Ho Bua Lipuo Lisele—Boemo bo Ntseng bo E-ja Setsi

EMONG ea bileng le phihlelo e sa tloaelehang ea ho bua “puo e sa tsejoeng” o ile a re: “Matla a ne a laola leleme la ka ’me mantsoe a phorosela joaloka metsi. Ke ne ke thabile hakaakang! Ke ne ke na le boikutlo ba ho hloeka ho fetisisang. Ka mor’a moo, ha kea ka ka hlola ke tšoana le pele.”

Ena ke tlhaloso ea motho ka phihlelo ea hae ea pele ea ho bua “puo e sa tsejoeng.” Ka nepo ba bang ba ka ’na ba botsa, ‘Empa hoo ke eng?’ Ke ketso kapa tumelo ea likereke tse ling moo banna le basali ba bolelang hore ba susumetsoa ke moea oa Molimo ho bua lipuo tsa melata kapa tse sa tloaelehang tseo ba sa li tsebeng.

Ke boemo ba bolumeli bo ntseng bo e-ja setsi. Ho bua lipuo lisele ho ne ho nkoa e le ketso ea balumeli ba Mapentekonta feela, joale ho fetetse ka nģane ho meeli ea neano ea likereke hoo ho akaretsang Mabaptiste, Maepiskopale, Maluthere, Mamethodiste, Mapresbitery, le Maroma a K’hatholike. Boemo ba motho ea boemong bona bo hlalosoa e le ba cheseho e fetelletseng, ho tsukutleha maikutlo, ho lahleheloa ke kelello, le ho tšerehana. Hape ba bang ba ho bitsa phihlelo ea ho hapeha maikutlo. Ho na le khoheli e tsamaisanang le ho bua lipuo lisele.

Ke Hobane’ng ha Mpho ea ho Bua Lipuo Lisele e Lakatsoa Kajeno?

Bukeng ea hae Tongues of the Spirit, Cyril G. Williams o hlahisa hore mohlomong ho na le “kamano pakeng tsa boikutlo ba ho hlōleha, le takatso ea ho bua ‘lipuo lisele.’” O hlalosa ho bua lipuo lisele e le ntho e imollang e nang le “molemo oa ho phekola joaloka ntho e fokotsang khatello” le “e rarollang pherekano ea ka hare.” Pherekano mosebetsing oa kereke, khatello ea maikutlo, ho hlōleha mosebetsing, bohloko ba ho shoeloa, khatello ka lapeng, kapa ho kula ha e mong lapeng li boleloa e le lintho tse tlatsetsang puong e joalo e susumetsoang ke cheseho e fetelletseng.

Ka ho tšoanang, ho The Psychology of Speaking in Tongues, John P. Kildahl o re “matšoenyeho ke tlhokahalo bakeng sa ho ba le tsebo ea ho bua lipuo lisele.” Ka patlisiso ea botho le lipuisano, ho ile ha fumanoa hore “batho ba buang lipuo lisele ba ka holimo ho karolo ea 85 lekholong ba bile le matšoenyeho a hlalositsoeng hantle a tlileng pele ba bua lipuo lisele.” Ka mohlala, ’mè e mong o ne a batla ho bua lipuo lisele hore a tle a rapelle ngoana oa hae ea neng a tšoeroe ke kankere. Monna e mong o ile a qala ho bua lipuo lisele nakong ea ha a ne a sa khone ho etsa qeto ea ho amohela boemo bo phahameng mosebetsing. Mosali e mong o ile a qala ho bua lipuo lisele bekeng eo monna oa hae a ileng a kenela Mokhatlo o Thusang Makhoba a Tahi ho Hlōla Temallo ea Oona.

Phihlelo eo Motho a Bang le Eona ke Efe?

E mong ea ileng a bua lipuo lisele ka lekhetlo la pele o ile a tlaleha: “Ke ile ka ba le boikutlo bo chesang ka ho ’na, le mohatsela le marotholi a maholo a mofufutso, ho thothomela le ho fokola ho itseng ha litho.” Hangata ho ba le boikutlo bo sa tloaelehang boo ba bang ba bo bonang bo tšoenya bo tsamaisanang le phihlelo ea ho bua lipuo lisele. Ka mohlala, “ngoanana e mong o batlile a khangoa ke mathe ha a ne a ikotlolla setulong, molala oa hae o le karolong eo ho itšetlehoang ho eona, lirethe tsa hae li le fatše, a satalalitse maoto.” Nakong ea seboka se seng sa phutheho “monna e mong o ile a etsa hlana-phetho ho tloha karolong e ’ngoe ea kereke ho ea ho e ’ngoe.”

Moprofesa William J. Samarin oa ngola: “Ho batho ba bang, ho bua lipuo lisele ke tlhokahalo ea ho kolobetsoa ka Moea o Halalelang.” Ka ntle ho tsona, ba “ikutloa ba sa fella hantle.” Hape ho talingoa “joaloka karabelo ea lithapelo, tiiso ea lerato le kamohelo ea bomolimo.” Ba bang ba itse ho ba siea ka boikutlo ba ka hare ba khutso, thabo, le khotso, le ka “boikutlo bo boholoanyane ba matla” le “boikutlo bo tiileng ba bonngoe.”

Na kannete puo e susumetsoang ke cheseho e fetelletseng ke bopaki ba tšebetso ea moea o halalelang? Na phihlelo eo e khetholla motho e le Mokreste oa ’nete? Na ho bua lipuo lisele ke karolo ea borapeli bo amohelehang kajeno? Lipotso tsena li hloka karabo e felletseng. Hobane’ng? Hobane re batla hore borapeli ba rōna bo amoheloe le ho hlohonolofatsoa ke Molimo.