Ho Amohela Tataiso ea Jehova ka Thabo
JOALOKAHA HO BOLETSE ULYSSES V. GLASS
E ne e le ketsahalo e ikhethang. Ho ne ho e-na le liithuti tse 127 feela sehlopheng se abeloang mangolo empa ho ne ho e-na le bamameli ba 126 387 ba nang le thahasello e matla, ba neng ba e-tsoa lichabeng tse ngata. E ne e le mokete oa kabo ea mangolo oa sehlopha sa bo21 sa Sekolo sa Bibele sa Gileade sa Watchtower, o neng o tšoaretsoe Yankee Stadium ea New York City ka la 19 July, 1953. Ke hobane’ng ha ketsahalo eo e ne e ikhetha hakaalo bophelong ba ka? A nke ke u fe boitsebiso bo seng bokae e le hore u ka utloisisa sena.
KE HLAHETSE Vincennes, Indiana, U.S.A., ka la 17 February, 1912, lilemo tse ka bang peli pele ’Muso oa Bomesia o tsoaloa, joalokaha ho hlalositsoe ho Tšenolo 12:1-5. Selemong se etellang sena pele batsoali ba ka ba ne ba qalile ho ithuta Bibele ka meqolo ea Studies in the Scriptures. Hoseng ho hong le ho hong ha Sontaha, Ntate o ne a balla lelapa e ’ngoe ea libuka tseo, ebe re buisana ka eona.
’Mè o ne a sebelisa seo a neng a ithuta sona bakeng sa ho ntlafatsa monahano oa bana ba hae. E ne e le motho ea molemo haholo—a le mosa haholo a bile a rata ho thusa. Rōna bana re ne re le bane, empa ’Mè o ile a atolosa lerato la hae hore le akarelletse bana ba bang ba baahisani. O ne a qeta nako a e-na le rōna. O ne a thabela ho re phetela lipale tsa Bibele le ho bina le rōna.
Hape o ne a ee a meme batho ba sa tšoaneng ba neng ba le tšebeletsong ea nako e tletseng hore ba tle lapeng heso. Ba ne ba qeta letsatsi kapa a mabeli, hangata ba tšoara liboka le ho fana ka lipuo lapeng heso. Re ne re rata ka ho khethehileng ba neng ba sebelisa lipapiso ’me ba re phetela lipale. Ka lekhetlo le leng ka 1919, hoo e ka bang selemo ka mor’a hore ntoa ea pele ea lefatše e lale, mor’abo rōna ea etileng o ile a buisana le rōna bana ka ho khetheha. O ile a bua ka ho khetheloa tšebeletso e halalelang—e leng seo hona joale ka nepo re reng ke boinehelo—’me a re thusa ho utloisisa kamoo e neng e ama bophelo ba rōna kateng. Hamorao mantsiboeeng ao ha ke il’o robala, ke ile ka rapela Ntate oa ka oa leholimo ’me ka mo bolella hore ke batla ho mo sebeletsa kamehla.
Leha ho le joalo, ka mor’a 1922 ho ameha ka lintho tse ling bophelong ho ile ha batla ho fifatsa qeto eo. Re ile ra ba bo-hloma-u-hlomole eaba ha ho phutheho ea Jehova eo re kopanelang le eona. Ntate o ne a le sieo ka lebaka la mosebetsi oa hae k’hamphaning ea literene. Re ne re sa tšoare thuto ea rōna ea Bibele kamehla. Ke ile ka khetha lithuto tsa sekolo ka sepheo sa ho ba moetsi oa litšoantšo tsa papatso ’me ke ile ka lokisetsa ho ea univesithing e ikhethang.
Ho Fetola Pono ea ka Bophelong
Bohareng ba bo-1930, lefatše le ile la boela la qala ho leba ntoeng ea lefatše. Re ne re lula Cleveland, Ohio, ha e mong oa Lipaki tsa Jehova a etela lapeng. Re ile ra qala ho nahana ka ho teba haholoanyane ka seo re neng re ithutile sona ha re sa le bana. Moholoane oa ka, Russell, ka ho khethehileng o ne a nka lintho ka ho teba, ’me ke eena ea ileng a kolobetsoa pele. Ke ne ke sa tšoane le eena, empa ka la 3 February, 1936, le ’na ke ile ka kolobetsoa. Kutloisiso ea ka ea se akarelletsoang ke boinehelo ho Jehova e ne e hōla, ’me ke ne ke ithuta ho amohela tataiso ea Jehova. Selemong sona seo likhaitseli tsa ka tse peli, Kathryn le Gertrude, le tsona li ile tsa kolobetsoa. Kaofela ha rōna re ile ra kenela tšebeletso ea nako e tletseng re le bo-pula-maliboho.
Leha ho le joalo, seo se ne se sa bolele hore ha ho mohla re neng re nahana ka ntho e ’ngoe e fapaneng. Ke ile ka mamela ka hloko ha mosali oa moholoane oa ka a mpolella ka ngoanana e motle haholo ea bitsoang Ann ea neng a “tuka malakabe” ho tloha ha a ne a utloa ’nete ’me o ne a tla tla libokeng lapeng heso. Ka nako eo Ann o ne a sebetsa e le mongoli ofising ea molao, ’me o ile a kolobetsoa pele selemo se fela. Ke ne ke sa rera ho nyala, empa ho ne ho totobetse hore pelo ea Ann e ne e le ’neteng ka ho feletseng. O ne a batla ho kopanela tšebeletsong ea Jehova ka ho feletseng. Ho ne ho se mohla a neng a ka re, “Na nka etsa see?” Ho e-na le hoo, o ne a ka botsa, “Tsela e molemohali ea ho etsa see ke efe?” ’Me o ne a ikemiselitse ho mamella mosebetsing ho fihlela o phethiloe. Boikutlo boo bo nepahetseng bo ile ba ipiletsa ho ’na. Ntle le moo, o ne a le motle haholo, ’me o sa ntse a le motle. E ile ea e-ba mosali oa ka, ’me kapele o ile a sebetsa le ’na tšebeletsong ea bopula-maliboho.
Koetliso ea Bohlokoa re le Bo-pula-maliboho
Re le bo-pula-maliboho re ile ra ithuta lekunutu la ho khotsofala ha re ne re haelloa ke lijo le ha re ne re e-na le tsona ka bongata. (Bafilippi 4:11-13) Ka letsatsi le leng, e ne e le ha shoalane e tšoara, ’me re sa ka ra ja. Re ne re e-na le lisente tse hlano feela. Re ile ra ea selakheng, ’me ka kōpa, “Na u ka re fa soseje ea lisente tse hlano?” O ile a re sheba eaba o seha lilae tse ’nè. Ka sebele theko ea eona e ne e feta lisente tse hlano, ’me e ile ea re ōtla.
Ho ne ho tloaelehile hore re thulane le khanyetso e matla ha re ntse re le tšebeletsong ea rōna. Motseng o pel’a Syracuse, New York, re ne re le seterateng re aba limemo ’me re apere liplakate bakeng sa ho memela batho sebokeng sa phatlalatsa se khethehileng. Banna ba babeli ba shahlileng ba ile ba ntšoara ka thata. E mong e ne e le lepolesa, empa o ne a sa apara junifomo ea hae, ’me o ile a iphapanya ha ke kōpa ho bona karete ea hae. Ka eona nako eo, Grant Suiter ea tsoang Bethele ea Brooklyn o ile a tla le rōna ’me a re re tla ea sepoleseng ho ea rarolla bothata bona. Eaba o letsetsa ofisi ea Mokhatlo e Brooklyn, ’me ’na le mosali oa ka re ile ra laeloa ho tsoa hape letsatsing lona leo ka liplakate le limemo ho fana ka motheo oa bopaki ba nyeoe ea tlhahlobo. Joalokaha ho lebeletsoe, re ile ra tšoaroa. Leha ho le joalo, ha re bolella mapolesa hore a tla qosetsoa ho re tšoara ntle ho lebaka le utloahalang molaong, a ile a re lokolla.
Letsatsing le latelang bacha ba bangata ba morusu ba ile ba hlasela sebaka seo re neng re bokane ho sona ka tlhohlelletso ea moprista, ’me mapolesa ha aa ka a hlahella. Bacha bana ba befileng ba ne ba otla fuluru ea lehong ka matla ka melangoana ea baseball, ba lahlela bamameli ba bang fatše ba ba tlosa litulong tsa mapolanka, ’me ba hloella sethaleng, moo ba neng ba tšoere folakha ea Amerika ’me ba hoeletsa, “E lumeliseng! E lumeliseng!” Joale ba qala ho bina “Beer Barrel Polka.” Ba ile ba qhala seboka sena ka ho feletseng. Re ne re latsoa ka ho toba seo Jesu a neng a se bolela ha a ne a re: “Kahobane ha le karolo ea lefatše, empa ke le khethile ho tsoa lefatšeng, ka lebaka lena lefatše lea le hloea.”—Johanne 15:19.
Ha e le hantle puo ea phatlalatsa e ne e le puo e rekotiloeng ea J. F. Rutherford, eo ka nako eo e neng e le mopresidente oa Mokhatlo oa Watch Tower. ’Na le Ann re ile ra lula motseng oo matsatsi a seng makae ’me ra etela batho ho ba fa monyetla oa ho utloa puo eo malapeng a bona. Ba seng bakae ba ile ba amohela monyetla oo.
Ho Ithaopela Tšebeletso Linaheng Tse Ling
Ka mor’a nako e itseng, ho ile ha buleha menyetla e meng ea tšebeletso. Moholoane oa ka Russell, le mosali oa hae, Dorothy, ba ile ba mengoa bobeli ba bona ho ba litho tsa sehlopha sa pele sa Sekolo sa Gileade, ka 1943, ka mor’a moo ba ile ba romeloa Cuba e le baromuoa. Khaitseli ea ka Kathryn o ne a le sehlopheng sa bone. Le eena o ile a fuoa kabelo ea ho ea Cuba. Hamorao o ile a fuoa kabelo e ’ngoe ea ho ea Dominican Republic a ntan’o isoa Puerto Rico. Ho thoe’ng ka ’na le Ann?
Ha re ne re utloa hore ho na le Sekolo sa Gileade le hore Mokhatlo o ne o batla ho romela baromuoa linaheng tse ling, re ile ra ikutloa hore re ka rata ho ithaopela ho ea sebeletsa linaheng tse ling. Qalong, re ile ra nahana hore re tsamaee ka borōna, mohlomong re ee Mexico. Empa hamorao ra etsa qeto ea hore mohlomong ho ka ba molemo ho leta ’me re tlohelle Mokhatlo o re fe kabelo ka mor’a ho kena Sekolo sa Gileade. Re ile ra hlokomela hore e ne e le eona tokisetso eo Jehova a neng a e sebelisa.
Re ile ra memeloa sehlopheng sa bone sa Sekolo sa Gileade. Empa pejana sehlopha sena se ka qalisa, N. H. Knorr, eo ka nako eo e neng e le mopresidente oa Mokhatlo oa Watch Tower, ka lebaka la kameho e mofuthu o ile a hlokomela ho fokola ha Ann ka lebaka la pholio eo a bileng le eona ha e sa le ngoana. O ile a buisana le ’na ka hona ’me a etsa qeto ea hore e ne e ke ke ea e-ba bohlale ho re romela naheng e ’ngoe ho ea sebeletsa teng.
Hoo e ka bang lilemo tse tharo hamorao, ha ke ne ke lokisetsa kopano, Mor’abo rōna Knorr o ile a kopana le ’na hape ’me a mpotsa hore na re sa ntse re thahasella ho ea Gileade. O ile a mpolella hore re ke ke ra ea kabelong ea naha e ’ngoe; o ne a nahanne ka ntho e ’ngoe. Ka hona, ha sehlopha sa borobong se ne se ngolisa ka la 26 February, 1947, re ne re le sehlopheng sa liithuti.
Matsatsi ao re a qetileng re le Gileade, hase a ho lebaloa. Thupelo ena e ne e enne moeeng. Re ile ra etsa metsoalle ea bophelo bohle. Empa ho ameha ha ka sekolong sena ho ile ha fetela ka nģ’ane ho sena.
Lipakeng Tsa Washington le Gileade
Sekolo sa Gileade se ne se ntse se batla se le secha. ’Muso oa United States o ne o sa tloaelana ka ho lekaneng le lipakane tsa sekolo sena, ka hona, o ne o botsa lipotso tse ngata. Mokhatlo o ne o batla ho ba le moemeli Washington, D.C. Re ile ra romeloa moo likhoeling tse seng kae ka mor’a ho abeloa mangolo Gileade. Ke ne ke lokela ho thusa ka ho fumanela ba neng ba memetsoe Gileade ba e-tsoa linaheng tse ling li-visa le ho fumana litokomane tse ling tsa molao e le hore ba abeloang mangolo ba ka romeloa linaheng tse ling bakeng sa mosebetsi oa boromuoa. Ba bang ba boholong ba ne ba se na leeme ba bile ba thusa. Ba bang ba ne ba hloile Lipaki ka ho feletseng. Ba seng bakae ba neng ba e-na le maikutlo a matla a lipolotiki ba ile ba tiisa hore re amana le mekha eo ba neng ba nka hore e mebe.
Monna e mong eo ke ileng ka ea ofising ea hae o ile a re nyatsa ka matla ka lebaka la ho se lumelise folakha le la ho se kopanele ntoeng. Ka mor’a ho tlatsa lerata ka seo ka nako e telele, qetellong ke ile ka re: “Ke batla hore u tsebe, ebile ua tseba hore Lipaki tsa Jehova ha li loantše mang kapa mang lefatšeng. Ha re nke karolo litabeng tsa lefatše. Ha re nke karolo lintoeng tsa lona, lipolotiking tsa lona. Ha re jele paate ho hang. Re se re hlōtse mathata ao le talimaneng le ’ona; re ntho e le ’ngoe mokhatlong oa rōna. . . . Joale, u batla hore re etse eng? U batla hore re boele mokhoeng oa lōna ’me re tlohele oa rōna?” Ha aa ka a re letho ka morao ho moo.
Ho ne ho beheletsoe matsatsi a mabeli ka beke ka thōko bakeng sa mosebetsi oo re neng re lokela ho o ela liofising tsa ’muso. Ho ekelletsa moo, re ne re sebeletsa re le bo-pula-maliboho ba khethehileng. Morao koo, sena se ne se akarelletsa ho qeta lihora tse 175 tšebeletsong ea tšimo khoeli ka ’ngoe (hamorao li ile tsa theoleloa lihoreng tse 140), ka hona, hangata re ne re e-ba tšebeletsong ho fihlela bosiu haholo. Re ne re natefeloa. Re ne re khanna lithuto tse ngata tse ntle le malapa, ’me a ne a tsoela pele hantle. ’Na le Ann re ne re entse qeto ea ho se be le bana, empa ka puo ea moea, ha rea ka ra ba le bana feela, empa re ile ra boela ra ba le litloholo le litloholoana. Ba thabisa lipelo tsa rōna hakaakang!
Ho ella mafelong a 1948, ke ile ka fuoa kabelo e ’ngoe hape. Mor’abo rōna Knorr o ile a bolela hore Mor’abo rōna Schroeder, eo e neng e le mongolisi oa Sekolo sa Gileade ebile e le e mong oa barupeli, o ne a tla tšoareha mosebetsing o mong oa bohlokoa, ka hona ke ile ka kōptjoa hore ke rute lihlopha tsa Gileade ha ho hlokahala. Ke ne ke tšohile ha ’na le Ann re khutlela Gileade, e Langsing Boroa, New York, ka la 18 December. Qalong, re ne re e-ba Gileade ka libeke tse seng kae feela lekhetlo ka leng, ebe re khutlela Washington. Leha ho le joalo, qetellong re ne re e-ba Gileade ka nako e telele ho feta eo re neng re e-ba Washington ka eona.
Joalokaha ke boletse pejana, e bile nakong ena, moo sehlopha sa bo21 sa Gileade se ileng sa amohela mangolo a sona Yankee Stadium e New York. Ka hona, ke le e mong oa bakoetlisi, ke ile ka fuoa tokelo ea ho kopanela lenaneong leo la kabo ea mangolo.
Tšebeletso Ntlo-khōlō ea Lefatše Lohle
Ka la 12 February, 1955, re ile ra qalisa kabelo e ’ngoe ea tšebeletso. Re ile ra ba litho tsa lelapa la Bethele ea ntlo-khōlō ea lefatše lohle ea mokhatlo oa Jehova o bonahalang. Empa ho ne ho tla akarelletsa eng? Ha e le hantle, ho ne ho tla akarelletsa ho ikemisetsa ho etsa eng kapa eng eo re neng re abetsoe ho e etsa, ho nka karolo mesebetsing e neng e hloka hore re sebelisane le ba bang. Ka sebele, re ne re ile ra etsa seo pele, empa hona joale re ne re tla ba karolo ea sehlopha se seholoanyane—lelapa la Bethele la ntlo-khōlō. Re ile ra amohela kabelo ena ka thabo e le bopaki ba tataiso ea Jehova.
Karolo e ka sehloohong ea mosebetsi oa ka e ne e amana le phatlalatso. Ka lebaka la takatso ea lipale tse sisinyang maikutlo le ka lebaka la ho fumana boitsebiso mehloling e leeme, likoranta li ne li ngotse lintho tse mpe ka Lipaki tsa Jehova. Re ile ra leka ka matla ho ntlafatsa boemo boo.
Mor’abo rōna Knorr o ne a batla ho tiiseha hore bohle ba na le ho hongata hoo ba ka ho etsang, ka hona, ho ne ho boetse ho e-na le likabelo tse ling. Tse ling tsa tsona li ne li hloka tsebo eo ke nang le eona joaloka moetsi oa litšoantšo tsa papatso. Tse ling li ne li akarelletsa seteishene sa seea-le-moea sa Mokhatlo sa WBBR. Ho ne ho e-na le mosebetsi o lokelang ho etsoa mabapi le litšoantšo tsa baesekopo tse entsoeng ke Mokhatlo. Ha e le hantle, thupelo ea Gileade e ne e akarelletsa histori ea puso ea Molimo, empa joale ho ne ho etsoa mesebetsi e sa tšoaneng bakeng sa ho etsa hore batho ba Jehova ba eketsehileng ba tsebe makolopetso a histori eo ea mokhatlo o hlophisitsoeng oa puso ea Molimo oa kajeno le ho etsa hore batho bohle ba a fumane. Karolo e ’ngoe ea koetliso ea Gileade e ne e akarelletsa ho bua phatlalatsa, ’me ho ne ho hlokahala hore ho sebetsoe e le hore barab’abo rōna liphuthehong ba ka fumantšoa thuto ea motheo mabapi le ho bua phatlalatsa. Ka hona, ho ne ho e-na le ho hongata ho lokelang ho etsoa.
Ho ba Gileade Kamehla
Kaha balebeli ba tsamaeang le basebetsi ba makala ba ne ba tla tloha ba koetlisoa, ka 1961 Sekolo sa Gileade se ile sa fallisetsoa Brooklyn, moo liofisi tsa ntlo-khōlō ea Mokhatlo oa Watch Tower li leng teng. Ke ne ke boetse ke khutletse ka phaposing ea ho rutela—lekhetlong lena ke se mokoetlisi ea emang sebakeng empa ke le setho sa kamehla sa lefapha lena la thuto. E ne e le tokelo e kaakang! Ke kholisehile ka tieo hore Sekolo sa Gileade ke mpho e tsoang ho Jehova, mpho e tsoetseng mokhatlo ’ohle oa hae o hlophisitsoeng molemo.
Brooklyn, lihlopha tsa liithuti tsa Gileade li ne li e-na le menyetla eo liithuti tsa lihlopha tsa pele li neng li se na eona. Ho ne ho e-ba le barupeli ba eketsehileng ba baeti, ’me ho ne ho e-ba le kamano e haufi le Sehlopha se Busang le botsoalle bo pharaletseng le litho tse ngata tsa lelapa la Bethele la ntlo-khōlō. Ho ne ho boetse ho khoneha hore liithuti li fumane koetliso mabapi le tsamaiso ea ofisi, mesebetsi ea lehae la Bethele le likarolo tse sa tšoaneng tsa mosebetsi oa fektheri.
Ho pholletsa le lilemo palo ea liithuti e ne e fetoha, ’me le palo ea bakoetlisi e ne e fetoha. Sebaka seo sekolo se neng se le ho sona le sona se ile sa fetoha ka makhetlo a mangata. Hona joale se tikolohong e ntle Patterson, New York.
Ho Sebetsa le Liithuti
Ho ruta lihlopha tsena e bile thabo e kaakang! Bana ke batho ba bacha ba sa thahaselleng ho etsa lintho tsamaisong ea khale. Ba siea litho tsa malapa abo bona, metsoalle, mahae le batho ba buang puo ea bona. Boemo ba leholimo, lijo—ntho e ’ngoe le e ’ngoe e tla ba e fapaneng. Ha ba tsebe le ho tseba hore na ba tla ea naheng efe, empa pakane ea bona ke ho ba baromuoa. Ha ho hlokahale hore u khanne batho ba mofuta oo.
Ha ke ne ke kena ka phaposing ea ho rutela, kamehla pakane ea ka e ne e e-ba ho etsa hore liithuti li ikutloe li phutholohile. Ha ho na motho ea ithutang hantle ha a tsitsipane a bile a tšoenyehile. Ke ’nete hore ke ne ke le mokoetlisi, empa ke ne ke tseba hore na ho joang ho ba seithuti. Nkile ka lula litulong tseo. Ka sebele, ba ne ba ithuta ka thata ’me ba ithuta lintho tse ngata Gileade, empa hape ke ne ke batla hore ba natefeloe.
Ke ne ke tseba hore ha ba e-ea likabelong tsa bona, ho ne ho tla ba le lintho tse itseng tseo ba neng ba tla li hloka e le hore ba atlehe. Ba ne ba hloka tumelo e matla. Ba ne ba hloka boikokobetso—bo boholo. Ho ne ho hlokahala hore ba ithute ho sebelisana le batho ba bang, ho amohela maemo, ho tšoarela ka bolokolohi. Ho ne ho hlokahala hore ba tsoele pele ho hlaolela litholoana tsa moea. Hape ho ne ho hlokahala hore ba rate batho le ho rata mosebetsi oo ba neng ba rometsoe hore ba o etse. Tseo ke lintho tseo ke neng ke atisa ho leka ho li hatisa ho liithuti ha li le Gileade.
Ha e le hantle ha ke tsebe hore na ke rutile liithuti tse kae. Empa kea tseba hore na ke ikutloa joang ka tsona. Ka mor’a ho nka likhoeli tse hlano ke e-na le tsona ka phaposing ea ho rutela, ke ne ke li rata haholo. Joale ha ke li shebelletse li e-ea sethaleng ’me li amohela mangolo a tsona letsatsing la kabo ea mangolo, ke ne ke tseba hore li ne li phethile thupelo ena ka katleho le hore li ne li tla tloha li tsamaea. Ho ne ho tšoana le ha karolo ea lelapa la ka e tsamaea. U ne u ka tlohela joang ho rata batho ba neng ba ikemiselitse ho itela le ho etsa mosebetsi oo batho baa ba bacha ba neng ba tla o etsa?
Nako e telele ka mor’a moo, ha ba khutla ba etile, ke ba utloa ba bua ka thabo ea bona tšebeletsong, joale kea tseba hore ba ntse ba le likabelong tsa bona, ba etsa seo ba se koetliselitsoeng. Seo se etsa hore ke ikutloe joang? Kannete, hoa thabisa.
Ho Lebella Nako e Tlang
Hona joale mahlo a ka ha a sa bona hantle, ’me ke tsielehisoa ke liphello tsa sena. Ha ke sa khona ho ruta ka phaposing ea ho rutela ea Gileade. Qalong, ke ne ke thatafalloa ho amohela, empa ho pholletsa le bophelo ba ka ke ithutile ho amohela maemo le ho sebetsana le ’ona ka katleho. Ke atisa ho nahana ka moapostola Pauluse le “moutloa nameng” oo a neng a e-na le oona. Pauluse o ile a rapella ho lokoloha bohlokong boo ka makhetlo a mararo, empa Morena o ile a mo bolella: “Mosa o sa tšoanelang oa ka o u lekane; kaha matla a ka a ntse a etsoa a phethahetseng bofokoling.” (2 Bakorinthe 12:7-10) Pauluse o ile a tsoela pele ho o mamella. Haeba o ne a ka ho etsa, ke tlameha ho leka. Le hoja ke se ke sa rute ka tlelaseng, ke leboha hore ebe ke ntse ke bona ha liithuti li kena li e-tsoa letsatsi ka leng. Ka linako tse ling ke khona ho bua le tsona, ’me ho thabisa pelo ea ka ho nahana ka moea o motle oo li o bontšang.
Ho nahana ka seo bokamoso bo se tšoereng hoa hlolla. Hona joale ho raloa motheo. Gileade e bile le karolo e hlaheletseng ho oona. Ka nģ’ane ho mahlomola a maholo, ha meqolo eo ho buuoang ka eona ho Tšenolo 20:12 e buloa, ho tla be ho e-na le lilemo tse sekete tsa thuto e matla e tsoelang pele ea litsela tsa Jehova. (Esaia 11:9) Empa le hoo hase phetho. Ke qalo feela. Ho pholletsa le bosafeleng, ho tla ba le ho hongata ho ka ithutoang ka Jehova le ho ka etsoang ha re bona merero ea hae e phutholoha. Ke kholisehile ka ho feletseng hore Jehova o tla phethahatsa litšepiso tsohle tsa hae tse hlollang tseo a li entseng, ’me ke batla ho ba teng hore ke amohele tataiso ea Jehova bakeng sa rōna ka nako eo.
[Setšoantšo se leqepheng la 26]
Kabo ea mangolo a Gileade, Yankee Stadium ea New York ka 1953
[Setšoantšo se leqepheng la 26]
Gertrude, ’na, Kathryn le Russell
[Setšoantšo se leqepheng la 26]
Ke sebetsa le N. H. Knorr (ka thōko-thōko, ka ho le letšehali) le M. G. Henschel re lokisetsa kopano
[Setšoantšo se leqepheng la 26]
Lefapheng la khaso la WBBR
[Setšoantšo se leqepheng la 29]
Ka phaposing ea ho rutela ea Gileade
[Setšoantšo se leqepheng la 31]
Ke na le Ann, eseng khale haholo