’Muso oa Molimo o Tla U Etsetsa’ng?

Mohlomong u ithutile lihloohong tse fetileng hore Lipaki Tsa Jehova li nka ’Muso oa Molimo e le oa bohlokoa. E ka ’na eaba u khahliloe ke tse ling tsa lintho tseo ’Muso oa Molimo o tla li etsetsa batho tseo ho builoeng ka tsona. Ho sa le joalo, e ka ’na eaba u oa ipotsa hore na litšepiso tseo li tla hle li phethahale.

E ka ba bohlale hore u se ke ua lumela ntho e ’ngoe le e ’ngoe eo u e utloang. (Liproverbia 14:15) Re ka ’na ra re u tla be u tšoana le Baberea ba boholo-holo.a Ha ba qala ho utloa litaba tse molemo tsa ’Muso, ba ile ba li amohela eseng feela hobane ba nahana hore ke ’nete. Ho e-na le hoo, ba ile ba hlahlobisisa Mangolo ka hloko hore ba bone “hore na lintho tsena li joalo kapa che.” (Liketso 17:11) Ka mantsoe a mang, Baberea ba ile ba bapisa seo ba ithutileng sona le seo Mangolo a se rutang. Ha e le hantle, ba ile ba kholiseha hore litaba tse molemo li thehiloe Lentsoeng la Molimo.

Ka mofuthu Lipaki Tsa Jehova li u kōpa hore u etse se tšoanang. Re u fa monyetla oa hore u bapise seo Lipaki Tsa Jehova li se lumelang le seo Bibele e se rutang mabapi le ’Muso oa Molimo ka hore re ithute Bibele le uena re sa u lefise.

Ntle le hore u ithute ka ’Muso oa Molimo, ho ithuta Bibele ho tla u thusa ho fumana likarabo tsa tse ling tsa lipotso tsa bohlokoa ka ho fetisisa bophelong.

• Batho ba bile teng joang?

• Re phelela’ng?

• Ke hobane’ng ha Molimo a lumella mahlomola?

• Ho etsahala’ng ka rōna ha re e-shoa?

• Na lefatše le tla felisoa?

• Ke’ng se ka tlisang thabo ka lapeng?

Habohlokoa le ho feta, ho ithuta Bibele ho tla u thusa ho ‘atamela ho Molimo.’ (Jakobo 4:8) Ha u ntse u atamela ho Molimo u tla bona hore na ’Muso oa Molimo ke oa bohlokoa hakae ho uena, eseng hona joale feela empa le ka ho sa feleng. Ha Jesu a rapela Ntate oa hae o ile a re: “Sena se bolela bophelo bo sa feleng, ho tsoela pele ba rua tsebo ka uena, Molimo a le mong feela oa ’nete, le ka eo u mo romileng, Jesu Kreste.”—Johanne 17:3.