Falimehelang ho Fumana Batho ba Litholo Tšimong ea Lōna

¹ Jehova o atolosa memo: “‘Tloo!’ . . . Mang kapa mang ea lakatsang a ke a nke metsi a bophelo ntle ho tefo.” (Tšen. 22:17) Palo e ntseng e eketseha ea batho ba litholo e har’a ba arabelang pitsong ena. Ka lebaka leo, lilemong tse seng kae tse fetileng bonyane ho ile ha thehoa lihlopha tse tšeletseng tsa puo ea matsoho tšimong e tlas’a lekala la Afrika Boroa.

² Le hoja lihlopha tsa puo ea matsoho li lebisa tlhokomelo boitekong bohle ba tsona ba ho bolella batho ba litholo le ba sa utloeng hantle tšimong ea tsona ka ho fapana, ho sa na le ba bangata ba joalo ba sa ntsaneng ba lokela ho fumanoa le ho pakeloa naheng ena.

³ U ka Thusa Joang? Ha u le libakeng tseo batho ba phetheselang ho tsona, na u kile ua bona batho ba bua ka matsoho? Na ho na le motho eo u mo tsebang mosebetsing kapa sekolong ea nang le mong ka eena oa setholo? Falimehela ho fumana litholo ha u ntse u tsoela pele le mesebetsi ea hao ea letsatsi le letsatsi. Empa u ka tiisa joang hore ba tla fumana bopaki ba ’Muso?

⁴ Ho Fana ka Bopaki: Tsebisa sehlopha sa puo ea matsoho se haufi-ufi hore na motho eo oa setholo o hokae. Hona joale ho na le lihlopha tsa puo ea matsoho liphuthehong tse latelang: Assagay, Brixton, Constantia, Eersterus, Katutura South (Windhoek) le Norkem Park. Batho ba litholo ba bangata ba tsoela pele ka potlako ho ithuta ’nete ha ba khona ho kopana le Lipaki tsa litholo libokeng tsa phutheho tse tsamaisoang ka puo ea matsoho. Kahoo, haeba ho e-na le sehlopha sa puo ea matsoho sebakeng sa heno, mongoli oa phutheho ea heno o lokela ho fetisetsa ho sona boitsebiso bohle ba batho ba litholo ba tšimong eo u leng ho eona. Baholo ba ka boela ba nahana ka litsela tseo ba ka thusang batho ba litholo hore ba be teng libokeng sehlopheng se haufi sa puo ea matsoho.

⁵ Ho thoe’ng haeba ho se na ea ka fanang ka thuso ea moea ho batho ba litholo motseng oa heno? U ka thusa joang? Ke hobane’ng ha u sa boele moo ’me u bue le setho leha e le sefe se utloang sa lelapa leo? Kōpa ho bontša video ea puo ea matsoho ho tsosa thahasello ea motho oa setholo. Bahoeletsi ba bang ba bile ba ithutile puo ea matsoho e le hore ba ka finyella batho ba litholo hamolemo haholoanyane. (Lik. 16:9, 10) Bukana ea Seo a se Hlokang le buka ea Tsebo li teng ka video ea Puo ea Matsoho ea Amerika, ’me bukana ea Seo a se Hlokang e boetse ea fumaneha ka Puo ea Matsoho ea Brithani. Ho khanna lithuto tsa Bibele ho sebelisoa lithulusi tsena ho se ho khōtsoe litholoana tse ngata tse ntle.

⁶ Ka ho falimehela ho fumana batho ba litholo sebakeng sa heno, u ka ba fa monyetla oa ho fumana metsi a bophelo ntle ho tefo.—Mat. 10:11.