Lipotso Tse Tsoang ho Babali
Boikarabelo ba phutheho ke bofe haeba Mokreste ea khannang koloi a baka kotsi e qetellang e entse hore batho ba shoe?
Phutheho e lokela ho hlahloba hore na ebe mokhanni o na le molato oa mali kapa che, hobane e lokela ho qoba ho kopanela boikarabelong ba ho ba le molato oa mali. (Deuteronoma 21:1-9; 22:8) Mokhanni ea bakileng kotsi eo e bolaeang a ka ’na a ba le molato oa mali haeba a ile a ba bohlasoa kapa a tlōla ka boomo o mong oa melao ea Cesare ea tšireletso kapa e laolang sephethephethe. (Mareka 12:14) Empa ho na le lintlha tse ling tse lokelang ho nahaneloa.
’Molai ea neng a balehetse ho o mong oa metse ea Baiseraele ea setšabelo o ne a lokela ho hlaha ka pel’a lekhotla. Haeba a ne a bolaile motho e se ka morero, o ne a lumelloa hore a lule motseng oo, e le hore a sireletsoe ho mopheteletsi oa mali. (Numere 35:6-25) Kahoo haeba Mokreste a bakile kotsi e entseng hore motho e mong a shoe, baholo ba lokela ho batlisisa litaba ho fumana hore na ebe ka tsela e itseng ha a na molato oa mali. Tsela eo ’muso o talimang taba ka eona kapa qeto ea lekhotla hase eona e rerang ka ho feletseng hore na phutheho e tla nka khato efe.
Ka mohlala, lekhotla le ka ’na la fumana motho a le molato oa ho tlōla molao o itseng, empa baholo ba batlisisang taba bona ba ka ’na ba etsa qeto ea hore ha ho amehe molato oa mali tabeng eo hobane ho ne ho se seo mokhanni a neng a ka se etsa ho laola maemo a ileng a fella ka hore ho shoe motho. Ka lehlakoreng le leng, haeba lekhotla le qhala nyeoe eo, baholo ba ka ’na ba etsa qeto ea hore motho eo o na le molato oa mali.
Qeto ea baholo ba batlisisang taba e lokela ho thehoa Mangolong le lintlheng tse hlakileng tse fumanoeng—ho lumela ha mokhanni hore o molato le/kapa bopaki ba lipaki tse peli kapa tse tharo tse tšepahalang tse boneng se etsahetseng. (Deuteronoma 17:6; Matheu 18:15, 16) Haeba ho fumaneha hore o na le molato oa mali, ho lokela hore ho thehoe komiti ea boahloli. Haeba komiti e fumana hore motho ea nang le molato oa mali o bakile, o tla fuoa khalemelo e loketseng ea Mangolo ’me o tla beheloa lithibelo mabapi le litokelo ka phuthehong. A ke ke a hlola a sebeletsa e le moholo kapa mohlanka ea sebeletsang. O tla beheloa le lithibelo tse ling. ’Me o ikarabella ho Molimo ka ho se natse, ka bohlasoa, kapa ka ho se falimehe ho feletseng ka hore a bake kotsi e bolaileng motho.—Bagalata 6:5, 7.
Ka mohlala: Haeba boemo ba leholimo bo ne bo le bobe ka nako ea kotsi, mokhanni a ka be a bile hlokolosi haholoanyane. Haeba o ne a otsela, a ka be a ile a ema ’me a phomola ho fihlela a hlaphoheloa, kapa a ka be a ile a re ho khanne motho e mong.
A re re mokhanni o ne a khanna ka lebelo le phahameng. Haeba Mokreste leha e le ofe a tlōla tekanyetso ea lebelo e behiloeng, ha a fe “Cesare lintho tsa Cesare.” O boetse o bontša hore ha a hlomphe khalalelo ea bophelo, hobane seo se ka ’na sa fella ka polao. (Matheu 22:21) Ntlheng ena, nahana ka taba e ’ngoe hape. Moholo o tla be a behela mohlape mohlala oa mofuta ofe haeba a sa natse melao ea Cesare ea sephethephethe kapa haeba a hlōleha ka boomo ho e boloka?—1 Petrose 5:3.
Bakreste ha baa lokela ho lebella hore Bakreste ba bang ba be sebakeng se itseng ka nako eo ho hlakileng hore ba ke ke ba ba ho sona ntle le hore ba tlōle tekanyetso e behiloeng ea lebelo. Leha ho le joalo, maemong a mangata, ho hlokahala feela hore motho a tlohe ka nako kapa a fetole kemiso ea hae e le hore a be le nako e lekaneng ea ho tsamaea. Haeba Mokreste a etsa joalo, a ke ke a lekeha hore a khanne ka lebelo le fetang leo a lokelang ho khanna ka lona, empa o tla khona ho boloka melao ea sephethephethe ea “balaoli ba phahameng” ba leng pusong. (Baroma 13:1, 5) Sena se tla thusa mokhanni hore a be hlokolosi hore a se ke a baka likotsi tse bolaeang tse ka ’nang tsa etsa hore a be le molato oa mali. Hape se tla mo nolofalletsa hore a behe mohlala o motle le ho ba le letsoalo le letle.—1 Petrose 3:16.