Ho Tšepahala—Na ho na le Molemo?

MOEMELI e mong oa k’hamphani ea inshorense ea bitsoang Karla o ile a re: “U lefa chelete e ngata haholo bakeng sa inshorense ea hao ea bophelo. Haeba u ka kenela inshorense ea rōna, cheleteng eo u e lefang, u tla boloka R120 ka khoeli, e leng chelete e ngata haholo.”

Jens o ile a mo araba tjena: “E ka ’na eaba u tiisitse. Empa ke lefeletse inshorense ena ea bophelo k’hamphaning ena ka lilemo tse ngata. K’hamphani ena e ’nile ea nthusa haholo nakong e fetileng, ’me ke sa ntse ke batla ho lula ke tšepahala ho eona.”

Karl o ile a mo araba tjena: “Botšepehi ke ntho e ntle. Empa, botšepehi bo u jella chelete!”

Karl o ne a nepile. Hangata ho tšepahala ho motho e mong ho ka ’na ha jella motho chelete. Ho boetse ho hloka nako, matla le boitelo. Na botšepehi ke ba bohlokoa hakaalo?

Botšepehi bo Thoholetsoa Hangata Empa ha bo Bontšoe

Phuputsong e ’ngoe e ileng ea etsoa Jeremane ke Mokhatlo o Fuputsang Maikutlo a Batho oa Allensbach, karolo ea 96 lekholong ea ba ileng ba araba e nka botšepehi e le ntho e ratehang. Phuputso ea bobeli ea Allensbach e ileng ea etsoa ho ba lilemo li 18 ho ea ho tse 24 e ile ea bontša hore ho ba ileng ba araba, ba babeli ho ba bararo ba ne ba nka botšepehi e le “ntho e ntle.”

Le hoja botšepehi bo thoholetsoa ke ba bangata, ka liketso batho ba bangata ha ba tšepahale. Ka mohlala, linaheng tse ’maloa tsa Europe, hangata botšepehi ha bo eo pakeng tsa banyalani esita le ka hare ho malapa. Hangata botšepehi ha bo eo esita le pakeng tsa metsoalle. ’Me bonneteng, botšepehi boo pele bo neng bo matahanya mohiri le mohiruoa kapa khoebo le bareki, bo felile. Hobane’ng?

Ka linako tse ling, taba ea hore batho ba phela ba le maphatha-phathe e etsa hore ba se be le nako e lekaneng kapa ba ikutloe ba se na matla a lekaneng a ho itella ho etsa ntho e itseng eo ho hlokahalang hore ba e etse ka botšepehi. Mohlomong batho ba ileng ba phoqoa kapa ba soetsoa ha ba sebelisana le ba bang, ba ka ba leqe ho tšepahala ho mang kapa mang. Ba bang ba ka ’na ba rata mofuta oa bophelo ba ‘metsi a macha a ntša a khale,’ e leng bophelo bo sa hlokeng hore motho a tšepahale.

Ho sa tsotellehe hore na ke hobane’ng, botšepehi ke ntho e thoholetsoang hangata empa batho ba bangata ha ba bo bontše. Kahoo, potso e salang ke e reng: Na ho tšepahala ho na le molemo? Haeba ho joalo, re lokela ho tšepahala ho mang, hona re ka bontša ka litsela life hore rea tšepahala? Meputso ea ho tšepahala ke efe?

[Mongolo o botlaaseng ba leqephe]

[Ntlha e Qolotsoeng e leqepheng la 3]

Botšepehi ke ntho e thoholetsoang hangata empa batho ha ba bo bontše