Lipaki tsa Jehova Lefatšeng Lohle—Rephabliki ea Philippines
LIHLEKE-HLEKE tse 7 083 tse matsutla tse chesang tse etsang Rephabliki ea Philippines ke karolo e kaholimo ea mokoloko oa lithaba tse hlaheletseng ka holimo hanyenyane.a ’Me baahi ba 62 000 000 ba Philippines ba rata ho bua hoo e ka bang ka sehlooho leha e le sefe. Moea ona oa ho bontša botsoalle o fella ka tšimo e behang bakeng sa bopaki ba ’Muso.
Ho Paka Sekolong
Sehleke-hlekeng sa Masbate, seithuti sa mosetsanyana sekolong se phahameng o ile a khona ho pakela tichere ea hae le sehlopha sa liithuti nakong ea lipotso tsa ’nete kapa bohata. Oa tlaleha:
“Polelo e ne e re, ‘Haeba Molimo oa nthata, a ke ke a ntlhahisetsa mathata kapa a lumella hore ke utloe bohloko.’ Ha tichere ea rōna e hlahloba lipampiri tsa rōna, e ile ea fumana hore bohle ntle le ’na ba arabetse ka hore ke ’nete. Tichere ea ka e ile ea ntumella hore ke hlalosetse sehlopha sa liithuti lebaka leo ke arabetseng ka hore ke bohata ka lona. Ke ile ka bolela hore hase Molimo ea re hlahisetsang mathata, le hoja a lumella ho utloa bohloko ’me a re tlohella hore re lekoe. Ke sebelisa Bibele ea ka, eo ke eang ka eona sekolong ka mehla, ke ile ka behela sehlopha sa liithuti mabaka ke sebelisa mantsoe a ho 1 Johanne 4:8 (BPN), ‘Molimo ke lerato.’ Ka mor’a tlhaloso ea ka, tichere ea ka e ile ea kholiseha, ea otla holim’a deske ea eona, ’me ea re: ‘Marilou o nepile.’ Ke ’na feela ea ileng a fumana karabo e nepahetseng potsong ena le ea fumaneng letšoao le ka holimo-limo.”
Molaetsa oa ’Muso o Hohle
Ha e ntse e kopanetse tšebeletsong ea ntlo le ntlo karolong e ’ngoe ea Philippines, pula-maliboho ea ka mehla (’moleli oa nako e tletseng oa litaba tse molemo) e ile ea kopana le ’mè ea nang le bana ba banyenyane ba bararo. Mosali enoa o ile a bontša thahasello e khōlō molaetseng oa ’Muso, ’me sena se ile sa nolofaletsa hore ho qalisoe thuto ea Bibele le eena. Le hoja monna oa hae a ne a sa thabisoa ke ha a rutoa Bibele, haholo-holo ke Lipaki tsa Jehova, thuto e ile ea tsoela pele.
Monna enoa o ile a fallisetsa lelapa la hae motseng o mong, a nahana hore sena se tla khaotsa hore mosali oa hae a kopane le Lipaki. Leha ho le joalo, ha hoa feta nako e telele pele li fumana mosali enoa, ’me o ile a tsosolosa thuto ea hae ea Bibele. Ho hlakile hore monna oa hae o ne a hlile a sa thabela sena. O ile a isa bohale ba hae mosebetsing, moo a ileng a intšetsa malokobe ho monna ea neng a lokisetsoa koloi. Monna enoa haa ka a tseba hore mong’a koloi ke e mong oa Lipaki tsa Jehova.
Paki e ile ea hlalosa hore ho tla ruisa lelapa lohle haeba mosali oa hae a ka tsoela pele ka thuto ea hae ea Bibele. O ne a ka qala ho sebelisa melao-motheo ea Bibele hona lapeng. O bile a etsa tlhahiso ea hore monna le eena o ne a tla rua molemo ka ho ithuta ka ’Muso oa Molimo.
Phello ea puisano ee e bile efe? Mosali oa monna enoa o ile a lokoloha haholoanyane ho ithuta Bibele, ’me monna a etsa qeto ea ho khutlisetsa lelapa la hae moo le neng le lula teng pele. Ha le le moo mosali o ile a hatela pele moeeng ho fihlela a fetoha mohoeletsi ea sa kolobetsoang oa ’Muso. Monna oa hae le eena o ile a amohela thuto ea Bibele, ’me lelapa lohle le ile la qala ho ba teng libokeng tsa Bokreste.
[Mongolo o botlaaseng ba leqephe]
a Bakeng sa boitsebiso bo eketsehileng, bona Almanaka ea Lipaki tsa Jehova ea 1994.
[Lebokose le leqepheng la 8]
BOITSEBISO BO AMANG NAHA
Selemo sa Tšebeletso sa 1993
TLHŌRŌ EA BA FANANG KA BOPAKI: 116 576
KAROLELANO: Paki e le 1 ho 549
BA BILENG TENG SEHOPOTSONG: 357 388
KAROLELANO EA BAHOELETSI BA BO-PULA-MALIBOHO: 22 705
KAROLELANO EA LITHUTO TSA BIBELE: 94 370
PALO EA BA KOLOBELITSOENG: 7 559
PALO EA LIPHUTHEHO: 3 332
OFISI EA LEKALA: MANILA
[Setšoantšo se leqepheng la 9]
Ho paka ’marakeng ho tlisa liphello tse ntle
[Setšoantšo se leqepheng la 9]
Ofisi ea lekala la Mokhatlo oa Watchtower Manila