Lintho tse ka Bonoang Naheng e Tšepisitsoeng

Sinai—Thaba ea Moshe le Mohau

HA U nahana ka Thaba ea Sinai, mohlomong u hopola Moshe. Hobane’ng? Hobane Moshe o ile a amohela Molao oa Molimo thabeng Hloahloeng ea Sinai. Thabeng efe? Mohlomong e bontšitsoeng mona ka holimo.a

Karolong e ka boroa ho hloahloa e leng hoo e ka bang bohareng pakeng tsa likou tsa Leoatle le Lefubelu, ke letsatsa le nang le litlhōrō tse peli. Sebaka sena ka kakaretso se lumellana le litlaleho tsa Bibele tse amanang le Moshe. Tlhōrō e ’ngoe e bitsoa Jebel Musa, e bolelang “Thaba ea Moshe.”

Litlaleho tse fapa-fapaneng tsa Bibele li etsa hore lebitso leo e be le loketseng hantle. Na ua hopola hore Moshe o ne a alositse mohlape oa Jethro ha lengeloi le hlaha sehlahleng se tukang? E ne e le hokae? Bibele e re e ne e le ‘thabeng ea Molimo oa ’nete, Horebe,’ eo hape e bitsoang Thaba ea Sinai. (Exoda 3:1-10; 1 Marena 19:8) Ka mor’a hore Moshe a etelle pele batho ba Molimo ho tsoa Egepeta, o ile a ba tlisa mona. Exoda 19:2, 3 e bolela hore “Iseraele a hloma litente malebana le thaba. Moshe a nyolohela ho Molimo, ’me Jehova a ’mitsa a le qhooeng ea thaba.”

Leo e ne e le lekhetlo la pele Moshe a hloa Thaba ea Sinai, e ne e se feela ho hloa meepa e mekhutšoanyane. Rea bala: “Jehova a theohela holim’a thaba ea Sinai, qhooeng ea thaba; Jehova a biletsa Moshe qhooeng ea thaba.”—Exoda 19:20.

Bahahlaoli ba likete-kete ba mehleng ea kajeno ba ile ba etsa boiteko bo matla ba ho hloa thaba eo bosiu ba latela litselana tse tšoailoeng ho ea fihla tlhōrōng, ba leta ho boha ho chaba ha letsatsi, ’me motšehare o moholo ba theoha. Moshe ha aa ka a etsa joalo. Molimo o ile a mo bolella: “Nyolohela ho ’na thabeng, ’me u hlole teng; ke tla u neha matlapa a nang le molao.” Ketsahalong eo “Moshe a hlola thabeng matsatsi a mashome a mane le masiu a mashome a mane.”—Exoda 24:12-18.

Ka hona ke ho utloahalang hore lebitso la Moshe le amahanngoe le thaba ena, empa ke hobane’ng ha le boetse le amahanngoa le “mohau”? Ha Moshe a le holimo moo ho amohela Molao, tlaase mane phuleng (mohlomong Phuleng ea er-Raha e setšoantšong) sechaba se ile sa latela tsela e booatla. Se ile sa hatella moholoan’a Moshe ho etsa molingoana. Aarone a re: “Rolisang basali ba lōna le bara ba lōna le barali ba lōna masale a gauda . . . le ntlisetse ’ona.” Ka hona ba etsa namane ea gauda ho e rapela. Hona ho ile ha halefisa Molimo oa ’nete ’me ha etsa hore ba likete ba shoe. (Exoda 32:1-35) Empa Aarone o ile a bontšoa mohau ’me a qeneheloa. Hobane’ng?

Tlhaloso ea Molimo e ho Exoda 32:10 e fana ka maikutlo a hore ha aa ka a talima Aarone e le mohlohleletsi oa phoso ea Iseraele. ’Me ha nako ea ho bonahatsa boemo ba bona e fihla, “bara bohle ba Levi” ba ile ba ema lehlakoreng la Molimo, bao ntle ho pelaelo ba neng ba kopanyeletsa Aarone. (Exoda 32:26, NW) Ka hona ho sa tsotellehe hore Aarone o ne a na le molato o itseng, o ile a fumana mohau oa Molimo pel’a Thaba ea Sinai.

Hamorao, Moshe o ile a ba le takatso ea ho tseba Jehova hamolemonyana le ho bona khanya ea Hae. (Exoda 33:13, 18) Kaha ho ne ho ke ke ha etsahala hore Moshe a bone sefahleho sa Molimo, Jehova o ile a ’montša karolo e itseng ea khanya ea Hae, A hatisa hore o “tla hauhela eo [A mo] hauhelang.” (Exoda 33:17–34:7) E ne e le ho loketseng haholo-holo bakeng sa Molimo ho hatisa mohau oa hae, hobane khafetsa Bibele e sebelisa “mohau” mabapi le litšebelisano tsa Molimo le Iseraele, eo a entseng selekane le eona Sinai.—Pesaleme ea 103:7-13, 18.

Kajeno baeti ba tlang Thabeng ea Sinai ba fumana ntlo ea baitlami pel’a thaba, e ke keng ea hopotsa motho ka borapeli ba ’nete boo Moshe a ithutileng ka bona ha a le ka holim’a thaba. Ho fapana le hoo, bolumeli bo ntlong ea baitlami bo lebisa tlhokomelo litšoantšong. Setšoantšo se bontšitsoeng mona ke “Leri e eang Paradeiseng.” Se thehiloe bukeng ea John Climacus moitlami oa monna oa Byzantium. Ka mor’a ho qeta lilemo tse ka bang 40 a le ka seleng ea ntlo ea baitlami, o ile a fetoha mookameli oa ntlo ea baitlami ba banna ’me a ngola ka leri ea tšoantšetso e eang leholimong. Empa hlokomela hore baruti ba bang ba tšoantšitsoe mona ba huleloa ke bademona ho theohela tlhokofatsong ea ka ho sa feleng ea mollo oa lihele. Ke setšoantšo se hlakileng, empa hase rute thuto ea Mangolo!—Moeklesia 9:5, 10; Jeremia 7:31.

Khahlanong le thuto eo ea bohata, ’nete ke hore Ea Matla ’Ohle ke “Molimo o mohau, o lereko, o liehang ho halefa, o tletseng mohau le ’nete.” (Exoda 34:6) Moshe o ile a atamela haufi le Molimo ona o mohau Thabeng ea Sinai.

[Mongolo o botlaaseng ba leqephe]

[Tlhaloso ea Moo Setšoantšo se Nkiloeng Teng e leqepheng la 8]

Pictorial Archive (Near Eastern History) Est.

[Tlhaloso ea Moo Setšoantšo se Nkiloeng Teng e leqepheng la 9]

Pictorial Archive (Near Eastern History) Est.

[Tlhaloso ea Moo Setšoantšo se Nkiloeng Teng e leqepheng la 9]

Pictorial Archive (Near Eastern History) Est.