Na Lekholo la Bo20 la Lilemo le ne le Busoa ke Satane?
KA LEBAKA la lintho tse mpe tse etsahetseng lekholong la bo20 la lilemo, ho ka thoe le ne le busoa ke Satane. Ha ho mohla batho ba kileng ba rata le ho lakatsa ho bolaea batho ba bangata ka lebaka la morabe, bolumeli kapa maemo a moruo joaloka lekholong leo.”
Sehopotso sa bo50 sa ho lokolloa ha batho ba se nang molato ba neng ba koaletsoe likampong tsa lefu tsa Nazi, se ile sa etsa hore ho ngoloe se ka holimo koranteng ea The New York Times ea la 26 January, 1995. Polaong e Sehlōhō—eo ho tsebahalang hore e ile ea etsoa ka morero oa ho timetsa morabe o itseng ka ho feletseng—ho ile ha bolaoa Bajuda ba ka bang limilione tse tšeletseng. Baahi ba Poland ba limilione tse ka bang tharo bao e seng Bajuda ba ile ba bolaoa ho se bitsoang “Polao e Sehlōhō e Lebetsoeng.”
Jonathan Glover bukeng ea hae ea Humanity—A Moral History of the Twentieth Century o re: “Ho hakanngoa hore pakeng tsa 1900 le 1989 ho bolailoe batho ba limilione tse 86 ntoeng.” Oa phaella o re: “Ho bolaeloa lintoeng lekholong lena la bomashome a mabeli la lilemo ho iphile matla ka tsela e ke keng ea hlalosoa. Ho bolela hore na ka kakaretso ho shoele batho ba bakae ha ho lumellane le se hlileng se etsahetseng, kaha hoo e ka bang batho ba babeli ho ba bararo (ba limilione tse 58) ba bolailoe lintoeng tse peli tsa lefatše. Empa haeba palo ea batho ba bolailoeng e ne e ka aro-aroloa, ho ne ho tla tšoana le hore ntoa e bolaile batho ba ka bang 2 500 letsatsi ka leng, E leng batho ba fetang 100 ka hora, letsatsi le leng le le leng ka lilemo tse mashome a robong.”
Ka lebaka leo, lekholo la bo20 la lilemo le bitsoa lekholo la lilemo le tletseng tšollo ea mali e fetisisang. Bukeng ea Hope Against Hope, Nadezhda Mandelstam o ile a ngola a re: “Re bone ha bobe bo hlōla ka mor’a hore melao ea boitšoaro ea batho e senngoe le ho hatakeloa.” Ntoeng ea bobe le botle, na ka sebele bobe bo hlōtse?
[Tlhaloso ea Moo Setšoantšo se Nkiloeng Teng e leqepheng la 2]
COVER: Mother and daughter: J.R. Ripper/SocialPhotos
[Tlhaloso ea Moo Setšoantšo se Nkiloeng Teng e leqepheng la 3]
U.S. Department of Energy photograph