Ke Hokae Moo U ka Fumanang Tataiso eo U ka e Tšepang e Tla U Thusa Hore U Phele Hamonate?

Joalokaha re ithutile sehloohong se fetileng, re hlokometse hore batho ba bangata ba leka ho phela bophelo bo monate ka ho tšepa lintho tse joaloka ho lumela hore bophelo bo reriloe esale pele, ho batla thuto e phahameng, ho rua le ho ba batho ba lokileng. Haeba u etsa lintho tsena e le hore u lule u phele hamonate, ho tšoana le ha u ea sebakeng seo u sa se tsebeng u sebelisa ’mapa o fosahetseng. Na see se bolela hore ha ho na tataiso eo re ka e sebelisang bakeng sa bokamoso ba rona? Ha ho joalo.

HO FUMANA TATAISO MOHLOLING O TŠEPAHALANG

Ha re etsa liqeto, hangata re kopa thuso ho motho ea holileng kapa ea bohlale ho re feta. Ka tsela e tšoanang, re ka fumana tataiso eo re ka e tšepang ka bokamoso ba rona ho motho ea moholo ka ho fetisisa le ea bohlale ho re feta. Re ka fumana tataiso eo bukeng e ileng ea ngoloa lilemo tse ka bang 3 500 tse fetileng. Buka eo e halalelang e bitsoa Bibele.

Ke hobane’ng ha u ka tšepa Bibele? Hobane Mongoli oa eona o moholo ebile o bohlale ka ho fetisisa bokahohleng. O hlalosoa e le “Moholo-holo oa Matsatsi” eo esale a le teng “ho tloha nakong e sa lekanyetsoang ho isa nakong e sa lekanyetsoang.” (Daniele 7:9; Pesaleme ea 90:2) Ke eena “’Mopi oa maholimo, eena Molimo oa ’nete, ’Mopi oa lefatše le Moetsi oa lona.” (Esaia 45:18) Oa re bolella hore lebitso la hae ke Jehova.—Pesaleme ea 83:18.

Kaha Bibele e ngotsoe ke ’Mopi oa batho bohle, ha hona moo e bontšang hore batho ba morabe o itseng kapa ba setso se itseng ba bohlokoa ho feta batho ba bang. Kamehla keletso ea eona ea sebetsa ’me e thusitse batho ba bangata lefatšeng lohle. E fumaneha ka lipuo tse ngata ’me batho ba bangata ba na le eona ho feta buka le ha e le efe.a Sena se bolela hore batho ba bangata ba ka khona ho e utloisisa ha bonolo ebile e ka khona ho ba tataisa. Taba ena e lumellana hantle le seo Bibele e se buang:

“Molimo ha a leeme, empa sechabeng se seng le se seng motho ea mo tšabang le ea sebetsang ho loka oa amoheleha ho eena.”—LIKETSO 10:34, 35.

Joaloka motsoali ea lerato ea thusang bana ba hae, Jehova ke Ntate ea lerato ea batlang ho re thusa a sebelisa Lentsoe la hae Bibele. (2 Timothea 3:16) Re ka tšepa Lentsoe la hae hobane ke eena ea re bopileng ebile o tseba se ka re thabisang.

RE KA TŠEPA BIBELE

Re ka tšepa seo Bibele e se buang ka bokamoso hobane re bona lintho tseo e ileng ea li bolela esale pele lilemong tse ka bang 2 000 tse fetileng li etsahala.

LINTHO TSEO BIBELE E ILENG EA RE LI TLA ETSAHALA

“Sechaba se tla tsohela sechaba matla, le ’muso o tla tsohela ’muso matla. ’Me ho tla ba le litšisinyeho tse kholo tsa lefatše, le mafu a seoa le likhaello tsa lijo sebakeng se seng ka mor’a se seng.”—LUKA 21:10, 11.

SEO BIBELE E ILENG EA SE BUA KA BOITŠOARO BA BATHO

“Matsatsing a ho qetela ho tla ba le linako tse mahlonoko tseo ho leng thata ho sebetsana le tsona. Etsoe batho e tla ba baithati, ba ratang chelete, ba ikhopolang ho tlola, ba ikhohomosang, banyefoli, ba sa mameleng batsoali, ba se nang teboho, ba sa tšepahaleng, ba se nang lerato la tlhaho, ba sa bulehelang tumellano le ha e le efe, baetselletsi, ba hlokang boitšoaro, ba bohale bo tšosang, ba hlokang lerato la se molemo, baeki, ba hlooho li thata, ba ikhohomosang ka boikakaso, ba ratang menyaka ho e-na le ho rata Molimo.”—2 TIMOTHEA 3:1-4.

Empa ho tla joang hore lintho tseo Bibele e ileng ea bolela esale pele hore li tla etsahala, li etsahale hantle kamoo e ileng ea re li tla etsahala kateng? Mohlomong u ka lumellana hantle le seo Leung ea lulang Hong Kong a ileng a se bua ha a re: “Boprofeta bo hlahang ka Bibeleng khale bo ngotsoe. Ho ke ke ha khoneha hore motho a bolele lintho tse tla etsahala nakong e tlang ka tsela e nepahetseng hakaana. Bibele e tlameha ebe e ngotsoe ke motho ea bohlale ka ho fetisisa.”

Bibele e na le boprofeta bo bongata bo seng bo phethahetse.b Sena se bontša hore kannete Bibele ke Lentsoe la Molimo. Jehova o re: ‘Ke ’na Molimo, ’me ha ho na Molimo e mong, leha e le mang ea joaloka ’na.’ “Ea bolelang qetello ho tloha tšimolohong.” (Esaia 46:9, 10) Kahoo u na le mabaka a utloahalang a ho tšepa seo Bibele e se buang ka bokamoso.

TATAISO E KA U THUSANG HONA JOALE LE KA HO SA FELENG

U tla itsoela molemo haeba u mamela tataiso e hlahang mangolong a halalelang. Nahana ka mehlala e latelang.

TATAISO E MOLEMO MABAPI LE CHELETE LE MOSEBETSI

“Phomolo e tletseng letsoho e molemo ho feta mosebetsi o boima o tletseng matsoho a mabeli le ho lelekisa moea.”—MOEKLESIA 4:6.

HO BA LE LELAPA LE THABILENG

“E mong le e mong oa lona ka bomong a ke a rate mosali oa hae joalokaha a ithata; ka lehlakoreng le leng, mosali o lokela ho ba le tlhompho e tebileng ho monna oa hae.”—BAEFESE 5:33.

KAMOO U KA UTLOANANG LE BATHO KATENG

“Tlohela bohale ’me u lese khalefo, u se ke oa iponahatsa u halefile hore feela u etse bobe.”—PESALEME EA 37:8.

Haeba u mamela seo Bibele e se buang u tla thabela bophelo hona joale le nakong e tlang. Ka Bibeleng re fumana litšepiso tsa Molimo tse thabisang tse buang ka bokamoso tse akarelletsang hore:

BATHO BA TLA PHELA KA KHOTSO EBILE BA SIRELETSEHILE

“[Batho] ba tla fumana thabo e phethehileng khotsong e ngata.”—PESALEME EA 37:11.

MOTHO E MONG LE E MONG O TLA BA LE BOLULO LE LIJO

“Ka sebele ba tla haha matlo ’me ba lule ho ’ona; ka sebele ba tla lema lirapa tsa morara ’me ba je litholoana tsa tsona.”—ESAIA 65:21.

HA HO NA MOTHO EA TLA KULA KAPA A HLOKAHALE

“Lefu ha le sa tla hlola le e-ba teng, ’me ho siama kapa ho bokolla kapa bohloko ha li sa tla hlola li e-ba teng.”—TŠENOLO 21:4.

U lokela ho etsa’ng e le hore u thabele bophelo bo joalo? Fumana karabo sehloohong se latelang.

a E le hore u fumane lintlha tse eketsehileng ka ho fetoleloa le ho ajoa ha Bibele e ea ho www.jw.org/st ’me u shebe tlasa LITHUTO TSA BIBELE > HISTORI LE BIBELE.

b Ho fumana lintlha tse eketsehileng sheba Khaolo ea 9 bukeng ea Bibele—Lentsoe la Molimo Kapa la Motho? E hatisitsoeng ke Lipaki Tsa Jehova. E fumaneha websaeteng ea rona ea Watchtower Online Library.