Jehova ke ‘Mopholosi’ oa Rōna

“Jehova o tla ba thusa ’me a ba pholose.”—PES. 37:40.

1, 2. Ke ’nete efe ea bohlokoa e mabapi le Jehova e re tšelisang le ho re matlafatsa?

LIRITI ha li eme ’nģa e le ’ngoe. Ha lefatše le ntse le potoloha, nako le nako liriti li tloha moo li neng li le teng ebile lia fetoha. Leha ho le joalo, ’Mōpi oa lefatše le letsatsi eena ha a fetohe. (Mal. 3:6) Bibele e re ka eena: “Ho eena ha ho phetoho ea ho reteleha ha moriti.” (Jak. 1:17) Ka sebele ’nete ena ea bohlokoa e mabapi le Jehova ea re tšelisa ebile ea re matlafatsa, haholo-holo ha re thulana le liteko le mathata. Hobane’ng?

² Joalokaha re bone sehloohong se fetileng, Jehova e bile “Mopholosi” mehleng ea ha ho ne ho ngoloa Bibele. (Pes. 70:5) Ha a fetohe ebile o phelela lentsoe la hae; kahoo, barapeli ba hae kajeno ba na le mabaka a ho tšepa hore o tla “ba thusa ’me a ba pholose.” (Pes. 37:40) Jehova o pholositse bahlanka ba hae joang mehleng ea kajeno? A ka ’na a re pholosa joang re le batho ka bomong?

Ho Lopolloa ho Bahanyetsi

3. Ke hobane’ng ha re ka kholiseha hore bahanyetsi ba ke ke ba thibela batho ba Jehova ho bolela litaba tse molemo?

³ Ha ho khanyetso efe kapa efe ea Satane eo le ka mohla e tla thibela Lipaki Tsa Jehova ho fa Jehova boinehelo bo khethehileng bo mo tšoanelang. Lentsoe la Molimo lea re tiisetsa: “Sebetsa leha e le sefe se tla etsoa khahlanong le uena se ke ke sa atleha, le leleme leha e le lefe le tla u tsohela matla kahlolong u tla le ahlola.” (Esa. 54:17) Bahanyetsi ba lekile empa ba hlōtsoe ho thibela batho ba Molimo ho etsa mosebetsi oa bona oa boboleli. Nahana ka mehlala e ’meli.

4, 5. Batho ba Jehova ba ile ba thulana le khanyetso efe ka 1918, ’me seo se ile sa fella ka eng?

⁴ Ka 1918, batho ba Jehova ba ile ba thulana le mahloriso a neng a hlohlelletsoa ke baruti ka morero oa ho thibela mosebetsi oa bona oa boboleli. Ka la 7 May, ho ile ha ntšoa mangolo a ’muso a neng a laela hore J. F. Rutherford, eo ka nako eo a neng a etelletse pele mosebetsing oa lefatše lohle oa boboleli, a tšoaroe hammoho le ba bang ba ’maloa ba neng ba sebetsa ntlo-khōlō. Nakong ea likhoeli tse peli, Mor’abo rōna Rutherford hammoho le basebetsi-’moho le eena ba ile ba ahloloa ka leeme ’me ba fumanoa ba le molato oa bohlabaphio eaba ba ahloleloa ho hlola chankaneng nako e telele. Na bahanyetsi ba ile ba atleha ho sebelisa makhotla ho thibela mosebetsi oa boboleli ka ho feletseng? Che!

⁵ Hopola tšepiso ena ea Jehova: ‘Sebetsa leha e le sefe se entsoeng khahlanong le uena se ke ke sa atleha.’ Lintho li ile tsa fetoha kapele ka la 26 March, 1919—likhoeli tse robong ka mor’a hore Mor’abo rōna Rutherford le basebetsi-’moho le eena ba ahloloe—bara bao babo rōna ba neng ba kentsoe chankaneng ba ile ba lokolloa ka beile. Selemong se latelang, ka la 5 May, 1920, liqoso khahlanong le bona li ile tsa huloa. Bara bao babo rōna ba ile ba sebelisa tokoloho ea bona hore ba tsoele pele ka mosebetsi oa ’Muso. Seo se ile sa fella ka eng? Ho tloha nakong eo, ho bile le keketseho e tsotehang! “Mopholosi” ke eena ea fuoang tlotla eohle ka se etsahetseng.—1 Bakor. 3:7.

6, 7. (a) Ke letšolo lefe le ileng la etsoa khahlanong le Lipaki Tsa Jehova Jeremane ea Bonazi, ’me seo se ile sa fella ka eng? (b) Histori ea batho ba Jehova ea mehleng ea kajeno, e fana ka bopaki ba eng?

⁶ Joale nahana ka mohlala oa bobeli. Ka 1934, Hitler o ile a hlapanya hore o tla felisa Lipaki Tsa Jehova Jeremane. O ne a sa soasoe. Hohle Lipaki li ile tsa tšoaroa ’me ka mor’a moo tsa kenngoa chankaneng. Lipaki tse likete li ile tsa hlorisoa; tse makholo li ile tsa bolaoa likampong tsa mahloriso. Na Hitler o ile a atleha letšolong la hae la ho felisa Lipaki? Na o ile a thibela mosebetsi oohle oa ho bolela litaba tse molemo Jeremane? Che, ha aa ka a o thibela! Nakong ea mahloriso, barab’abo rōna ba ile ba etsa mosebetsi oa ho bolela ka sekhukhu. Ka mor’a ho oa ha puso ea Bonazi, ba ile ba sebelisa tokoloho ea bona hore ba tsoele pele ho bolela. Kajeno, Jeremane ho na le baboleli ba ’Muso ba fetang 165 000. Hape, “Mopholosi” o pheletse tšepiso ea hae e reng: ‘Sebetsa leha e le sefe se entsoeng khahlanong le uena se ke ke sa atleha.’

⁷ Histori ea mehleng ea kajeno ea Lipaki Tsa Jehova e fana ka bopaki ba hore le ka mohla Jehova a ke ke a lumella hore batho ba hae ba timetsoe kaofela. (Pes. 116:15) Empa ho thoe’ng ka rōna re le batho ka bomong? Jehova o re pholosa joang?

Na re Tla Sireletsoa Nameng?

8, 9. (a) Re tseba joang hore ha rea tšepisoa hore joang kapa joang re tla sireletsoa nameng hona joale? (b) Ke sefe seo re lokelang ho se lumela?

⁸ Re le batho ka bomong, rea tseba hore ha rea tšepisoa hore joang kapa joang re tla sireletsoa nameng hona joale. Re etsisa se ileng sa etsoa ke Baheberu ba bararo ba tšepahalang ba ileng ba hana ho khumamela setšoantšo sa Morena Nebukadnezare sa khauta. Bacha bao ba tšabang Molimo ha baa ka ba nka feela hore Jehova o ne a tla ba sireletsa ka mohlolo hore ba se ke ba tsoa kotsi. (Bala Daniele 3:17, 18.) Kamoo litaba li ileng tsa tsamaea kateng, Jehova o ile a fela a ba lopolla malakabeng a sebōpi sa mollo. (Dan. 3:21-27) Leha ho le joalo, esita le mehleng ea ha ho ne ho ngoloa Bibele, ho lopolloa ka mohlolo ho ne ho sa etsahale kamehla. Bahlanka ba Jehova ba bangata ba tšepahalang ba ile ba bolaoa ke bahanyetsi.—Baheb. 11:35-37.

⁹ Kajeno teng ho etsahala joang? Kaha Jehova ke “Mopholosi,” ka sebele a ka lopolla batho ka bomong maemong a kotsi. Na re ka bolela ka tieo hore na ebe Jehova o ile a kenya letsoho maemong a itseng kapa che? Che. Ho ntse ho le joalo, motho ea pholohileng boemong bo kotsi a ka ’na a ba le maikutlo a hore Jehova o ile a kenya letsoho. E tla be e le ho tlōla moeli hore ba bang ba hanyetse maikutlo a hae. Ka nako e tšoanang, re lokela ho lumela hore Bakreste ba bangata ba tšepahalang ba shoele ka lebaka la mahloriso, joalokaha ho bile joalo mehleng ea Bonazi. Ba bang ba shoele ka sehlōhō. (Moek. 9:11) Re ka ’na ra botsa, ‘Na Jehova o ile a hlōloa ho ba “Mopholosi” oa batho ba tšepahalang bao bophelo ba bona bo ileng ba khaoletsoa?’ Ha ho joalo.

10, 11. Ke hobane’ng ha ho se seo motho a ka se etsang ha a tobane le lefu, empa Jehova eena a ka etsa’ng ka seo?

¹⁰ Nahana ka sena: Ha ho seo motho a ka se etsang ha a tobane le lefu, hobane ha ho motho ea ka ‘pholosang moea oa hae letsohong la Sheole,’ kapa Hadese, e leng lebitla le tloaelehileng la batho. (Pes. 89:48) Leha ho le joalo, ho thoe’ng ka Jehova? Morali e mong oabo rōna ea ileng a pholoha nakong e tšosang ea Manazi o hopola seo ’Mè oa hae oa Paki a kileng a mo bolella sona e le ha a mo tšelisa mabapi le baratuoa ba hae ba neng ba shoella likampong tsa mahloriso: “Haeba lefu le ne le ka boloka batho ba litlamong tsa lona ka ho sa feleng, na le ne le tla be le se matla ho feta Molimo?” Ka sebele, lefu hase letho ha le bapisoa le Mohloli oa bophelo ea matla ’ohle! (Pes. 36:9) Bohle ba Sheole, kapa Hadese, ba mohopolong oa Jehova, ’me o tla pholosa e mong le e mong oa bona.—Luka 20:37, 38; Tšen. 20:11-14.

¹¹ Khabareng, Jehova o kenya letsoho ka ho toba ho se etsahalang bophelong ba bahlanka ba hae ba tšepahalang kajeno. A re ke re hlahlobeng litsela tse tharo tseo ehlileng e leng “Mopholosi” oa rōna ka tsona.

Ho Sireletsoa Moeeng

12, 13. Ke hobane’ng ha ho sireletsoa moeeng e le habohlokoa ka ho fetisisa, ’me Jehova o re fa tšireletso e joalo joang?

¹² Jehova o re sireletsa moeeng, e leng eona tšireletso ea bohlokoa ka ho fetisisa. Kaha re Bakreste ba ’nete, rea utloisisa hore ho na le ntho e ’ngoe ea bohlokoa haholo ho feta bophelo ba rōna ba hona joale. Letlotlo la rōna la bohlokoa ka ho fetisisa ke kamano ea rōna le Jehova. (Pes. 25:14; 63:3) Ha kamano eo e ne e le sieo, bophelo ba rōna ba hona joale bo ne bo ke ke ba e-ba le morero ’me re ne re ke ke ra ba le tšepo ea bokamoso.

¹³ Ka lehlohonolo, Jehova o re fa thuso eohle eo re e hlokang hore re lule re e-na le kamano e haufi le eena. Re thusoa ke Lentsoe la hae, moea oa hae o halalelang le phutheho ea hae ea lefatše lohle. Ebe tsela e molemohali ea ho sebelisa lintho tsee tseo Jehova a re fileng tsona ke efe? Ha re khothalla ho ithuta Lentsoe la hae kamehla, re tla matlafatsa tumelo ea rōna le tšepo ea rōna. (Bar. 15:4) Haeba re rapella moea oa hae ka tieo, sena se tla re thusa hore re hanele moleko oa ho kopanela boitšoarong bo sa lokang. (Luka 11:13) Ka ho mamela tataiso eo sehlopha sa lekhoba se fanang ka eona ka lingoliloeng tse thehiloeng Bibeleng hammoho le liboka, likopano tse khōlō le tse nyenyane, re tla feptjoa ka ‘lijo tsa moea ka nako e tšoanetseng.’ (Mat. 24:45) Lijo tseo, li re sireletsa moeeng ebile li re thusa ho ba haufi le Molimo.—Jak. 4:8.

14. Pheta ketsahalo e bontšang hore Jehova o re sireletsa moeeng.

¹⁴ Ho tea mohlala oa hore na Jehova o sireletsa kamano ea rōna le eena joang, nahana ka batsoali bao ho builoeng ka bona qalong ea sehlooho se fetileng. Matsatsi a seng makae ka mor’a hore ho tlalehoe hore morali oa bona Theresa o nyametse, ba ile ba fumana litaba tse bohloko: O ne a bolailoe.a Ntate oa hae o re: “Ke ne ke ile ka rapela hore Jehova a mo sireletse. ’Nete ke hore ha a fumanoa a bolailoe, qalong ke ile ka ipotsa hore na ke hobane’ng ha lithapelo tsa ka li sa ka tsa arajoa. Ha e le hantle, kea tseba hore Jehova ha aa bolela hore joang kapa joang o tla sireletsa batho ba hae ka bomong ka mohlolo. Ke ile ka tsoela pele ho rapella hore ke be le kutloisiso. Ke ’nile ka tšelisoa ke ho tseba hore Jehova o sireletsa batho ba hae moeeng—ke hore, o re fa seo re se hlokang e le hore re sireletse kamano ea rōna le eena. Tšireletso e joalo ke ea bohlokoa ka ho fetisisa, hobane e ka ama bokamoso ba rōna ba ka ho sa feleng. Ka kutloisiso eo, Jehova o ile a fela a sireletsa Theresa hobane nakong ea lefu la hae, o ne a ntse a mo sebeletsa ka botšepehi. Ke tšelisoa ke ho tseba hore tšepo ea hore o tla boela a phele ka moso e liatleng tsa hae tse mofuthu.”

Ho Hlokomeloa Liphateng Tse Chesang

15. Jehova a ka re thusa ka litsela life ha re hlasetsoe ke boloetse?

¹⁵ Jehova a ka re tšehetsa ha re le ‘setulong se kang moalo sa ho kula,’ joalokaha a ile a tšehetsa Davida. (Pes. 41:3) Le hoja mehleng ea rōna Jehova a sa re pholose ka ho re phekola ka mohlolo, o ntse a re thusa. Joang? Melao-motheo e fumanoang Lentsoeng la hae e ka re thusa hore re etse liqeto tse bohlale litabeng tsa phekolo le litabeng tse ling. (Liprov. 2:6) Re ka ’na ra fumana boitsebiso bo molemo le litlhahiso tse ka re thusang lihloohong tse hatisitsoeng Molula-Qhooeng le Tsoheng! tse tšohlang boloetse bo itseng boo re nang le bona. Ka moea oa hae, Jehova a ka re fa “matla a fetang se tloaelehileng” e le hore re mamelle boemo ba rōna le hore re lule re tšepahala, ho sa tsotellehe se ka hlahang. (2 Bakor. 4:7) Ha re e-na le thuso e joalo, re ka qoba hore boloetse bo re sithabetse hoo bo ka amang kamano ea rōna le Jehova.

16. Mora e mong oabo rōna o khonne ho mamella boloetse joang?

¹⁶ Nahana ka mor’abo rōna e mocha eo ho builoeng ka eena qalong ea sehlooho se fetileng. Ka 1998, ho ile ha fumanoa hore o na le lefu la amyotrophic lateral sclerosis [lefu le hlaselang methapo ea kutlo e ka mokokotlong le e ka sekotlong] kapa ALS, leo qetellong le ileng la mo holofatsa ka ho feletseng.b O khonne ho mamella boloetse ba hae joang? Oa hlalosa: “Ka linako tse ling ke ne ke opeloa ebile ke ferekana hoo ke neng ke nahana hore ho shoa ho molemo. Neng kapa neng ha ke ikutloa ke sithabetse, ke rapela hore Jehova a mphe lintho tse tharo: khutso, mamello le tiisetso. Kea utloa hore Jehova o arabetse lithapelo tseo. Khutso e etsa hore ke nahane lintho tse tšelisang, tse kang hore na ho tla ba joang lefatšeng le lecha ha ke se ke tseba ho tsamaea, ho thabela lijo tse monate le ho qoqa le lelapa la ka hape. Mamello e nthusa hore ke mamelle mathata a bakoang ke ho holofala. Tiisetso e nthusa hore ke lule ke tšepahala le hore ke se ke ka lumella hore lintho tse ling li be bohlokoa ho feta kamano ea ka le Jehova. Ka sebele ke lumellana le mopesaleme Davida, hobane ke nahana hore Jehova o ntšehelitse setulong sa ka se kang moalo sa ho kula.”—Esa. 35:5, 6.

Ho Fuoa Lijo

17. Jehova o tšepisitse hore o tla re etsetsa’ng, ’me tšepiso ee e bolela’ng?

¹⁷ Jehova o tšepisa hore o tla re hlokomela ka lintho tse bonahalang. (Bala Matheu 6:33, 34 le Baheberu 13:5, 6.) Seo ha se bolele hore re lokela ho lebella ho fuoa lintho tse bonahalang ka mohlolo kapa hore re lokela ho qoba ho sebetsa. (2 Bathes. 3:10) Seo tšepiso ena e se bolelang ke hore: Haeba re batla ’Muso oa Molimo pele bophelong ebile re ikemiselitse ho sebetsa, re ka ba le tšepo ea hore Jehova a re thuse ho fumana lintho tseo re li hlokang bophelong. (1 Bathes. 4:11, 12; 1 Tim. 5:8) A ka re fa seo re se hlokang ka litsela tseo e ka ’nang eaba re ne re sa li lebella, mohlomong a ka ’na a sebelisa morapeli-’moho le rōna hore a re thuse kapa a re fe mosebetsi.

18. Pheta phihlelo e bontšang hore re ka ’na ra hlokomeloa ha re hloka lintho tse itseng.

¹⁸ Hopola ’Mè ea se nang molekane eo ho builoeng ka eena kenyelletsong ea sehlooho se fetileng. Ha eena le morali oa hae e monyenyane ba ne ba fallela sebakeng se secha, o ile a thatafalloa ho fumana mosebetsi. Oa hlalosa: “Ke ne ke e-ea tšimong hoseng, ’me thapama ke ne ke batla mosebetsi. Ke hopola letsatsi le leng leo ka lona ke ileng ka ea lebenkeleng ho ea reka lebese. Ke ile ka ema eaba ke sheba meroho, empa ke ne ke se na chelete e lekaneng ea ho e reka. Ha ho mohla nkileng ka ikutloa ke nyahame joalo bophelong ba ka. Eitse ha ke fihla hae ke tsoa lebenkeleng letsatsing leo, ke ile ka fumana monyakong o ka morao ho tletse mekotlana ea meroho ea mefuta-futa. Ho ne ho e-na le lijo tse lekaneng tseo re ileng ra li ja ka likhoeli tse ngata. Ke ile ka lla, eaba ke leboha Jehova.” Ka mor’a nakoana, morali enoa oabo rōna o ile a tseba hore mekotlana eo e ne e siiloe ke mor’abo rōna e mong ea kopanelang le bona phuthehong, ea nang le serapa sa meroho. Hamorao o ile a mo ngolla a re: “Le hoja ke ile ka u leboha haholo letsatsing leo, ke ile ka boela ka leboha Jehova hore ebe o ile a sebelisa mosa oa hao ho nkhopotsa hore oa nthata.”—Liprov. 19:17.

19. Matšoenyehong a maholo, bahlanka ba Jehova ba tla kholiseha ka eng, ’me re lokela ho ikemisetsa ho etsa’ng hona joale?

¹⁹ Ho hlakile hore seo Jehova a se entseng mehleng ea ha ho ne ho ngoloa Bibele hammoho le mehleng ea rōna se re fa lebaka la hore re tšepe hore ke eena Mothusi oa rōna. Haufinyane, ha matšoenyeho a maholo a oela lefatše la Satane, re tla hloka thuso ea Jehova ho feta neng kapa neng. Leha ho le joalo, bahlanka ba Jehova ba tla mo tšepa, ba kholisehile ka ho feletseng hore o tla ba thusa. Ba tla phahamisa lihlooho ’me ba thabe, ba tseba hore topollo ea bona e atametse. (Luka 21:28) Hona joale, ho sa tsotellehe hore na ke liteko life tse ka ’nang tsa re hlahela, a re ikemisetseng ho tšepa Jehova, re kholisehile ka ho feletseng hore Molimo oa rōna ea sa fetoheng, ka sebele, ke “Mopholosi” oa rōna.

[Mongolo o botlaaseng ba leqephe]

Na U sa Hopola?

• Jehova e ka ba mopholosi oa batho bao bophelo ba bona bo khaolelitsoeng joang?

• Ke hobane’ng ha ho sireletsoa moeeng e le habohlokoa ka ho fetisisa?

• Tšepiso ea Jehova ea hore o tla re hlokomela ka lintho tse bonahalang e bolela’ng?

[Setšoantšo se leqepheng la 8]

Mor’abo rōna Rutherford le basebetsi-’moho le eena ba ileng ba tšoaroa ka 1918, hamorao ba ile ba lokolloa, ’me liqoso khahlanong le bona li ile tsa huloa

[Setšoantšo se leqepheng la 10]

Jehova a ka re tšehetsa ha re le ‘setulong se kang moalo sa ho kula’