Ho Hlokahala Hore Baahelani ba Rōna ba Utloe Litaba Tse Molemo
1 Ke thato ea Molimo hore “mefuta eohle ea batho e pholohe ’me e fihle tsebong e nepahetseng ea ’nete.” (1 Tim. 2:4) “Mefuta eohle ea batho” e tla akarelletsa baahelani ba rōna kaofela. Ho ba finyella ka litaba tse molemo ho hloka hore re feto-fetole linehelano tsa rōna le ho ameha ka se ka thahasellisang motho e mong le e mong eo re kopanang le eena. (1 Bakor. 9:19-23) Mokhatlo o hlophisitsoeng oa Jehova o fane ka likofuto tse ka re thusang ho finyella lipelo tsa ba nang le “tšekamelo e nepahetseng bakeng sa bophelo bo sa feleng.” (Lik. 13:48) A re boneng hore na re ka sebelisa libukana tse fapa-fapaneng joang ka July le August ho sebetsana le tlhoko ea moea ea baahelani ba rōna.
2 Libukana Tse Buelloang: Ka tlaase mona le tla fumana litlhahiso tse ka ’nang tsa e-ba molemo ha ho nehelanoa ka libukana tse itseng. Tlhahiso ka ’ngoe e akarelletsa (1) potso e susumetsang monahano bakeng sa ho qalisa moqoqo, (2) tšupiso moo ntlha e buelloang e ka fumanoang teng bukaneng, le (3) lengolo le loketseng le ka baloang nakong ea puisano. U ka qetella nehelano eohle ka mantsoe a hao ho latela karabelo ea motho eo. Bakeng sa boholo ba libukana tsena, tokollo e fetileng ea Tšebeletso ea Rōna ea ’Muso e qotsitsoe moo u ka fumanang boitsebiso bo eketsehileng bakeng sa ho nehelana ka bukana.
Na Ruri Molimo oa re Tsotella?
U nahana hore ho na le tšepo efe bakeng sa ho thusa batho ba ileng ba tšoaroa hampe?—Leqepheng la 27-8, serapeng sa 23-7; Esa. 65:17, 18; km-SU 7/97 leq. 4.
Morero oa Bophelo ke Eng—U ka o Fumana Joang?
Ke hobane’ng ha kajeno ho bonahala batho ba bangata hakana ba sa khotsofatsoa ke bophelo ba bona?—Leqepheng la 29-30, serapeng sa 2, 25-6; Pes. 145:16; km-SU 7/96 leq. 4.
Thabela Bophelo Lefatšeng ka ho sa Feleng!
Na u kile ua ipotsa hore na hona joale Jesu Kreste o etsa eng?—Setšoantšo sa 41-2; Tšen. 11:15; km-SU 8/96 leq. 8.
’Muso O Tla Tlisa Paradeise.
Na u ka rata ho tseba ka ’Muso oo Jesu a re rutileng hore re o rapelle?—Leqepheng la 3; Mat. 6:9, 10; km-SU 8/96 leq. 8.
Ha Eo U Mo Ratang A E-shoa.
Na u kile ua ipotsa hore na u ka tšelisa motho ea lahlehetsoeng ke moratuoa oa hae lefung joang?—Leqepheng la 26, serapeng sa 2-5; Joh. 5:28, 29; km-SU 7/97 leq. 4.
Na U Lokela ho Lumela Boraro-bo-bong?
Na ho utloisisa ha rōna sebōpeho sa sebele sa Molimo ke habohlokoa bakeng sa bokamoso ba rōna?—Leqepheng la 3, serapeng sa 3, 7-8; Joh. 17:3.
3 Libukana Tse Ling: Kenyelletso ea Tšebeletso ea Rōna ea ’Muso ea February 1998 e thathamisitse likhatiso tse ling, ho akarelletsa libukana tse etselitsoeng ho pakela Mabuddha, Mahindu, Bajuda le Mamosleme ka ho khethehileng. Ka linako tsohle ha ho loketse, ho ka nehelanoa ka libukana tsena ho batho bao re kopanang le bona. U ka hlahloba litlhahiso tse leqepheng la 4-6 la kenyelletso eo hammoho le leqepheng la 21-4 la buka ea Ho Bea Mabaka le nehelano e khutšoanyane e ka tsosang thahasello ea batho bana.
4 Ho boetse ho lokiselitsoe bukana e ’ngoe ho thusa batho bao mohlomong ba rutehileng haholo empa ba tseba ho fokolang feela ka Bibele. E reretsoe ho ba susumelletsa ho batla ho hlahloba Lentsoe la Molimo. Moo ho loketseng, u ka khetha ho nehelana ka tse latelang:
Buka ea Batho Bohle.
Na ua lumela hore ho fumana thuto e nang le motheo oa sebele ho akarelletsa ho fumana tsebo mabapi le se fuperoeng ke Bibele?—Leqepheng la 3, serapeng sa 1-3 le leqepheng la 30, serapeng sa 2; Moek. 12:9, 10.
5 Bukana ea ho Ithuta Bibele: Ka linako tsohle morero oa rōna boboleling e lokela ho ba ho qalisa thuto ea Bibele, ebang ke leetong la pele kapa leetong le latelang la ho boela. Bakeng sa ho finyella seo, re na le bukana ena e latelang eo ho leng bonolo ho e sebelisa bakeng sa ho qala le ho khanna lithuto tsa mahae tsa Bibele:
Ke Eng Seo Molimo a se Hlokang ho Rōna?
Na u ne u tseba hore ka metsotso e 30 kapa ka tlaase ka beke libekeng tse 16, u ka fumana kutloisiso ea motheo ea Bibele?—Thuto ea 2, serapeng sa 6; 2 Tim. 3:16, 17; km-SU 3/97 leq. 4.
6 Setšoantšong sa Mosamaria ea nang le moea oa boahisani, Jesu o ile a hlakisa hore moahelani oa sebele ke ea sebelisang lerato le mosa ho thusa motho ea leng tlokotsing. (Luka 10:27-37) Baahelani ba rōna ba tlokotsing ea moea. Ba tlameha ho utloa litaba tse molemo. Ha re jareng boikarabelo ba ho arolelana le bona litaba tse molemo, kahoo re ipake re le barutuoa ba ’nete ba Jesu Kreste.—Mat. 24:14; Bagal. 5:14.