Lenaneo le Lecha la Kopano e Khethehileng ea Letsatsi
Sehlooho sa lenaneo la kopano e khethehileng ea letsatsi ea selemo sa tšebeletso sa 2009 se re, “U Lule U Lebetse Bosebeletsi . . . , Hore U bo Phethahatse,” ’me se thehiloe ho Bakolose 4:17. Joaloka Bakreste, re nka keletso eo ka ho teba. Re ikemiselitse ho phethahatsa bosebeletsi ba rōna ka botšepehi joaloka Jesu. (Joh. 17:4) Moapostola Pauluse le eena o ile a re behela mohlala o motle tabeng ena. O ne a ikemiselitse ho qeta tsela ea hae tšebeletsong.—Lik. 20:24.
Puo ea molebeli oa potoloho e tla bontša kamoo bahoeletsi ba fapa-fapaneng ba hlōlang mathata a amanang le tšebeletso ea bona. Ka mor’a moo puo e reng “U Hlaole Moo U Lemmeng Teng” e tla bontša kamoo re ka thusang ba nang le “tšekamelo e nepahetseng bakeng sa bophelo bo sa feleng.” (Lik. 13:48) Puong ea pele e nang le sehlooho se reng “Kamoo re Ipuellang re le Basebeletsi Kateng,” sebui sa moeti se tla tšohla 2 Bakorinthe 6:1-10 temana ka temana. Thapama, se tla bua le bamameli ka puo ea sehlooho se reng “Nka Bosebeletsi ba Hao e le ba Bohlokoa ka ho Fetisisa.” Ha ho pelaelo hore puo e reng “Ba Baholo le ba Banyenyane ba Thabela Bosebeletsi” le e reng “Bacha ba Phethahatsang Bosebeletsi ba Bona” e tla u khothatsa haholo. Ba lakatsang ho tšoantšetsa boinehelo ba bona ka ho kolobetsoa metsing kopanong e tlang ea potoloho kapa e khethehileng ea letsatsi ba lokela ho tsebisa molebeli ea okamelang kapele kamoo ho ka khonehang. Puo ea bohlokoa likopanong tsohle tsa rōna tse khōlō le tse nyenyane ke kakaretso ea Molula-Qhooa. Tloo le makasine ea hao e tla ithutoa bekeng ea kopano e khethehileng ea letsatsi.
E le ho lebela bosebeletsi ba rōna hore re bo phethahatse, re ikitlaelletsa ho tiisa hore ho se ke ha e-ba le lintho tse ling tse ka kena-kenanang le seo Jehova a se behileng tlhokomelong ea rōna. Khothatso ea Mangolo e tla fanoa lenaneong lena la kopano e khethehileng ea letsatsi e lokela ho thusa e mong le e mong oa rōna hore a utloisise seo a lokelang ho se etsa hore a lule a e-na le pono e nepahetseng ’me a ele hloko bosebeletsi ba hae hore a bo phethahatse ka botlalo.