Ketsahalo e Thabisang Sehlopha sa Gileade sa bo104 se Abeloa Mangolo
“LENA ke letsatsi la thabo, ’me kaofela re thabile.” Ka mantsoe ao, Carey Barber, setho sa Sehlopha se Busang sa Lipaki tsa Jehova, o ile a bula lenaneo la ho abela sehlopha sa bo104 sa Sekolo sa Bibele sa Gileade sa Watchtower mangolo ka la 14 March, 1998. Ho ile ha kōptjoa bamameli ba 4945 hore ba qale ketsahalo ena ka ho bina pina ea ’Muso ea 208, eo sehlooho sa eona se reng “Pina ea Thabo.”
Keletso e Sebetsang Bakeng sa ho Lula U Thabile
Karolo e qalang ea lenaneo, e leng letoto la lipuo tse hlano tse khutšoanyane tse thehiloeng Bibeleng, e ile ea fana ka keletso e sebetsang mabapi le kamoo ho ka bolokoang moea oa thabo o neng o tletse hohle letsatsing la kabo ea mangolo.
Joseph Eames oa Lefapha la Bongoli o ile a nehelana ka puo ea pele. O ile a buella sehlooho se reng “Etsisa Moea oa ba Tšepahalang ka ho sa Sekisetseng,” se thehiloeng tlalehong ea Bibele e ho 2 Samuele khaolong ea 15 le ea 17, moo Absalome, mor’a Davida, a ileng a etsa ’momori oa ho nka ’muso oo ntat’ae a neng a o filoe ke Molimo ka ho hlohlelletsa phetohelo. Leha ho le joalo, ho bile le ba ileng ba sala ba tšepahala ka ho sa sekisetseng ho Morena Davida, motlotsuoa oa Jehova. Baromuoa ba bacha ba ne ba ka ithuta eng ho see? Mor’abo rōna Eames o ile a phetha: “Kae kapa kae moo le eang teng likabelong tsa lōna tsa boromuoa, ka botšepehi bo sa sekisetseng khothalletsang moea oa tšebelisano le oa ho hlompha matla a ho laela a puso ea Molimo. Thusang ba bang ho etsa se tšoanang.”
Ea ileng a latela lenaneong e bile David Sinclair, ea ileng a lokolisa lintho tse leshome tse hlokahalang bakeng sa ho ba baeti ‘tenteng ea Jehova,’ tse boletsoeng ho Pesaleme ea 15. Puo ea hae, eo sehlooho sa eona se reng “Tsoelang Pele le le Baeti Tenteng ea Lōna ea Boromuoa,” e ile ea khothalletsa liithuti tse neng li abeloa mangolo ho sebelisa pesaleme ena likabelong tsa tsona tsa boromuoa, moo e neng e tla ba baeti teng. Mor’abo rōna Sinclair o ile a totobatsa bohlokoa ba ho phela tumellanong le litekanyetso tsa bomolimo ka linako tsohle. Phello ke efe? Pesaleme ea 15:5 e re: “Ea etsang joalo, a ke ke a sisinyeha le ka ho sa eeng kae.”
Ho ile ha latela John Barr, setho sa Sehlopha se Busang, ’me a lebisa tlhokomelo phellong e matlafatsang eo ho bina libokeng tsa Bokreste ho nang le eona. Empa pina e thabisang ka ho fetisisa e binoang ho pota lefatše ke efe? Ke litaba tse molemo tsa ’Muso oa Molimo oa Bomesia. Phello ea ho bina hoo hohle kapa ho bolela ka ’Muso ke efe? Mola oa bobeli oa pina ea 208 o e beha ka ho toba: “Ha ntse re paka ka ’Muso oa Jah, batho ba ineela ho Jehova. Joaloka rōna ba tsanyaola pina tsa thabo fatšeng lena!” E, letsatsi ka leng barutuoa ba bacha ba ka bang 1000 baa kolobetsoa. Mor’abo rōna Barr o ile a phetha: “Barab’abo rōna, na hase ho hlollang ho nahana hore le romeloa linaheng ho ea kopana le mofuta oa batho ba tla beng ba letetse feela ho utloa pina ea lōna ea thoriso?”
Sehlooho sa puo eo James Mantz oa Lefapha la Bongoli a ileng a nehelana ka eona ka mor’a moo se ne se re: “Mamelang ba Nang le Phihlelo.” O ile a bontša hore lintho tse ling li ka ithutoa feela ka phihlelo ea botho. (Baheberu 5:8) Leha ho le joalo, Liproverbia 22:17 e re khothalletsa ho ‘mamela lipolelo tsa ba bohlale,’ kapa ba nang le phihlelo. Liithuti tse abeloang mangolo li ka ithuta ho hongata ho tse tsoileng pele ho tsona. Mor’abo rōna Mantz o ile a re: “Ba tseba tsela ea ho buisana le bahoebi ba sebakeng seo ka litheolelo. Ba tseba hore na ke libaka life tsa motse tse lokelang ho qojoa ka lebaka la likotsi tsa ’meleng le tsa boitšoaro. Lia tseba hore na ke lintho life tse khopisang batho ba sebakeng seo habonolo. Baromuoa ba nako e telele baa tseba hore na ho hlokahala eng hore u thabe le hore u atlehe kabelong ea hao.”
Wallace Liverance, mongolisi oa Sekolo sa Gileade ha a buella sehlooho se reng “Ananela Kabelo ea Hao ea Puso ea Molimo,” o ile a hlalosa hore le hoja baromuoa ba bang, ba kang moapostola Pauluse, Timothea le Barnabase, ba ile ba amohela likabelo tsa bona ho Molimo ka moea o halalelang kapa pontšo e itseng ea mohlolo, baromuoa ba koetlisitsoeng Gileade ba abeloa sebaka tšimong ea lefatše ka bophara ke “lekhoba le tšepahalang le le masene.” (Matheu 24:45-47) O ile a bapisa likabelo tsa baromuoa le libaka tseo Gideone a ileng a li abela banna ba hae ba neng ba lokela ho loantša Bamidiane. (Baahloli 7:16-21) Mor’abo rōna Liverance o ile a phehella: “Ananelang kabelo ea lōna ea puso ea Molimo ea boromuoa. Joalokaha masole a Gideone a ile ‘a ema e mong le e mong sebakeng sa hae,’ talimang likabelo tsa lōna e le sebaka seo le lokelang ho ba ho sona. E-bang le tumelo ea hore Jehova a ka le sebelisa joalokaha a ile a sebelisa ba makholo a mararo ba Gideone.”
Ho Lebisa Tlhokomelo Bathong ho Fella ka Thabo
Molula-Qhooa o kile oa re: “Ho e-na le hore re thahaselle ka ho feletseng le ho phelela thepa le lintho tse sebelisoang tsa lefatše lena, lintho tseo ho se nang bonnete ba hore li tla ba teng ka ho sa feleng, ho molemo ebile ho bohlale hakaakang hore re thahaselle batho ka ho feletseng ’me re ithute ho fumana thabo ea ’nete ho etsetseng ba bang lintho.” Tumellanong le seo, Mor’abo rōna Mark Noumair, e leng e mong oa barupeli ba Sekolo sa Gileade, o ile a buisana le sehlopha sa liithuti ka liphihlelo tsa tsona tsa tšebeletso ea tšimo ’me a re: “Ho bontša thahasello ea botho ho ba bang ke sona se tla etsa hore le be baromuoa ba molemo.”
Linotlolo Tsa Thabo Tšimong ea Linaha Tse Ling
Linotlolo tse ling tsa katleho le thabo mosebetsing oa boromuoa ke life? Mor’abo rōna Charles Woody, oa Lefapha la Tšebeletso le Harold Jackson, eo e kileng ea e-ba moromuoa Latin America ebile e le motlatsi oa Komiti e Rutang, ba ile ba buisana le litho tsa Likomiti tse sa tšoaneng tsa Makala tse neng li le sehlopheng sa borobong sa sekolo sa basebetsi ba makala. Ona ke mohlala oa keletso eo bana ba ileng ba fana ka eona:
Albert Musonda oa Zambia o ile a re: “Ha moromuoa a nka bohato ba pele ba ho lumelisa barab’abo rōna, sena se hlahisa moea o motle haholo hobane barab’abo rōna ba tla atamela haufi le moromuoa, ’me moromuoa o tla atamela haufi le bona.”
Rolando Morales oa Guatemala o ile a etsa tlhahiso ea hore ha batho ba nang le botsoalle ba fa baromuoa ba bacha seno se itseng, ba ka araba ka mosa le ka bohlale ba re: “Ke sa tsoa fihla naheng ena. Nka rata ho se noa, empa ’mele oa ka ha o na matla a ho itšireletsa maloetseng joaloka ’mele oa hao. Ke tšepa hore ka letsatsi le leng ke tla se amohela, ’me ke tla thabela ho etsa joalo.” Melemo ea karabo ea mofuta oo ke efe? “Batho ba ke ke ba khopeha, ’me baromuoa ba tla be ba bile mosa ho ba bang.”
Ke’ng se ka thusang baromuoa ho mamella likabelong tsa bona? Mor’abo rōna Paul Crudass, ea ileng a abeloa lengolo sehlopheng sa bo79 sa Gileade, ea ’nileng a sebeletsa Liberia lilemong tse fetileng tse 12, o ile a hlokomela sena: “Kea tseba hore ke ’nete hore batsoali ba hloloheloa bana ba bona. Empa ho na le linako tseo ka tsona moromuoa a lekang ho tloaela naha, tikoloho, mekhoa ea bophelo, batho. A ka ’na a ba le boikutlo ba ho tsamaea. Haeba a fumana lengolo le tsoang hae le reng, ‘Re u hlolohetsoe haholo; ha re tsebe hore na re tla etsa joang ha u le sieo,’ seo e ka ’na ea e-ba sohle seo a se hlokang hore a tlame thoto a ee hae. Ke habohlokoa haholo hore beng ka baromuoa ba leng mona kajeno ba hopole seo.”
Ka mor’a lipuisano, Theodore Jaracz, setho sa Sehlopha se Busang o ile a nehelana ka puo ea ho qetela lenaneong. Sehlooho sa hae se ne se re: “Etelletsa ’Muso ka Pele-pele Bophelong ba Hao.” Baromuoa ba ka lula joang ba tsepamisitse mehopolo ’me ba sa sitisoe mosebetsing oa bona? O ile a ba khothalletsa ho ba le kemiso ea thuto ea botho ea Bibele, e tla ba thusa ho beha lithahasello tsa ’Muso ka pele-pele bophelong ba bona. ’Me ho bile le khopotso ena e nakong: “Baromuoa ba bang ba hlokomolohile thuto ea botho hobane ba ile ba tšoareha ka ho feletseng linthong tse sebelisoang tsa elektronike, E-mail, le k’homputha. Re lokela ho hlaphoheloa likelellong hore re leka-lekane tšebelisong ea kofuto efe kapa efe ’me re se ke ra qeta nako e fetang tekano nthong e ka kena-kenanang le nako ea rōna ea thuto ea botho ea Lentsoe la Molimo.”
Ka mor’a puo ea Mor’abo rōna Jaracz ho ile ha latela kabo ea mangolo le ho baloa ha lengolo la kananelo le tsoang sehlopheng sa liithuti. Moemeli oa sehlopha sena o ile a bolela maikutlo a e mong le e mong ka tsela ena: “Re bone bopaki ba sebele ba lerato leo Jesu a ileng a re le ne le tla khetholla barutuoa ba hae, ’me sena se re kholisitse hore ho sa tsotellehe hore na re hokae, ho na le mokhatlo o hlophisitsoeng o kang ’mè o mofuthu, o lerato o re tšehelitseng. Ka tšehetso e joalo, re loketse ho ea lipheletsong tsa lefatše.” E ne e le qetello e susumetsang ea letsatsi le thabisang la kabo ea mangolo a sehlopha sa bo104 sa Gileade.
[Lebokose le leqepheng la 24]
Lipalo-palo tsa sehlopha
Palo ea linaha tseo se li emetseng: 9
Palo ea linaha tseo se abetsoeng ho tsona: 16
Palo ea liithuti: 48
Palo ea malapa: 24
Karolelano ea lilemo: 33
Karolelano ea lilemo ’neteng: 16
Karolelano ea lilemo tšebeletsong ea nako e tletseng: 12
[Setšoantšo se leqepheng la 25]
(1) Romero, M.; Howarth, J.; Blackburne-Kane, D.; Hohengasser, E.; West, S.; Thom, S.
(2) Colon, W.; Glancy, J.; Kono, Y.; Drews, P.; Tam, S.; Kono, T.
(3) Tam, D.; Zechmeister, S.; Gerdel, S.; Elwell, J.; Dunec, P.; Tibaudo, H.
(4) Taylor, E.; Hildred, L.; Sanches, M.; Anderson, C.; Bucknor, T.; Hohengasser, E.
(5) Howarth, D.; Ward, C.; Hinch, P.; McDonald, Y.; Sanches, T.; Thom, O.
(6) Drews, T.; Tibaudo, E.; Elwell, D.; Dunec, W.; Blackburne-Kane, D.; Ward, W.
(7) Anderson, M.; Zechmeister, R.; McDonald, R.; Bucknor, R.; Glancy, S.; Gerdel, G.
(8) Romero, D.; Hinch, R.; Hildred, S.; Taylor, J.; Colon, A.; West, W.
[Setšoantšo se leqepheng la 25]
Sehlopha sa bo104 sa Sekolo sa Bibele sa Gileade sa Watchtower
Lethathamong le ka tlaase, mela e baloa ho tloha ka pele ho ea ka morao, ’me mabitso a thathamisitsoe ho tloha ka letsohong le letšehali ho ea ka ho le letona moleng ka mong
[Setšoantšo se leqepheng la 26]
Barab’abo rōna ba ileng ba nka karolo ho rupeleng sehlopha sa bo104:
(ho tloha ka letsohong le letšehali) W. Liverance, U. Glass, K. Adams, M. Noumair