Sehlopha sa Bo108 sa Gileade se Khothalletsoa ho Etsa Tšebeletso e Halalelang

KA Bibeleng, hangata ho sebelisoa poleloana e reng “tšebeletso e halalelang” ha ho buuoa ka ho rapela Molimo. E tsoa lentsoeng la Segerike le bolelang ho sebeletsa Molimo. (Baroma 9:4) Batho ba 5 562 ba neng ba mametse lenaneo la kabo ea mangolo a sehlopha sa bo108 sa Sekolo sa Bibele sa Gileade sa Watchtower ba ile ba utloa ha libui li fana ka keletso e sebetsang e tlang ho thusa ba abeloang mangolo hore ba etse tšebeletso e halalelang e amohelehang ho Jehova Molimo.a

Theodore Jaracz, setho sa Sehlopha se Busang sa Lipaki tsa Jehova, e ne e le molula-setulo. Lenaneo le ile la buloa ka pina ea 52, “Lebitso la Ntat’a Rōna.” Mola oa bobeli oa pina ena o re: “’Me re batla tsela tsa ho tlotla uena, Jehova.” Ruri sena se ile sa hlalosa takatso e tlohang pelong ea liithuti tsa sehlopha se neng se abeloa mangolo (tse neng li tsoa linaheng tse 10) ea hore li sebelise thupelo ea tsona likabelong tsa tsona tsa boromuoa, tse tlang ho ba linaheng tse 17 tse fapaneng.

Mantsoeng a hae a bulang, Mor’abo rōna Jaracz o ile a lebisa tlhokomelo thutong e matla ea Bibele ea likhoeli tse hlano ea liithuti e ileng ea li lokisetsa hore li sebeletse masimong asele. Thuto ena e li thusitse hore li ‘nepisise lintho tsohle,’ ke hore, li hlahlobisise seo li ithutileng sona li sebelisa Lentsoe la Molimo ’me li “tšoarelle ka tieo ho se setle.” (1 Bathesalonika 5:21) O ile a li khothalletsa hore ka botšepehi li khomarele Jehova, Lentsoe la hae, le likabelo tseo li koetliselitsoeng hore li li phethe. Li tla thusoa ke’ng ha li etsa see sohle?

Keletso e Sebetsang Bakeng sa ho Etsa Tšebeletso e Halalelang

Lon Schilling, eo e leng setho sa Komiti ea Tšebetso ea Bethele, o ile a tšohla sehlooho se reng “Na U Tla Feta ka Katleho Tekong ea ho ba le Kahlolo e Molemo?” O ile a totobatsa bohlokoa ba ho ba le kahlolo e molemo, e leng ho bonahatsang bohlale ba bomolimo. (Jakobo 3:17) Ho ba le kahlolo e molemo ho kopanyelletsa ho ba ea tenyetsehang, ea hlokang leeme, ea leka-lekaneng, ea nahanelang le ea mamellang. Mor’abo rōna Schilling o ile a re: “Batho ba nang le kahlolo e molemo ba bontša teka-tekano ha ba sebelisana le ba bang. Ha ba feteletse lintho.” Moromuoa a ka thusoa ke eng hore e be ea nang le kahlolo e molemo? Ho se inkele holimo, ho sebelisa menyetla ea ho mamela le ho ithuta ho ba bang, le ho ikemisetsa ho nahanela maikutlo a ba bang ha ka nako e tšoanang a sa sekisetse melao-motheo ea bomolimo.—1 Bakorinthe 9:19-23.

Sehlooho se thahasellisang sa puo e latelang lenaneong, e neng e fanoa ke Samuel Herd, eo e leng setho se seng sa Sehlopha se Busang, se ne se re: “Le se Lebale ho Ja!” O ile a totobatsa bohlokoa ba ho ja lijo tse matlafatsang tsa moea e le hore motho a lule a loketse ho etsa tšebeletso e halalelang. Mor’abo rōna Herd o ile a re: “Haufinyane mosebetsi oa lōna oa moea o tla eketseha ha le ikakhela ka setotsoana kabelong ea lōna ea ho bolela le ho ruta. Ka lebaka leo, ho tla hlokahala hore le eketse mokhoa oo le jang lijo tsa moea ka oona e le hore le leka-lekanye le ho tsitsisa matla a lōna.” Ho ja lijo tsa moea ka mokhoa o sa feto-fetoheng ho ka thusa moromuoa hore a qobe ho tepella maikutlo le ho hloloheloa hae. Ho tlatsetsa khotsofalong le boikemisetsong ba hore motho a khomarele kabelo ea hae ea tšebeletso e halalelang.—Bafilippi 4:13.

Morupeli e mong oa Gileade, Lawrence Bowen, o ile a khothalletsa liithuti tse abetsoeng mangolo hore, “Le Khutlele Tšimolohong.” O ne a bolela’ng? O ile a kōpa hore bamameli bohle ba phetle Liproverbia 1:7 (NW), e reng: “Ho tšaba Jehova ke tšimoloho ea tsebo.” Sebui se ile sa hlalosa: “Ntho leha e le efe e sa natseng ’nete ea motheo ea hore Jehova o teng ha ho mohla e tla tšoaneleha hore e be tsebo ea ’nete kapa e felle ka kutloisiso e nepahetseng.” Mor’abo rōna Bowen o ile a tšoantša makolopetso a Lentsoeng la Molimo, Bibele, le likotoana tsa morabaraba oa ho kopanya likotoana ho etsa setšoantšo. Ha likotoana li kopanngoa, li etsa setšoantšo. Ha likotoana li le ngata, setšoantšo se ba seholoanyane le ho hlaka haholoanyane ’me motho o se ananela ka ho eketsehileng. Sena se ka thusa bohle hore ba etsetse Molimo tšebeletso e halalelang.

Wallace Liverance, eo e leng mongolisi Sekolong sa Gileade, o ile a phetha letoto la lipuo. Sehlooho sa hae se ne se re “Fana ka Liteboho e le Sehlabelo sa Hao ho Molimo.” O ile a lebisa tlhokomelo tlalehong ea ha Jesu a folisa balepera ba leshome. (Luka 17:11-19) Ke a le mong feela ea ileng a khutla ho tla rorisa Molimo le ho leboha Jesu. Mor’abo rōna Liverance o ile a re: “Kantle ho pelaelo, ba bang le bona ba ne ba thabetse hore ebe ba hloekile. Ba ne ba nyakaletse, empa ho bonahala eka seo ba neng ba ipatlela sona feela ke hore moprista a ba bolele ba hloekile.” Tlhoekiso ea moea e bang teng ka lebaka la ho ithuta ’nete, hammoho le teboho, li lokela ho re susumelletsa ho leboha Molimo bakeng sa molemo oa hae. Liithuti tsa sehlopha sa bo108 sa Gileade li ile tsa khothalletsoa hore li thuise ka mesebetsi eohle ea Molimo le molemo oa hae e le hore li etse hore tšebeletso ea tsona le mahlabelo a tsona e be pontšo ea teboho ea tsona ho Molimo.—Pesaleme ea 50:14, 23; 116:12, 17.

Liphihlelo le Puisano ka Lipotso Mabapi le Kamoo Sena se ka Etsoang

Mark Noumair, morupeli e mong oa Gileade, o ile a tšoara karolo e latelang ea lenaneo. E ne e pheta liphihlelo tsa sehlopha tsa tšebeletsong ea tšimo nakong ea thupelo. Ka kakaretso liithuti li qetile lilemo tse ka bang 12 tšebeletsong ea nako e tletseng pele li tla Gileade. Ha li ntse li le sekolong, li ile tsa qalisa lithuto tse ngata tsa Bibele le batho ba limelo tse sa tšoaneng, e leng ho bontšang hore liithuti li tseba ho ‘iphetola lintho tsohle ho batho ba mefuta eohle.’—1 Bakorinthe 9:22.

Ka mor’a liphihlelo tsa liithuti, Charles Molohan le William Samuelson ba ile ba buisana ka lipotso le litho tse ling tsa lelapa la Bethele le balebeli ba tsamaeang ba kileng ba rupeloa Gileade. E mong oa barab’abo rōna eo ho ileng ha buisanoa le eena ka lipotso, Robert Pevy, o ile a sebeletsa Philippines ka mor’a ho abeloa lengolo sehlopheng sa bo51 sa Gileade. O ile a hopotsa sehlopha: “Neng le neng ha ho e-na le bothata, e mong le e mong o etsa litlhahiso bakeng sa hore na bothata bo rarolloe joang. Kamehla ho na le ea leng bohlale ho u feta, ea tlang ho hlahisa khopolo e molemo. Empa haeba u sheba ka Bibeleng ’me u leka ho fumana pono ea Molimo ka lintho, ha ho motho ea tla fana ka pono e molemo ho e feta. Kamehla e tla ba tharollo e nepahetseng.”

Ha a lihela likhala lenaneong le letle la moea, John Barr, eo e leng setho sa Sehlopha se Busang, o ile a bua tlas’a sehlooho se reng “Etsetsa Jehova Tšebeletso e Halalelang e Amohelehang.” O ile a bontša kamoo tšebeletso e halalelang e ka bontšoang tšebeletsong ea tšimo kateng ho thusa batho ba lipelo li lokileng hore ba rapele Molimo ka tsela e amohelehang. Ka mor’a ho bua ka mantsoe a Jesu a ho Matheu 4:10, Mor’abo rōna Barr o ile a re, “Haeba re batla ho rapela Jehova a ’notši, re lokela ho qoba mefuta eohle e poteletseng ea borapeli ba litšoantšo, e kang meharo, takatso ea maruo le ho iphahamisa. Re thaba hakaakang hore ebe ho theosa le lilemo ho tloha mathoasong a lilemo tsa bo-1940 baromuoa ba rōna ba iketselitse tlaleho e ntle tabeng ee! ’Me re kholisehile hore lōna ba abeloang mangolo sehlopheng sena sa bo108 sa Gileade le tla latela mohlala oa bona. Le tla etsetsa Jehova tšebeletso e halalelang, e leng eena feela ea tšoaneloang ke eona.”

E bile sehlohlolo se setle sa lenaneo leo le hahang. Joale e ile ea e-ba nako ea ho utloa litumeliso tse tsoang ho batho ba lakaletsang liithuti katleho ho tsoa lefatšeng ka kakaretso, nako ea ho abuoa ha mangolo a diploma le nako ea ho bala lengolo le ngotsoeng ke sehlopha le bontšang kananelo bakeng sa koetliso eo se e fumaneng. Sehlopha se abeloang mangolo se ile sa khothalletsoa hore se bonahatse tšoaneleho ea ho khomarela likabelo tsa sona le tšebeletso ea sona ho Jehova. Bohle ba neng ba le teng, ho kopanyelletsa le baeti ba tsoang linaheng tse 25, ba ile ba kopanela ho phetheng lenaneo ka pina le thapelo.

[Mongolo o botlaaseng ba leqephe]

[Lebokose le leqepheng la 23]

LIPALO-PALO TSA SEHLOPHA

Palo ea linaha tseo se li emetseng: 10

Palo ea linaha tseo se abetsoeng ho tsona: 17

Palo ea liithuti: 46

Karolelano ea lilemo: 34

Karolelano ea lilemo ’neteng: 16

Karolelano ea lilemo tšebeletsong ea nako e tletseng: 12

[Setšoantšo se leqepheng la 24]

Sehlopha sa Bo108 se Abeloang Mangolo sa Sekolo sa Bibele sa Gileade sa Watchtower

Lethathamong le ka tlaase, mela e baloa ho tloha ka pele ho ea ka morao, ’me mabitso a thathamisitsoe ho tloha ka letsohong le letšehali ho ea ka ho le letona moleng ka mong.

(1) Amadori, E.; Cook, O.; Byrne, M.; Lee, A. (2) Newsome, D.; Pederzolli, A.; Bigras, H.; Kato, T.; Gatewood, D. (3) Eade, D.; Eade, J.; Wells, S.; Jamison, J.; Gonzales, M.; Gonzales, J. (4) Kato, T.; Lohn, D.; Niklaus, Y.; Preiss, S.; Foster, P.; Ibarra, J. (5) Amadori, M.; Manning, M.; James, M.; Boström, A.; Gatewood, B.; Newsome, D. (6) Foster, B.; Jamison, R.; Hifinger, A.; Koffel, C.; Koffel, T.; Byrne, G. (7) Hifinger, K.; Manning, C; Cook, J.; Boström, J.; Lohn, E.; Pederzolli, A. (8) James, A.; Wells, L.; Preiss, D.; Niklaus, E.; Lee, M.; Ibarra, P.; Bigras, Y.