“Ke Bolokile Tumelo”

JOALOKAHA HO BOLETSE METSOALLE EA BRUNELLA INCONDITI

“LETSATSI la Moqebelo e ne e le le tsamaeang butle le le bolutu. Ke ne ke le mong feela ka phaposing, ke ikutloa ke feletsoe ke tšepo. Ke ne ke utloa eka nka tsamaea phasejeng. Litaba li ne li tsamaea hantle, ’me ka tšohanyetso feela, motho e mong o ile a khahlela lemati hona pel’a mahlo a ka mona, ’me ho ne ho se moo nka tsoang le teng, ho sa tsotellehe hore na ke leka ka matla hakae.”

Brunella Inconditi ea lilemo li 15 o ne a le masoabing a fetisisang. Letsatsi la bohlokoa ka ho fetisisa bophelong ba hae ba bocha le ne le feta. Pejana selemong seo, lerato la hae le ntseng le hōla ho Jehova le Bibeleng le ne le mo susumelitse hore a nehele bophelo ba hae ho eena. Ka July 1990 o ne a lokela ho kolobetsoa Kopanong ea Setereke ea Lipaki tsa Jehova ea “Puo e Hloekileng” Montreal, Canada. Ho e-na le hoo, Brunella o ne a le mothating oa ho talimana le teko ea tumelo ea hae e neng e tla tšoarella bophelong bohle ba hae.

Matsatsi a mabeli pele ho nako eo a neng a lebeletse ho tšoantšetsa boinehelo ba hae ka kolobetso ea metsing, Brunella o ile a tsebisoa hore o na le kankere ea mali. Lingaka sepetleleng sa bana sa sebakeng seo li ne li batla ho qala phekolo hang-hang, kahoo Brunella o ile a sala sepetlele.

Mantsoe a Hae a Susumetsa Lingaka

Brunella o ne a tseba hore mali aa halalela ho Jehova Molimo. (Levitike 17:11) Batsoali ba hae, Edmondo le Nicoletta, ba ne ba ile ba tiisa hore ha ho litšelo tsa mali tse lokelang ho sebelisoa phekolong ea morali oa bona. Ntat’ae oa hopola: “Brunella o ne a batla hore lingaka li ikutloele ho eena ka ho tšoanang, esita le hoja a ne a le monyenyane. O ile a li bolella ka tieo hore ha a batle phekolo e neng e tla tlōla taelo ea Bibele ea ‘ho tela mali.’”—Liketso 15:20.

Ka la 10 July, 1990, lingaka tse tharo le mosebeletsi oa sechaba ba ile ba kopana le batsoali ba Brunella le basebeletsi ba babeli ba phutheho ea Lipaki tsa Jehova ea sebakeng seo. Litlhahlobo tsa meriana li ile tsa tiisa hore Brunella o na le kankere ea mali e etsang hore lisele tse thibelang mafu ’meleng li ate kapele ho feta tekano. Lingaka li ile tsa hlalosa leqheka la tsona la ho loantša lefu lena. Ka masene li ile tsa hlalosa hore ho thata haholo ho le phekola. E mong oa baholo ba phutheho oa hopola: “Boitšoaro ba Brunella le boikemisetso ba hae ba ho utloa Molimo bo ile ba ama lingaka hammoho le mosebeletsi oa sechaba. Ba ne ba hloletsoe ke lerato la batsoali ba hae le tšehetso ea metsoalle e tsoang phuthehong ea Bokreste. Ba ne ba boetse ba ananela tsela eo re utloisisang le ho hlonepha boemo ba bona kateng.”

Lingaka li ile tsa rera ho qoba litšelo tsa mali. Brunella o ne a tla fumana phekolo e batsi ea lik’hemik’hale bakeng sa ho laola lefu leo, empa e ne e ke ke ea e-ba matla haholo joalokaha ho tloaelehile. Sena se ne se tla fokotsa tšenyeho liseleng tsa hae tsa mali e bakiloeng ke phekolo. Nicoletta oa hlalosa: “Lingaka li ne li nahanela litlhoko tsa Brunella ’meleng, maikutlong, le moeeng. Ha re ne re li kōpa hore li buisane le setsebi se nang le phihlelo tšebetsong e sa amaneng le mali ea ho phekola kankere ea mali baneng, li ile tsa lumela.” Ho ne ho e-na le tlamahano e matla ea lerato pakeng tsa Brunella le basebetsi ba sepetlele.

Lipakane tsa Moea

Le hoja phekolo ea pele e ile ea hlahisa liphello tse molemo, teko e matla ea Brunella e ne e le hona e qalang. Ka November 1990 boloetse ba hae bo ile ba kokobela, kahoo ntle le tšenyo ea nako o ile a kolobetsoa. Ha a hopola likhoeli tse ’maloa tse fetileng, Brunella o ile a lumela: “Ho hang ho ne ho se bonolo. U hloka matla a mangata, ’me ho hlokahala hore u be le monahano o nepahetseng. . . . Tumelo ea ka e ile ea lekoa, empa ke ile ka lula ke tiile, ’me ke ntse ke rerile ho etsa bopula-maliboho ba kamehla [tšebeletso ea nako e tletseng] mosebetsi oa bophelo.”

Mathoasong a 1991, Brunella o ile a kula hape. O ile a batla a e-shoa ha a ntse a le phekolong e batsi ea lik’hemik’hale, empa o ile a hlaphoheloa ’me batho bohle ba ile ba makala ba ba ba thaba. Ka August o ne a hlaphohetsoe hoo a ileng a qeta khoeli eo tšebeletsong ea phatlalatsa e le pula-maliboho ea thusang. Boloetse ba hae bo ile ba mpefala hape, ’me ka November 1991 ’mele oa hae o ile oa hlaseloa ke kankere likarolong tse ngata. Sehlopha se seng sa lingaka sepetleleng se seng se ile sa qala ho mo phekola ka mahlaseli.

Esita le tlas’a maemo a thata joalo, Brunella o ile a lula a ntse a tiile ’me a ipehela lipakane tsa moea. Ha a tsebisoa ka kankere ena ea mali ka lekhetlo la pele, o ile a bolelloa hore a ka ’na a phela likhoeli tse tšeletseng feela. Joale, hamorao, hoo e ka bang selemo le halofo, Brunella o ne a ntse a etsa merero bakeng sa nako e tlang. Moholo e mong oa phutheho oa hlalosa: “Haa ka a senya nako ea letho ho sebeletsa hore a finyelle lipakane tsa hae. Tumelo ea Brunella tšepisong ea Molimo ea Paradeise e ile ea mo tšehetsa tekong ea hae e matla. Le hoja a ne a le monyenyane lilemong, o ile a hōla hore e be Mokreste ea hōlileng tsebong. Boitšoaro ba hae le boikutlo ba hae li susumelitse phutheho ’me li hapile lipelo tsa ba neng ba mo tseba, ho akareletsa le basebetsi ba sepetlele.” ’M’ae oa hopola: “Le ka mohla haa ka a belaela. Ha motho a ne a ’motsa hore na o ikutloa joang, o ne a arabela ka ho re, ‘Kea phela’ kapa, ‘Ha ho bothata, uena u phela joang?’”

Bokamoso bo Sireletsehileng

Brunella o ile a rera ho ba teng Kopanong ea Setereke ea “Bajari ba Leseli” ea Lipaki tsa Jehova ka July 1992. Leha ho le joalo, nakong ea kopano, Brunella o ile a kena sepetlele, ’me bophelo ba hae bo ne bo feta ka potlako. Leha ho le joalo, o ile a ba teng kopanong a tsamaea ka setulo sa likooa, a rerile ho tla bona tšoantšiso e reng Ho Etsa se Lokileng Mahlong a Jehova.

Matsatsing a ’maloa a ho qetela a bophelo ba hae o ile a khutlela hae lelapeng labo. Nicoletta o re: “Ho isa qetellong, o ne a amehile ka ba bang haholoanyane ho ipheta. O ne a ba khothaletsa ho ithuta Bibele, a ba bolella, ‘Re tla ba hammoho Paradeising.’”

Brunella o ile a shoa ka la 27 July, 1992, a tiile tšepong ea hae ea ho tsohela bophelong Paradeising lefatšeng. O ne a se a qalile ho hahamalla lipakane tsa hae, empa o rerile ho ntšetsa pele tsela ea hae ea boinehelo ka mor’a hore a tsohe. Matsatsi a ’maloa feela pele a shoa, Brunella o ile a ngola lengolo le latelang, le ileng la baloa tšebeletsong ea ho hopoloa ha hae.

“Metsoalle e Ratehang:

“Kea le leboha ka hore ebe le tlile. Boteng ba lōna bo bolela ho hoholo ho lelapa leso.

“Ho batho ba neng ba le haufi le ’na—re fetile linthong tse ngata. Re bile le linako tse ngata tse bohloko, empa ho ne ho boetse ho e-na le linako tse thabisang. E ne e le ntoa e thata e telele, empa ha ke nahane hore ke hlōlehile. Joalokaha Mangolong ho thoe, ‘Ke loanne ntoa e molemo, ke mathile ka qeta sebaka, ke bolokile tumelo.’—2 Timothea 4:7.

“Ke boetse ke ithutile ho hongata, ebile ke hōlile haholo, ’me metsoalle ea ka le ba neng ba le haufi le ’na ba bone phetoho ena. Ke rata ho leboha batho bohle ba ileng ba ntšehetsa.

“Lōna ba lumelang tsamaisong e ncha le ho Jehova lea tseba hore ho tla ba le tsoho, joalokaha Johanne 5:28, 29 e bolela. Kahoo lulang le le matla tumelong, ’me re tla khona ho bonana hape.

“Ke rata ho leboha batho ba tsebang boemo boo ke fetileng ho bona. Ke fetisetsa kameho ea ka e mofuthu le kako ho e mong le e mong oa lōna. Ke le rata kaofela ha lōna.”

Brunella haa ka a lumella bocha ba hae kapa ho kula hore li chechisetse boinehelo ba hae ho Molimo morao. Mohlala oa tumelo le boikemisetso ba hae li khothatsa ba bacha le ba hōlileng ka ho tšoanang ho lahla ntho leha e le efe e ka ba sitisang ho matha peisong ea bophelo.—Ba-Heberu 12:1.