Ba Ile ba Etsa Thato ea Jehova

Monehelo oa Boithatelo Bakeng sa ho Ntšetsa Pele Borapeli bo Hloekileng

BAISERAELE e ne e le lipaki tse boneng matla a pholosang a Jehova. Ba bone ha metsi a Leoatle le Lefubelu a aroha ka mohlolo, a ba lumella ho tšela mobung o omileng le ho pholoha matsohong a lebotho la Baegepeta. Ka mose oane, ba ile ba shebella ba le hojana ha metsi ’ona ao a kopana ka sekhahla holim’a ba ba lelekisang. Jehova o ne a pholositse bophelo ba bona!—Exoda 14:21-31.

Leha ho le joalo, hoa soabisa hore ebe Baiseraele ba bang ba ile ba nka habobebe seo Molimo oa bona a neng a se entse. Ha Moshe a ntse a le Thabeng ea Sinai, ba ile ba neha Arone mabenyane a bona a khauta ’me ba mo laela hore a ba etsetse molimo oa setšoantšo eo ba tla mo rapela. Ha Moshe a khutla, o ile a fumana letšoele lena la marabele le e-ja, le e-noa, le tantša le ho khumamela namane ea khauta! Ka taelo ea Jehova, ho ile ha bolaoa ba ka bang 3 000 bao mohlomong e neng e le bona bahlohlelletsi ba baholo ba borabele bona. Letsatsing leo, batho ba Molimo ba ile ba ithuta thuto ea bohlokoa e mabapi le hore hoa hlokahala ho rapela Jehova a ’notši.—Exoda 32:1-6, 19-29.

Nakoana ka mor’a ketsahalo ena, Moshe o ile a itokisetsa ho phetha taelo ea Molimo ea ho haha tabernakele, e leng tente ea borapeli e nkehang. Mosebetsi ona oa ho haha o ne o tla hloka thepa e theko e boima le basebetsi ba nang le tsebo. Basebetsi le thepa ba ne ba tla nkoa hokae? Hona re ka ithuta’ng tlalehong ee ea Bibele?

Menehelo ea Thepa le Tsebo

Jehova o ile a laela Baiseraele ka Moshe, a re: “Ntšang . . . seo le se abelang Jehova. Motho ka mong eo pelo ea hae e ratang, a ke a tlise se abetsoeng [“monehelo oa,” NW] Jehova.” Monehelo oa mofuta ofe? Har’a lintho tseo Moshe a ileng a li thathamisa e ne e le khauta, silevera, koporo, khoele e ohliloeng, masela, matlalo, lehong le majoe a bohlokoa.—Exoda 35:5-9.

Baiseraele ba ne ba e-na le lintho tse bonahalang tse ngata ho feta se hlokahalang bakeng sa monehelo o joalo o etsoang ka bolokolohi. Hopola hore ha ba tloha Egepeta, ba ile ba nka lintho tsa khauta, silevera, hammoho le liaparo tse ngata. Ha e le hantle, ba ile “ba hlobolisa ba-Egepeta.”a (Exoda 12:35, 36) Pele ho moo, Baiseraele ba ne ba ile ba fana ka mabenyane a bona hore ho etsoe molimo oa setšoantšo oa borapeli ba bohata. Na joale ba ne ba tla bontša hore ba cheseha ka tsela e tšoanang ha ba etsa monehelo o ntšetsang pele borapeli ba ’nete?

Hlokomela hore Moshe ha aa ka a laela hore na motho le motho a ntše bokae, leha e le hore o ile a sebelisa mokhoa oa hore motho a fane ka lebaka la ho ikutloa a le molato kapa a le lihlong. Ho e-na le hoo, o mpile a ipiletsa ho “motho ka mong eo pelo ea hae e ratang.” Ho totobetse hore Moshe o ile a ikutloa hore ha ho hlokahale hore a qobelle batho ba Molimo. O ne a kholisehile hore e mong le e mong o ne a tla fana ka seo a ka se khonang.—Bapisa le 2 Bakorinthe 8:10-12.

Leha ho le joalo, mosebetsi oa ho haha o ne o sa tl’o hloka menehelo ea thepa feela. Jehova o ile a boela a re ho Baiseraele: “Banna bohle ba masene ba har’a lōna ba tle ba tle, ba sebetse tsohle tseo Jehova a li laetseng.” E, mosebetsi ona oa ho haha o ne o hloka basebetsi ba nang le tsebo. Ka sebele, “tsebo ea ho etsa mesebetsi eohle”—ho akarelletsa ho betla mapolanka, ho tea tšepe le ho etsa mabenyane—e ne e tla hlokahala ho phetha mosebetsi ona. ’Nete ke hore Jehova o ne a tla tataisa tsebo ea basebetsi, ’me tlotla ea katleho ea mosebetsi ka nepo e ne e tla isoa ho eena.—Exoda 35:10, 30-35; 36:1, 2.

Baiseraele ka cheseho ba ile ba arabela memo ea hore ba fane ka lintho tsa bona tse bonahalang le tsebo ea bona. Tlaleho ea Bibele e re: “Motho ka mong ea elelitsoeng ke pelo ea hae le bohle ba pelo li ithatetseng, ba fihla ba tlisetsa Jehova likabelo [“monehelo,” NW] ho sebetsa tente ea pōkano, le tsohle tsa tšebeletso ea eona, le liaparo tse khethehileng. Banna ba tla ba e-na le basali; bohle ba pelo tse ithatetseng.”—Exoda 35:21, 22.

Thuto ho Rōna

Kajeno mosebetsi o moholo oa ho bolela litaba tse molemo tsa ’Muso oa Molimo o finyelloa ka menehelo ea boithatelo. Hangata e etsoa ka chelete. Maemong a mang, bara le barali babo rōna ba Bakreste ba sebelisa phihlelo e ngata eo ba nang le eona ho thusa ho haha Liholo tsa ’Muso, Liholo tsa Kopano le mehaho ea makala. Joale ho na le mosebetsi o etsoang mahaeng a Bethele a ka holimo ho lekholo lefatšeng ho pota, mosebetsi o akarelletsang tsebo ea mefuta e fapa-fapaneng. Bohle bao lipelo tsa bona li ratang, ba entseng menehelo e joalo, ba ka kholiseha hore Jehova a ke ke a lebala mosebetsi oa bona o boima!—Baheberu 6:10.

Ho joalo le ka karolo eo e mong le e mong oa rōna a nang le eona tšebeletsong ea Bokreste. Bohle ba phehelloa hore ba reke nako ea ho ba le karolo e bontšang cheseho boboleling. (Matheu 24:14; Baefese 5:15-17) Ba bang ba etsa sena e le baevangeli ba nako e tletseng, kapa bo-pula-maliboho. Ka lebaka la maemo, ba bang ba sitoa ho qeta nako e ngata joaloka bo-pula-maliboho tšebeletsong. Leha ho le joalo, le bona ba khahlisa Jehova. Joalokaha ho ne ho le joalo ka menehelo ea tabernakele, Jehova ha a qaqise hore na e mong le e mong o lokela ho fana ka bokae. Leha ho le joalo, seo a se batlang ke hore e mong le e mong oa rōna a mo sebeletse ka pelo eohle, moea, kelello le matla. (Mareka 12:30) Haeba re etsa joalo, re ka tiisa hore o tla re putsa bakeng sa menehelo ea rōna ea boithatelo eo re e ntšang ho ntšetsa pele borapeli ba ’nete.—Baheberu 11:6.

[Mongolo o botlaaseng ba leqephe]