Ho Buisana ka Bolumeli ho ka Tlisa Molemo Ofe?
KA THAHASELLO batsoali ba letela ho utloa mantsoe a pele ao ngoana oa bona a a buang. Ha ba utloa melumo e pheta-phetoang ha a ntse a hoeleketsa, mohlomong “Mama” kapa “Tata,” lipelo tsa bona li tlala thabo. Ba potlakela ho bolella metsoalle le baahisani litaba tsena. Ho bua ha ngoana ka lekhetlo la pele ruri ke litaba tse molemo tse nyakallisang.
Melumo, lintho tse bonoang, le menko tse amoheloang ke litho tsa kutlo tsa ngoana e monyenyane li susumetsa karabelo. Ho hlakile hore litsela tsa ho arabela lia fapana. Empa haeba, ka mor’a nako e itseng, lesea le hlōleha ho arabela litšusumetsong tsena, ka nepo batsoali ba ne ba tla tšoenyeha ka hore ho na le bothata bo itseng tabeng ea khōlo ea ngoana oa bona.
Bana ba arabela hamolemo ho batho bao ba ba tsebang. Ha ’mè a sika ngoana, sena se atisa ho fella ka pososelo. Empa, ho angoa ke mong ka eena ea etileng ho ka ’na ha etsa hore a lle, ka manganga a ka ba a hana ho nkoa ke eo. Bongata ba beng ka bona ba thulanang le boemo bona ha ba tele. Ha ngoana a ntse a ba tseba hamolemo, ba nyakallela hore ebe mokoallo oa ho ba ba sa tloaelehang ho ngoana oa sutha, ’me pososelo ea ngoana e hlaha butle-butle.
Ka ho tšoanang, batho ba baholo ba bangata ba ba lesisitheho ho buisana ka litumelo tsa bona tsa bolumeli pontšeng le motho eo ba sa kang ba tsebana le eena ka nako e telele. Ba ka ’na ba se ke ba utloisisa lebaka leo ka lona osele a ka batlang ho qoqa le bona ka taba ea botho—bolumeli. Phello e ba hore ba lumella hore mokoallo o kene lipakeng tsa bona le ba buang ka ’Mōpi. Ba bile ba hana le ho bua ka seo ha e le hantle e leng tšobotsi ea tlhaho ea moloko oa batho, takatso ea ho rapela.
Ha e le hantle, re lokela ho thahasella ho ithuta ka ’Mōpi oa rōna, ’me ho buisana le ba bang ho ka ’na ha etsa hore re be boemong ba ho ithuta. Ho joalo hobane ke khale Molimo a ile a amahanngoa le puisano ea pontšeng. A re boneng hore na ke joang.
‘Mamela ’me U Ithute’
Ha Molimo a qala ho bua le motho o ile a bua le Adama tšimong ea Edene. Empa, ka mor’a hore Adama le Eva ba etse sebe, ba ile ba ikhethela ho ipata ha Molimo a ba bitsa, ha a ne a batla ho tsoela pele ho bua le bona. (Genese 3:8-13) Leha ho le joalo, Bibele e etsa litlaleho tse qaqileng mabapi le banna le basali ba ileng ba amohela ka thabo boitsebiso bo tsoang ho Molimo.
Molimo o ile a bua le Noe ka timetso e atamelang ea lefatše le khopo la mehleng ea hae, kapele ka mor’a moo Noe e ile ea e-ba “’moleli oa ho loka.” (2 Petrose 2:5) E le ’muelli oa Molimo molokong oa hae, Noe ha aa ka a bontša tumelo litšebelisanong tsa Molimo le motho feela empa hape o ile a ipolela pontšeng hore o ka lehlakoreng la Jehova. Noe o ile a fumana karabelo efe? Ka masoabi, bongata ba batho ba mehleng ea hae “ha ba ka ba lemoha, ha ba ha fihla moroallo, ’me ba nkoa bohle ke oona.” (Mattheu 24:37-39) Empa hoa re thabisa hore ebe litho tse supileng tsa lelapa la Noe li ile tsa mamela, tsa utloa litaelo tsa Molimo, ’me tsa pholoha Moroallo oa lefatše lohle. Batho bohle ba phelang kajeno ba tsoile ho bona.
Hamorao, Molimo o ile a bua le sechaba se feletseng sa batho, Iseraele ea boholo-holo. Ka Moshe, Molimo o ile a ba neha Melao e Leshome le melao e meng e 600 e tlamang ka ho tšoanang. Jehova o ne a lebeletse hore Baiseraele ba e utloe kaofela. Moshe o ile a laela hore lilemo tse ling le tse ling tse supileng, nakong ea Mokete oa Metlotloane oa selemo le selemo, Molao oa Molimo o lokela ho baloa ka lentsoe le phahameng. O ile a laela: “Phutha sechaba, banna, le basali, le bana, le molichaba ea metseng ea hao.” Ka morero ofe? “Ba tle ba utloe, ’me ba ithute ho tšaba Jehova, Molimo oa lōna, ’me ba hlokomele ho etsa litaba tsohle tsa molao ona.” Bohle ba ne ba tlameha ho mamela le ho ithuta. Inahanele hore na ba ne ba thabela ho buisana ka seo ba se utloileng hakaakang!—Deuteronoma 31:10-12.
Lilemo tse fetang makholo a mahlano hamorao, morena oa Judea Josafate o ile a hlophisa mahosana le Balevi bakeng sa letšolo la ho tsosolosa borapeli bo hloekileng ba Jehova. Banna bana ba ile ba tsamaea ho pholletsa le metse ea Juda ba ruta baahi ba eona melao ea Jehova. Ka ho etsa hore ho buisanoe ka eona pontšeng, morena enoa o ile a bontša ho tiea ha hae borapeling ba ’nete. Haele bafo ba hae, ba ne ba tlameha ho mamela le ho ithuta.—2 Likronike 17:1-6, 9.
Ho Beha Bopaki ka Puisano
Molimo o ile a roma Mora oa hae Jesu, lefatšeng, hore a sebeletse e le ’Muelli oa Hae. (Johanne 1:14) Joalokaha barutuoa ba bararo ba ile ba bona ha Jesu a fetohela boemong bo phahameng bo khanyang ka pel’a bona, ba ile ba utloa lentsoe la Molimo ka sebele le phatlalatsa: “Enoa ke Mora oa ka ea ratoang, eo ke khahlisoang ke eena; mo utloeng!” (Mattheu 17:5) Ba ile ba mamela hang-hang.
Ka ho tšoanang, Jesu o ile a laela baapostola ba hae hore ba bolelle ba bang merero ea Molimo. Empa ha ho setse hoo e ka bang likhoeli tse tšeletseng tsa tšebeletso ea lefatšeng, Jesu o ile a tsebahatsa hore mosebetsi oa ho bolela ka ’Muso oa maholimo o ne o le moholo hoo ho neng ho tla hlokahala barutuoa ba eketsehileng. O ile a ruta ba 70 ba bona tsela ea ho buisana le batho bao ba sa ba tsebeng ka ’Muso oa Molimo eaba o ba romela ho ea jala molaetsa oo pontšeng. (Luka 10:1, 2, 9) Nakoana pele a khutlela ho Ntate oa hae leholimong, Jesu o ile a khothalletsa balateli ba hae ho nka bohato ba pele ba ho bua le ba bang ka molaetsa ona, a bile a ba laela: ‘E-eang ke hona, le rute lichaba tsohle; . . . le ba rute, ho boloka tsohle tseo ke le laetseng tsona.’ (Mattheu 28:19, 20) Lefatšeng lohle, Bakreste ba ’nete kajeno ba phetha thomo eo ka ho buisana le baahisani ba bona ka litaba tse molemo tsa ’Muso oa Molimo. Lipuisano tsena li ba nolofalletsa ho pakela ’nete e mabapi le ’Mōpi, Jehova.—Mattheu 24:14, NW.
Lipuisano Tse Seng Lerata, Tse Hahang
Barutuoa ba Jesu ba ne ba lokela ho buisana le ba bang ka litumelo tsa bona ka tsela efe? Ba ne ba sa lokela ho khopisa bahanyetsi, leha e le hona ho pheha khang le bona. Ho e-na le hoo, ba ne ba lokela ho batla ba amohelang litaba tse molemo, ebe ba fana ka bopaki ba Mangolo ho li tšehetsa. Ka sebele, Molimo o ile a lemoha tsela eo ba ileng ba kopana le barutuoa ba Mor’a hae ba neng ba itšoara ka eona, feela joalokaha Jesu a ile a bolela: “Ea le amohelang oa nkamohela; ’me ea nkamohelang o amohela ea nthomileng.” (Mattheu 10:40) E bile ho hloka tlhompho ho hokaakang ha batho ba bangata ba mehleng ea Jesu ba hana molaetsa oa hae!
Moapostola oa Mokreste Pauluse o ile a eletsa: “Mohlanka oa Morena ha a tšoanela ho loana; empa e ka khona a be mosa ho bohle, a lokele ho ruta, a mamelle ka sebete. A rute ka bonolo ba hanyetsang, ho tle ho lekoe hore na mohlomong Molimo o ke se ke oa ba nea pako, ba be ba lemohe ’nete.” (2 Timothea 2:24, 25) Tsela eo Pauluse a neng a bolela litaba tse molemo ka eona ho batho ba Athene, Greece, e fana ka mohlala o motle. O ile a behelana mabaka le Bajode ka synagogeng ea bona. Letsatsi le leng le le leng o ne a bua “le bao ho neng ho etsahala hore ebe ba teng” ’marakeng. Le hoja ho se pelaelo hore ba bang ba ne ba mpa feela ba rata ho mamela likhopolo tse ncha, Pauluse o ile a bua ka ho toba le ka mosa. O ile a buisana le bamameli ba hae ka molaetsa oa Molimo, o neng o ba khothaletsa ho baka. Ba ile ba arabela ka tsela e tšoanang le eo batho ba arabelang ka eona kajeno. “Ba bang ba ile ba qala ho soma, ha ba bang ba re: ‘Re tla u utloa mabapi le sena esita le nakong e ’ngoe.’” Pauluse ha aa ka a tsitlellela ho lelefatsa puisano ena. Ha a se a boletse molaetsa oa hae, o ile a “tsoa har’a bona.”—Liketso 17:16-34, NW.
Hamorao, Pauluse o ile a bolella litho tsa phutheho ea Bakreste e Efese hore ‘ha a ka ba a pata taba leha e le ’ngoe, ea tse ba tšoanelang; ha a ka ba a phetsa le ho ba bolella le ho ba ruta tsona pontšeng le ka matlung a bona.’ Ho feta moo, ‘o ne a ntse a khothaletsa ba-Juda le ba-Gerike ho sokolohela ho Molimo, le ho lumela ho Jesu Kreste.’—Liketso 20:20, 21.
Mehlala ena ea Mangolo e bontša kamoo mehleng ea Bibele bahlanka ba Molimo ba tšepahalang ba neng ba buisana ka bolumeli kateng. Kahoo kajeno, Lipaki tsa Jehova ka boikokobetso li buisana le baahisani ba tsona ka bolumeli.
Lipuisano Tse Finyellang ho Eketsehileng
‘Utloang Lentsoe la Molimo.’ ‘Mamelang litaelo tsa hae.’ Likhothatso tse joalo li hlaha hangata hakaakang ka Bibeleng! U ka arabela litaelong tsena tsa Bibele nakong e tlang ha Lipaki tsa Jehova li bua le uena. Mamela molaetsa oo li u tlisetsang oona o tsoang Bibeleng. Molaetsa ona hase oa lipolotiki empa o buella puso ea Molimo ea leholimo, ’Muso oa hae. Ena ke kofuto ea Molimo bakeng sa ho tlosa lisosa tsa likhohlano tsa kajeno. (Daniele 2:44) Ka mor’a moo puso ena ea Molimo e tsoang leholimong e tla lokisetsa hore lefatše lohle le fetoloe paradeise e tšoanang le tšimo ea Edene.
Eo e kileng ea e-ba lepolesa la lefokisi o ne a atisa ho hana ho mamela ha Lipaki tsa Jehova li bua le eena ka Bibele. Empa ka ho eketseha ha tlōlo ea molao eo a ileng a tlameha ho talimana le eona, o ile a felloa ke tšepo mabapi le bophelo. Kahoo o ile a bolella Paki e ileng ea mo etela ka mor’a moo hore o tla batlisisa bopaki ba molaetsa oa Bibele. Ho ile ha latela lipuisano tsa kamehla. Le hoja lepolesa lena le ne le falla hangata, Lipaki li ile tsa ithaopela ho mo batla sebakeng ka seng se secha hore li ntšetse lipuisano pele. Qetellong lepolesa lena le ile la lumela: “Bopaki boo ke neng ke bo batla bo ne bo ntse bo le hona ka mona ka Mangolong a Halalelang ka linako tsohle. Haeba Lipaki tseo li ne li sa ka tsa mamella ho buisana le ’na, nka be ke ntse ke le kantle mane ke ntse ke ipotsa hore na morero oa bophelo ke eng. ’Nete ke hore, ke se ke tseba ’nete, ’me ke tla sebelisa nako ea bophelo ba ka e setseng ke batla ba bang ba ntseng ba batla Molimo joalokaha ke ne ke mo batla.”
Bautloi ba thahasellang ka sebele ba batla ho tseba ho eketsehileng. Ka nepo ba lebella ho fumana mabaka a litumelo tse boleloang. (1 Petrose 3:15) Feela joalokaha ngoana e monyenyane a botsa batsoali ba hae lipotso a sa khaotse ’me a lebella hore ba arabele, ke ka nepo u lebellang hore Lipaki li u fe likarabo tse molemo. U ka kholiseha hore ka thabo li tla khutla ’me li buisane le uena ka molaetsa oa Bibele ka ho eketsehileng.
Mohlomong u se u ntse u tseba ho seng hokae ka Bibele. U ka ’na ua hlokomela hore seo Molimo a se lebellang ho uena se tla akarelletsa liphetoho tse itseng tseleng eo u phelang ka eona. U se ke ua tsila-tsila ho hatela pele hobane u tšaba hore seo Molimo a se hlokang se akarelletsa boitelo bo bongata haholo. Se tla mpe se tlise thabo ea ’nete. U tla utloisisa sena ha u ntse u hatela pele mohato ka mohato.
Oa pele, ithute hore na Jehova ke mang, o lebeletse eng ho uena, le hore na o fana ka eng. Kōpa Lipaki hore li u bontše seo Bibele e se buang ka sena. Netefatsa seo li se buang Bibeleng ea hao. Ha u hlokomela hore Lipaki li na le kahlolo e molemo mabapi le seo li se bolelang e le ’nete ea bolumeli, ha ho pelaelo hore u tla batla ho batlisisa lintho tse ntle tse eketsehileng tseo li ka li arolelanang le uena ka Mangolong.—Liproverbia 27:17.
U amoheloa ka thabo hore u tl’o bona Lipaki sebakeng sa tsona sa liboka, Holo ea ’Muso e sebakeng sa heno. Moo u tla utloa lipuisano tse molemo tsa Lentsoe la Molimo. U tla bona kamoo ba leng teng ba thabelang ho buisana ka merero ea Molimo. Lumella Lipaki tsena ho u thusa ho ithuta ’nete ka thato ea Molimo bakeng sa rōna kajeno. Arabela memong ea Molimo ea ho bua ka borapeli ba ’nete ’me u fumane kamohelo ea hae e mofuthu, esita le bophelo bo sa feleng Paradeiseng.—Malakia 3:16; Johanne 17:3.
[Setšoantšo se leqepheng la 5]
Noe o ne a bua ka morero oa Molimo pontšeng
[Litšoantšo tse leqepheng la 7]
Joalokaha Pauluse a ne a etsa Athene ea boholo-holo, Lipaki tsa Jehova li ruta ba bang linnete tsa Bibele