Re Lipaki ka Linako Tsohle
1. Re ithuta’ng tabeng ea ha Jesu a pakela mosali ea neng a le selibeng?
1 Jesu o ne a se a tsamaile nako e telele. O ne a khathetse a bile a nyoriloe. Ha barutuoa ba hae ba sa il’o reka lijo, o ile a phomola selibeng ka ntle ho motse oa Samaria. Jesu o ne a sa ea motseng oa Samaria ho ea bolela litaba tse molemo; o ne a mpa a feta ka tsela a e-ea Galilea ho ea ntšetsa pele tšebeletso ea hae. Leha ho le joalo, o ile a sebelisa monyetla ona hore a pakele mosali ea neng a kha metsi. (Joh. 4:5-14) Hobane’ng? Hobane ha ho mohla Jesu a kileng a khaotsa ho ba “paki [ea Jehova] e tšepahalang le ea ’nete.” (Tšen. 3:14) Re etsisa Jesu ka ho ba Lipaki Tsa Jehova ka linako tsohle.—1 Pet. 2:21.
2. Re ka etsa joang hore re lule re le malala-a-laotsoe hore re pake neng le neng ha monyetla o hlaha?
2 E-ba Malala-a-laotsoe: Re ka itokisetsa ho paka neng le neng ha monyetla o hlaha ka hore re tsamaee re nkile lingoliloeng. Bahoeletsi ba bangata ba lula ba tšoere lipampitšana ’me ba li tsamaisetsa batho ba sebetsang mabenkeleng, likaracheng le ba bang bao ba kopanang le bona letsatsi le letsatsi. (Moek. 11:6) Morali e mong oabo rōna ea atisang ho nka maeto o etsa bonnete ba hore kamehla o kenya Bibele e nyenyane le buka ea Seo Bibele e se Rutang ka mokotlaneng oa hae, ’me o leka ho buisana le batho ba lutseng pel’a hae.
3. Re ka qala moqoqo joang?
3 Qala Moqoqo: Ha re pakela motho ka tšohanyetso, ha ho hlokahale hore li sa tloha feela, re bontše hore re tlil’o bua le eena ka Bibele. Ha ea ka eare ha Jesu a kopana le mosali oa Mosamaria selibeng a be a se a mo bolella hore ke Mesia. O ile a ikōpela metsi, e leng se ileng sa makatsa mosali eo. (Joh. 4:7-9) Morali e mong oabo rōna o ile a bona hore tsela eona eo e mo thusa ho qala moqoqo ha a botsoa hore na o jele letsatsi le itseng la phomolo joang. Ho e-na le hore a re ha a le keteke hobane e le Paki ea Jehova, o re: “Ke ikhethetse ho se keteke letsatsi leo.” Hangata motho ea mo botsitseng potso oa makala ebe o batla lebaka, ’me morali’abo rōna o khona ho mo pakela.
4. Matheu 28:18-20 e u susumelletsa ho etsa eng?
4 Le hoja Jesu a phethile tšebeletso ea hae ea lefatšeng ka cheseho, o ntse a amehile haholo ka mosebetsi oa ho bolela litaba tse molemo o etsoang ka tsela e tšoanang le eo a o entseng ka eona. (Mat. 28:18-20) Ka lebaka leo, rōna Lipaki re etsisa mohlala oa Jesu ka hore re be malala-a-laotsoe ho bolela tumelo ea rōna phatlalatsa neng kapa neng.