Lipotso Tse Tsoang ho Babali
“Molula-Qhooa” oa November 1, 1995, o ile oa lebisa tlhokomelo ho seo Jesu a se boletseng mabapi le “moloko ona,” joalokaha re bala ho Matheu 24:34. Na see se bolela hore ho na le pelaelo e itseng mabapi le hore na ’Muso oa Molimo o ile oa hlongoa leholimong ka 1914?
Ho tšohloa ha taba eo ho Molula-Qhooa ha hoa tlisa phetoho ea letho thutong ea rōna ea motheo mabapi le 1914. Jesu o nehelane ka pontšo e neng e tla tšoaea ho ba teng ha hae matleng a ’Muso. Re na le bopaki bo bongata ba hore pontšo ena e ’nile ea phethahala ho tloha ka 1914. ’Nete e mabapi le lintoa, litlala, mafu a seoa, litšisinyeho tsa lefatše le bopaki bo bong li tiisa hore ho tloha ka 1914, Jesu o ’nile a nka khato e le Morena oa ’Muso oa Molimo. Sena se supa hore ho tloha ka nako eo, re ’nile ra phela nakong ea bofelo ba tsamaiso ea lintho.
Joale ke eng seo Molula-Qhooa o neng o se hlakisa? Ha e le hantle, ntlha ea bohlokoa e ne e le kutloisiso eo Jesu a ileng a sebelisa lentsoe “moloko” ka eona ho Matheu 24:34. Temana eo e baleha tjena: “Kannete ke re ho lōna moloko ona ho hang ha o na ho feta ho fihlela lintho tsena tsohle li etsahala.” Jesu o ne a bolela eng ka “moloko” mehleng ea hae esita le mehleng ea rōna?
Mangolo a mangata a tiisa hore Jesu ha aa ka a sebelisa lentsoe “moloko” malebana le sehlopha se senyenyane kapa se khethehileng, e leng baeta-pele ba Bajuda feela kapa barutuoa ba hae ba tšepahalang feela. Ho e-na le hoo, o ile a sebelisa lentsoe “moloko” ho nyatsa letšoele la Bajuda le neng le mo latola. Leha ho le joalo, ka thabo batho ka bomong ba ne ba ka etsa seo moapostola Petrose a ileng a se phehella letsatsing la Pentekonta, e leng ho sokoloha le ho ‘pholoha molokong ona o khopameng.’—Liketso 2:40.
Ho hlakile hore ka polelo eo, Petrose o ne a sa bolele ka ho tobileng batho ba lilemo tse itseng kapa bolelele ba nako, leha e le hona hore o ne a amahanya “moloko” le letsatsi leha e le lefe le itseng. Ha aa ka a re batho ba lokela ho pholoha molokong o tsoetsoeng selemong se le seng le seo Jesu a tsoetsoeng ka sona kapa moloko o tsoetsoeng ka 29 C.E. Petrose o ne a bua ka Bajuda ba sa lumelang ba mehla eo—mohlomong ba bang ba ne ba hlile ba le banyenyane, ha ba bang ba ne ba le baholoanyane—ba neng ba utloile thuto ea Jesu, ba bone mehlolo ea hae kapa ho utloela ka eona ’me leha ho le joalo, ba sa mo amohela e le Mesia.
Ka ho hlakileng, ke kamoo Petrose a ileng a utloisisa ho sebelisa ha Jesu lentsoe “moloko” ha eena le baapostola ba bang ba bararo ba ne ba e-na le Jesu Thabeng ea Mehloaare. Ho ea ka polelo ea boprofeta ea Jesu, Bajuda ba mehleng eo—ha e le hantle, batho ba phetseng nakong ea Jesu—ba ne ba tla angoa ke lintoa, litšisinyeho tsa lefatše, litlala le bopaki bo bong ba hore bofelo ba tsamaiso ea Sejuda bo ne bo le haufi, kapa ba utloele ka tsona. Ha e le hantle, moloko oo ha oa ka oa feta pele bofelo bo fihla ka 70 C.E.—Matheu 24:3-14, 34.
Re lokela ho hlokomela hore hase kamehla re ileng ra nka mantsoe ao a Jesu ka kutloisiso eo. Batho ba sa phethahalang ba na le tšekamelo ea ho batla ho ba ba tobileng mabapi le letsatsi leo bofelo bo tla tla ka lona. Hopola hore baapostola le bona ba ile ba batla lintlha tse tobileng, ba botsa: “Morena, na u khutlisetsa ’muso ho Iseraele nakong ee?”—Liketso 1:6.
Ka maikutlo a tšepahalang a tšoanang le ao, mehleng ea kajeno bahlanka ba Molimo ba ile ba leka ho fumana nako e itseng e tobileng e baliloeng ho tloha ka 1914 ho seo Jesu a se buileng ka “moloko.” Ka mohlala, ho ’nile ha behoa lebaka la hore moloko e ka ba batho ba lilemo li 70 kapa 80, ba hōlileng ka ho lekaneng hore ba utloisise se neng se boleloa ke ntoa ea pele ea lefatše le liketsahalo tse ling; ka hona, re ka hakanya hore na bofelo bo batla bo atametse hakae.
Ho sa tsotellehe hore na monahano oo o ne o lokile hakae, na o ne o lumellana le keletso eo Jesu a ileng a tsoela pele ho fana ka eona? Jesu o ile a re: “Malebana le letsatsi leo le hora eo ha ho ea tsebang, leha e le mangeloi a maholimo kapa Mora, haese Ntate feela. . . . Ka hona, le lule le lebetse, hobane ha le tsebe hore na Morena oa lōna o tla ka letsatsi lefe.”—Matheu 24:36-42.
Ka lebaka leo, boitsebiso bo hlahileng morao tjena ho Molula-Qhooa mabapi le “moloko ona” ha boa fetola kutloisiso ea rōna ka se etsahetseng ka 1914. Ho e-na le hoo, bo re file kutloisiso e hlakileng haholoanyane ka ho sebelisa ha Jesu lentsoe “moloko,” e leng ho re thusang ho hlokomela hore ho le sebelisa ha hae e ne e se motheo oa ho bala nako—ho bala ho tloha ka 1914—ho bona hore na re haufi hakae le bofelo.