Lentsoe la Molimo ke ’Nete
1. Bibele e fupere boitsebiso bofe ba bohlokoa?
1 Mopesaleme o ile a ngola a re: “Boleng ba lentsoe la hao ke ’nete.” (Pes. 119:160) Ka Lentsoe la hae le bululetsoeng, Jehova o araba lipotso tsa bohlokoa tse mabapi le bophelo. O tšelisa le ho khothatsa ba mahlomoleng. ’Me o re bontša kamoo re ka atamelang haufi le eena kateng. Mosali e mong ea ananelang o re: “Ho ithuta ’nete ea Bibele ho tšoana le ho tloha sebakeng se lefifi le se tepeletsang le ho kena ka kamoreng e hloekileng, e khanyang le e monko o monate.” Na u leka ka matla ho bolella ba bang ’nete ea Lentsoe la Molimo ha monyetla o mong le o mong o hlaha?
2. Bibele e ntlafatsa bophelo ba batho joang?
2 Matla a Eona a Fetolang Batho Lefatšeng ka Bophara: ’Nete ea Bibele e na le matla a ho susumetsa lipelo le a ho fetola bophelo. (Baheb. 4:12) Moroetsana e mong ea bitsoang Rosa e ne e le letekatse, a bile a sebelisa lino tse tahang le lithethefatsi. O re: “Ka letsatsi le leng ha ke ne ke tepeletse haholo, banyalani ba bang ba Lipaki ba ile ba mpolella kamoo Bibele e ka re thusang ho rarolla mathata a rōna. Ka qala ho ithuta Lentsoe la Molimo, ’me ka fumana le hlolla. Pele ho feta khoeli ke ne ke se ke e-na le matla a ho qalisa bophelo bo bocha. Kaha ke ne ke se ke e-na le morero bophelong, ke ne ke se ke sa hloke tšehetso ea lino tse tahang kapa lithethefatsi. Kaha ke ne ke chesehela ho ba motsoalle oa Jehova, ke ne ke ikemiselitse ho phela ka litekanyetso tsa hae. Hoja ea se ke ea e-ba ka bohlale bo sebetsang ba Lentsoe la Molimo, ruri nka be ke se ke ipolaile.”—Pes. 119:92.
3. Ke hobane’ng ha re sa lokela ho khaotsa ho bolella ba bang molaetsa oa Bibele?
3 Ho fapana le libuka tse ngata tsa kajeno, Bibele e ipiletsa ho batho ba ‘lichaba tsohle, meloko eohle, mefuta eohle le maleme ’ohle.’ (Tšen. 7:9) Thato ea Molimo ke “hore batho ba mefuta eohle ba pholohe ’me ba fihle tsebong e nepahetseng ea ’nete.” (1 Tim. 2:4) Ka lebaka leo, ha rea lokela ho nahana hore motho a ke ke a amohela litaba tse molemo feela ka lebaka la semelo sa hae. Ho e-na le hoo, bolella bohle molaetsa oa ’Muso, ka ho bala Bibele ka ho toba neng le neng ha ho khoneha.
4. Re ka sebelisa Bibele joang ha re pakela batho?
4 Hatisa Mangolo: Ho na le menyetla e mengata ea ho sebelisa Bibele tšebeletsong. Ha u buella limakasine, leka ho bala lengolo le hlahang nehelanong e bontšitsoeng. Ha ba buella lingoliloeng tse tsamaisoang khoeling eo, ba bang ba bona ho le molemo hore ha ba etsa kenyelletso ba bale lengolo leo ba ikhethetseng lona. Ha u etsa maeto a ho boela, balla mong’a ntlo temana e le ’ngoe kapa tse peli tsa Bibele ho mo thusa hore hanyane ka hanyane a be le tsebo e nepahetseng. Ha u khanna thuto ea Bibele, lebisa tlhokomelo mangolong a sehlooho. Ha u se tšebeletsong ea tšimo, nka Bibele e le hore u tle u e sebelise ha ho hlaha menyetla ea ho fana ka bopaki bo sa reroang.—2 Tim. 2:15.
5. Ke hobane’ng ha re lokela ho phehella ho sebelisa Bibele tšebeletsong?
5 E se eka re ka thusa ba bang ho rua molemo matleng a susumetsang a Lentsoe la Molimo ka ho sebelisa Bibele ha monyetla o mong le o mong o hlaha tšebeletsong ea rōna.—1 Bathes. 2:13.