Balisa le Linku Pusong ea Bomolimo

“Jehova ke Moahloli oa rōna, Jehova ke Monehi-molao oa rōna, Jehova ke Morena oa rōna; eena ka boeena o tla re boloka.”—ESAIA 33:22, NW.

1. Ke joang ho ka boleloang hore Bakreste ba lekholo la pele la lilemo le Bakreste kajeno ke puso ea bomolimo?

PUSO ea bomolimo e bolela puso ka Molimo. E akareletsa ho amohela bolaoli ba Jehova le ho latela tataiso ea hae le litaelo liqetong tse khōlō le tse nyenyane tseo re li etsang bophelong. Phutheho ea lekholo la pele la lilemo e ne e le puso ea sebele ea bomolimo. Bakreste ka nako eo ka tieo ba ne ba ka re: “Jehova ke Moahloli oa rōna, Jehova ke Monehi-molao oa rōna, Jehova ke Morena oa rōna.” (Esaia 33:22, NW) Kaha masala a tlotsitsoeng a ka sehloohong, mokhatlo o hlophisitsoeng oa Jehova Molimo kajeno ka ho tšoanang ke puso ea sebele ea bomolimo.

Re Tlas’a Puso ea Bomolimo ka Litsela Life Kajeno?

2. Tsela e ’ngoe eo ka eona Lipaki tsa Jehova li ikokobeletsang puso ea Jehova ke efe?

² Ke joang re ka bolelang hore mokhatlo o hlophisitsoeng oa Jehova oa lefatšeng ke puso ea bomolimo? Hobane bao e leng litho tsa oona ka sebele ba ikokobeletsa molao oa Jehova. ’Me ba latela ketello-pele ea Jesu Kreste, e leng eena eo Jehova a mo behileng teroneng e le Morena. Ka mohlala, nakong ea qetello, taelo ena e tobileng e tsoang ho ’Musi e Moholo oa Puso ea Bomolimo e fetisetsoa ho Jesu: “Kenya sekele ea hao, u kotule; hobane nako ea ho kotula e fihlile, hobane koro ea lefatše e butsoitse.” (Tšenolo 14:15) Jesu o utloa taelo ena ’me o tsoela pele ka kotulo ea lefatše. Bakreste ba tšehetsa Morena oa bona mosebetsing ona o moholo ka hore ka cheseho ba bolele litaba tse molemo le ho etsa barutuoa. (Mattheu 28:19; Mareka 13:10; Liketso 1:8) Ka ho etsa sena, hape ke basebetsi-’moho le Jehova, ’Musi e Moholo oa Puso ea Bomolimo.—1 Ba-Korinthe 3:9.

3. Ke ka tsela efe Bakreste ba ikokobeletsang puso ea bomolimo litabeng tsa boitšoaro?

³ Le ka boitšoaro, Bakreste ba ikokobeletsa puso ea Molimo. Jesu o itse: “Ea etsang ’nete, o tla leseling, mesebetsi ea hae e tle e bonahatsoe hore e etselitsoe Molimo.” (Johanne 3:21) Kajeno, ho na le likhang tse sa feleng mabapi le litekanyetso tsa boitšoaro, empa likhang tsena ha li na sebaka har’a Bakreste. Ba talima seo Jehova a se talimang e le boitšoaro bo hlephileng joalokaha a se talima, ’me ba se qoba joaloka lefu la seoa! Hape ba hlokomela malapa a bona, ba utloa batsoali ba bona, ’me ba lula ba ikokobelelitse balaoli ba phahameng. (Ba-Efese 5:3-5, 22-33; 6:1-4; 1 Timothea 5:8; Tite 3:1) Kahoo, ba nka khato ka tsela ea puso ea bomolimo tumellanong le Molimo.

4. Ke maikutlo afe a fosahetseng a ileng a bonahatsoa ke Adama le Eva le Saule, ’me Bakreste ba bonahatsa boikutlo bo fapaneng le boo joang?

⁴ Adama le Eva ba ile ba lahleheloa ke monyetla oa ho phela Paradeiseng hobane ba ne ba batla ho iketsetsa liqeto mabapi le se nepahetseng le se fosahetseng. Jesu o ne a batla se fapaneng. O itse: “Ha ke batle ho ratoang ke ’na, ke mpa ke batla ho ratoang ke Ntate ea nthomileng.” Bakreste ba batla se tšoanang. (Johanne 5:30; Luka 22:42; Ba-Roma 12:2; Ba-Heberu 10:7) Saule, morena oa pele oa Iseraele, o ile a utloa Jehova—empa eseng ka ho feletseng. Ka lebaka leo o ile a hlokomolohuoa. Samuele o ile a ’molella: “Kutlo e fetisa sehlabelo, ’me mamelo e fetisa mafura a lipheleu.” (1 Samuele 15:22) Na ho tumellanong le puso ea bomolimo ho etsa thato ea Jehova ho isa bohōleng bo itseng, mohlomong ka ho etsa mosebetsi oa ho bolela kapa ho ba teng libokeng ka mehla, ebe rea sekisetsa boitšoarong kapa ka tsela e ’ngoe e itseng? Ho hlakile hore ha ho joalo! Re loanela ho ‘etsa thato ea Molimo ka sephefumolohi sohle.’ (Ba-Efese 6:6, NW; 1 Petrose 4:1, 2) Ho fapana le Saule, re ikokobeletsa puso ea Molimo ka ho feletseng.

Puso ea Bomolimo ea Kajeno

5, 6. Jehova o sebetsana le moloko oa batho joang kajeno, ’me ho sebetsa tumellanong le tokisetso ee ho fella ka eng?

⁵ Nakong e fetileng, Jehova o ile a busa ’me a senola linnete ka batho ka bomong, ba kang baprofeta, marena, le baapostola. Kajeno, ha ho sa le joalo; ha ho baprofeta kapa baapostola ba bululetsoeng. Ho e-na le hoo, Jesu o ile a bolela hore nakong ea ho ba teng ha hae ho sa bonahaleng matleng a borena, o tla tsebahatsa sehlopha sa balateli ba tšepahalang, “mohlanka ea khabane, ea bohlale,” ’me o tla se khethela ho hlokomela thepa ea hae. (Mattheu 24:45-47; Esaia 43:10) Ka 1919 lekhoba leo le ile la tsebahatsoa e le masala a tlotsitsoeng a Bakreste. Ho tloha ka nako eo, joalokaha a emeloa ke Sehlopha se Busang sa Lipaki tsa Jehova, e bile setsi sa puso ea bomolimo lefatšeng. Ho pota lefatše, Sehlopha se Busang se emeloa ke Likomiti tsa Makala, balebeli ba tsamaeang le baholo ba liphutheho.

⁶ Ho sebelisana le mokhatlo o hlophisitsoeng oa puso ea bomolimo hoa hlokahala bakeng sa ho ikokobeletsa puso ea bomolimo. Tšebelisano e joalo e sebeletsa bonngoe le taolo lefatšeng lohle ‘mokhatlong oohle oa baena.’ (1 Petrose 2:17, NW) Ka lehlakoreng le leng, sena se thabisa Jehova, eo eseng “Molimo oa mofere-fere, empa e le oa khotso.”—1 Ba-Korinthe 14:33.

Baholo Pusong ea Bomolimo

7. Ke hobane’ng ha ho ka boleloa hore baholo ba Bakreste ba khethiloe ka tataiso ea Molimo?

⁷ Banna bohle ba hōlileng ba khethiloeng, ho sa tsotellehe boemo ba bona ba bolaoli, ba finyella litšoaneleho tse thathamisitsoeng ka Bibeleng bakeng sa ofisi ea bolebeli, kapa monna ea hōlileng. (1 Timothea 3:1-7; Tite 1:5-9) Ho feta moo, mantsoe a Pauluse a eang ho baholo ba Efese a sebetsa ho baholo bohle: “Le itise, le lise le mohlape kaofela, oo Moea o Halalelang o le beileng balebeli ba oona, ho alosa kereke ea Molimo.” (Liketso 20:28) E, baholo ba khethiloe ka tataiso ea moea o halalelang, o tsoang ho Jehova Molimo. (Johanne 14:26) Ho khethoa ha bona ke ha puso ea bomolimo. Ho feta moo, ba alosa mohlape oa Molimo. Mohlape ke oa Jehova, eseng oa baholo. Mokhatlo o hlophisitsoeng ke puso ea bomolimo.

8. Boikarabelo bo akaretsang ba baholo ke bofe kajeno?

⁸ Lengolong la hae le eang ho Baefese, moapostola Pauluse o ile a bontša boikarabelo bo akaretsang ba baholo, ha a re: “E sa le eena ea beileng ba bang baapostola, ba bang baporofeta, ba bang baboleli ba Evangeli, ba bang balisa le baruti [“barupeli,” NW], ho phethisisa bahalaleli, ho etsa tšebetso ea bolisa, ho hahisa ’mele oa Kreste.” (Ba-Efese 4:11, 12) Ka mor’a hore “’mele oa Kreste” o fete boemong ba bongoana ha hoa ka ha hlola ho e-ba le baapostola le baprofeta. (Bapisa le 1 Ba-Korinthe 13:8.) Empa baholo ba ntse ba le mafolo-folo mosebetsing oa ho bolela evangeli, oa ho alosa le oa ho ruta.—2 Timothea 4:2; Tite 1:9.

9. Baholo ba lokela ho itokisetsa ho emela thato ea Molimo joang ka phuthehong?

⁹ Kaha puso ea bomolimo ke puso ea Molimo, baholo ba tšoanelehang ba tloaelane ka ho feletseng le thato ea Molimo. Joshua o ile a laeloa ho bala Molao ka mehla. Ho hlokahala hore baholo le bona ba ithute le ho hlahloba Mangolo ka mehla le ho tloaelana ka ho feletseng le lingoliloeng tsa Bibele tse hatisitsoeng ke lekhoba le tšepahalang le le masene. (2 Timothea 3:14, 15) Sena se akareletsa limakasine tsa Molula-Qhooa le Tsoha! le lingoliloeng tse ling tse bontšang tsela eo ka eona melao-motheo ea Bibele e sebetsang maemong a itseng a tobileng.a Leha ho le joalo, le hoja ho le bohlokoa hore moholo a tsebe ’me a latele litataiso tse hatisitsoeng ho lingoliloeng tsa Mokhatlo oa Watch Tower, hape o lokela ho tloaelana ka ho feletseng le melao-motheo ea Mangolo ao e leng motheo oa litataiso tseo. Joale o tla ba boemong ba ho sebelisa litataiso tsa Mangolo ka kutloisiso le kutloelo-bohloko.—Bapisa le Mikea 6:8.

Ho Sebeletsa ka Moea oa Bokreste

10. Ke boikutlo bofe bo bobe boo baholo ba lokelang ho itebela khahlanong le bona, hona joang?

¹⁰ Hoo e ka bang ka selemo sa 55 C.E., moapostola Pauluse o ile a ngola lengolo la hae la pele le eang phuthehong ea Korinthe. Bo bong ba mathata ao a neng a sebetsana le ’ona bo ne bo amana le banna ba itseng ba batlang boemo bo hlaheletseng ka phuthehong. Pauluse o ile a ngola: “Le se le khotše, le se le enne, le se le busitse ka ntle ho rōna; hoja le ka fela la busa, le rōna re tle re buse hammoho le lōna!” (1 Ba-Korinthe 4:8) Lekholong la pele la lilemo C.E., Bakreste bohle ba ne ba na le tšepo ea ho busa joaloka marena le baprista le Jesu leholimong. (Tšenolo 20:4, 6) Leha ho le joalo, ho totobetse hore ba bang Korinthe ba ile ba lebala hore lefatšeng ha ho na marena pusong ea bomolimo ea Bokreste. Ho e-na le ho itšoara joaloka marena a lefatše lena, baholo ba Bakreste ba hlaolela boikokobetso, e leng tšoaneleho e thabisang Jehova.—Pesaleme ea 138:6; Luka 22:25-27.

11. (a) Mehlala e ikhethang ea boikokobetso ke efe? (b) Baholo le Bakreste ba bang bohle ba lokela ho ba le boikutlo bofe ka bona ka bobona?

¹¹ Na boikokobetso ke bofokoli? Le hanyenyane! Jehova ka boeena o hlalosoa e le ea ikokobelitseng. (Pesaleme ea 18:35) Marena a Iseraele a ile a etella mabotho pele ho ea ntoeng ’me a busa sechaba tlas’a tataiso ea Jehova. Leha ho le joalo, e mong le e mong oa bona o ne a lokela ho hlokomela hore ‘pelo ea hae e se ke ea ikhohomosetsa banab’abo.’ (Deuteronoma 17:20) Jesu ea tsositsoeng ke Morena oa leholimo. Leha ho le joalo, ha a le lefatšeng, o ile a hlatsoa maoto a barutuoa ba hae. Ke boikokobetso bo bokaakang! ’Me ha a bontša hore o batla hore baapostola ba hae ka ho tšoanang ba ikokobetse, o itse: “Ekare ha ’na, ke leng Morena le Moruti, ke hlatsoitse maoto a lōna, le lōna le tšoanetse ho hlatsoana maoto.” (Johanne 13:14; Ba-Filippi 2:5-8) Khanya eohle le thoriso li lokela ho ea ho Jehova, eseng ho motho leha e le ofe. (Tšenolo 4:11) Ho sa tsotellehe hore na ke baholo kapa che, Bakreste bohle ba lokela ho inahana leseling la mantsoe a Jesu: “Re bahlanka ba se nang thuso, hobane re entse seo re neng re tšoanetse ho se etsa.” (Luka 17:10) Pono leha e le efe e ’ngoe ha e tumellanong le puso ea bomolimo.

12. Ke hobane’ng ha lerato e le tšoaneleho ea bohlokoa eo baholo ba Bakreste ba lokelang ho e hlaolela?

¹² Hammoho le boikokobetso, baholo ba Bakreste ba hlaolela lerato. Moapostola Johanne o bontšitse bohlokoa ba lerato ha a re: “Ea sa rateng ha a ka a tseba Molimo; hobane Molimo o lerato.” (1 Johanne 4:8) Batho ba se nang lerato hase ba puso ea bomolimo. Ha ba tsebe Jehova. Mabapi le Mora oa Molimo, Bibele e re: “Joalo ka ha [“Jesu,” NW] a na a ratile ba hae ba lefatšeng, a ba rata le ho isa qetellong.” (Johanne 13:1) Ha a bua le banna ba 11 bao e neng e tla ba karolo ea sehlopha se busang ka phuthehong ea Bokreste, Jesu o itse: “Molao oa ka ke hoba le ratane, joalo ka ha ke le ratile.” (Johanne 15:12) Lerato ke letšoao le khethollang Bokreste ba ’nete. Le hohela ba nyahameng, ba siameng le batlamuoa ba moea ba laba-labelang tokoloho. (Esaia 61:1, 2; Johanne 13:35) Baholo ba tlameha ho beha mohlala bakeng sa ho le bontša.

13. Le hoja kajeno mathata a ka rarahana, ke joang moholo a ka bang le tšusumetso e molemo maemong ’ohle?

¹³ Kajeno, baholo ba atisa ho kōptjoa hore ba thuse tabeng ea ho sebetsana le mathata a rarahaneng. Mathata a lenyalo a ka teba a ba a nka nako e telele. Bacha ba na le mathata ao batho ba baholo ba ka thatafalloang ho a utloisisa. Hangata ho ba thata ho utloisisa ho kula maikutlong. Moholo ea tobaneng le boemo bo joalo a ka ’na a se tiisehe mabapi le hore na o lokela ho etsa’ng. Empa a ka kholiseha hore haeba ka thapelo a tšepa bohlale ba Jehova, a etsa lipatlisiso ka Bibeleng le boitsebisong bo hatisitsoeng ke lekhoba le tšepahalang le le masene, a bile a sebetsana le linku ka boikokobetso le ka lerato, o tla ba le tšusumetso e molemo esita le maemong a thata ka ho fetisisa.

14, 15. Ke lipolelo life tse bontšang hore Jehova o hlohonolofalitse batho ba hae ka baholo ba bangata ba molemo?

¹⁴ Jehova o hlohonolofalitse mokhatlo oa hae o hlophisitsoeng ka ho enneng ka “limpho tsa banna.” (Ba-Efese 4:8, NW) Nako le nako, Mokhatlo oa Watch Tower o amohela mangolo a futhumatsang pelo a pakang hore baholo ba ikokobelitseng bao ka kutloelo-bohloko ba alosang linku tsa Molimo ba bontša lerato. Ka mohlala, moholo oa phutheho oa ngola: “Ha ho ketelo ea molebeli oa potoloho e kileng ea nkama ho feta ena kapa eo ho ntseng ho buuoa ka eona ka phuthehong. Molebeli oa potoloho o ile a nthusa hore ke bone bohlokoa ba ho ba le boikutlo bo nepahetseng ha ke sebetsana le baena, a hatella tabeng ea ho babatsa.”

¹⁵ Khaitseli ea neng a lokela ho nka leeto le eang sepetlele se hōle e le hore a ka alafuoa oa ngola: “Ho kopana le moholo bosiung boo ba pele boo ke tšoenyehileng ka bona sepetlele se leng hōle hakana le hae e bile ho tlisang kholiseho e kaakang! Eena le baena ba bang ba ile ba nka nako e ngata ba e-na le ’na. Esita le batho ba lefatše ba neng ba tseba boemo boo ke leng ho bona ba ikutloa hore nka be ke sa ka ka feta ho bona ka katleho ka ntle ho matšeliso, tlhokomelo le lithapelo tsa baena bao ba lerato le ba itetseng.” Khaitseli e mong oa ngola: “Kajeno kea phela hobane sehlopha sa baholo ka mamello se ile sa ntataisa ho pholletsa le ntoa ea ho tepella maikutlo ho tebileng. . . . Moena e mong le mosali oa hae ba ne ba sa tsebe hore na ba lokela ho re’ng ho ’na. . . . Empa se ileng sa nkama haholo ke hore le hoja ba ne ba sa utloisise boemo boo ke leng ho bona ka ho feletseng, ba ne ba ntsotella ka lerato.”

16. Petrose o fa baholo khothatso efe?

¹⁶ E, baholo ba bangata ba sebelisa khothatso ea moapostola Petrose: “Alosang mohlape oa Molimo o ho lōna, le o lebele, e seng ka ho qophelloa, e mpe e be ka ho rata; e seng ka baka la moruo o mobe, e mpe e be ka ho rata; e seng ka ho busa mehlape ea lōna ka thata, e mpe e be ka ho etsetsa mohlape mehlala.” (1 Petrose 5:1-3) Baholo bao ba puso ea bomolimo ke tlhohonolofatso e kaakang!

Linku Pusong ea Bomolimo

17. Bolela litšoaneleho tse ling tseo bao eseng baholo ka phuthehong ba lokelang ho li hlaolela.

¹⁷ Leha ho le joalo, puso ea bomolimo ha ea thehoa ka baholo feela. Haeba baholo ba tlameha ho sebetsa lintho tumellanong le puso ea bomolimo, le linku li tlameha ho etsa se tšoanang. Ka litsela life? Ha e le hantle, melao-motheo e tataisang balisa e tlameha ho tataisa le linku. Bakreste bohle, eseng baholo feela, ba tlameha ho ikokobetsa e le hore ba ka fumana tlhohonolofatso ea Jehova. (Jakobo 4:6) Bohle ba tlameha ho hlaolela lerato hobane ka ntle ho lona mahlabelo ao re a etsetsang Jehova ha a mo thabise. (1 Ba-Korinthe 13:1-3) ’Me kaofela ha rōna, eseng baholo feela, re tlameha hore re “tlale tsebo ea thato ea [Jehova], ka bohlale bohle, le kelello eohle ea Moea.”—Ba-Kolosse 1:9.

18. (a) Ke hobane’ng ha tsebo feela e sa tebang ea ’nete e sa lekana? (b) Kaofela ha rōna re ka tlala tsebo e nepahetseng joang?

¹⁸ Ba bacha le ba hōlileng ka ho tšoanang ka linako tsohle ba tobane le liqeto tse thata ha ba ntse ba leka ho lula ba tšepahala le hoja ba phela lefatšeng la Satane. Mekhoa ea lefatše mabapi le moaparo, ’mino, libaesekopo le lingoliloeng e phephetsa bomoea ba ba bang. Tsebo e sa tebang ea ’nete ha ea lekana bakeng sa ho re thusa ho boloka ho leka-lekana. Hore re tiisehe hore re lula re tšepahala, ho hlokahala hore re tlale tsebo e nepahetseng. Re hloka temoho le bohlale tseo e leng Lentsoe la Molimo feela le ka re fang tsona. (Liproverbia 2:1-5) Sena se bolela ho hlaolela mekhoa e metle ea ho ithuta, ho thuisa ka seo re ithutang sona, le ho se sebelisa. (Pesaleme ea 1:1-3; Tšenolo 1:3) Pauluse o ne a ngolla Bakreste bohle, eseng baholo feela, ha a re: “Lijo tse tiileng ke tsa banna ba tiileng, e leng bao likelello tsa bona li lemaletseng ho khetha ho hotle le ho hobe, ke ho sebelisoa hona.”—Ba-Heberu 5:14.

Balisa le Linku ba Sebetsa Hammoho

19, 20. Bohle ba fuoa likhothatso life e le hore ba ka sebelisana le baholo, hona hobane’ng?

¹⁹ Qetellong, re lokela ho bolela hore moea oo ehlileng e leng oa puso ea bomolimo o bontšoa ke ba sebelisanang le baholo. Pauluse o ile a ngolla Timothea: “Baholo ba lisang hantle ba ke ba baloe hoba ba tšoaneloa ke hlompho e fetisisang, haholo ba sebetsang polelong le thutong.” (1 Timothea 5:17; 1 Petrose 5:5, 6) Ho ba moholo ke tokelo e hlollang, empa baholo ba bangata ke banna ba malapa ba eang mosebetsing oa boipheliso letsatsi le leng le le leng ’me ba na le basali le bana bao ba lokelang ho ba hlokomela. Le hoja ba thabela ho sebeletsa, tšebeletso ea bona e ba bonolo haholoanyane le ho putsa haholoanyane ha phutheho e le e tšehetsang, e se e tšoaeang liphoso ka ho feteletseng le e hlokang tlhokomelo e feteletseng.—Ba-Heberu 13:17.

²⁰ Moapostola Pauluse o itse: “Hopolang balisa ba lōna ba le boleletseng lentsoe la Molimo, ’me le etsise tumelo ea bona, le ntse le lemoha qetello ea ho phela ha bona.” (Ba-Heberu 13:7) Che, Pauluse haa ka a khothaletsa baena ho latela baholo. (1 Ba-Korinthe 1:12) Ho latela motho ha ho tumellanong le puso ea bomolimo. Empa ruri ho bohlale ho etsisa tumelo e pakiloeng ea moholo ea sebetsang tumellanong le puso ea bomolimo ea mafolo-folo mosebetsing oa ho bolela evangeli, ea kopanelang libokeng ka mehla, le ea sebetsanang le phutheho ka boikokobetso le ka lerato.

Pontšo ea Tumelo

21. Bakreste ba bonahatsa tumelo e matla e kang ea Moshe joang?

²¹ Bonneteng, ho ba teng ha mokhatlo o hlophisitsoeng oa puso ea bomolimo nakong ena eo boemo bo ntseng bo mpefala historing ea motho ke bopaki ba hore ’Musi e Moholo oa Puso ea Bomolimo o matla. (Esaia 2:2-5) Hape ke bopaki ba hore banna, basali le bana ba Bakreste ba ka bang limilione tse hlano, ba loanang le mathata a bophelo ba letsatsi le letsatsi empa le ka mohla ba sa lebale hore Jehova ke ’Musi oa bona ba na le tumelo. Hantle feela joalokaha Moshe ea tšepahalang a ile a “tiea joalo ka hoja a bona ea sa bonoeng,” Bakreste kajeno ba na le tumelo e tšoanang e matla. (Ba-Heberu 11:27) Ba na le tokelo ea ho phela pusong ea bomolimo, ’me ba leboha Jehova ka mehla bakeng sa eona. (Pesaleme ea 100:4, 5) Ha ba ntse ba latsoa matla a Jehova a bolokang, ba thabela ho bolela: “Jehova ke Moahloli oa rōna, Jehova ke Monehi-molao oa rōna, Jehova ke Morena oa rōna; eena ka boeena o tla re boloka.”—Esaia 33:22, NW.

[Mongolo o botlaaseng ba leqephe]

Bibele e Bontša’ng?

◻ Bakreste ba ikokobeletsa puso ea bomolimo ka tsela efe?

◻ Puso ea bomolimo e hlophisitsoe joang kajeno?

◻ Ke ka tsela efe baholo ba lokelang ho itokisetsa ho phetha boikarabelo ba bona?

◻ Ke litšoaneleho life tsa Bokreste tseo e leng habohlokoa hore baholo ba li hlaolele le ho li bonahatsa?

◻ Pusong ea bomolimo, ke kamano efe e lokelang ho ba teng pakeng tsa linku le balisa?

[Setšoantšo se leqepheng la 16]

Adama le Eva ba ile ba lahleheloa ke Paradeise hobane ba ne ba batla ho iketsetsa liqeto mabapi le se nepahetseng le se fosahetseng

[Setšoantšo se leqepheng la 18]

Haeba moholo a sebetsana le linku ka boikokobetso le ka lerato, ka mehla o tla ba le tšusumetso e molemo