. Leha ho le joalo, ha nako eo ea teko e khōlō e ntse e atamela, o etsa boiteko bohle ba ho sebeletsa baena ba hae ka lerato. E se eka ka linako tsohle re ka ba le “boikutlo bona ba kelello . . . bo neng bo boetse bo le ka ho Kreste Jesu.”—Ba-Filippi 2:1-5, NW; 1 Johanne 3:16.

Nisane 9

6. Mantsiboeeng a Nisane 9, Maria o ile a etsa eng, ’me Jesu o ile a re’ng ho Judase?

⁶ Ka mor’a shoalane, ha ho qala Nisane 9, Jesu o thabela lijo lelapeng la Simone eo pele e neng e le molepera. Jesu o ne a le mona ha khaitseli ea Lazaro Maria a mo tšela hloohong le maotong ka oli e theko e boima ’me ka boikokobetso a mo hlakola ka moriri oa hae. Ha Judase a hana, Jesu o re: “Mo lese; o se boloketse letsatsi la ho epeloa ha ka.” Ha baprista ba baholo ba utloa hore Bajode ba bangata ba ea Bethania le hore ba bontša tumelo ho Jesu, ba etsa ’momori oa ho ’molaea hammoho le Lazaro.—Johanne 12:1-7.

7. Hoseng ha Nisane 9, lebitso la Jehova le ile la hlomphuoa joang, ’me Jesu o ile a bolela eng esale pele?

⁷ Hoseng ka meso, Jesu o nka leeto le eang Jerusalema. Matšoele a tsoa ho ea mo khahlanyetsa, a ntse a tsoka makala a lipalema ’me a hoeletsa: “Hosanna! ho bokoe morena oa Iseraele, ea tlang ka lebitso la Morena!” Joale Jesu o phethahatsa boprofeta ba Zakaria 9:9 ka ho kena motseng a kalletse esele. Ha a atamela Jerusalema, oa e llela, o bolela esale pele hore Baroma ba tla e lika-liketsa ka lekhoakhoa le metsu e nchocho ’me ba e ripitle ka ho felletseng—e leng boprofeta bo neng bo tla phethahala ka tsela e hlollang lilemo tse 37 hamorao. (Sena se boetse se bontša hore Bokreste-’mōtoana, bo ’nileng ba latela mohlala oa Jerusalema ea boholo-holo ka ho koeneha, bo tla oeloa ke koluoa.) Babusi ba Bajode ha ba batle hore Jesu e be morena oa bona. Ba tletse khalefo ba re: “Bonang, lefatše lohle le mo setse morao.”—Johanne 12:13, 19.

Nisane 10

8. Ka Nisane 10, Jesu o ile a bontša tlhompho e tebileng joang bakeng sa ntlo ea Jehova ea thapelo, ’me ho ile ha latela eng?

⁸ Jesu o boetse o etela tempeleng. Ka lekhetlo la bobeli, o leleka bahoebi ba meharo le ba ananyang ka lichelete. Khoebo—“lerato la chelete”—ha ea lokela ho etsetsoa ntlong ea Jehova ea thapelo! (1 Timothea 6:9, 10, NW) Jesu o tla tloha a e-shoa. O tšoantša sena ka ho bua ka ho jaloa ha peō. Peō ea pele ea shoa, empa ea mela ’me e hlahisa lehlaka le behang koro e ngata. Ka ho tšoanang, lefu la Jesu le tla tlisetsa batho ba bangata ba bontšang tumelo ho eena bophelo bo sa feleng. A tšoentsoe ke lefu la hae le atamelang, Jesu o rapella hore lebitso la Ntate oa hae le tlotlisoe lefung leo. Ha Molimo o arabela, lentsoe la oona le luma le tsoa leholimong e le hore bohle ba leng teng ba ka le utloa: “Ke se ke le tlotlisitse, ’me ke tla ’ne ke le tlotlise!”—Johanne 12:27, 28.

Nisane 11—Letsatsi le Tletseng Mosebetsi

9. (a) Hoseng ha letsatsi la Nisane 11, Jesu o ile a sebelisa litšoantšo joang ha a nyatsa Bajode ba bakoenehi? (b) Tumellanong le setšoantšo sa Jesu, ke bo-mang ba lahlehetsoeng ke monyetla o hlollang?

⁹ Jesu le barutuoa ba hae ba boetse ba tloha Bethania bakeng sa ho etsa mosebetsi o moholo letsatsing leo. Jesu o sebelisa litšoantšo tse tharo ho bontša lebaka leo ka lona Bajode ba bakoenehi ba nyatsuoang ka lona. O ne a rohakile sefate sa feiga se sa hlahiseng litholoana, ’me boemo ba sona bo omelletseng bo emela sechaba sa Bajode se se nang tumelo, le se sa hlahiseng litholoana. Ha a kena ka tempeleng, o hlalosa kamoo qetellong balemi ba sa tšoaneleheng tšimong ea morara ea mong’a bona ba bolaeang mora le mojalefa oa mong’a tšimo—e leng se tšoantšetsang ho lahla ha Bajode letlotlo la bona le tsoang ho Jehova, ho tlang ho fihla tlhōrōng ka hore ba bolaee Jesu. O hlalosa mokete oa lenyalo o lokiselitsoeng ke morena—Jehova—eo baeti ba hae ba menngoeng (Bajode) ka boithati ba behang mabaka a ho ikemela a ho se be teng. Ka hona, memo e fetisetsoa ho batho ba ka ntle—Balichaba—bao ba bang ho bona ba ileng ba arabela hamolemo. Empa motho e mong ea fumanoeng a se na kobo ea lenyalo o ntšetsoa ka ntle. O emela Bakreste ba maiketsetso ba Bokreste-’mōtoana. Bajode ba bangata ba mehleng ea Jesu ba ne ba menngoe ‘empa ha khethoa ba seng bakae’ hore ba be har’a ba tšoailoeng ba 144 000 ba ruang lefa la ’Muso oa leholimo.—Mattheu 22:14; Tšenolo 7:4.

10-12. (a) Ke hobane’ng ha Jesu a ile a nyatsa baruti ba Bajode, ’me ke ho ba nyatsa ha mofuta ofe ho hlabang hoo a ileng a phareha baikaketsi bao ka bona? (b) Qetellong kahlolo e ile ea lihuoa joang holim’a Bajode ba bakoenehi?

¹⁰ Baruti ba baikaketsi ba Bajode ba batla monyetla oa ho tšoara Jesu, empa o arabela lipotso tsa bona tse ngata tsa bolotsana ’me o ba tlotlolla har’a batho. A Bajode bao ba bolumeli ba bakhelohi! Jesu o ba nyatsa pepenene hakaakang! Ba lakatsa botumo, liaparo tse ba khethollang, le litlotla tse phahameng, tse kang “Rabbi” le ‘Ntate,’ ho tšoana le baruti ba bangata ba mehleng ea rōna. Jesu o bolela molao-motheo ona: “E mong le e mong ea iphahamisang, o tla kokobetsoa, ’me e mong le e mong ea ikokobetsang, o tla phahamisoa.”—Mattheu 23:12.

¹¹ Jesu o nyatsa baeta-pele bao ba bolumeli ka tsela e hlabang. O ile a hooa tjena ka makhetlo a mararo: “Ho malimabe lōna,” a ntse a ba bitsa batataisi ba foufetseng le baikaketsi. ’Me nako le nako o fana ka lebaka le hlakileng la ho ba nyatsa. Ba thibela batho ho kena ’Musong oa maholimo. Ha ba tšoasa mosokolohi, o fetoha ngoana oa Gehenna ka makhetlo a mabeli, kaha mohlomong o se a ntse a le mocheng oa ho timetsoa ka baka la sebe se tebileng kapa cheseho e fetelletseng ea nako e fetileng. Jesu o re: “Maoatla le lifofu!” kaha Bafarisi ba lebisa tlhokomelo gauteng ea tempele ho fapana le ho ntšetsa pele borapeli bo hloekileng ho eona. Ba iphapanyetsa toka, mohau, le botšepehi ha ba ntse ba lefa karolo ea leshome ea koena, anetha, le kumine tse lakatsehang haholo, empa ba hlokomoloha litaba tsa bohlokoa tsa Molao. Ho hang ho itlhatsoa hoo ba ho fetotseng molao ho ke ke ha tlosa litšila tsa bona tse ka hare—ke pelo e hloekisitsoeng ke tumelo sehlabelong se atamelang sa Jesu e ka finyellang sena. Boikaketsi ba bona bo ka hare le ho hloka molao li shanofatsa ‘ho soeufala’ leha e le hofe ho ka ntle.—Mattheu 23:13-29.

¹² E, ka sebele Bafarisi ba malimabe, ha e le hantle ke “bana ba ba bolaileng baprofeta” ba boholo-holo! Ke linoha, malinyane a marabe, ba ahloletsoe ho akheloa Gehenna, hobane ba ke ke ba bolaea Jesu feela empa ba tla bolaea le bao a ba romang. Ena ke kahlolo e tla lihuoa holim’a “moloko ona.” Phethahatsong ea sena, Jerusalema e ile ea ripitloa ka ho felletseng lilemo tse 37 hamorao.—Mattheu 23:30-36.

13. Lipolelo tsa Jesu ka menehelo ea tempele li bonahala maemong afe kajeno?

¹³ Pele a tloha tempeleng, Jesu o babatsa mohlolohali e mong ea hlokang ea nokelang licheletana tse peli ka polokelong ea letlotlo—“hohle hoo a neng a phela ka hona.” Ka sebele hoo ho fapane haholo hakaakang le barui ba meharo, ba nokelang menehelo feela e sa tsoeng pelong! Joaloka mohlolohali eo ea hlokang, ka boithatelo Lipaki tsa Jehova kajeno li tela nako, matla, le lichelete e le hore li ka tšehetsa mosebetsi oa ’Muso o etsoang lefatšeng ka bophara le ho o atolosa. Li fapane hakaakang le baboleli ba thelevishene ba hlephileng boitšoarong ba hanyapetsang mehlape ea bona e be ba ipokellela leruo la botho!—Luka 20:45–21:4.

Ha Letsatsi la Nisane 11 le ea Malikelong

14. Jesu o ile a bontša ho utloa bohloko joang, ’me o ile a arabela potso ea barutuoa ba hae e tsoelang pele joang?

¹⁴ Jesu o llela Jerusalema le batho ba eona ’me o re: “Ho qala joale, ha le ka ke la hlola le mpona, ho be ho fihle mohla le tla re: Ho bokoe ea tlang ka lebitso la Morena!” (Mattheu 23:37-39) Hamorao, ha ba lutse Thabeng ea Mehloare, barutuoa ba hae ba haufi-ufi ba ’motsa ka sena, ’me Jesu ha a ba arabela o hlalosa pontšo e tla tšoaea ho ba teng ha hae matleng a ’Muso le qetello ea tsamaiso e khopo ea lintho ea Satane.—Mattheu 24:1–25:46; Mareka 13:1-37; Luka 21:5-36.

15. Jesu o ile a fana ka pontšo efe mabapi le ho ba teng ha hae bakeng sa kahlolo, ’me e phethahala ho tloha neng?

¹⁵ Ha Jesu a bua ka kahlolo ea Jehova e tla tloha e lihuoa holim’a tempele, o bontša hore sena se tšoantšetsa liketsahalo tsa tlokotsi tse tla etsahala nakong e tlang qetellong ea tsamaiso eohle ea lintho. Nako eo ea ho ba teng ha hae e tla tšoauoa ka ho qhoma ha ntoa eo ho seng e tšoanang le eona, hammoho le litlala, litšisinyeho tsa lefatše, le mafu a seoa, ho akarelletsa le ho hloka lerato le ho hloka molao. See e ’nile ea e-ba ’nete hakaakang lefatšeng la rōna la lekholo la bo20 la lilemo ho tloha ka 1914!

16, 17. Jesu o ile a hlalosa liketsahalo life tse neng li tla etsahala lefatšeng, ’me Bakreste ba lokela ho arabela joang boprofeteng?

¹⁶ Tlhōrō e tla finyelloa ‘mahlomoleng a maholo a e-s’o ka a e-ba teng ho tloha tšimolohong ea lefatše ho tla fihlela joale, ’me a ke ke a hlola a e-ba teng hape.’ Kaha mahlomola ana e tla ba a timetsang joaloka Moroallo oa mehleng ea Noe, Jesu o re lemosa khahlanong le ho tšoaseha lipakaneng tsa lefatše. “Lebelang hle; hobane ha le tsebe nako eo Morena oa lōna a tla tla ka eona.” Re lokela ho thaba hakaakang hore e be Morena o khethile “mohlanka ea khabane, ea bohlale” ea tlotsitsoeng hore a phatlalatse temoso le ho fana ka lijo tse ngata tsa moea letsatsing lena la ho ba teng ha hae!—Mattheu 24:21, 42, 45-47.

¹⁷ Lekholong la rōna la bo20 la lilemo, re bone ho ‘tsieleha ha lichaba lefatšeng, le ho ba matsoalong, ’me batho ba nehela moea ke tšabo le ke tebello ea tse tla tla lefatšeng.’ Empa Jesu oa re bolella: “Etlare ha tseo li qala ho hlaha, emisang lihloho, ’me le lelale holimo, hobane topollo ea lōna e tla be e atametse.” ’Me oa re hlokomelisa: “Le iponele, hore lipelo tsa lōna li se ke tsa imeloa ke ho ja le ho noa hampe, le ke lipelaelo tsa bophelo bona, ’me letsatsi leo la le tšoara sehlōhō.” Ke feela ka ho lula re falimehile re ka amoheloang ke Jesu, “Mor’a motho,” ho beng teng ha hae.—Luka 21:25-28, 34-36.

18. Re fumana khothatso efe litšoantšong tsa Jesu tsa baroetsana ba leshome le litalenta?

¹⁸ Ha Jesu a phetha ponelo-pele ea hae e hlollang ea liketsahalo tsa mehla ea kajeno, o fana ka litšoantšo tse tharo. Tabeng ea pele, setšoantšong sa baroetsana ba leshome, o boetse o hatisa tlhokahalo ea ho ‘lebela.’ Joale, setšoantšong sa bahlanka le litalenta, o bontša kamoo ho ba mahlaha-hlaha ho putsoang ka teng ka ho memeloa ho ‘kena thabong ea Morena.’ Bakreste ba tlotsitsoeng, ba tšoantšetsoang litšoantšong tsena, hammoho le linku tse ling ba ka khothatsoa haholo ke litlhaloso tsena tse matla.—Mattheu 25:1-30.

19, 20. Ke kamano efe e teng mehleng ea kajeno e thabisang e bontšoang setšoantšong sa Jesu sa linku le lipoli?

¹⁹ Setšoantšo sa boraro se bua ka ho ba teng ha Jesu matleng a ’Muso ka mor’a hore a fihle ’me a lule teroneng ea hae e khanyang ea leholimo. Ke nako ea ho ahlola lichaba le ho arola batho lefatšeng ka lihlopha tse peli, se seng e le se entsoeng ka batho ba ikokobelitseng ba kang linku, ’me se seng e le se entsoeng ka batho ba manganga ba kang lipoli. Linku li etsa boiteko bo matla ba ho iponahatsa li tšehetsa baena ba Morena—batlotsuoa ba setseng ba ntseng ba le lefatšeng nakong ena ea bofelo ba lefatše. Linku tsena li putsoa ka bophelo, athe lipoli tse hlokang kananelo li ea timetsong ea ka ho sa feleng.—Mattheu 25:31-46.

²⁰ Ke kamano e hlollang hakaakang eo re e bonang pakeng tsa linku tse ling le baena ba Morena qetellong ee ea tsamaiso ea lintho! Le hoja masala a tlotsitsoeng a ne a jarile mojaro o moholo oa boikarabelo ba mosebetsi qalong ea ho ba teng ha Morena, hona joale linku tse ling tse chesehang tse limillione li bōpa karolo ea 99,8 lekholong ea bahlanka ba Molimo ba lefatšeng. (Johanne 10:16) ’Me le tsona li ipakile li ikemiselitse ho mamella ‘tlala, lenyora, ho hlobola, ho kula, le ho kenngoa teronkong’ joaloka metsoalle ea batlotsuoa ba bolokang botšepehi.a

Nisane 12

21. Ke eng e ileng ea tiea ka Nisane 12, hona joang?

²¹ Morero oa ho bolaea Jesu oa tiea. Judase o etela baprista ba baholo tempeleng, o lumela ho eka Jesu e le hore a ka fumana likotoana tsa silevera tse 30. Esita le ketsahalo ena e ne e se e ntse e profetiloe.—Zakaria 11:12.

Nisane 13

22. Ho ile ha etsoa tokisetso efe ka Nisane 13?

²² Jesu, ea tsoang a ntse a le Bethania, mohlomong e le hore a ka rapela le ho thuisa, o roma barutuoa ba hae Jerusalema hore ba batle “’nyeo.” Ba lokisetsa Paseka ka kamoreng e khōlō e ka holimo, lapeng la monna enoa. (Mattheu 26:17-19) Ha letsatsi le likela ka Nisane 13, Jesu o kopanela le bona moo moketeng oa bohlokoa ka ho fetisisa historing eohle. Joale ke eng se larileng ka pele ka Nisane 14? Sehlooho sa rōna se latelang se tla re bolella.

[Mongolo o botlaaseng ba leqephe]

U ne U Tla Akaretsa Taba Joang?

◻ Batho ba bang ba ile ba bontša Jesu botsoalle joang le ho mo amohela ka li-8 ho fihlela ka li-10 Nisane?

◻ Jesu o ile a pepesa baruti ba baikaketsi joang ka Nisane 11?

◻ Jesu o ile a fana ka boprofeta bofe bo boholo, ’me bo phethahala joang kajeno?

◻ Liketsahalo li ile tsa fihla tlhōrōng joang ka li-12 le ka li-13 Nisane?

[Setšoantšo se leqepheng la 12]

Jesu o babatsa mohlolohali ea fumanehileng ea ileng a etsa monehelo ka licheletana tse peli—sohle seo a neng a e-na le sona