Ho Tseba Molimo Ho Ka U Tsoela Molemo Joang?
Lihloohong tse fetileng makasineng ena, re thusitsoe ho fumana karabo ea potso e reng, Molimo ke mang? Re ithutile hore Bibele e re lebitso la hae ke Jehova le hore ke Molimo ea lerato. Re ile ra boela ra ithuta ka lintho tseo a li entseng le tseo a tla li etsa molemong oa batho bohle. Ho na le lintho tse ngata tseo re ka ithutang tsona ka Molimo empa u ka ’na oa ipotsa hore na ho etsa joalo ho ka u tsoela molemo joang.
Jehova o tšepisa hore “haeba u mo batla, o tla etsa hore u mo fumane.” (1 Likronike 28:9) U tla ba le “kamano e haufi-ufi le Jehova” haeba u ithuta ka eena. (Pesaleme ea 25:14) Ho ba motsoalle oa Jehova ho ka u tsoela molemo joang?
U tla thaba. Bibele e re Jehova ke “Molimo ea thabileng.” (1 Timothea 1:11) Haeba u e-na le kamano e haufi le Molimo ebile u etsa lintho joaloka eena, u tla thaba ’me u imolohe kelellong le maikutlong. (Pesaleme ea 33:12) U tla thaba haeba feela u qoba lintho tse ka senyang bophelo ba hao ’me u etsa lintho tse nepahetseng ebile u rata le batho ba bang. U ka ’na oa lumellana le mopesaleme ea ileng a re: “Ho atamela ho Molimo ho molemo ho ’na.”—Pesaleme ea 73:28.
Molimo o tla u hlokomela. Jehova o re: “Ke tla u fa keletso leihlo la ka le le holim’a hao.” (Pesaleme ea 32:8) Mantsoe ana a bontša hore Jehova o tsotella barapeli ba hae ebile o ba fa lintho tseo ba li hlokang. (Pesaleme ea 139:1, 2) Jehova o tla u thusa haeba u e-na le kamano e ntle le eena.
U tla ba le bokamoso bo chabileng. Jehova o tla u thusa hore u thabe bophelong ’me u be le bokamoso bo chabileng. (Esaia 48:17, 18) Bibele e re: “Sena se bolela bophelo bo sa feleng, ho tsoela pele ba rua tsebo ka uena, Molimo a le mong feela oa ’nete, le ka eo u mo romileng, Jesu Kreste.” (Johanne 17:3) Matsatsing ana a bofelo, Molimo o re fa tšepo ‘ea ’nete le e tiileng’ eo re ka e tšoantšang le ankora e le hore re ka mamella mathata.—Baheberu 6:19.
Ena ke e meng ea melemo e seng mekae eo motho a ka e fumanang ka ho tseba Molimo le ho ba le kamano e ntle le eena. Haeba u batla ho ithuta haholoanyane ka litaba tsena, u ka bua le e mong oa Lipaki Tsa Jehova kapa oa kena websaeteng ea jw.org/st.