Lipotso Tse Tsoang ho Babali
Ha Jesu a theha Lijo Tsa Shoalane Tsa Morena, barutuoa ba 70 bao a neng a ba romme ho ea bolela ba ne ba le hokae? Na ba ne ba mo lahlile?
Ha re na lebaka la ho nahana hore kaha barutuoa ba 70 ba ne ba le sieo Lijong Tsa Shoalane Tsa Morena, seo se bolela hore ba ne ba lahlile Jesu kapa hore o ne a se a sa ba amohele. Jesu o ne a mpa feela a batla ho ba le baapostola ba hae ketsahalong eo.
Lihlopha tsena ka bobeli, ba 12 le ba 70, e ne e le barutuoa ba hae. Jesu o ile a khetha banna ba 12 har’a barutuoa ba hae ba bangata, ’me a ba bitsa baapostola. (Luka 6:12-16) O ne a le Galilea ha “a bitsa baapostola ba hae ba 12” ’me “a ba roma hore ba rute ka ’Muso oa Molimo le ho folisa batho ba kulang.” (Luka 9:1-6) Hamorao ha a le Judea, Jesu o ile “a khetha ba bang ba 70 a ba roma ka bobeli.” (Luka 9:51; 10:1) Kahoo, Jesu o ne a e-na le balateli ba buang ka molaetsa oa hae libakeng tse fapaneng.
Bajuda ba ileng ba fetoha barutuoa ba Jesu ba ne ba tla ’ne ba keteke mokete oa selemo le selemo oa Paseka mohlomong ba e-na le ba malapa a bona. (Ex. 12:6-11, 17-20) Ha nako ea hore Jesu a bolaoe e ntse e atamela, o ile a ea Jerusalema le baapostola ba hae. Empa ha aa ka a etsa mokete oa semetletsahali oa Paseka bakeng sa barutuoa ba hae ba tsoang Judea, Galilea le Perea. Ho hlakile hore Jesu o ne a batla ho ba le baapostola ba hae feela ketsahalong ena. O ile a re ho bona: “Esale ke emetse hore letsatsi lena le fihle e le hore ke je Paseka le lona pele ke hlokofatsoa.”—Luka 22:15.
Jesu o ne a e-na le lebaka le utloahalang la ho etsa joalo hobane o ne a le haufi le ho bolaoa e le “Konyana ea Molimo e tlosang sebe sa lefatše.” (Joh. 1:29) Sena se ne se tla etsahalla Jerusalema, moo Molimo a neng a etsetsoa mahlabelo teng ka nako e telele. Konyana ea Paseka e ne e hopotsa Baiseraele hore Jehova o ba ntšitse Egepeta, empa sehlabelo sa Jesu se ne se le bohlokoa ho feta moo hobane se ne se lokolla batho bohle bokhobeng ba sebe le lefu. (1 Bakor. 5:7, 8) Sehlabelo sa Jesu se ne se tla lumella baapostola ba 12 hore e be motheo oa phutheho ea Bokreste. (Baef. 2:20-22) Ntho e thahasellisang ke hore motse o halalelang Jerusalema o na le “majoe a motheo a 12” ao ho ’ona ho ngotsoeng “mabitso a baapostola ba 12 ba Konyana.” (Tšen. 21:10-14) Kahoo, baapostola ba tšepahalang ba ne ba e-na le karolo ea bohlokoa eo ba lokelang ho e bapala ho phethahatsa morero oa Molimo. Kahoo, hoa utloahala hore na ke hobane’ng ha Jesu a ne a batla ho ba le bona Pasekeng ea ho qetela le ketsahalong e neng e tl’o latela ka mor’a moo, e leng Lijo Tsa Shoalane Tsa Morena.
Barutuoa ba 70 le ba bang ba ne ba le sieo lijong tseo tsa shoalane. Ho ntse ho le joalo, barutuoa bohle ba tšepahalang ba ne ba tla rua molemo tokisetsong eo Jesu a e thehileng ea Lijo Tsa Shoalane Tsa Morena. Bohle bao qetellong e neng e tla ba Bakreste ba tlotsitsoeng ba ne ba tla kena selekaneng sa ’muso, seo Jesu a ileng a bua ka sona ho baapostola ba hae bosiung boo.—Luka 22:29, 30.