Itebeleng Khahlanong le Borapeli ba Melimo ea Litšoantšo ba Mefuta Eohle
“Tempele ea Molimo e na le tumellano efe le litšoantšo tse rapeloang?”—2 BA-KORINTHE 6:16.
1. Tabernakele le litempele tsa Iseraele li ne li tšoantšetsa eng?
JEHOVA o na le tempele eo ho sa luleng melimo ea litšoantšo ho eona. E ile ea tšoantšetsoa ke tabernakele ea Iseraele e ileng ea hahoa ke Moshe le ke litempele tseo hamorao li ileng tsa hahoa Jerusalema. Mehaho ena e ne e emela “tente ea ’nete,” tempele ea Jehova e khōlō ea moea. (Ba-Heberu 8:1-5, BPN) Tempele eo ke tokisetso ea ho atamela Molimo borapeling motheong oa sehlabelo sa Jesu Kreste sa thekollo.—Ba-Heberu 9:2-10, 23.
2. Ke bo-mang ba ileng ba fetoha litšiea tempeleng ea Molimo e khōlō ea moea, hona bongata bo boholo bo thabela boemo bofe?
2 Mokreste ka mong ea tlotsitsoeng o fetoha “tšiea tempeleng ea Molimo,” o ba le sebaka leholimong. “Bongata bo boholo” ba barapeli ba bang ba Jehova bo “nehelana ka tšebeletso e halalelang ho [Molimo]” ho se ileng sa emeloa ke lebala la tempele la Balichaba tempeleng e ileng ea tsosoa ke Heroda. Ka baka la ho ba le tumelo sehlabelong sa Jesu, ba na le boemo bo lokileng bo fellang ka ho bolokoa “mahlomoleng a maholo.”—Tšenolo 3:12; 7:9-15.
3, 4. Phutheho e lefatšeng ea Bakreste ba tlotsitsoeng e tšoantšoa le eng, hona e tlameha ho lokoloha litšileng life?
3 Ka tšoantšetso, phutheho ea Bakreste ba tlotsitsoeng ba leng lefatšeng e boetse e tšoantšoa le tempele e ’ngoe e lokolohileng borapeling ba melimo ea litšoantšo. Ho bana ba ‘tšoailoeng ke moea o halalelang,’ moapostola Pauluse o itse: “Le mohaho o theiloeng holim’a motheo oa baapostola le oa baprofeta, oo Jesu Kreste e leng eena lejoe la ntlha la oona; eo mohaho oohle o theiloeng holim’a hae, o kopaneng ka nģa tsohle, ’me o ntse o hōla ho ba tempele e khethehileng Moreneng. Le lōna le hahiloe hammoho ho eena, ho ba ntlo ea Molimo moeeng.” (Ba-Efese 1:13; 2:20-22) Bana ba tšoailoeng ba 144 000 ke “majoe a phelang” a “ho etsa ntlo ea moea, le boprista bo halalelang.”—1 Petrose 2:5; Tšenolo 7:4; 14:1.
4 Kaha baprista bana ba tlaasana ke “mohaho oa Molimo,” ha a lumelle hore tempele ena e silafatsoe. (1 Ba-Korinthe 3:9, 16, 17) Pauluse o ile a lemosa: “Se sikareng joko e le ’ngoe le ba sa lumelang; hobane kopano ke efe ea ho loka le bokhopo? Kapa leseli le na le kopano efe le lefifi? Kreste o na le selekane sefe le Beliale? kapa ea lumetseng o na le kabelo efe le ea sa lumelang? Tempele ea Molimo e na le tumellano efe le litšoantšo tse rapeloang?” Bakreste ba tlotsitsoeng, bao e leng ba “[Jehova] ea matla ’ohle,” ba tlameha ho lokoloha borapeling ba melimo ea litšoantšo. (2 Ba-Korinthe 6:14-18) Batho ba bongata bo boholo le bona ba tlameha ho qoba borapeli ba melimo ea litšoantšo ba mefuta eohle.
5. E le ha Bakreste ba ’nete ba hlokomela hore Jehova o batla boinehelo bo isoe ho eena a ’notši, ba etsa joang?
5 Ho na le mefuta e totobetseng le e poteletseng ea borapeli ba melimo ea litšoantšo. Che, borapeli ba melimo ea litšoantšo ha boa lekanyetsoa feela ho borapeli ba melimo le melimotsana ea bohata. Ke borapeli ba ntho leha e le efe kapa motho leha e le ofe ntle ho Jehova. Joaloka ’Musi oa Bokahohle, ka nepo o batla boinehelo bo isoe ho eena a ’notši ’me boa mo lokela. (Deuteronoma 4:24) Bakreste ba ’nete ha ba hlokomela sena, ba utloa litemoso tsa Mangolo tse khahlanong le borapeli bohle ba melimo ea litšoantšo. (1 Ba-Korinthe 10:7) A re hlahlobeng mefuta e meng ea borapeli ba melimo ea litšoantšo e lokelang ho qojoa ke bahlanka ba Jehova.
Ho Tšoantšetsoa Borapeli ba Melimo ea Litšoantšo ba Bokreste-’mōtoana
6. Ezekiele o ile a bona lintho life tse manyala ponong?
6 Moprofeta Ezekiele ha a le kholehong Babylona ka 612 B.C.E., o ile a ba le pono ea lintho tse manyala tse neng li etsoa ke Bajode ba bakoenehi tempeleng ea Jehova e Jerusalema. Ezekiele o ile a bona “setšoantšo sa poulelo.” O ile a bona baholo ba mashome a supileng ba nyehela libano tempeleng. O ile a bona basali ba llela molimo oa bohata. ’Me banna ba 25 ba ne ba rapela letsatsi. Liketso tsee tsa bokoenehi li ne li bolela eng?
7, 8. E ka ’na eaba “setšoantšo sa poulelo” e ne e le eng, hona ke hobane’ng ha se ile sa susumeletsa Jehova hore a boulele?
7 Borapeli ba melimo ea litšoantšo ba Bokreste-’mōtoana bo ne bo tšoantšetsoa ke lintho tse manyala tseo Ezekiele a ileng a li bona ponong. Ka mohlala, o itse: “Eaba ke emisetsa mahlo a ka ’nģa Leboea, ’me ka bona, ’nģa Leboea ho monyako oa aletare, setšoantšo seo sa poulelo se le monyako. [Jehova Molimo] a re ho ’na: Mor’a motho, na u bona seo ba se etsang na? Na u bona manyala a maholo ao ba ntlo ea Iseraele ba a etsang mona, hore ba tle ba ntšuthise pel’a sehalalelo sa ka?”—Ezekiele 8:1-6.
8 Setšoantšo sa borapeli ba melimo ea litšoantšo sa poulelo e ka ’na eaba e ne e le palo e halalelang e neng e emela molimotsana oa bohata oo Bakanana ba neng ba o nka e le mosali oa molimo oa bona Baale. Ho sa tsotellehe hore na setšoantšo seo e ne e le sa eng, se ne se etsa hore Jehova a boulele hobane se ne se arola boinehelo bo isoang ho eena a ’notši ba Iseraele e leng ho neng ho tlola melao ea hae: “Ke ’na Jehova Molimo oa hao . . . Ha ua tlameha ho ba le melimo e meng pel’a sefahleho sa ka. Ha ua tlameha ho iketsetsa setšoantšo se betliloeng kapa se nang le sebopeho sa ntho leha e le efe e maholimong kapa e lefatšeng ka tlase kapa e ka metsing tlas’a lefatše. Ha ua tlameha ho li khumamela kapa ho susumeletseha hore u li sebeletse, hobane ’na Jehova Molimo oa hao ke Molimo ea batlang boinehelo bo tlisoang ho ’na ke ’notši.”—Exoda 20:2-5, NW.
9. Bokreste-’mōtoana bo susumelelitse Molimo joang hore a boulele?
9 Ho rapela setšoantšo sa poulelo tempeleng ea Molimo ke e ’ngoe ea lintho tse manyala tse neng li etsoa ke Baiseraele ba bakoenehi. Ka ho tšoanang, likereke tsa Bokreste-’mōtoana li silafalitsoe ke litšoantšo tse hlomphollang Molimo tse arolang boinehelo bo ikhethang boo ba ipolelang hore ba bo fa Eo ba reng baa mo sebeletsa. Molimo o boetse o etsoa hore a boulele ka baka la hore baruti ba latola hore ’Muso oa hae ke tšepo feela bakeng sa moloko oa batho ’me ba etsa Machaba a Kopaneng molimo oa setšoantšo—‘manyala . . . a emeng nģalong e halalelang,’ moo a sa lokelang ho ema teng.—Mattheu 24:15, 16; Mareka 13:14.
10. Ezekiele o ile a bona eng ka har’a tempele, hona see se tšoana joang le se bonoang ho Bokreste-’mōtoana?
10 Ezekiele ha a kena tempeleng oa tlaleha: “Ha ke talima, ka bona litšoantšo tse ngata tsa lihahabi le tsa liphoofolo tse iloang, le litšoantšo tsohle tsa ntlo ea Iseraele li tšoantšitsoe lerakong, ho le pota ka ’nģa tsohle. Hape, ho le banna ba mashome a supileng bao e leng baholo ba ntlo ea Iseraele . . . ba eme pel’a tsona, e mong le e mong a e-na le pitsa ea hae ea libano ka letsohong la hae, ’me mosi oa leru la libano oa thukhuthela.” Ak’u nahane! Baholo ba Baiseraele ba le tempeleng ea Jehova, ba nehelana ka libano ho melimo ea bohata, e emeloang ke litšoantšo tse entsoeng marakong. (Ezekiele 8:10-12) Ha ho bapisoa, linonyana le liphoofolo tse hlaha lia sebelisoa linaheng tsa Bokreste-’mōtoana, e leng tseo batho ba inehelang ho tsona. Ho feta moo, baruti ba bangata ba molato oa ho thusa ho khelosa batho ka ho buella thuto e fosahetseng ea hore motho o iphetotse ho tloha mefuteng ea bophelo ea liphoofolo tse tlaase ho motho ho e-na le ho tšoarella tlalehong ea ’nete ea Bibele ea pōpo ka Jehova Molimo.—Liketso 17:24-28.
11. Ke hobane’ng ha basali ba Baiseraele ba bakoenehi ba ne ba llela Tammuze?
11 Monyakong oa heke ea ntlo ea Jehova, Ezekiele o ile a bona basali ba bakoenehi ba Baiseraele ba llela Tammuze. (Ezekiele 8:13, 14) Bababylona le Baasyria ba ne ba nka Tammuze e le molimo oa limela tse bang teng nakong ea lipula ebe lia shoa ka komello. Ho shoa ha limela tsena ho ne ho bolela ho shoa ha Tammuze, eo a neng a lleloa selemo le selemo ke barapeli ba hae nakong eo ea mocheso oa leteteru. Ha limela li boetse li hlaha nakong ea lipula, ho ne ho nahanoa hore Tammuze o khutla lefatšeng le ka tlaase. O ne a emeloa ke tlhaku e qalang ea lebitso la hae, tau ea boholo-holo eo e neng e le mofuta oa sefapano. Sena ka ho loketseng se re hopotsa ka borapeli ba Bokreste-’mōtoana ba sefapano.
12. Ezekiele o ile a bona banna ba bakoenehi ba 25 ba Baiseraele ba etsa eng, hona ke ketso efe e tšoanang e etsoang ke Bokreste-’mōtoana?
12 Lebaleng le kahare la tempele, Ezekiele o ile a bona banna ba bakoenehi ba 25 ba Baiseraele ba rapela letsatsi—e leng ho tlola molao oa Jehova o khahlanong le borapeli bo joalo ba melimo ea litšoantšo. (Deuteronoma 4:15-19) Barapeli bao ba litšoantšo ba ne ba boela ba phahamisetsa lekala le litšila ka pel’a Molimo, mohlomong le emelang setho sa motho sa botona. Hase feela Molimo o sa kang oa arabela lithapelo tsa bona, joalokaha le Bokreste-’motōana bo tla batla thuso ea hae ka ‘mahlomola a maholo,’ empa bo ke ke ba e fumana. (Mattheu 24:21) Joalokaha Baiseraele bao ba bakoenehi ba ne ba rapela letsatsi le fanang ka leseli ba furaletse tempele ea Jehova, le Bokreste-’mōtoana bo iphapanyetsa leseli le tsoang ho Molimo, bo ruta lithuto tsa bohata, bo etsa bohlale ba lefatše molimo oa setšoantšo, ’me bo iphapanyetsa boitšoaro bo bobe.—Ezekiele 8:15-18.
13. Lipaki tsa Jehova li qoba mekhoa ea borapeli ba melimo ea litšoantšo e bonoeng ponong ea Ezekiele ka litsela life?
13 Lipaki tsa Jehova li qoba mekhoa ea borapeli ba melimo ea litšoantšo bo sebelisoang ho Bokreste-’mōtoana, kapa se tšoantšoang ke Jerusalema, joalokaha ho ile ha boleloa esale pele ke Ezekiele. Ha re etse litšoantšo tse hlomphollang Molimo melimo ea litšoantšo. Le hoja re hlompha “balaoli ba phahameng,” boikokobetso ba rōna ho bona bo lekanyelitsoe. (Ba-Roma 13:1-7, NW; Mareka 12:17; Liketso 5:29) Boinehelo ba rōna ba pelo bo nehoa Molimo le ’Muso oa hae. Ha re kenye thuto ea ho iphetola ha lintho bakeng sa ’Mōpi le pōpo ea hae. (Tšenolo 4:11) Ha ho mohla re hlomphang sefapano kapa re etsang bohlale ba batho bo tebileng, filosofi, kapa mefuta leha e le efe ea bohlale ba lefatše melimo ea litšoantšo. (1 Timothea 6:20, 21) Re boetse re itebela khahlanong le borapeli ba melimo ea litšoantšo ba mefuta e meng eohle. E meng ea eona ke efe?
Mefuta e Meng ea Borapeli ba Melimo ea Litšoantšo
14. Bahlanka ba Jehova ba nka boemo bofe mabapi le “sebata” sa Tšenolo 13:1?
14 Bakreste ha ba kopanele le batho ho etseng “sebata” molimo oa setšoantšo. Moapostola Johanne o itse: “Eaba ke bona sebata se nyolohang leoatleng, se nang le lihloho tse supileng le linaka tse leshome; linakeng tsa sona se ne se roetse meqhaka e leshome . . . Se tla rapeloa ke bohle ba ahileng lefatšeng.” (Tšenolo 13:1, 8) Libata li ka emela “marena,” kapa babusi ba lipolotiki. (Daniele 7:17; 8:3-8, 20-25) Kahoo lihlooho tse supileng tsa sebata sa tšoantšetso li emela mebuso ea lefatše—Egepeta, Assyria, Babylona, Medo-Persia, Greece, Roma, le ’Muso oa Manyesemane le Maamerika o kopantseng Brithane le United States of America. Baruti ba Bokreste-’mōtoana ba bontša ho se hlomphe Molimo le Kreste haholo ka ho etella batho pele hore ba etse tsamaiso ea lipolotiki ea Satane, “morena oa lefatše lena,” molimo oa setšoantšo. (Johanne 12:31) Leha ho le joalo, bahlanka ba Jehova joaloka Bakreste ba sa nkeng lehlakore le batšehetsi ba ’Muso, ba hana borapeli bo joalo ba melimo ea litšoantšo.—Jakobo 1:27.
15. Batho ba Jehova ba nka likhalala tsa lefatše joang, hona Paki e ’ngoe e kile ea re’ng tabeng ee?
15 Batho ba Molimo ba boetse ba hana ho etsa likhalala tsa boithabiso le tsa lipapali tsa lefatše melimo ea litšoantšo. Ka mor’a ho fetoha Paki ea Jehova, monna e mong oa sebini o ile a re: “’Mino oa boithabiso kapa oa tantši o ka tsosa litakatso tse fosahetseng . . . Libini li bina ka thabo le bonolo tseo bamameli ba bangata ba nahanang hore lia haella ho molekane oa bona oa lenyalo. Hangata sebini se tšoantšoa le seo se binang ka sona. Libini tse ling tse hloahloa tseo ke li tsebang li ratoa ke basali ka baka la sena. Hang ha motho a qoela lefatšeng lena la litoro, ho ka etsa hore a etse sebini molimo oa setšoantšo. Ho ka qala ka mokhoa oa hore feela motho a kōpe hore sebini se ngole lebitso la sona bukeng ea hae e le boikhopotso. Empa ba bang ba nka sebini e le motho oa bohlokoa, ’me ka ho se fa hlompho e sa lokelang, ba se etsa molimo oa setšoantšo. Ba ka fanyeha setšoantšo sa khalala leboteng ’me ba qala ho apara le ho itlhopha joaloka sona. Ho hlokahala hore Bakreste ba hopole hore tlhompho ea borapeli e lokela ho lebisoa ho Molimo feela.”
16. Ke eng se bontšang hore mangeloi a lokileng a hana borapeli ba melimo ea litšoantšo?
16 E, ke Molimo feela ea lokeloang ke tlhompho kapa borapeli. Ha Johanne a “itihela ho khumama maotong a lengeloi” le ileng la ’montša lintho tse makatsang, sebōpuoa seo sa moea se ile sa hana ho etsoa molimo oa setšoantšo ka tsela leha e le efe empa sa re: “Se etse hoo; hobane ke molekane oa hao oa tšebeletso, le oa banab’eno ba baprofeta, le oa ba bolokang lipolelo tsa buka ena. Khumamela Molimo.” (Tšenolo 22:8, 9) Ho tšaba Jehova, kapa ho mo neha tlhompho e tebileng ea borapeli, ho re etsa hore re rapele eena a le mong. (Tšenolo 14:7) Ka hona, boinehelo ba ’nete ba bomolimo bo re sireletsa borapeling ba litšoantšo.—1 Timothea 4:8.
17. Re ka itebela joang borapeling ba melimo ea litšoantšo ba boitšoaro bo bobe ba likamano tsa botona le botšehali?
17 Boitšoaro bo bobe ba likamano tsa botona le botšehali ke mofuta o mong oa borapeli ba litšoantšo bo hanoang ke bahlanka ba Jehova. Baa tseba hore “mofebi, leha a le mong, le ea litšila, le ea ratang leruo, e leng motho ea sebeletsang melimo ea bohata—ha ba na kabelo ’musong oa Kreste le Molimo.” (Ba-Efese 5:5) Borapeli ba melimo ea litšoantšo bo ama lintho tse ngata hobane ho lakatsa monate o fosahetseng ho fetoha ntho eo motho a inehelang ho eona. Litšoaneleho tsa bomolimo li behoa kotsing ke litakatso tse sa lokelang tsa botona le botšehali. Ka ho lebisa mahlo le litsebe lingoliloeng tsa boitšoaro bo bobe, motho o beha kotsing kamano leha e le efe eo a ka bang le eona le Molimo o halalelang, Jehova. (Esaia 6:3) Ka baka leo, e le ho itšireletsa borapeling ba melimo ea litšoantšo, bahlanka ba Molimo ba tlameha ho qoba libuka tsa litšoantšo tsa boitšoaro bo bobe le ’mino o senyang. Ho hlokahala hore ba itšoarelle ka litekanyetso tse matla tsa moea tse thehiloeng Mangolong, ’me ba tlameha ho boloka “botho bo bocha bo bōpiloeng ho ea ka thato ea Molimo ho lokeng le botšepehing ba ’nete.”—Ba-Efese 4:22-24, NW.
Qoba Meharo le Takatso e Mohono
18, 19. (a) Meharo le takatso e mohono ke eng? (b) Ke joang re ka itebelang khahlanong le meharo le takatso e mohono e bontšang borapeli ba melimo ea litšoantšo?
18 Bakreste ba boetse ba itebela khahlanong le meharo le takatso e mohono, tse amanang haholo-holo le borapeli ba melimo ea litšoantšo. Meharo ke takatso e feteletseng kapa ea ho senya, ’me takatso e mohono ke meharo e bang teng bakeng sa ntho ea e mong. Jesu o ile a lemosa khahlanong le takatso e mohono ’me a bua ka monna oa morui ea nang le takatso e mohono ea sa kang a rua molemo leruong la hae ha a shoa ’me a ba boemong bo soabisang ba ho se “ruele ho Molimo.” (Luka 12:15-21) Ka ho loketseng Pauluse o ile a eletsa balumeli: “Le bolaee . . . litho tsa lōna tse leng lefatšeng mabapi le . . . takatso e mohono, e leng borapeli ba melimo ea litšoantšo.”—Ba-Kolosse 3:5, NW.
19 Batho ba ratang chelete haholo, ba nang le meharo e sa laoleheng ea lijo le lino, kapa ba hahamallang matla ba etsa litakatso tse joalo melimo ea bona ea litšoantšo. Joalokaha Pauluse a boletse, motho ea meharo ke morapeli oa melimo ea litšoantšo ’me a ke ke a ja lefa la ’Muso oa Molimo. (1 Ba-Korinthe 6:9, 10; Ba-Efese 5:5) Kahoo, batho ba kolobelitsoeng ba kopanelang borapeling ba melimo ea litšoantšo ka ho ba batho ba meharo ba ka khaoloa phuthehong ea Bokreste. Leha ho le joalo, ka ho sebelisa Mangolo le ho rapela ka tieo, re ka qoba meharo. Liproverbia 30:7-9: “Li peli tseo ke li kōpileng ho uena, [Jehova] Molimo; u se ke ua nkhanela le tsona, ke e-so ho shoe. Suthisetsa bosaoana le puo ea leshano hole le ’na. U se ke ua mpha bofuma, leha e le maruo; mphepe ka bohobe bo ntekanang; e se re mohlomong ha ke khotše, ka u latola, ka re: Jehova ke mang na? mohlomong ha ke fumanehile, ka utsoa, ’me ka tlaela ka lebitso la Molimo oa ka.” Moea o joalo o ka re thusa hore re itebele meharong le takatsong e mohono eo e leng borapeli ba melimo ea litšoantšo.
Itebele Khahlanong le ho Iketsa Molimo oa Setšoantšo
20, 21. Batho ba Jehova ba itebela joang khahlanong le ho iketsa melimo ea litšoantšo?
20 Batho ba Jehova ba boetse ba tlameha ho itebela khahlanong le ho iketsa melimo ea litšoantšo. Lefatšeng lena ho tloaelehile hore motho a iketse a be a etse le thato ea hae molimo oa setšoantšo. Ho lakatsa botumo le khanya ho etsa hore ba bangata ba etse lintho tse khelohileng. Ba batla hore ho etsoe thato ea bona e seng ea Molimo. Empa re ke ke ra ba le kamano le Molimo haeba re inehella ho iketsa molimo oa setšoantšo ka hore ka ho kheloha re tsitlalele hore ho etsoe seo re se batlang ’me re leke ho busa ba bang. (Liproverbia 3:32; Mattheu 20:20-28; 1 Petrose 5:2, 3) Joaloka balateli ba Jesu, re latotse lintho tse sa lokang tsa lefatše lena.—2 Ba-Korinthe 4:1, 2.
21 Ho e-na le ho batla botumo, batho ba Molimo ba utloa keletso ea Pauluse: “Leha le e-ja, leha le e-noa, leha le etsa ntho efe le efe, etsang tsohle ho tlotlisa Molimo ka tsona.” (1 Ba-Korinthe 10:31) Kaha re bahlanka ba Jehova, ka ho rapela melimo ea litšoantšo ha re tsitlalle tseleng ea rōna empa ka thabo re etsa thato ea Molimo, re amohela tataiso e tsoang ho “mohlanka ea khabane, ea bohlale” ’me re sebelisana ka botlalo le mokhatlo o hlophisitsoeng oa Jehova.—Mattheu 24:45-47.
Itebele!
22, 23. Re ka itebela khahlanong le borapeli ba melimo ea litšoantšo ba mefuta eohle joang?
22 Joaloka batho ba Jehova, ha re khumamele melimo ea litšoantšo e entsoeng ke batho. Re boetse re itebela mefuteng e poteletseng ea borapeli ba melimo ea litšoantšo. Ha e le hantle, re tlameha ho tsoela pele re qoba borapeli ba melimo ea litšoantšo ba mefuta eohle. Ka hona re utloa keletso ea Johanne: “Itebeleng khahlanong le borapeli ba melimo ea litšoantšo.”—1 Johanne 5:21, NW.
23 Haeba u e mong oa bahlanka ba Jehova, ka linako tsohle u sebelise letsoalo la hao le koetlisitsoeng ke Bibele le matla a ho nahana. (Ba-Heberu 5:14) Ha u etsa joalo u ke ke ua silafatsoa ke moea oa lefatše oa borapeli ba melimo ea litšoantšo empa u tla tšoana le Baheberu ba tšepahalang ba bararo le Bakreste ba pele ba tšepahalang. U tla fa Jehova boinehelo a ’notši, ’me o tla u thusa hore u lule u itebetse khahlanong le borapeli ba melimo ea litšoantšo ba mefuta eohle.
U ka Re’ng?
◻ Lipaki tsa Jehova li qoba mekhoa ea borapeli ba melimo ea litšoantšo bo bonoeng ponong ea Ezekiele joang?
◻ “Sebata” sa Tšenolo 13:1 ke eng, hona bahlanka ba Jehova ba nka boemo bofe mabapi le sona?
◻ Ke hobane’ng ha re tlameha ho itebela khahlanong le ho etsa likhalala tsa ’mino le tsa lipapali melimo ea litšoantšo?
◻ Ke joang re ka itebelang khahlanong le ho iketsa melimo ea litšoantšo?
◻ Ke hobane’ng ha ho hlokahala hore re itebele khahlanong le borapeli ba litšoantšo ba mefuta eohle?
[Litšoantšo tse leqepheng la 26]
Na ua tseba hore na manyala a bonoeng ponong ea Ezekiele a ne a tšoantšetsa borapeli ba melimo ea litšoantšo ea Bokreste-’mōtoana joang?
[Tlhaloso ea Moo Setšoantšo se Nkiloeng Teng]
Artwork (upper left) based on photo by Ralph Crane/Bardo Museum